Matayo 24

Yesu nakiongabe gengia Hekalo

(Maliko 13:1-2; Luka 21:5-6)

1Injo nalasi̱be, Yesu ahu̱wa ka Hekalo nali kayaki du̱mbi̱ bhaegi̱ ndibhaki nibhakimuyabe nibhakimuani̱sa nesi̱ bhʼali̱ki̱ Hekalo. 2Yesu nakigia bhiyo; “Ka mazima nikibhutolia eti ndabho ndio bhu̱zi̱bi̱o injo poni tolo ada kiduwa bhagengie. Toli̱ kalibe tali poni ndia ada ki̱ti̱ga gua dai̱si̱.”

3Yesu ndia abha nali̱kagi̱ ka gu̱si̱a ndia ali na mili ndia bhakigiagaku̱ Oli̱va, bhaegi̱ ndibhaki bhamuyabe ka nsobho nibhakimuolu̱li̱a bhiyo; “Okitolie, yoho akienikana dhi̱? Toli̱ andiki sazi̱bi̱li̱ai̱be ndia akiani̱sa bi̱ka ndiako na bwile sa mpelo?”

4Du̱mbi̱ Yesu naki̱bhu̱si̱ki̱aku̱ bhiyo; “Bhwegendi̱e toli̱ nkpa na moti̱ kalakibhudimaga. 5Bhakpa bi̱yabho bhaki̱bi̱ka ke i̱nami nibhakigia eti ‘Andimi Masiya,’#24:5 Masiya Masiya andiye mindia Mambombi̱ ambuwa zuna bhakpa. toli̱ bhaki̱bhu̱bhu̱li̱sa bi̱yabho. 6Toli̱ bhukuoka ndia agbei̱be bhulemo na makulu sa bhulemo bhukulukutiya. Kima sie injo ada kiteketa ndu̱lu̱ enikanai̱ no mpelo akibha ndia kadoi̱mbe. 7Nsi akilwana na nsi dai̱si̱ na kusali̱a alwane na kusali̱a ndietolo. Inja ada ki̱gu̱wa na bhali̱ngi̱na abhi̱nde kyalo bi̱yai̱. 8Yoho poni ndia aki̱ya enikanai̱ akibha bhia kisa ndia kateketa ndia nkali̱ mindia ali kaya bhokota.”

9“Du̱mbi̱ bhangi̱gu̱ ndibhanu̱ bhakibhugba toli̱ bhabhu̱pesi̱eku̱ eti bhabhueni̱se bhu̱su̱ toli̱ bhabhuole. Nsi poni akibhuyala nanga emi. 10Ka bwile injo, bhakpa bi̱yabho bhakidhuwa hi̱ki̱li̱za toli̱ bhakibhuleliana na yala bhadabho, 11bhanabbi̱ bhatua mbela bi̱yabho bhakienikana bhabhudimage bhakpa bi̱yabho. 12Toli̱ nanga kola kibi kamadha, bhakpa bhakakitodha kunda bhadabho, 13no minjo mindia aki̱li̱ka ka mazima doi̱sa ka dhakililia, Mambombi̱ akinzuna. 14Toli̱ Makulu Mabhonga yoho ndia agbei̱be kusali̱a ndia Mambombi̱ bhakitebeza ka nsi poni bhia bwakai̱so ka bhakpa bhoponi du̱mbi̱ ka bwile injo mpelo ada kibha nadoi̱.”

Bwile sa mpelo

(Maliko 13:14-23; Luka 21:20-24)

15Bhukutangia bhihali̱yo ndia akidhua bhakpa nibhakidhua sabilia ka Hekalo ndia nabbi̱ Dhaneli̱ aongabe. Yoho ada kienikiliana ka kikalo mawelikana (odhuwe mindia akisoma yoho, akenge.) 16“Du̱mbi̱ bhenjo ndibha bhali ka kyalo ndia ka Yu̱deya bhakitetilia ka gu̱si̱a. 17Nkpa poni mindia ali gua ndabho ndiaki kalaki̱si̱ma gwabhi̱mba, godhaki ka ndabho bhuwaku̱ kima poni. 18Kalakibhabe nkpa poni mindia ali ka ti̱ko si̱ki̱aki ka i̱nji̱ bhuwaku̱ gandula ndia adhu̱ku̱. 19Bhakali̱ bhamakalimi na bhakali̱ ndibha bhali kalu̱ngi̱sa bhada kiena bhu̱su̱ ka bwile injo! 20Bhunsabe Mambombi̱ eti bhukulu ku̱bi̱ka tetia ka bwile sa dekaga sa kyalo kedha ka Sabbato. 21Ena bhu̱su̱ yoho kada kikinganana na ndia ala enikani̱o tukilia kindia nsi atandika doi̱sa lelu, toli̱ bhakpa bhakada kitodha ena bhu̱su̱ bhinjo.

