Ichedendik 35
35
Jekọb ọkpa nnạm k'Bẹtẹl
1Wa Ubinọkpaabyi obeni Jekọb bẹ́, “Vura tena kha Bẹtẹl, asi ibyirukhasẹ sọ ma, abạra asi ijabyi ma anạng Ubinọkpaabyi kw'uyini abọ k'okpe kw'uwa arạbhọ k'mbọhk s'nnwạkka, Ẹsau.”
2Ma wọ Jekọb obeni ẹchọhmfhạr chẹ, ọttạra anạng phyi-phyibh p'aning abẹ bẹ́, “Abạnga arengi akpatava pidede p'aning bạnga abẹ abhạrẹ, achok ifor sabạnga iwur-uwur, asi ẹmmaana ọkkachẹ. 3Ma wọ abạnga m'akwu amvura amfona k'Bẹtẹl, mạma wọ m'nsi ijabyi nnạng Ubinọkpaabyi kw'ọkkaan-m k'okpe kw'nning k'ọmmaphyaangẹ, kw'ọbạra uninga abamẹ k'ibyi sidede s'kk'nta.” 4Ma wọ abẹ atạk akpatava pidede py'abẹ akhaam, ọttạra akkra py'itọhng py'abẹ age, anạng Jekọb. Jekọb ọtạkha pyẹ ọnnọhnga k'ichirin ch'oak k'Shẹkẹm. 5Ma wọ abẹ abin osenga, ojora f'ididen f'Ubinọkpaabyi ọvạkha ifhon phyibh s'ibaanga bẹ tạrr ọnạng kw'ukhubhu iva Jekọb kòde.
6Jekọb ọttạra anạng pẹ phyibh akpir k'Luz, kw'ọbạra okpena Bẹtẹl, k'ẹkhạma ch'Kenaan. 7Ma wọ kw'Jekọb usi ijabyi, okpe sẹ Ẹl-Bẹtẹl, ukwuru bẹ́, ma wọ kw'uwa Ubinọkpaabyi usi ẹyaakha ch'ifor sẹ ọnạng-ẹ k'okpe kw'uwa ọrạbhọ k'nnwọkka Ẹsau.
8Wa Dẹbọra kw'ode ọrạrạkha kw'Rẹbẹka ope, abẹ annọhng-ẹ k'ichirin ch'oak ch'ining k'efhoncho ch'Bẹtẹl. Ma wọ abẹ ayeri ibyi nnọ Allọn-Bakut.
9Masẹ Jekọb ubin k'Padan-Aram ukwuna, Ubinọkpaabyi ọbạra uyin abẹ, udi-ẹ. 10Oben-ẹ bẹ́, “Ọma akpen Jekọb, okhenka, dạkhẹ Jekọb mákpena, n'akpena Israẹl.” Ma wọ Ubinọkpaabyi ukpuẹ-ẹ Israẹl.
11Ọvaar Ubinọkpaabyi ọbạra oben-ẹ bẹ́, “Amma wọ nde Ubinọkpaabyi kw'Ẹfa phyibh; fhon iva k'ọsaabh. Ẹkhạma, ọttạra ẹkhạma ch'nkhạma m'ibina ma ntaak sọ, avaar m'abạra abina k'iva piva pọ. 12Isisek nnọ s'uwa nnạngẹ Abraham ọttạra Isaak, ẹrọ m'nnạng-ọ, asẹma rọ M'mbạra ntte sẹ ọbọhk nnạng ofhon pfọ.” 13Masẹ Ubinọkpaabyi kk'idik nnọ ọkpaakha phyibh, ubina urik Jekọb ma, ofona.
14Ma wọ Jekọb ọtạk ẹta ofho ma ibyi nnọ s'Ubinọkpaabyi kk'idik ọkpaakha ọnạng-ẹ, usi ẹnạnga ebyengachẹ mạma, ọbạra ọtạkha ana obyenga ma ẹta njọ. 15Wa Jekọb oyeri ibyi nnọ s'Ubinọkpaabyi ọkpaakhẹ abẹ idik, Bẹtẹl.
Obo kw'Rachẹl ọttạra Isaak
16Wa abẹ abin osenga k'Bẹtẹl n'afona k'ẹkhạma Ẹphrat. Masẹ abẹ akpir k'ibyi rạne ma, ọmaan ọtạma Rachẹl k'ẹfa-k'ẹfa sisi. 17Masẹ kk'iyạkhọ ọtạkha kidaam-kidaam, ikwanạng kw'n'utikh-ẹ ọmaan oben-ẹ bẹ́, “Chok ettem tọhng khiri kk'ujunung amaana adạkhẹ.” 18Masẹ ọjẹ ikpongannạm-yọhng s'n'abạra ope, okpe nnwa kwẹ, Bẹn-Oni. Okhenka, otte Jekọb ukpuẹ-ẹ Bẹnjamin.
19Ma wọ Rachẹl ope, abẹ annọng-ẹ k'eden ch'eten k'Ẹphrat, kw'ode Bẹtẹlẹhẹm. 20Jekọb ọtạkha ẹta ofho k'epekwur ch'Rachẹl. Tạrr ukpira maa, ẹta njọ ede ẹkhọhkha ch'epekwur ch'Rachẹl.
21Jekọb, kw'n'okpen Israẹl ofon ororo k'osenga kwẹ, ọbạra usi ibyirukhasẹ sẹ k'ukhubha kw'Migdal-Eder. 22Masẹ Israẹl urukhu ma ẹkhạma njọ, wa Reubẹn ọnwa kha ọta uyima Bilha, kw'ode oyok kw'otte abẹ. Wa Israẹl ọbhaang udik ngwọ.
Wa Jekọb ofhonu ajunungva jobh-kamfa.
23Ajunungva p'Lea ade:
Reubẹn kw'ode ocheden-nwa kw'Jekọb,
ọttạra Simeọn, ọttạra Lẹvi, ọttạra Juda, ọttạra Isaka, ọttạra Zẹbulun.
24Iva p'Rachẹl ade:
Josẹph, ọttạra Bẹnjamin.
25Iva p'Bilha kw'ode ọtọhmnạng kw'Rachẹl, ade:
Dan ọttạra Naphtali.
26Iva p'Zilpa, kw'ode ọtọhmnạng kw'Lea ade:
Gad ọttạra Asha.
Ma wọ ode ajunungva p'uwa Jekọb ofhonu k'Padan-Aram.
27Wa Jekọb ọkpa nnạm otor otte Isaak kha Mamrẹ, kw'ọbaang Kiriyat-Arba (kw'abẹ abạra ayeri Hẹbrọn), k'ibyi s'uwa Abraham ọttạra Isaak kk'arukha bạra. 28Phyi-phyibh wa Isaak urukhu icho arạbh sọwạnọ. 29Ma wọ wa Isaak ope k'atạm otor anạng pẹ p'kk'apua. Ẹsau ọttạra Jekọb p'ade iva pẹ annọhng-ẹ.
Iliyochaguliwa sasa
Ichedendik 35: mfn-x-os
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©️2025 West Africa Christian Mission