Mateyo 16
16
Abafalise bafwaya ikishibilo
(Mako8.11-13; Luka12.54-56)
1Abafalise na Basaduke bambi baishile kuli Yesu mu kumwesha. Balimwebele ati akitepo ikishibilo kimo ikyakufuma kwiulu. 2Nomba Yesu alibasukile ati, “Ulo akasuba kali mukuwa, mulebati ‘Umwela ukoba bwino apo iulu lilikashikile.’ 3Na pa makya mulasosa ati, ‘Imfula ikoloka apo kyafutika ne ulu lyakashika no kutiinya.’ Mulishibile ukwilula pa fyo iulu likoboneka, nomba tamwilula no kwishiba shino nshita. 4Abantu bankulo ino babubi kabili tabeshibile Lesa. Bakofwaya ikishibilo nomba tabaka kibone kano fye kishibilo kyakwa Yona.” Epakubasha aya.
Ikitutumushi kya Bafalise na Basaduke
(Mako8.14-21)
5Ulo bayabukile bushilya bwa bemba, balilabile ukusendapo mukate. 6Elo Yesu alibebele ati, “Mule kukengela no kuibaka ku kitutumushi kya Bafalise na Basaduke.”
7Elo balitampile ukwambaula ati, “Ikyo alandile fi nikyo tatulipo ne mikate?”
8Yesu alishibile ifyo bali kulanda naye epakubepusha ati, “Nindo muko ambaula ati tamukwetepo imikate? Mwe ba kiteketelo kinini! 9Bushe tamulati kwiluka. Tamwibwishe ulo na pesawile imikate isano pa bantu amakana yasano? Miseke inga mwaiswishe? 10Kabili na pa mikate kine lubali pa bantu amakana yane napo miseke inga mwaiswishe? 11Mwafilwa shani ukwiluka ati nebo ntakolanda palwa mikate? Kengeleni fye ku kitutumushi kya Bafalise na Basaduke.”
12Elo abasambi bailukile ati takolanda pa kitutumushi ikibomfeshiwa mu mikate. Akolanda pa masambilisho ya Bafalise na Basaduke.
Petelo ashimbula ati Yesu ni Klistu
(Mako8.27-30; Luka9.18-21)
13Yesu pa kufika mu nkende umwabela umusumba wa Kasalia Filipi, eko aipwishe abasambi bakwe ati, “Bushe abantu bebati Umwana wa muntu ni nani?”
14Elo bamwasukile ati, “Bambi balebati ni Yowane kabatisha. Bambi nabo balebati ni Eliya elo bambi nabo balebati ni Yelemia na bambi balebati ni umo wa muli bakasesema.”
15Naye Yesu epakubepusha ati, “Nga mwebo mwebati ni nebo nani?”
16Elo Simoni Petelo alimwasukile ati, “Ni webo Klistu, Umwana wakwa Lesa wa mweo.”
17Yesu alimwasukile ati, “Ulishukile Simoni mwana Yona! Apo iki kishinka tekyakufuma ku buntunse, kyakufuma fye kuli Tata wa mwiulu. 18Ekyo na kwebati, ni webo Petelo, kabili pa kilibwe ki epo nkakulila ulukuta lwangi, na maka yamfwa#16.18 (amaka yamfwa,) mu kigiliki baleta ati Hades tayali na kulwansha. 19Nkakupeela ne mfungulo sha Bufumu bwa mwiulu, pakwebati kyonse ukabinda pesonde, kikesa kubindwa mwiulu, nekyo ukasuminisha pesonde ninshi na kwiulu kika suminishiwa.”
20Elo Yesu alyebekeshe abasambi bakwe ati be ebako muntu nangu umo ati e Klistu.
Yesu asobela amakyushi ne mfwa yakwe
(Mako8.31—9.1; Luka9.22-27)
21Ukufumapo, Yesu alitampile ukulanda ku basambi bakwe pabwelu ati, “Nkoya ku kyula mu Yelusalemu kuli bakilolo, banshimapepo bakindami na bakafundisha bamafunde. Ndi no kwipaiwa nomba ulo pakapitapo inshiku shitatu, nkesa kushikuka.”
22Petelo alisendele Yesu pa mbali atampa ukumukalipila ati, “Tefyo Shikulu, teti kibe fyo!” 23Yesu epa kupilibukila kuli Petelo no kumweba ati, “Fumapa Satana! Ulikipunwisho munshila yangi, apo amatontonkanyo yobe teyakufuma kuli Lesa, ya buntunse fye.”
24Yesu alyebele abasambi bakwe ati, “Onse uukofwaya ukunkonka naikanye, asende no lupanda lwakwe elo ankonke. 25Pantu onse uufwaya ukupususha umweo wakwe akaulofya, nomba uwalufya umweo wakwe pali nebo akaunonka. 26Bushe umuntu kuti kyamwafwa indo umfwa anonka ifya pesonde fyonse, elo nomba alofya umweo wakwe? Nangula pengabapo kintu angapeela pa kukabushamo mweo wakwe? 27Umwana wa Muntu ali pepi pepi no kwisa mu bukindami bwakwa wishi na bamalaika bakwe mukulambula onse ukulingana nefyo abombele. 28Nkomyeba ikyakine, bambi pali mwebo tabali na kufwa mpaka bakabone Umwana wa Muntu akoisa mu Bufumu bwakwe.”
Iliyochaguliwa sasa
Mateyo 16: ABT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word For The World International
