रोमियो 8
8
पवितर आतमा रै जरियै जीवन
1इण तरैह अबै जिकौ मसीह यीसु में है, उण ऊपर डंड री आग्या कोनीं।#8:1 कीं पुराणी हस्तलेखो मे यह भी लिखा हुआ मिलता है, “क्यूंकै वे सरीर रै अनुसार कोनीं बल्कि आतमा रै अनुसार चालै है।” 2क्यूंकै आतमा री व्यवस्था नै जिकौ यीसु मसीह में जीवन दैवै है, म्हनै पाप री व्यवस्था ऊं जिकौ मौत री तरफ ले जावै है, आजाद कर दियौ है। 3क्यूंकै जिकौ कांम व्यवस्था, सरीर रै कारण कमजोर होयनै नीं कर सकी, उणनै परमेसर कियो, यानि की अपणै ही बेटे नै पापमय सरीर रै रूप में, अर पाप रै बलिदान होणै रै लियै भेजनै सरीर में पाप ऊपर डंड री आग्या दी। 4इण वास्तै की व्यवस्था री विधि म्हौ में जिकौ सरीर रै अनुसार कोनीं बल्कि आतमा रै अनुसार चालै है, व्यवस्था री जरुते पूरी की जा सकै। 5क्यूंकै सारीरिक मिनख सरीर री बातां ऊपर मन लगावै है, पण आत्मिक मिनख आतमा री बातां ऊपर मन लगावै है।
6सरीर ऊपर मन लगाणौ तो मौत है, पण आतमा ऊपर मन लगाणौ जीवन अर सानति है। 7सरीर ऊपर मन लगाणौ तो परमेसर रै विरोध है, क्यूंकै नीं तो परमेसर री व्यवस्था रै अधीन है, अर नीं हो सकै है। 8अर जिकौ सारीरिक स्वभाव रै अनुसार जीवै है, वे परमेसर नै खुस नीं कर सकै।
9पण जद परमेसर री आतमा थां में वास करै है, तो थै सारीरिक दसा में कोनीं पण आत्मिक दसा में हो। जे किणी में मसीह री आतमा कोनीं तो वो मसीह रौ कोनीं। 10जे मसीह थां में है, तो देह पाप रै कारण मरण उपरात भी, आतमा धारमिकता रै कारण जीवित है। 11#1 कुरि 3:16जे वो आतमा जिणै यीसु मसीह नै मरयोड़ौ में ऊं जिलायौ हो, थौरे मांय वास करै है, तो वो परमेसर जिणै यीसु नै मरयोड़ौ में ऊं जिलायौ हो, थौरे नासवान सरीरो नै अपणी आतमा ऊं जिकौ थौरे मांय बसयोड़ी है, जिलावैला।
12इण वास्तै हे विसवासी भाइयो, म्हौ सरीर रा करजदार कोनीं, ताकी सरीर रै अनुसार जीए। 13क्यूंकै जे थै सरीर रै अनुसार जीओला तो मरोला, बल्कि थै आतमा रै जरियै सरीर रै व्यवहारों रौ अंत कर दो ला तो थै जी जाओला। 14इण वास्तै की जिता लोग परमेसर री आतमा रै चलाया चालै है, वोहीज परमेसर रा बेटा है। 15#गला 4:5–7#मरकु 14:36; गला 4:6क्यूंकै वो आतमा जिकौ थांनै मिळी है, थांनै वळै दास बणाणै या डराणै रै लियै कोनीं है, बल्कि आप लोगां नै गोद लियोड़े बेटौ बणाणै रै लियै है, जिण ऊं म्हौ “हे अब्बा, हे पिता,” कैह नै बुलाओ हो। 16परमेसर री आतमा आप ही म्हौरी आतमा रै साथै गवाई दैवै है, की म्हौ परमेसर री औळाद हो। 17अर औळाद है तो वारिस भी, बल्कि परमेसर रै वारिस अर मसीह रै संगी वारिस है। जद म्हौ उणरै साथै दुख उठाओ तो उणरै साथै महिमा भी मिळैला।
भविसय में परगट होवणवाळी महिमा
