Mateus 20
20
Marahara Lei Fitehiri Räni Maatari Bino
1“Farüyeri weirengi ra e weya faülüri merer. E wol fadew ra demarü mwaare e uhori süya nimatariyeri bwa ebwe kupetiil palüül yalemat bwa labwe fitehi räni na maatar maatari bino. 2Mwana e ngütahe bwa ebwe parüyeri ngeriil döpöü mane ra silver bwa parüyeni yaar fitehi delari eda hatalilaraho marahara räni na maatar maatari bino bwa labwe fitehi. 3Eda par wehitafaari räni makit ifiri tiwouwa kloko eda par weliil palüül mwaare ra la ddü nga e tawol na la faaülü, 4eda haüül bwa, ‘Hami-mo nga haubwe raho hauda fitehi räni na maatai maatari bino, ida parüyeri ngerihemi na hataingehiri parüyeni yami fitehi!’ 5Lada raho. Eda par raho ifiri deih ma luwouwa kloko ma dörüwa kloko eda par faülü söhü-mo e uhori faaülü. 6Ifiri rimouwa kloko eda par wehitafaari burukawe, nga eda par weliil palüül mwaare ra la ddü eda hadiyael bwa, ‘Meta me hau fafaülü me uruteri delari yami ddü ihar nga e tawol me hau fitehiya?’ 7Lada parüyeri na ramar lada dölü bwa, ‘E tawol re e hädihamami bwa haibwe fitehi.’ Mwana eda haüül bwa, ‘Ira hauda raho räni na maatai maatari bino hauda fitehi.’
8“Ifiri na eda nifahafitoho nga mwana maatar mena eda haüya mwana tamoni yaar fitehi bwa ebwe fadöngüül marahara lei fitehi eda parüyeriil; ebwe hapurotahe ma iyoloil marahawe e haühühüri na e hafitehiil eda habwangibwengi ma iyoloil marahawe e matamowari na e hafitehiil. 9Marahara e mwetahe yael fitehi ifiri rimouwa kloko lada hädini yael mwanne, nga yaari demarü iil mwanne ra döpöü silver. 10Ifiri na eda hataingehiri na ebwe parüyeriil iyahawe e uhori hafitehiil, iil lada mangiya bwa ebwe tarapar yael mwanne, nga dari na e hafeiya sahü bwa la hadöpöü silver. 11La hädini marahara yael mwanne lada tapa tammaüya mwana e hafitehiil. 12Lada dölü bwa, ‘Har dew sikang yael fitehi maraha e hapurotahe yael fitehi ifiri rimouwa kloko, nga hamami we hai fitehi uruteri delari fari halahalari yaaro, nga yamami mwanne ra e hafeiya sahü!’
13“Mwana e hafitehiil eda haüya demarü marahara bwa, ‘Bwidi, hadutering. I tei hosowaho. Heera-mo nga ho ngütahe bwa hobwe fitehi uruteri delari ida hariho döpöüsilver bwa parüyeni yaamu fitehi. 14Hädi na yaamu mwanne hoda ra matariimwomu. I masari na ebwe hafeiya hohotiri mwanne ra i harihemi ma mwanne ra ibwe hariil maraha i haühühüri hafitehiil. 15Motipei na ibwe faülüngeri yai mwanne. Hau dongahiri na i moori?’ ”
16Hesus eda habwangi na ramar eda dölü bwa, “Marahara haühühü ra larau matamowa, nga iyahara matamowa ra larau haühühü.”
Hadörüweri Yaari Hesus Tapa Titiini Mader
(Markus 10.32-34; Lukas 18.31-34)
17Ifiri na Hesus e bipitahe Yerusalem eda hädi delayeil marahara deih ma liyemaru lei tabwer eda iilaraho sahü lada fatare, nga eda titirongariil. E haüül bwa, 18“Hau hadutering! His ra dibwe bwitahe Yerusalem, nga Rauri Yalemat erau bwirango räni paüül marahara tarapari paderei ma lei tanahori Farau. Labwe hataleyasir bwa labwe riiya. 19Lada hariil marahara e tai iil sawori Israel bwa labwe hada mariye nga la wautu lada siforungeri kurus; nga dari na dörülari werimwilir nga eda par fadatafaari.”