22“Ambe Mambombi̱ ndia kangbu̱eli̱sa tolo sa ena bhu̱su̱ injo, kalibe mindia abhi̱ kilama, no nanga bhakpa ndibha Mambombi̱ abhubhuwa, aki̱ngbu̱eli̱sa tolo injo. 23Ka bwile injo nkpa poni kakugia bhiyo; ‘Ozi̱be, Masiya mendi̱ye’ kedha ‘Mi̱sendi̱ye,’ bhu̱ku̱lu̱ku̱hi̱ki̱li̱za. 24Bhamasiya bhatua mbela na bhanabbi̱ bhatua mbela bhakienikana toli̱ bhakole sazi̱bi̱li̱ai̱be sa mani̱ ndia akitina nki̱li̱ kabha natokekani̱ bhabhudimage na bhakpa ndibha Mambombi̱ abhu̱bhoi̱yo. 25Bhuniokiane bhiani, ni̱bhu̱toli̱ kima yoho bwile si̱ ndia kadoi̱mbe.”

26“Nkpa kakugia eti, ‘Masiya mi̱sendi̱ye ke lungu,’ koloku̱hu̱wa, kedha ‘Mendi̱ye ka kisika,’ koloku̱hi̱ki̱li̱za. 27Nesi̱ kubha akitukiliaga kindia mani aki̱hu̱eli̱aga bhakitangiaga na kindia mani aki̱gu̱waga, toli̱ akibha bhinjo na bi̱ka ndia Mi̱ki̱ mindia Nkpa. 28Kindia ki̱nda aliyo, menjo bhasamba bhakiekumesaga kau̱.

Si̱ki̱a ndia Mi̱ki̱ mindia Nkpa

(Maliko 13:24-27; Luka 21:25-28)

29“Menjo bwile sa ena bhu̱su̱ nalasi̱be,

‘ki̱li̱mi̱ki̱aga ada kihati̱a mani,

na sungi kada ki̱beni̱sa kyalo,

bhatanga-tanga bhada ki̱mu̱ga tukabho gulu.

Toli̱ kima poni ndia ali na mani̱ gulu ada kidhinga.’#Isaya 13:10; 34:4

30“Du̱mbi̱ sazi̱bi̱li̱ai̱be ndia Mi̱ki̱ mindia Nkpa akienikana gulu. Toli̱ bhakpa bhoponi ndibha ka nsi bhada kigama si̱ni̱ bhakantangia Mi̱ki̱ mindia Nkpa kabi̱ki̱li̱aki ka kuba nali na mani̱ na ngu̱ko si̱ni̱.#Dhaneli̱ 7:13-14 31Toli̱ ada kibhutika bhamalai̱ka ndibhaki suwa di̱yo ndia ali na laso manyeta toli̱ bhakibhukumesa bhakpa ndibha Mambombi̱ abhu̱bhoi̱yo ka nsi poni.

32“Bhuegilie ka nsi̱mo sa mili sa mu̱ti̱ni̱, kpata si̱ katandika bombai̱, na pasi̱-pasi̱ si̱ kabi̱kabe, bhu̱ku̱i̱baga eti bwile sa mani ali bi̱ya. 33Bhukutangia kima yoho poni nakienikana, bhu̱ku̱i̱ba nesi̱ Mi̱ki̱ mindia Nkpa ali bi̱ya bi̱kaki, toli̱ ali ka mpu̱me. 34Ka mazima nikibhutolia eti muzo ndia sebhali̱si̱yo kakisweka poni, kima yoho poni ndia kaenikani̱mbe. 35Tolo moti̱, nsi na gulu ada ki̱si̱yabe, no kigambo ndiamo kada ki̱si̱yabe.”

