Luke 6

Te fesiri ki te Aso e tapu

(Mat 12.1–8; Mak 2.23–28)

1Jesus ne saere ia roto maara witi i te Aso e tapu. Na kau fanonga ku fakatafito o faki koa fatu kai witi, ma e limi ki aratou rima o kai. 2Rake Pharisee ne feesiri atu, “Sea na atamai ko kotou e fai koa nea, ia tatou fono e munakina ko tatou ka see fai faka peenaa i te Aso e tapu?”

3Tongoi atu rei ko Jesus kia ratou, “Ea, kotou se ne tau pe nia ma David ne fai i te vasia koia ma ana taangata ne fiakai iei? 4Koia ne poi ki te paito o Tupua o sau koa preti kavaaki ki Tupua, o kai ea koia ma ne sori fokia ki tana faoa. Ka moa arei e sara ia tatou fono siei pe koai ke kai iei, kae ko nga pure fai kava fuarei e kkai kia preti nei.”

5Tera faka suku suku rei ko Jesus, “Te Tama a Tangata e nai Ariki tia ko te Aso e tapu.”

Te tangata na rima e mate

(Mat 12.9–14; Mak 3.1–6)

6I take Aso e tapu, Jesus ne poi ki te paito taanaki o fakaako. Te tangata i rota paito na rima matau e mate. 7Rake fakaako oa Fono ma nga Pharisee e fifia ke ratou faka tautara sia ko Jesus, tera koratou e pula kiei, pe koia ka faka maroro ko tangata nei i te Aso e tapu. 8Kae ko Jesus ku nai iroa ina ko aratou maanatu, koia ne muna atu ki tangata na rima e mate, “Tuu ki runga o au ki mua nei.” Koia ne tuu ake ki runga ku tuu rei iei. 9Tera ko Jesus ne muna atu kia ratou, “Kuou ka fesiri atu kia kotou, a nia ma tatou fono e masara mai kia tatou ke fai i te Aso e tapu? Ke sosoa pe ke fai pariki? Ke faka sao ko te ora o tangata, pe ke fai pariki ki aatea?” 10Koia ne ono saere kia ratou kaatoa, tera muna atu rei ki tangata, “Fora ki tua ko tou rima.” Koia ne fai tautari, laoi arei fokia na rima.

11Koratou ku maatea rei ratou teke, tera tafito arei o fai taranga maso koratou pe nia ma ratou ke fai kia Jesus.

Jesus e faka patino na kau fai fekau e tino angafuru ma rua

(Mat 10.1–4; Mak 3.13–19)

12I te vasiaa, Jesus ne poi ki fongo maunga o rotu, tera ne nofo rei i te poo katoa o rotu ki Tupua. 13Vasia i pongi pongi, koia ne karanga ki na kau fanonga ke oomai kia koia, ke faka patino te tino angafuru ma rua mai a koratou, ne faka ingoa ea koia na kau fai fekau:

14Simon, na ingoa fokia ne ati e Jesus ko Peter,

ma na taina ko Andrew,

James ma John,

Philip ma Bartholomew,

15Matthew ma Thomas,

James te tama a Alphaeus,

ma Simon (ku faka ingoa te Patriot),

16Judas te tama a James,

ma Judas Iscariot, koia ka nai soria ko Jesus.

Jesus e fakaako ma e faka maroro

(Mat 4.23–25)

17Vasia ko Jesus ne fena ifo ki raro mai fongo maunga ma na kau fai fekau, koia ne tuu ki te toko toko laoi ranga ma na kau fanonga lasi. E maatea te kapi o te kano fenua ku fare i kuraa e oomai ia ngangea kaatoa mai Judea, mai Jerusalem, mai ia noforanga lasi i vaevae tai o Tyre ma Sidon. 18Koratou ne oomai ke fakarongo kiei ma ke faka maroro koratou mai ia ratou fakarongo neaisu. Kae rake faoa ia koratou e urufia ina e nga atua pariki fokia ne oomai, ma ku sau kesea ki tua ma ku faka maroro ria. 19Te kano fenua kaatoa e fai ke poo kiei, natafito na manuu ku au ki tua, ku nai faka maroro ria koratou kaatoa rei.

