ଜହନ 2
2
କାନ୍ନା ଗାଡ଼ାନାଜୁତି ବିବା ବୁଜିତାୱା ଜିସୁ
1ମୁ ଦିନାତାୱା ଗାଲିଲିତି କାନ୍ନା ଗାଡ଼ାନାଜୁତାୱା ରଣ୍ଡି ବିବା ବୁଜି ମାଚ୍ଚେ, ଏଦିମ୍ୱା ଜିସୁତି ଇୟା ମାଚ୍ଚେ; 2ଜିସୁ ୱାଡ଼େ ତା ଗ୍ରାମ୍ୱାଗାଟାର୍ ଡ଼ାହି ଏ ବିବା ବୁଜିଇନ୍ଦା ହାଲ୍ବନ୍ ବାଗା ଆର୍ପା ପାଁଣ୍ଡାଚ୍ଚେଞ୍ଜି । 3ଏଚ୍ଚିକିଃଆ ଅଙ୍ଗୁରନିରୁ ୱିହିତେ, ଏମ୍ବାଟି ଜିସୁନିକି ତା ଇୟା ୱେସ୍ତେ, “ଏୱାରିକି ଅଙ୍ଗୁରନିରୁ ହେଃଲ୍ଲେ ।”
4ଏମ୍ବାଟି ଜିସୁ ଏଦାଡ଼ିକି ୱେସ୍ତେଞ୍ଜି, “ଏ ଆଚାଲୁ, ନାଙ୍ଗେ ଇନ୍ନା କିଅନ୍ ମାନ୍ନେ, ଏଦା ନିନୁ ନାଙ୍ଗେ ୱେସ୍ପନ୍ ଆବସକ ଆଃଏ, ହାଦାଡ଼ି ଟିକ୍ନା ନା ତୁକା ୱାହେଃଲ୍ଲେ ।”
5ଏମ୍ୱାଟି ଜିସୁତି ଇୟା କାମାକିଚ୍ଚାରିକି ୱେସ୍ତେ, “ଏୱାଞ୍ଜି ମିଙ୍ଗେ ଇନ୍ନା ୱେସ୍ପିଞ୍ଜାନେଞ୍ଜି, ଏଦା କିଦୁ ।”
6ଆଟେ ଜିହୁଦିଙ୍ଗ୍ତି କାଟ୍କା କାସ୍କା ନବ୍ଗନ୍ତି ହାଜୁ ମାଚ୍ଚେ, ଏଦାବାଗା ଏଦିମ୍ୱା ସେଙ୍ଗୁଡ଼ି ନାଲା ମୁପନ୍ତି ହାରାଗଟ୍ଟା ୱାଲ୍ଲି କ୍ଲାହିଙ୍ଗ୍ କିଟ୍ଟାଚ୍ଚେରି । 7ଜିସୁ ଏୱାରିକି ୱେସ୍ତେଞ୍ଜି, “କ୍ଲାହିକ୍ ଏସେନ୍ ଏଜୁ ନେସ୍ଦୁ ।” ଏମ୍ୱାଟି ଏୱାରି ଏୱା ହାବେ ମୁଜ୍ଜୁ ଟିକ୍ନା ନେସ୍ତେରି । 8ଆଟେ ଏୱାଞ୍ଜି ଏୱାରିକି ୱେସ୍ତେଞ୍ଜି, “ହାଦାଡ଼ି କଡ୍ଡାନ୍ ଅଆନ୍ ବୁଜିତି ଗାମିନାଞ୍ଜିନିକି ହିଦୁ ।” ଏମ୍ବାଟି ଏୱାରି ଅଆନ୍ ହିତେରି । 9ବୁଜିତି ଗାମିନାଞ୍ଜି ଅଙ୍ଗୁରନିରୁ ମ୍ଲିଆନ୍ନି ଏ ଏଜୁତିଦି ୱାଣ୍ଡାନ୍ ଇୱା ଇମ୍ୱିନାୱାଟି ୱାତୁ ଇଞ୍ଜାନ୍ ପୁଞ୍ଜାହେଃଲ୍ଲାତେଞ୍ଜି ମତ୍ର ଇମ୍ୱିନ୍ କାମ୍ବାରାଙ୍ଗା ଏଜୁ ୱେଚାଚ୍ଚେରି, ଏୱାରି ପୁଞ୍ଜାଚ୍ଚେରି, ଏଦାବାଗା ବିବା ଲାୱେଞ୍ଜିକି ଆର୍ଚାନ୍ ୱେସ୍ତେଞ୍ଜି, 10“ଦାଲ୍ଲା କାହେ ନେହି ଅଙ୍ଗୁରନିରୁ ହିନ୍ନେରି, ଆଟେ ଦାଲ୍ଲା ହାବେ ହଚିତେସି#୨:୧୦ ହଚିତେସି, ଇଚ୍ଚେସି ପାଞ୍ଜନ୍ତାଦି ଡ଼ଃଆନ୍ ଅଙ୍ଗୁରନିରୁ ହିନ୍ନେରି; ମିରୁ ହାଦାଡ଼ି ଟିକ୍ନା ନେହି ଅଙ୍ଗୁରନିରୁ କିଟ୍ଟାଞ୍ଜେରି ।”
