Mateyo 15
15
Intambi shafikolwe
(Mako7.1-13)
1Ulo Abafalise na Bakafundisha bamafunde bambi bafumine ku Yelusalemu ne kipusho kya kwebati, 2“Nindo abasambi bobe batakonkela ntambi shafikolwe fyesu? Pantu tabasamba ku mimwe pa kulya nge fyo kilingilile ukuba.”
3Yesu naye alibasukile ati, “Nindo na mwebo mupepwila ikipope kyakwa Lesa pa mulandu fye wa ntambi shenu? 4Apo ni Lesa umwine ewaebele ati, ‘Ulekukindika wiso na noko kabili uwatipa wishi nangula nyina alingilile ukwipaiwa.’ 5Nomba mwebo mufunda bantu ati, uyo onse weba wishi nangula nyina ati pa fintu ningilile ukumipeelapo pa kumyafwako, ‘ni mfipeela kuli Lesa,’ ninshi takonkele ikyebo kyakwafwa wishi nangula nyina. 6Tabali na kukindika ba wishibo na ba nyinabo. Ekyo tamukonka ifunde lyakwa Lesa pantu mwalilemyapo intambi shenu. 7Mwe babumbimunda mwe! Kasesema Isaya ali lungikile ulo aseseme palwa mwebo ati:
8“Aba bantu bankindika fye pa tunwa,
nomba imitima yabo yali taluka kuli nebo.
9Banshinshimuna apafye
na mafunde yabo ya buntunse.”
Ifikowesha umuntu
(Mako7.14-23)
10Ulo Yesu akuutile ibumba lya bantu alibebele ati, “Kutikeni no kwiluka. 11Ifingila mu kanwa ka muntu teti fimulenge ukukowela, kano ifyakufumamo.”
12Elo abasambi balishile kuli Yesu no kumweba ati, “Bushe tamwishibile ati Abafalise balifulilwe pakumfwa ifyo mwakisosa?”
13Yesu epakubasuka ati, “Tata wa mwiulu akatupula ikimuti kyonse ikyo talimbikile. 14Ikyo ki misakamika! Aba ni ba ntungulushi mpofu, elo impofu nga yatungulula impofu inakwe, bonse kuti baya kuponena mu kilindi.”
15Petelo alilandile ati, “Tulondolweleni pali uyu mulumbe mwalanda.”
16Yesu alibasukile ati, “Bushe na mwebo tamulati kwiluka? 17Tamwishibile ati, kyonse ikingila mu kanwa kipulila mu mala elo kyafuma mu mubili. 18Nomba ififuma mu kanwa fifuma mu mutima efilenga ukukowela. 19Pantu ni mu mutima emufuma amotontonkanyo yabubi, ukwipaya, ubukende, ubulalelale ubun'go, ubufi no kulandila bambi ifyabubi. 20Ifi fyonse filenga umuntu uku kowela. Nomba ukulya ukwakubulo kusamba ku minwe tekuti kulenge umuntu ukukowela.”
Ikiteketelo kya mwanakashi umwina Kenani
(Mako7.24-30)
21Elo Yesu pakufuma apo, epakuya mu kyalo kya Turi na Sidoni. 22Umwanakashi umwina kenani umwikashi wa muli ilya nkende alishile kuli Yesu, akopunda ati, “We Shikulu mwana Davidi, unangulukileko! Umwana wangi kisotwe alikwete kibanda kabili kilamukyusha bubi bubi.”
23Nomba Yesu talandilepo kintu. Elo abasambi balimupapatile ati, “Mutamfyeni pantu akotupanga fye ikyongo pa kutukonka!”
24Naye Yesu alyasukile ati, “Nalituminwe fye kubena Islaeli, imbelele shakuluba.”
25Nomba ulya mwanakashi, epakwisa kufukama pa nkasa shakwa Yesu no kumwebati, “We Shikulu ungafweko!” 26Yesu naye alimwasukile ati, “Takilingile ukusenda ikyakulya kya bana no ku kipoosa ku mbwa.” Umwanakashi naye alimwasukile ati,
27“Efyeke fyo mukwai, nomba ne mbwa nasho shilatolelela amapande ya kopona kwi tebulo lyakwa shikulubo.” 28Yesu alimwasukile ati, “We mwanakashi webo, ikiteketelo kyobe kilikulile! Ekyo ukopokelela ikyo ukofwaya.” Pekapo, umwana wakwe alipolele.
Yesu aposha abengi
29Yesu pa kufuma alile mu mukulo wa Bemba wa Galile. Aninine pa mbali ya lupili no kuya kwikalapo. 30Abantu abakuti ubwingi balishilepo ukuleta abakulemana amolu, impofu, abali kusunkuta, bakibulu, na bengi abali kulwala, epakubapalamika pa makasa yakwa Yesu naye alibaposeshe bonse. 31Abantu kyalibapapwishe pa ku bona bakibuulu bakolanda, abali kusunkuta bakoenda fye bwino, abakulemana bakoenda elo na bampofu bakobona, epakulumbanya Lesa wakwa Islaeli.
Yesu aliisha abantu amakana yane
(Mako8.1-10)
32Yesu akuutile abasambi bakwe no kubebati, “Nkolangulukilako aba bantu apo twaliba nabo kuno pa nshiku shitatu ukwakubula ifyakulya. Pantu nga mbaleke baye kwabo, bakofwa ulushile munshila.”
33Abasambi epakwipusha Yesu ati, “Muno tuli ni mukiswebebe, nganipi tungaya kufisanga ifyakulya fyakulisha ibumba lya ku kulefi?”
34Yesu alibepwishe ati, “Ngale mikate inga mukwetepo?” Nabo epakumwasuka ati, “Tulipo fye ne mikate kine lubali no tusabi tubili.”
35Yesu naye aebele bumba lya bantu ukwikalako panshi. 36Kabili alibulile ne mikate kine lubali ne sabi no kutasha Lesa, ukuipesaula, no kuipeela ku basambi bakwe, nabo epakwabanyako abantu. 37Bonse abalile bali kutile fyashala napo. Elo abasambi balisendelepo imiseke kine lubali iya tumokolwa twashelepo. 38Impendwa ya baume balileko bali amakana yane ukwakubula ukupendelako abanakashi na baike.
39Panuma apalanganya ibumba lya bantu, Yesu alipateme mu bwange no kuya mu nkende ya Magadani.
Iliyochaguliwa sasa
Mateyo 15: ABT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Word For The World International