Kalibe mindia ai̱bi̱ tolo na saha

(Maliko 13:32-37; Luka 17:26-30, 34-36)

36Du̱mbi̱ Yesu nakigia bhiyo; “Kalibe mindia ai̱bi̱ tolo na saha ndia kima yoho poni ada kienikana, no Abasu̱ yekaka ai̱bi̱ ndiye. Bhamalai̱ka ndibha bhali gulu na Mi̱ki̱ mindia Mambombi̱ #24:36 Bbai̱bbu̱li̱ ndietolo kali na kedha Mi̱ki̱.bhakai̱bi̱.” 37Bi̱ka ndia Mi̱ki̱ mindia Nkpa akibha bhia ndia aenikana ka bwile ndia Nuwa. 38Ka tolo li̱bho ndia katu̱mi̱mbe, bhakpa bhabhi̱ kiliagaga na nu̱wa, bhaluku bhabhuama bhakali̱ na bhakali̱ bhabhuamana bhaluku, doi̱sa tolo ndia Nuwa adhai̱li̱aku̱ meli̱. 39Toli̱ yabhakai̱bi̱ ndia aki̱ya enikanai̱ doi̱sa li̱bho ndia atu̱ma naki̱bhu̱sendi̱sa bhoponi. Ada kibha bhinjo ka bi̱ka ndia Mi̱ki̱ mindia Nkpa. 40Ka bwile injo ada kibha bhiyo; bhakpa bhebhali bhada kibha nibhali ka kola ka ti̱ko, Mambombi̱ ada ki̱mu̱i̱sa moti̱ no anduwe mindietolo mbu̱sa. 41Bhakali̱ bhebhali bhakibha nibhali kadula ka ki̱li̱ngi̱ moti̱,#24:41 kadula ka ki̱li̱ngi̱ moti̱ Bbai̱bbu̱li̱ ndietolo ali na sia ka lubengo. Mambombi̱ aki̱mu̱i̱sa moti̱ toli̱ anduwe mindietolo.

42Ti̱-no bhwegendi̱e, nanga bhu̱ku̱i̱bi̱ tolo ndia Sali̱a mindianu̱ ada ki̱bi̱ki̱li̱aku̱. 43Ti̱-no bhukenge yoho eti, nkuma ndabho ambe ndia abha nai̱bi̱ saha ndia nsuma ndia aki̱bi̱ki̱li̱aku̱ ki̱li̱ya, abhi̱ kibhundilia ndabho ndiaki toli̱ nsuma kabhi̱ ki̱bhu̱na. 44Na bhenu̱ bhuli nali̱ka nibhuetekani̱zi̱, nanga Mi̱ki̱ mindia Nkpa aki̱bi̱ka ka saha ndio bhukukumunihiliaku̱.

45“Andi ani̱ nkoli̱ mindia bhamuesi̱gi̱o toli̱ ntua magezi̱ mindia nkumaki ambi̱si̱be bha nkuma bhakoli̱ ndibhetolo ka i̱nji̱ ndiaki pesi̱agabho li̱eli̱ ka bwile ndia ai̱ki̱o? 46Akibhonga nkoli̱ miyo nkumaki kantakana nali ka kola kima yoho kasi̱ki̱a. 47Ka mazima nikibhutolia eti nkumaki akimpesi̱a kima ndiaki poni bhundiliai̱. 48No nkoli̱ miyo kabha nali mubi toli̱ agia bhiyo; ‘Nkumami kaki̱si̱kie endindi’ 49toli̱ atandika bhi̱ndaga bhakoli̱ daki, na liaga na nu̱wa na bhatami̱li̱, 50nkuma nkoli̱ minjo aki̱bi̱ka tolo moti̱ ndia kakimunihila na ka bwile ndia kai̱bi̱, 51nkoli̱ minjo bhakinfubilia toli̱ bhamu̱i̱se ka kikalo ndia bhangobhi̱a kindia ada kibha ngamu na kwebhabhu̱a ngaga.”

Iliyochaguliwa sasa

Matayo 24: KWAMBA

Kuonyesha

Shirikisha

Nakili