Mateus 21
21
Bwirangori Hesus Yerusalem
(Markus 11.1-11; Lukas 19.28-40; Yohanes 12.12-19)
1Ifiri na Hesus ma marahara lei tabwer lada haleparaho Yerusalem nga la toho ma Betfage ra idelaye duhuri Olibet. Hesus eda hataliletiwo liyemaru marahara lei tabwer 2nga e haüül bwa: “Haubwe bwitiwo räni wotawotara e taraetoho ma imowami hauda weli demarü donkey ra e yawo nga e mire na raur idelaye iiye. Hauda woutu na yawoil hauda hädilatahe iyoloi. 3Nga sahü nga e wol re e titirongarihami nihataingehiri na hau faaülü, hauda haüya bwa, ‘Tamoru e laweri horiil’, nga ifiri mena sahü nga e rau e hatabwe ngarihami bwa haubwe hädiil.”
4E faülüyehi merer bwa ebwe nnah bwa tödü-mo profeta e dölü bwa: 5“Haüya wotawotari Sion: ho habaühü bwa yaamu king ra e bwitoho iyolomu! E hatahitarow tipar eda tahetahe donkey nga e tahetahe happari donkey.”
6Marahara lei tabwer lada bwitiwo lada faaülü-mo e haüül. 7Lada häditahe donkey ma mena raur iyolor, lada falahirini tahe üffael uwawori maruhara, nga Hesus eda maatotahe uwawor. 8Towuri yalemat lada falahirinitiwo üffael niyar nga palüül la dopi laari siriheti lada iterinitiwo niyar. 9Marahara la fatare imowar ma marahara la fatare imwilir lada kabwat nga la dölü bwa, “Yataheya Rauri Dabid! Dios e hafaiyemauye yalematara e bwitoho nga e hädi iiteri Tamoru! Yatahe ebwe raho ifiri Dios!”
10Ifiri na Hesus eda bwirango Yerusalem nga urutael sawori Yerusalem lada hawiyewiye fatare nga la hadiya bwa, “Itöü merer?”
11Marahara la pülüya lada dölü bwa, “Iyer na profeta Hesus ra e bwitoho ma Nasaret ra e mire Kalilea.”
Hesus e Bwirango Räni Templo
(Markus 11.15-19; Lukas 19.45-48; Yohanes 2.13-22)
12Hesus eda bwirango räni Templo eda harewayelawau sawori siobai ma marahara la parüyeri faülümire ma räni Templo. E hasapaniraho tebwar hara yael marahara lei haduweni mane ma räniyeri maatoil marahara la hori parüyeri hiyoope, 13nga eda haüül bwa, “E farüüyehi räni Farüförü Liya bwa Dios e dölü bwa, ‘Yai Templo ra ebwe iitar iimweri uwolongolong.’ Nga hami hauda faülü bwa räniyael lei pilaf!”
14Marahara e tabu matael ma marahara e mangüs hubwael hale pauul lada bwirango iyolor räni Templo eda hasüya hamatahiil. 15Marahara tamorul paderei ma marahara tanahori Farau lada dong ifiri na la käkäne marahara halülüdü ra e faülüüni, nga riweisi lada kabwat ma räni Templo nga la dölü bwa, “Hau yataheya Rauri Dabid!” 16Lada haüya Hesus bwa, “Ho longolong na la dölü?”
Hesus eda haüül bwa, “I longolongo. E tösü wola-mo na haubwe habaühü na e farüüyehi räni Farüförü Liya? ‘Hau kaüül riweisi ma röüsörü bwa labwe faaülü na hatödüri yatahe.’ ”
17Hesus eda rihitil eda süya ma räni wotawotara eda raho Betania eda mire irang bwongina.
Hesus e Hafaiyebwiteliye Sirihetira iitar Fig
(Markus 11.12-14, 20-24)
18Ifiri na Hesus eda wehitafaari räni wotawot nimatariyeni waradur nga e ddung, 19eda käkäne siriheti ra fig ra e ddü uwawori ngaseri yaar, eda paraho irang nga e tawol uwaar bwa hara saür sahü, eda haüya sirihetira bwa, “E tawau süya dewa bwa ebwe para wol uwamu!” Ifiri mena sahü nga eda bwatabwataraho sirihetira.
20La lüdüyanaho dewa marahara lei tabwer ifiri na la käkäne. Lada hadiya bwa, “Meta e faülü sirihetir eda matangatang dewa yaar bwatabwataraho?”
21Hesus eda haüül bwa, “Ibwe hau dewahami bwa nga sahü nga e wol yami hatödü nga hau tei fangiyengi, ira nga e süya bwa haubwe faülü-mo i faülüngeri sirihetir. E tei merera sahü na e süya bwa haubwe faülü, bwa eda par süya bwa haubwe haüya duhur bwa, ‘Düütahe ma ihar hoda buwou maatotiwo nimatawa,’ nga e tabweya na hau dölü. 22Nga sahü nga hau hatödüya bwa Dios ebwe harihemi marahara hau tingalo ifiri yami sipesipe, ira nga haubwe hädini marahara hau tingalo.”
Haddiye Nihataingehiri Ppouri Hesus
(Markus 11.27-33; Lukas 20.1-8)
23Ifiri na Hesus eda wehitafaari räni Templo eda kaüül yalemat, nga marahara tamorul paderei ma marahara tarapari yalemat lada raho iyolor lada haüya bwa, “Meta ppoumu hoda faülüüni marahar? Itöü e hariho ppou bwa hobwe faülüüni marahar?”
24Hesus e parüyeri ramael eda dölü bwa, “Ibwe hadiyahami dewo raam; nga sahü nga e süye bwa haubwe parüyeri, ira nga ida hauhemi meta ppoui ida faülüüni marahar. 25E bwito ma iiya ppouri Yohanes eda hatütüül yalemat: Dios hale yalemat?”