Yaari Ra Diredire Tingalo
(Markus 10.35-45)
20Faifina liiri Sebedi eda raho iyolori Hesus nga la wödüraho ma marahara liyemaru raur mwaare, eda bwalotiwo imowar eda tingalowa bwa ebwe tapangi.
21Hesus eda hadiya faifina bwa, “Meta na ho masariya?”
Faifina eda haüya bwa, “Hobwe hatabotabo ngari dewayai bwa mareha rai ma liyemaru ra demarü ebwe maato ifiri hurumalamu nga demarü ebwe maato ifiri hurusehirimu niyatora hobwe hädi yaamu rüürü bwa heer King.”
22Hesus eda haüül marahara ra rauri faifina bwa, “Hau tahüra meneiye na hau tingalo. Ebwe süya ngarihemi bwa haubwe uru ma räni kapari iram ra ibwe urumi?”
Mwaare hara lada dölü bwa, “E süya ngarihamami bwa haibwe urumi.”
23Hesus eda haüül bwa, “Üngö, haubwe uru ma räni na yai kap, nga dari na e tawol ppoui na ibwe tiwereya hale itöü ra ebwe maato ifiri hurumalai nga itöü ra ebwe maato ifiri hurusehiri. Räniye hara ra räniyael marahara Papai e tiwereiil.”
24Ifiri na marahara deihetiwo lei tabwer lada longolongo na la dölü, lada dongahiril marahara liyemaru lei bwidibwidi. 25Hesus eda fadöngü fängäniil ma urutael eda haüül bwa, “Hau hüra bwa tamorul marahara la tai hatödüya Dios ra e wol ppouul iyoloil yael sawo, nga marahara yael mataffa ra la hädi uruteri ppou. 26E tai mena na ebwe faülüyehi nipatami. Nga sahü nga e wol demarühami ra e masari na ebwe taitei, ira nga ebwe faaülü podür bwa iiye yami ma hau deih lei fitehi; 27ira nga e wol demarühami ra ebwe masari na ebwe matamat, ira nga ebwe faaülü podür bwa ebwe iiye na yami ma urutemi lei haküröü; 28eda weya Rauri Yalematara e tai bwitoho bwa ebwe yalemat labwe faülü yaar fitehi, bwa e fäli bwitoho bwa ebwe lei haküröü eda fangaraho fadar bwa ebwe pipiya yalemat na ebwe haruul.”
Hesus E Faülüül Liyemaru Lei Taburi Matael Bwa Labwe Käkäne Faülümire
(Markus 10.46-52; Lukas 18.35-43)
29E pipiya yalemat na la tabweya Hesus ma marahara lei tabwer ifiri na la süya ma Jeriko. 30Liyemaru yalematara e tabu matael ra la maato uwawori ngaseri yaar lada longolongo bwa Hesus e patoho, lada kabwat nga la dölü bwa, “Tamoru, Rauri Dabid, fahohamami!”
31Marahara la tabweya Hesus lada hammatahüül bwa labwe dauraho. Nga iil ra lada par hakalofa dewa ramael lada dölü bwa, “Rauri Dabid, fahohamami!”
32Hesus eda ddütafaari eda fadöngülaraho iyolor eda hadiyael bwa, “Meta na hau masari bwa ibwe faülüngeri hami?”
33Lada haüya bwa, “Latu, hai masari na hobwe faaülühamami bwa haibwe par käkäne faülümire!”
34Hesus eda fahoil eda hatangowa matael. Ifiri mena sahü nga lada käkäne faülümire lada tabweya.
Iliyochaguliwa sasa
Mateus 20: SOV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
(Active) © Wycliffe Bible Translators, Inc. All rights reserved.