Te vaki vaki ma te fakaruru faka arofa

(Mat 5.1–12)

20Jesus ne pula ki na kau fanonga ma ne muna atu,

“Fakatapu ria ko kotou e faka arofa;

te Kainanga o Tupua otou!

21Fakatapu ria kotou e fia kai i vasia nei,

kotou ka faangai ina!

Fakatapu ria kotou e ttangi i vasia nei,

kotou ka kata!

22 # 1 Pet 4.14. “Fakatapu ria ko kotou ia vasia nga taangata e teke atu kia kotou, ma see ratou fifia kina kotou, ma e mmuna faka pariki kia kotou ma e ngutu atua atu kia kotou natafito kotou a faoa te Tama a Tangata! 23#Act 7.52.Vaki vaki tonu i te vasia ka fai iei, kae mako ma te mata mau, natafito totou matuaa sori e naa i te vaerangi. Ne fai fokia e ratou puna koa nea sokotasi ki nga ʻprophetʼ.

24Ka e fakaruru faka arofa maatea rei kia kotou e taufenua i vasia nei,

otou ora noko faingaofia.

25E fakaruru faka arofa maatea rei kia kotou e maakona ia vasia nei,

kotou ka oro faka naa mangumangu!

E fakaruru faka arofa

maatea rei kia kotou e kakata ia vasia nei,

kotou ka arofa ma ka ttangi!

26“E fakaruru faka arofa maatea rei kia kotou i vasia nga taangata kaatoa e mmuna tara kia kotou, teenaa te fai fai aratou puna ne fai ki nga ʻprophetʼ tataangutu.

Fakapere ki fenua e firi atu

(Mat 5.38–48; 7.12a)

27“Kuou ka faka ari atu kia kotou koai ma e fakarongo kia kuou: Fakapere ki te faoa e firi atu kia kotou, fai faka laoi kia ratou koai ma e fai teke atu rei kia kotou; 28fakatapu ria koratou e tautuku kia kotou. Rotu kia ratou koai ma e fai pariki kia kotou. 29Kae pe koai e nai pakia tou faasi karafau, tuku atu take tou faasi karafau fokia. Kae pe koai e nai saua ria ko tou suru tino, tuku take tou suru tino fokia ke sau ea koia. 30Sori kia ratou e kaisi atu pe nia, ma pe koai e sau pe nia ma au i ou kope kopenga, kau see muna kiei ke fokisaki mai. 31#Mat 7.12.Fai fokia faka peeraa ki rake faoa, pe ko kee fokia e fifia kia koratou ke fai mai kia kee.

32“Kae kotou e fakapere fuarei ki faoa e ratou fakaperea ina ko kotou, sea arei na kau kotou ke kotou saua ina ko te fakatapu? Kae faoa titisara e fakapere faka peeraa fokia ki faoa e fakapere kia ratou! 33Ma tera kotou e laoi tasi fuarei kia ratou e laoi atu kia kotou, sea rei na kau kotou ke kotou saua ina ko te fakatapu? Kae faoa titisara e fai faka peeraa fokia! 34Ma tera kotou e tuku, o sori tasi fuarei ki faoa kotou e maanatu ka siaki mai, sea rei na kau kotou ke kotou saua ina ko te fakatapu? Kae faoa titisara e sori fokia ki faoa titisara! 35Siei! Fakapere ki te faoa e tau firi firi ko kotou ma fai faka laoi kia ratou. Sori ka see maanatu ke siaki mai. Otou sori laoi sapa ka sori atu, tera kotou ka fai a tama a te Tupua Maurunga Sapa. Natafito koia e laoi ki te faoa seke paanaki ma faoa tukunga pariki. 36Manava arofa pe totou Mmana e manava arofa.

