युहन्ना 1
1
जीबनज़ बचन
1डोङ्क बचन लेव, बचन परमेस्वरसं लेव, होसोनो बचन परमेस्वर लेव। 2ओल डोङ्क परमेस्वरसं लेव।
3स्यान्टै बस्त परमेस्वरये ओलज़ उसिर्जोयो होसोनो ओल उसिर्जोयोकाम कडि बस्त पनि ओबाठङ मासिर्जिये। 4ओल्स जीबन लेव, होकाम नो जीबन मीराई याज्योती लेव। 5नो ज्योती अन्ड्यारोलं चम्किये, होकाम अन्ड्यारो नोसं माझ्याङडुये।
6परमेस्वरङाम परि:ङसिव टोबो मी लेव, नोलो उमिन युहन्ना लेव।
7नोये मीरंलाई नो उज्यालोलो ओबारेलं गोहाई यानेलो लागिटं ओराव, कडालेकं स्यान्टै मीराई नोलो ओसोर ठैडे बिस्वास गोडोरंकं। 8हो ओलज़ नो ज्योती माङ्क बुरु नो ज्योतीलो गोहाई याने ओराव।
9स्यान्टै मीरंलाई उज्यालो याने सत्य ज्योती प्रिठीबीलं रारिज़्या। 10नो प्रिठीबीलंज़ लेव, प्रिठीबी नो लेवङामज़ उसिर्जिव, हैटानि पनि प्रिठीबीये नोलाई मासरेवये। 11नो ओआफ्ना मीरं लेवकंज़ ओराव, होटानि पनि उमीराई ओललाई ग्रहन माडोरंये। 12होकाम जोराई येसुलाई ग्रहन डाडे ओल उमिन्ट बिस्वास याडोरं, नोरंलाई होये परमेस्वरलो ओसन्तान टाने अढिकार ओयोवरं। 13नोरं न झीङाम, न क्याङलो इछ्याङाम, होसोनो न कोइ मीलो उइछ्याङाम जर्मीव टारंये बुरु नोरंके परमेस्वरङाम जर्मीवरं टारंये।
14होकाम बचन क्याङ टाडे डया सोनो सत्यये ब्यालडे गेखार्ल बास ओडोव। गे येसुलो ओमहिमा गेरो:ङो, नो महिमा बाबुङाम रा:व टोबोयाज़ ओज़ालो स्याव लेव।
15युहन्नाये येसुलो ओबारेलं गोहाई यावग्यान डाडे कस्सिडे कि:डे हैओडोवरं, “येसु नो मीज़, जोलो ओबारेलं ङा हैङावारो, ‘ङा भन्डा छिन्डे राने ङा भन्डा पनि घ्योव ले, कडालेकं नो ङा भन्डा ङाडेकामज़ लेव’।” 16नो लेवङामटा पुरा डयाये गे टोबो डया तर्ट छुटं डया डैडेगेनै। 17कडालेकं न्याम मोसाङाम यासिव लेव, हैनि पनि डया सोनो सत्यके येसु ख्रीस्टङाम ओराव। 18परमेस्वरलाई काङ्कायेज़ खर्कज़ यारो:ङो माले। बाबुसं लिज़्याव टोबो याज़ ज़ाये परमेस्वरलाई सटन्डे नोयो।
बप्तिस्मा याने युहन्नालो ओसोर
मत्ती ३:१-१२; मर्कुस १:१-८; लुका ३:१-१८
19यरुसलेमला यहुडी अढिकारीराई सेवा डोने मीरं सोनो लेबीरंलाई नो लेवकं “नङ काङ्का?” वार्डे पजोयो यापरि:ङोरं, होकाम युहन्नालो ओगोहाई ऐटाव लेव। 20नोये होरंलाई जबाफ योने ओभनो ङाम्यो मावार्ये, “ङा ख्रीस्ट माङ्कची ओवारो।”
21होकाम नो राव मीराई युहन्नालाई यापजोयो, “होकाम नङ काङ्का? नङ एलिया रो?”
नोये हैओवारो “ङा माङ्कची।”
“होकाम नङ अगमबक्ता रो?”
नोये जबाफ ओयोवरं, “माङ्कची।”
22नोराई नोलाई हैयाडोव, “नङ काङ्का गेलाई हैगडासिके, गेलाई परि:ङनेरंलाई गे जबाफ याव गिढुकं। नङ नबारेलं नङ कैनंवार?”
23नोये हैओवारो यसैया अगमबक्ताये हैओवारो मान्टि, “घ्योव प्रभुलो ओयेम तयार झैच्यो” वार्डे जङ्गललं कि:ने ङा टोबो मीलो ओगा ची।
24नोरं फरिसीराई यापरि:ङो सोर रैने मीरं लेवरं। 25होकाम नोराई नोलाई यापजोयो “नङ ख्रीस्ट पनि माङ्क, एलिया पनि माङ्क, नो अगमबक्ता पनि माङ्क याटाखे भने कडाने बप्तिस्मा नयोज़्यावरं?”