Lada hangingi fängääni lada dölü bwa, “Meta dibwe dölü? Nga sahü nga di parüyeri dida dölü bwa, ‘E bwitoho ma ifiri Dios’, nga iiye erau dölü bwa, ‘Nga meta sapir hauda tai hatödüya Yohanes?’ 26Nga sahü nga dida dölü bwa, ‘E bwitoho ma ifiri yalemat,’ nga dida fangiyengi hale meta na yalemat larau faülü bwa urutael yalemat la hatödüya bwa Yohanes demarü profeta.”
27Lada haüya Hesus bwa, “Hai tahüra.”
Hesus eda haüül bwa, “Ira ngaangu-mo nga i tawai hauhemi hale e bwitoho ma iya ppoui ida faülüüni marahar.”
Haweweil Liyemaru Bwidibwidi
28“Meta yami mangimengi? E wol demarü mwaare ra raur liyemaru riweisi mwaare. Mwana eda raho ifiri ira e rap eda haüya bwa, ‘Rai, laneiya nga hobwe bwitahe hoda fitehi räni na maatai maatari bino.’ 29Eda dölü ira raur bwa, ‘I tamasari bwitahe,’ nga dari na werimwiliri mena nga eda lubaraho ifiri-mo e faülü eda bwitahe. 30Mena tamael eda raho ifiri ra e waisi eda par haüya sahü titirowe e haüya mwaarewe e rap. Ira e waisi eda dölü bwa, ‘Üngö, ibwe bwitahe,’ nga dari na e tai bwitahe. 31Itöü ma uworuul marahar na e faülü na tamael e haüül?”
Lada parüyeri na ramar lada dölü bwa, “Ira e rap.”
Hesus eda haüül bwa, “Ibwe hau dewahami bwa marahara lei ikkeri tax ma faifire hara la hori parüyeri podüül ra labwe uhorango uwawori Farüyeri Dios ma imowami. 32Bwa Yohanes ra Lei Hatütü e bwitoho bwa ebwe hannaha hatödüri yara mahora haubwe tauhu, nga hami hau tei hatödüya, nga marahara lei ikkeri tax ma faifire hara la hori parüyeri podüül la hatödüya. Hau käkäne na e faülüyehi nga e tai duweri-mo tipemi bwa haubwe hatödüye.”
Fiyangori Lei Fitehiri Räni Maatari Bino
(Markus 12.1-12; Lukas 20.9-19)
33Hesus eda par haüül bwa, “Hau hadutering par dew hawewe. E wol demarü yalematara e fato bino räni na maatar, eda rutuw tahuniya na maatara nga e kkeri räniyeri wonguwonguri bino, nga e haddüyatahe iimweri matarahi. Eda hariil palüül yalemat mena maatar bwa labwe hori, iiye eda süya eda raho wori para dewo farüye. 34Ifiri na eda yatori hini uwari bino, nga yalemata-we maatar mena eda hatalilaraho palüül lei yaar haküröü iyoloil marahawe la mire räni na maatar, bwa labwe hädi ra hataingehir ma ifiri bino hara la hiridini. 35Marahara la mire räni na maatar lada dubuliil marahara lei yaar haküröü lada wautu demarü nga la riimadeya demarü nga la hatingiye demarü. 36Mwana eda par hatalilaraho par palüül lei yaar haküröü, nga la pipiya ma imowael iyahawe la uhoraho, marahara la mire räni na maatar lada par faülüngerila-mo la faülüngeriil marahawe la uhoraho. 37Haühühür dewa nga eda hatalaraho ira raur iyoloil nga e dölü bwa, ‘Ibwe hatalaraho iiye rai bwa labwe tawahiyehiri.’ 38Ifiri na marahara la mire räni na maatar lada käkäne na raur, lada dölü fängääni bwa, ‘Iyer na Rauri mwaarewe maatar merer. Hau bwitoho bwa dibwe riiya dida hädi hapitehir bwa yas.’ 39Lada dubuli mwana raurou lada peitawau maürühüri na mataar lada riiya.”
40Hesus eda hadiyael bwa, “Meta na yalematara maatar mena ebwe faülüngeriil ifiri na ebwe bwito?”
41Lada haüya bwa, “Erau riil marahara la faaülü na e tammaü eda hädi ra maat eda hariil palüül yalemat bwa ebwe süya bwa labwe hariya ra taliyar ma irang ifiri na labwe hiri uwari bino.”
42Hesus eda haüül bwa, “Hau tösü habaühü-mo hale meta na e dölü Farüförü Liya?
‘Fadura marahara lei fitehi la peitaraho bwa e tawol nifaar
na eda nnahawau bwa e tarapar dewa nifaar.
Tamoru re e faülü eba ebwe haitina;
e hamatahütöhü dewa mahori yas habaühü!’”
43Hesus eda par dölü bwa, “Ibwe hauhemi bwa Farüyeri Dios ra labwe häditengi hemi lada hariil iyahara la faaülü na Dios e masariya.” 44[Marahara labwe ppüngü wori fadura ra labwe mahararaho nga ira ebwe püngütiwo fadura uwawor ra ebwe pwiriraho.]
45Marahara tamorul paderei ma marahara Farisi ra la hadutering yaari Hesus fiyango nga la hüra bwa Hesus e tapael, 46lada laweri na labwe karabuseya. Nga dari na la matahü bwa yalematahara la ttowu ihira, la hatödüya bwa Hesus demarü profeta demarü profeta.
Iliyochaguliwa sasa
Mateus 21: SOV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
(Active) © Wycliffe Bible Translators, Inc. All rights reserved.
