Matayo 23
23
Yesu nakibhuhabhula bhakpa kwegendi̱a ngeso ndia Bhafali̱sayo
(Maliko 12:38-39; Luka 11:43-46; 20:45-46)
1Du̱mbi̱ Yesu nakibhugia bi̱ya bhakpa na bhaegi̱ ndibhaki bhiyo; 2“Bhaegesi̱ sa kilagilo ndia Mambombi̱ ampesi̱a Musa na Bhafali̱sayo andibho ndibha bhagbokiliani̱ hindula kilagilo ndia Mambombi̱ ampesi̱a Musa. 3Ti̱-no bhwegendi̱e kola kima poni ndia bhakibhutolia. No bhukulukukola ndia bhakikolaga, nanga bhakakikolaga ndia bhakitebezaga. 4Bhakibhukpangbaga bhakpa ku̱mba nku̱mba mati̱edha, no bhaku̱mi̱ ndia bhakakabhi̱ i̱dhai̱ na kibhoko ndiabho.”
5“Kima poni ndia bhakikolaga, bhakikolaga andu̱lu̱ bhakpa bhabhu̱zi̱be. Bhakikolaga filakiteli̱si̱#23:5 filakiteli̱si̱ Abhi̱ bboki̱si̱ kindia yabhahandikaga nkala ndia ka Bbai̱bbu̱li̱, bhalola ka bhu̱su̱ na ka kibhoko ndiabho.ndiabho bhagbatikesa na muheko sa ngoye ndiabho azamba. 6Bhakikabhaga li̱kaga ka kikalo ndia namusa ka bhu̱geni̱ na ka mbata sa ngu̱ko si̱ni̱ ka Ndabho kindia Bhayu̱daya yabhalami̱li̱aga. 7Bhakikabhaga bhabhumati̱se na ngu̱ko ka si̱mana na giabho eti Mwegesi̱.”
8“No bhakalakibhugiaku̱ ‘Mwegesi̱,’ nanga bhenu̱ poni bhukinganani̱a toli̱ bhuli na Mwegesi̱ moti̱, Yesu. 9Toli̱ bhukulukungia nkpa poni ka nsi eti aba nanga bhuli na Abanu̱ moti̱ mindia ali gulu. 10Kedha bhakada kibhugiaku̱ bhaegesi̱, nanga bhuli na mwegesi̱ moti̱, andiye Masiya. 11Ntua mani̱ si̱ni̱ kowanu̱ akibha nkoli̱ mindianu̱. 12Bhenjo ndibhe bhetangi̱ mani̱ bhakidhota, toli̱ bhenjo ndibha bhadhoti̱o bhakibha bhatua mani̱ si̱ni̱.”
Yesu nakibhuhabhula bhaegesi̱ sa Kilagilo na Bhafali̱sayo
(Maliko 12:40; Luka 11:39-42, 44, 52; 20:47)
13“Bhuda kutangia, Bhafali̱sayo na bhaegesi̱ sa Kilagilo ndia Mambombi̱ ampesi̱a Musa, bhangobhi̱a bhenu̱ nanga bhukubhudhakiliaga bhakpa ki̱ku̱ku̱ sa kusali̱a ndia gulu kei̱soabho. Na bhenu̱ bhaku̱mi̱ bhukukugodhagaku̱ toli̱ bhukudhuaga ndibha bhakikabhaga godhai̱ku̱, bhakagodhe.”
14“Bhuda kutangia, Bhafali̱sayo na bhaegesi̱ sa Kilagilo ndia Mambombi̱ ampesi̱a Musa, bhangobhi̱a bhenu̱ nanga bhukubhunyagagabe bhamaki̱ku̱si̱a ndabho ndiabho bhusaba nsala mazamba eti bhakpa bhabhu̱zi̱be. Ti̱-no bhakibhufubilia si̱ni̱.#23:14 Bbai̱bbu̱li̱ ndietolo kali na nkala yoho.