26युहन्नाये नोरंलाई हैओडोवरं, “ङाके रि:ये बप्तिस्मा ङायोरं, बुरु जेखार्ल टोबो च्याङसिव लिज़्या, नोलाई जे जेमसरेये। 27ङा भन्डा रा:ने नोज़। नोलो ओपनैलो ओटस्मा पलाने हाडङ्का पनि ङा ङाम्ले।”
28आव रो: यर्डन भै होपंटं बेठानियालं ओटाव, नलं युहन्नाये बप्तिस्मा ओयोज़्यावरं।
परमेस्वरलो ओमार
29ओपराटि युहन्नाये येसुलाई ओललेवडे ओराज़्याव र:ङडे हैओवारो, “र:ङच्यो प्रिठीबीला पापलाम छुटैडे लाङने परमेस्वरलो ओमार! 30नो होज़, जोलो ओबारेलं ङा हैङावारो, ‘ङा भन्डा टोबो मी रानेले, नो ङा भन्डा घ्योव ले, कडालेकं नो ङा भन्डा ङाडेकामज़ लेव।’ 31नो काङ्का ङा नोलाई ङासरेव मालेव, बुरु नोलाई इस्राएलला मीराई गसरेरंकं वार्डेज़ रि:लो बप्तिस्मा याये-याये ङाराव।” 32युहन्नाये ऐवार्डे गोहाई ओयोव, “ङा चोखो आत्मालाई परिवा स्यानाव स्वर्गटाम झरिडे राडे येसुलो ओतर्ट उचुङो ङारो:ङो। 33ङा नोलाई ङासरेव माले, बुरु जोये ङालाई रि:ये बप्तिस्मा योरं वार्डे उपरि:ङसोङो, होयेज़ ङालाई हैओडाङो, ‘जोलो ओतर्ट चोखो आत्मालाई नङ झरिडे चुङोग्यान ओडोज़्याव र:ङनेनले, चोखो आत्माये बप्तिस्मा याने नोज़।’ 34ङा ङारो:ङोले, होसोनो गोहाई ङायोवले, परमेस्वरलो ओज़ा नोज़।”
येसुलो ङाडेका उसिसरं
35फरि ओपराटि युहन्ना उसिसरंकाम नेम्लोसं च्याङसिडे उलिज़्याकं। 36नोये येसुलाई ओनाज़्याव र:ङडे हैओवारो, “र:ङच्यो परमेस्वरलो ओमार!” 37नोये ऐओवार्ज़्याव ठैडे नो नेम्लो उसिसनि येसुलो उझिन्ट नेनाव।
38येसुये वोल्डे ओरो:ङो, होकाम नोनिलाई उझिन-उझिन नेराज़्याव र:ङडे नोनिलाई ओपजोयोनि, “जिन कडि जिखिमज़्याव?”
नोनि येसुलाई हैनेडोव, “रब्बी (आवलो ओमाने, गुरबा), नङ काङ नलिज़्याव?”
39येसुये नोनिलाई हैओडोवनि, “गराचिनके, होकाम जिन र:ङने जेले।” नोनि नेनाव होकाम येसु ओबासिज़्याव पो नेरो:ङो। नोनि नो छ्याम येसुसंज़ नेबासिव, कडालेकं ठोकै चार बजिडे उलिज़्याव।
40युहन्नाये हैओवार्ज़्याव रो: ठैने सोनो येसुलो उझिन-उझिन बाने नो नेबऱ्याङनिकाम टोबो सिमोन पत्रुसलो ओभाइ अन्ड्रियास लेव। 41होकाम नो ङा:डे ओडाज्यु सिमोनसं नेडैसिव, होकाम होलाई हैओडोव “गिन मसिहलाई (नोलो ओमाने ख्रीस्ट) गेडोयो।” 42नोये सिमोनलाई येसु लेवकं ओरोयो।
येसुये नोलाई ओरो:ङो होकाम हैओडोव, “नङ युहन्नालो ओज़ा सिमोनज़, नङलाई केफास (नोलो ओमाने, पहर) डासिनेनंले।”
येसुये फिलिप सोनो नठानेललाई उखुलोनि
43नोलो ओपराटि येसुये गालीललं नाने युङ ओडोव। होकाम फिलिपसं डैसिडे येसुये नोलाई हैओडोव, “ङाछिन्ट गराचिनके।”
44अन्ड्रियास सोनो पत्रुस मान्टि फिलिप पनि बेठसेडा गाउँलाज़ लेव। 45फिलिपये नठानेलसं डैसिडे हैओडोव, “नोलो ओबारेलं मोसाये न्यामटं सोनो अगमबक्ताराई पनि सर्डे यानैज़्याव, हो नो योसेफलो ओज़ा नासरतला येसुलाई गे गेडोयो।”
46नठानेलये नोलाई हैओडोव, “कडा नासरतलाम पनि चाव रो: राव ढुव डोरो?”
फिलिपये नोलाई जबाफ ओयोव, “राडे गर:ङरिके।”
47येसुये नठानेललाई ओललेवडे ओराज़्याव र:ङडे नोलो ओबारेलं हैओवारो, “टोबो पक्का इस्राएलीलाई र:ङच्यो, नोलो उयुङलं कडि छल कपट माले।”
48नठानेलये ओपजोयो, “नङ ङालाई कैजैडे नसरेसोङो?”
येसुये नोलाई जबाफ याडे हैओडोव, “फिलिपये नङलाई उखुल्सनज़्याव भन्डा ङा:डे, डीलो उसिङ खङलं ङा नङलाई ङार:ङसोनो।”
49नठानेलये येसुलाई हैओडोव, “रब्बी, नङ परमेस्वरलो ओज़ाज़ नलेवलेव, नङ इस्राएलला राजा नलेवलेव।”
50येसुये नोलाई जबाफ याडे ऐओडोव “ङा नङलाई डीलो उसिङ खङलं ङार:ङसोनो ङावारोयेज़ नङ बिस्वास नडोव? नङ आव भन्डा अजं घ्योव रो:रं र:ङनेनले।”
51होकाम येसुये नोरंलाई हैओडोवरं, “डस्साज़ ङा जेलाई हैङाडाच्यो, जे स्वर्ग ओफैसिज़्याव सोनो परमेस्वरलो ओकटंवालरंलाई स्वर्गडे यानाज़्याव सोनो मानवालो ओज़ा लेवटं याराज़्याव र:ङनेजेले।”
Iliyochaguliwa sasa
युहन्ना 1: NTWMK25
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
