Matiós 28
28
Yésuse udibánd uguá gibɛ́l
1Egélém gá giíndía giá bayúdɛn, na giamádá giá buɔ́sɛ buá busió buá gɛnyɛ, na Malía wa Magdala na Malía omodi abɛ́d agá gibɛ́l. 2Hɔ́nɔhɔ́, guísi ugúéyiŋkimid na bugaga, gilúna giá Ɔgúná igíonoólín ugunɔn igíákɛl agá gibɛ́l, igíédíŋílídie nidányɛ agá buáyɛ igíédugumin uguá niɛ́. 3Gímabíyigánɛ́n hana balányá, bisɔn biég bíbunya hana ndɛf. 4Nsénsi isímagígá gibɛ́l isíɔ́b bugádɔ, isíɛ́d gá lígímin isíósiond hana bilɔ́ŋ. 5Gilúna igíɔ́yidɛn bagándɔ gɔg áneé: «Banuá bómodi nudibiá bugádɔ, yaálinsan áneé nuáguamba Yésuse uyɔɔ́ bɔ́ndɔ́n uguá nuag. 6Udibánd agá, gá giagiá waáhám uguá gibɛ́l haná úmɔnúɔ́yɔ́n, ógúnónón nuasián hɔɔ́m ɔhɔɔ́ waábá bidimina. 7Idánánɔ gɔg gunsáns nuɔnɔyídɛ́n bebinene bég áneé: “waáhám uguá gibɛ́l, gúu weébué guɛ́d gánɔ Galilé, hɔ́ nugánaánɔ́ yɔ́.” Búbugányɛ mmɔ́núɔ́yídɛ́n.» 8Bagándɔ abagányɛ ebédúmbie guólígie agá gibɛ́l, na bugádɔ na giandá giá ibal, abɛ́d na ɔdɛ́d gá guɔyidɛn bebinene nsɔ́m. 9Hɔ́nɔhɔ́, Yésuse uwosigólíe bɔ́ úmuanyɛ gɔ́b áneé: «Mménúbígélídíe.» Abákilɛn yɔ́ ɔbɔ́bɔmbigɔnɛn yɔ́ dudúg, ebégimbin yɔ́ uguá dugɔ́nd gá hínenye yɔ́. 10Yésuse uwɔyidɛn bɔ́ gɔg áneé: «Nudibiá bugádɔ, idánánɔ nuɔnɔyídɛ́n beliméen bámɛ áneé bógódi áneé bɛ́d Galilé hɔ́ bágaŋánánɔ́.» 11Bámaábándá uguá ŋŋil, gidám giá nsénsi giá begíg igíɛ́d agá tísɔna gá guídɔ́nɔyídɛ́n bedúmbinusámb abagɔ́n buand ubúmabídúmban. 12Bedúmbinusámb abagɔ́n abagányɛ ebébídidid na bɔgɔ́ga gá idɔg, abáhám ugelu gá guéŋin nsénsi isigányɛ giod giá ŋŋúme, 13na silen bɔ́ áneé: «Nuɔyɛd áneé: “Búnyɛ bebinene bég bɔ́ bósóguólésíéb gilɔ́ŋ giég na budúg basuá gá dunɔ́.” 14Búméneg uguá idú siá ŋŋɔ́mɔna, basua digalinsanɔ́ hana digagálgalaá neéneg, diond dial áneé nudibiá meyú.» 15Nsénsi isíɔ́gɔ́l ŋŋúme, isíál hana bɔ́mɔyídɛ́n siɛ́, gúu ŋŋɔyida yɔ́b igányɛ ímésegídínyé uguá idú siá bayudɛ́n guesieg na behínen.
Umaáhám uguá gibɛ́l umádɔ́m bebinene bég gá busɔ́m
16Gá bebinene bá báad nomue gɔg, abɛ́d Galilé agá ɔŋuɛnyɛ uhuɔ́ Yésuse úmɔyídɛ́n bɔ́ áneé bɛ́d hɔ́. 17Bámaámáan yɔ́ ɔbɔ́bɔmbigɔnɛn yɔ́ dudúg gá búlúgenye yɔ́, ta anagányɛ bómodi bágan mpálɔ. 18Yésuse uwakilɛn bɔ́, úmuanyɛ gɔ́b áneé: «Bámampuá buŋaŋa gidigid, ta ubúnya uguísi, ta ubúnya ugumɔn. 19Idánánɔ gɔg uguá egéndu ya guísi gidigid, nuéyenye bandɔ bebinene bámɛ, nuyumenye bɔ́ uguá ɔhɛ́n huá Síe na Muɔ́n na Gileénde giá Budányɛ. 20Nuond nuhuínyihuínye bɔ́ gubídígan bigodi biámɛ ibiɛ́ mménúhuínyihuínyé. Mmába hana gámɛ gɔg, nnyɛ naánanɔ mɔɔ́sɛ gidigid gueneg uguá nsúgúdinye ya binɛŋ gidigid.»
Iliyochaguliwa sasa
Matiós 28: EKM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