18क्यूंकै म्हैं समझूं हूं, की इण वगत रै दुख अर तकलीफ उण महिमा रै सांमै, जिकौ म्हौ माथै परगट होवण वाळी है, उणरै सांमै कीं कोनीं है। 19क्यूंकै सिस्टी घणी आसा भरी दिस्टी ऊं परमेसर री औळाद रौ परगट होणै रौ इन्तजार कर री है। 20क्यूंकै सिस्टी अपणी इछा ऊं कोनीं पण अधीन करणैवाळै री तरफ ऊं, फालतू रै अधीन इण आसा ऊं की है, 21की सिस्टी भी आप ही विनास रै गुलामी ऊं छुटकारो पायनै, परमेसर री संतान री महिमा री आजादी हासल करैला। 22क्यूंकै म्हौ जांणौ हो, की सगळी सिस्टी अबै तांई मांनौ जापे रै पीड़ा में चिलाय रीं है। 23#2 कुरि 5:2–4अर कैवल सिस्टी ही नीं म्हौ भी मांय ही मांय चिलाओ हो। म्हौ नै तो पवितर आतमा रौ पैला करपादान मिळ चुकौ है, बल्कि म्हौ परमेसर री संतान बणणै री अर अपणै सरीर री मुगति री बांट जोह रिया हो। 24आसा रै जरियै तो म्हौरौ उद्धार होयौ है। पण जिण चीज री आसा की जावै है, जद वो देखणै में आवै, तो पछै आसा कठै रही? क्यूंकै जिण चीज नै कोई देख रियौ है उणरी आसा कांई करैला? 25पण जिण चीज नै म्हौ नीं देखौ, जे उणरी आसा राखौ हो, तो धीरज ऊं उणरौ इन्तजार भी करौ हो।
26इण रीति ऊं परमेसर री आतमा भी म्हौरी कमजोरी में मदद करै है, क्यूंकै म्हौ नीं जांणौ, की पराथना कीण रीति ऊं करणी चाहीजै, पण परमेसर री आतमा आप ही ऐड़ी आहें भर भरणै जिकौ बयान ऊं बारै है, म्हौरै लियै विनती करै है। 27अर मन नै जांचनै वाळौ जांणै है, की आतमा री मनसा कांई है। क्यूंकै वो पवितर लोगां रै लियै परमेसर री इछा रै अनुसार विनती करै है।
28म्हौ जांणौ हो, की जिकौ लोग परमेसर ऊं परैम राखै है, अर जिणरी बुलाहट परमेसर री इछा रै अनुसार होई है, उणौरै लियै सगळी बातां मिळनै भलाई ही पैदा करै है। 29क्यूंकै जिणनै परमेसर पैला ऊं चुण लियौ हो उणनै पैला ऊं ठैरायौ भी है की उणरै बेटे रै स्वरूप में हो, ताकी वो घणै भाइयो में पैलौ बेटौ ठैरै। 30जिणौनै परमेसर पैला ऊं ठैराया, उणौनै बुलाया भी है। जिणौनै उणै बुलाया, उणौनै धरमी भी ठैराया है। अर जिणौनै धरमी ठैराया, उणौनै महिमा भी दी है।
परमेसर रौ परैम
31तो म्हौ इण बातां रै बारै में कांई कैवौ? जे परमेसर म्हौरी तरफ है, तो म्हौरौ विरोधी कुण हो सकै है? 32जिणै आपरै बेटे नै भी म्हौ सगळौ रै लियै मरण वास्तै दे दियौ, तो वो उणरै साथै म्हौ नै और सगळौ क्यूं नीं दैला? 33परमेसर रै चुणयोड़ौ ऊपर दोस कुण लगावैला? परमेसर ही है जिकौ उणौनै धरमी ठैराणवाळौ है। 34पछै कुण है जिकौ डंड री आग्या दैला? मसीह यीसु ही है जिकौ मरग्या बल्कि मुड़दो में ऊं जी भी उठया, अर परमेसर रै जीमणा पाड़ै विराजमान है, अर म्हौरै लियै पराथना करता रैवै है। 35कुण म्हौ नै मसीह रै परैम ऊं अलग करैला? कांई कलेस, संकट, सताव, अकाळ, नंगाई, जोखम या तरवार? 36ज्यूं पवितर सास्तर में लिख्योड़ौ है,
“थारै लियै म्हौ हरैक दिन मौत रौ सामनौ करौ हो,
म्हौ वध होवण वाळी लरड़ियां रै ज्यूं समझया गिया हो।”
37पण इण सगळी बातां में म्हौ उणरै जरियै जिणै म्हौरै ऊं परैम कियो है, जीत ऊं भी बढ़ नै है। 38क्यूंकै म्हैं पको जांणूं हूं, की न तो मौत, न जीवन, न सरगदूत, न परधानता, न इण वगत, न आवण वाळौ वगत, न सामरथ, 39न ऊंचाई, न गेराई अर न कोई और सिस्टी, म्हौ नै परमेसर रै परैम ऊं, जिकौ म्हौरै परभु मसीह यीसु में है, अलग कर सकै है।
Iliyochaguliwa sasa
रोमियो 8: RWR
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© NLCI CC BY-NC-ND 4.0