Faka tautara sia rake faoa

(Mat 7.1–5)

37“Kau see faka tautara ki rake faoa, tera Tupua ka se nai faka tautara sia kotou. Kau see muna makeke ki rake faoa, Tupua fokia ka see muna makeke ki kotou. Fakangaro koa sara a rake nea, ma Tupua ka nai faka ngaromia ina otou sara. 38Sori ki rake faoa, ma Tupua ka soria atu kia kotou. E tonu rei, totou fakataunga ka sapa rei, ka soria atu ki otou rafi rima a nea kaatoa ka kotou faia. Te fakataunga e fai ea kotou ki rake faoa, ka faia atu e Tupua kia kotou fokia.”

39 # Mat 15.14. Tera ko Jesus ne araara faki kia ratou ko te araara fanga faka tautau nei, “Te tangata mata sengi ka se nai takina riaina ko take tangata mata sengi, kae pe koia ke fai, koraua kaatoa ka fetau feetoki ki te rua. 40#Mat 10.24,25; Jon 13.16; 15.20.Siei ni tama riki riki ke sapa ma ratou fakaako, kae nga tamariki katoa ka fai pe te ratou fakaako i vasia koratou ku faka oti ko ratou ako ranga.

41“Sea rei na atamai ko kee e fai pula rei kia titi e naa i te mata o tou taina, kae si see fai mua ko kee ke ono kia penu penu e naa i tou kee mata ia?! 42Kae e ma fai faka fefea rei ko kee ke muna atu ki tou taina, ‘Sea rei, taina ee, tuku mai ke sau kese ki tua ko te titi i tou mata,’ kae ko kee ia ku see kee ravea ina koa penu penu i tou kee mata ia?! Ko kee te tangata taataa laoi! Sau mua ki tua te penu penu i tou kee mata ia, tera, ko kee ku kee ravea ina laoi, ta sau kese raa ko te titi i te mata o tou taina.

Te raakau ma ana fua

(Mat 7.16–20; 12.33–35)

43“Te raakau ora laoi ka si see fua pariki ma te raakau ora pariki ka si see fua laoi. 44#Mat 12.33.Nga raakau kaatoa e iroa ina mai ia ratou fua raakau e fua ifo. Ko kee ka see ffaki koa fuei ʻfigʼ mai ia raakau suki suki, pe faka maopo mai koa ʻgrapeʼ mai i te uruvao. 45#Mat 12.34.Te tangata laoi e nai aumai ina ki tua koa nea laoi mai i na fatu manava laoi, kae te tangata pariki e nai aumai ina koa nea pariki mai i na fatu manava pariki. Natafito te tangata e nai munakina pe nia e pii i na fatu manava.

A tufunga taa paito toka rua

(Mat 7.24–27)

46“Sea te atamai ko kotou e fai o karanga kia kuou, ‘Te Ariki ee, te Ariki ee,’ kae ko kotou si see fai pe nia ma aku e faka ari atu kia kotou?! 47Pe koai e au kia kuou, ma e fakarongo kia aku taranga, ma e tautari kiei, kuou ka faka ari atu kia kotou pe koia e fai faka fefea. 48Koia e fai pe te tangata e taa ko na paito. Koia ne foto ki raro ko te mato o faka takoto ko te faka mau ranga o na paito. Te vai saria ne tafe ifo kiei, si se ne nai ruuvia ina ko na paito, natafito ne taa ki te mato e faka mau kiei. 49Kae te tangata koia ne fakarongo kia aku taranga, kae si se ne tautari kiei, e fai pe te tangata ne taa ko na paito ki te kere si se ne fai ko se futi ke faka mau kiei. Vasia te vai saria ne tafe ifo kiei, turekina arei ko paito nei ki raro, ma e maatea rei te fai pariki ne fai!”

Iliyochaguliwa sasa

Luke 6: TKP

Kuonyesha

Shirikisha

Nakili