15“Bhuda kutangia, Bhafali̱sayo na bhaegesi̱ sa kilagilo ndia Mambombi̱ ampesi̱a Musa, bhenu̱ bhangobhi̱a. Bhukumamikanaga ka nsi poni toli̱ bhuzaba tu̱li̱ kakabha hindula nkpa moti̱, toli̱ bhukumuhindula nkpa minjo, bhukudhuaga abha nkpa sa makaki ka gehena kolianu̱ dou̱ bhali.”
16“Bhuda kutangia bhenu̱ bhai̱ki̱li̱ ndibho bhudhakanagi̱ i̱so! Bhukugiaga bhiyo; ‘Nkpa poni kalahilia ke i̱na Hekalo kali na nsonga, no nkpa poni kalahilia ke i̱na feza ndia ali ka Hekalo agbokiliani̱ yeli̱a ka ndia alahi̱li̱o.’ 17Bhenu̱ bhaki̱ngi̱ bhadhakanagi̱ i̱so, ndia ali na mugaso si̱ni̱ andiki, feza kedha Hekalo ndia akiwelikesaga feza injo? 18Bhukutodhaga bhugia bhiyo; ‘Nkpa poni kalahilia ke i̱na sa kindia bhaki̱su̱mbi̱li̱aga kibhembo kasobhi̱, no kalahilia ke i̱na sa kisembo sa kindia bhaki̱su̱mbi̱li̱aga kibhembo agbokiliani̱ yeli̱a ka ndia alahi̱li̱o.’ 19Bhenu̱ bhadhakani̱ i̱so, ndia akoli̱ mani̱ andiki, kisembo kedha kindia bhaki̱su̱mbi̱li̱aga kibhembo ndia akiwelikesaga kisembo? 20Ti̱-no, mindia akilahiliaga ke i̱na sa kindia bhaki̱su̱mbi̱li̱aga kibhembo, akibhaga nalahi̱li̱ ke i̱na kima poni ndia alibe. 21Mindia akilahiliaga atuwa Hekalo akibhaga natu̱ Hekalo toli̱ nantu̱ Mambombi̱ kei̱na mindia aki̱li̱kagaku̱. 22Toli̱ nkpa poni mindia akilahiliaga ke i̱na gulu akibhaga nalahi̱li̱ ke i̱na mbata sa kusali̱a ndia Mambombi̱ na mindia aki̱li̱ki̱dhi̱aga.”
23“Bhuda kutangia Bhafali̱sayo na bhaegesi̱ sa kilagilo ndia Mambombi̱ ampesi̱a Musa bhenu̱, bhangobhi̱a. Bhukupesi̱aga moti̱ ke komi̱ sa li̱eli̱ ndio bhu̱ku̱gu̱baga ka ti̱ko ndianu̱. No bhu̱dhu̱ yeli̱a ka egesa sa mani̱ sa kilagilo bhia bwinganiza, kobhu̱ na kwesigangana. Bhugbokiliani̱ kola yoho ndio bhu̱ku̱dhu̱ ndietolo. 24Bhenu̱ bhai̱ki̱li̱ bhadhakanagi̱ i̱so! Bhukusengejaga ndio bhu̱ku̱nu̱wa andu̱lu̱ bhukulu ku̱mu̱nu̱eliaku̱ sagi̱, no bhumumedha ngamiya.”
25“Bhuda kutangia bhenu̱ bhangobhi̱a, Bhafali̱sayo na bhaegesi̱ sa kilagilo ndia Musa. Bhuli bhia bhakpa ndibha bhakisukusaga kibhali̱ na bbaku̱li̱ gu̱li̱, no subhelei̱ nalia nahu̱ndi̱kani̱ku̱ ani̱sa nesi̱ bhuli na pau̱ na tima. 26Bhenu̱ Bhafali̱sayo bhadhakani̱ i̱so, bhutekete bhusukuse subha kibhali̱ na bbaku̱li̱, toli̱ na gu̱li̱ akibha nau̱ki̱.”
27“Bhuda kutangia bhenu̱ bhangobhi̱a, Bhafali̱sayo na bhaegesi̱ sa kilagilo nanga bhuli bhia bhutulo ndia ali bhia nku̱ku̱ ndia bhasiebhi̱ langi̱ mau̱ka ndia akidhuaga abhonga gu̱li̱ no subhelei̱ natu̱mi̱ku̱ nku̱we-nku̱we sa ki̱nda na kima mahola. 28Na bhenu̱ gu̱li̱ bhuli bhia bhakpa ndibha bhagbokiliani̱o kei̱soa bhakpa, no ka mulima ndianu̱ bhuli bhangobhi̱a na bhakoli̱ kibi.”
29“Bhuda kutangia bhenu̱ bhangobhi̱a, Bhafali̱sayo na bhaegesi̱ sa kilagilo ndia Mambombi̱ ampesi̱a Musa, bhangobhi̱a bhenu̱! Bhukualikaga bhutulo ka bhanabbi̱, toli̱ bhubhongi̱sa bhutulo ndia bhenjo ndibha bhagbokiliani̱o. 30Toli̱ bhukugiaga eti, ambe nikibha nikilibe ka tolo ndia bhatatasu̱, bhi̱ki̱bhi̱ kibha kowa bhenjo ndibha bhabhuola bhanabbi̱. 31Ti̱-no bhukupesi̱aga bwakai̱so nesi̱ andi bhenu̱ bhanana bhenjo ndibha bhabhuola bhanabbi̱. 32Bhu̱ye namusa, du̱mbi̱ bhudhakililie ndia bhatatanu̱ bhatandika.”
33“Bhenu̱ bhanjoka! Bhenu̱ bhani̱ki̱ ndibha bhanjoka bhudakulama bhoni̱ gehena? 34Ti̱-no nikibhutika kanu̱ bhanabbi̱ na bhaluku bhatua magezi̱ na bhaegesi̱. Bemoti̱ bhukubhuola toli̱ bhubhubambe ka musalaba, ndibhetolo bhu̱ku̱bhu̱bhi̱ndi̱li̱a ka Ndabho kindia Bhayu̱daya yabhalami̱li̱aga na kibboko toli̱ bhukubhubhiya ka tau̱ni̱ poni. 35Ti̱-no magi̱la ndia ndibha bhagbokiliani̱o ndibha bhabhuola tukilia Mambombi̱ ahanga nsi, tukilia ka magi̱la ndia Abbeli̱ mindia agbokiliani̱o doi̱sa ka magi̱la ndia Zakaliya mi̱ki̱ mu̱lu̱ku̱aki mindia Bbelekiya mindia bhumuolilia sobhe sa Hekalo na kindia bhaki̱su̱mbi̱li̱aga kibhembo, ali guanu̱.” 36Ka mazima nikibhutolia eti, yoho poni akiduabe muzo ndia sebhali̱si̱yo ndia kamwesi̱gi̱ Mambombi̱ 37“Bhakpa ndibha ka Yelusalemu, bhakpa ndibha ka Yelusalemu, bhenu̱ ndibho bhukubhuolaga bhanabbi̱ na bhi̱nda tali ndibha bhabhu̱ti̱ki̱ kindianu̱, nili kabhi̱ dou̱ nga kumesanu̱ bhia koko nesi̱ aki̱bhu̱ku̱mbataga bhani̱ki̱ ndibhaki ka kibhabha ndiaki, no bhukunibhalia. 38Ozi̱be, i̱nji̱ ndiako aki̱ya bhai̱ si̱mo. 39Tukilia endindi, bhukukutodha tangiami ndio bhu̱ku̱gi̱mbe bhiyo; ‘Ali na nki̱sa minjo mindia aki̱bi̱ka ke i̱na Sali̱a Mambombi̱.’ ”#Zabbu̱li̱ 118:26
Iliyochaguliwa sasa
Matayo 23: KWAMBA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Wycliffe Bible Translators, Inc., 2025