11ଜିସୁ ଗାଲିଲି ରାଜିତି କାନ୍ନା ଗାଡ଼ାନାଜୁତାୱା ତା କାହେତି ଆକ୍କାବାଡ଼ାଙ୍ଗ୍ତି କାମା କିଆନ୍ ତା ଗଉରବ ପକ୍ତେଞ୍ଜି, ଆଟେ ତା ଗ୍ରାମ୍ୱାଗାଟାର୍ ତାଙ୍ଗେ ମାଞ୍ଜାଡ଼ି କିତେରି ।
12 #
ମାତି ୪:୧୩
ଏମ୍ୱାଟି ଏୱାଞ୍ଜି ତା ଇୟା, ଆମ୍ୱେସାଙ୍ଗା ଅଟେ ଗ୍ରାମ୍ୱାଗାଟାର୍ ଡ଼ାହି କପର୍ନାହୁମ ଗାଡ଼ାନାଜୁଇନ୍ଦା ହାଚ୍ଚେଞ୍ଜି; ଆଟେ ଏୱାରି ଏଦିମ୍ୱା ଗାପ୍ଚି ଦିନା ବାସାଆଃଆତେରି ।
ଜିସୁ ଜିରୁସାଲମ ମନ୍ଦିରଇନ୍ଦା ହାଲ୍ବନ୍
(ମାତିଉ ୨୧:୧୨–୧୩; ମାର୍କ ୧୧:୧୫–୧୭; ଲୁକ ୧୯:୪୫–୪୬)
13ଏଚିତୁକାତାୱା ଜିହୁଦିଙ୍ଗ୍ତି ନିସ୍ତାର ରେହାଙ୍ଗ୍ ଟାକ୍କେ ଆଏସ୍ ୱାଇଚ୍ଚେ, ଏଦାକି ଜିସୁ ଜିରୁସାଲମଇନ୍ଦା ହାଚ୍ଚେଞ୍ଜି । 14ମନ୍ଦିରତି ଆଞ୍ଜଡ଼୍ତାୱା ଏୱାଞ୍ଜି କଡିଙ୍ଗ୍, ମେଁଣ୍ଡାଅଡାଙ୍ଗ୍ ଅଟେ ଗୁଗୁର୍କା ପ୍ରାପିଚ୍ଚାରିକି ଆଟେ ଟାକ୍କାଙ୍ଗ୍ ମାସ୍କନ୍ତାରିନିକି କକ୍ଚାଚ୍ଚାଦାଃଆ ହୁଡ଼ିତେଞ୍ଜି । 15ଏଦାବାଗା ଏୱାଞ୍ଜି ହାପ୍କାନଡ଼#୨:୧୫ ହାପ୍କାନଡ଼ ଇଚ୍ଚେସି ଉଡ଼ିଆ ବାଇବଲତାୱା “କରଡ଼ା” ଇଞ୍ଜାନ୍ ମାନ୍ନେ କ୍ଲେହାନାହି ମେଁଣ୍ଡାଅଡାଙ୍ଗ୍, କଡିଙ୍ଗ୍ ଅଟେ ହାବେତାରିନିକି ମନ୍ଦିରତାୱାଟି କାଟ ହପ୍ତେଞ୍ଜି; ଆଟେ ଟାକ୍କାଙ୍ଗ୍ ମାସ୍କନ୍ତାରିତି ଟାକ୍କାଙ୍ଗ୍ ହାବେ ୱିତିକିଆହିଆନ୍ ଏୱାର୍ତି ଟେବୁଲ୍କା ଉଲ୍ଟି କିଆହିତେଞ୍ଜି; 16ଆଟେ ଏୱାଞ୍ଜି ଗୁଗୁର୍କା ପ୍ରାପନ୍ତାରିନିକି ୱେସ୍ତେଞ୍ଜି, “ଇୱା ଇମ୍ୱାଟିଆଟି ଅଦୁ, ନା ଆବା ମୁଲାପେନୁତି ଇଡ୍ଡୁତିଦି ହାଟ୍ଟୁ ବଜାର କିଃଆଟୁ ।” 17“ନି ଇଡ୍ଡୁ ବାଗାଟି ନା ତାୱା ମାନ୍ନି ବକ୍ତି ନା ହଡାଙ୍ଗ୍ତାୱା ନାଡ଼ି ଡେହେଙ୍ଗ୍ ରିଞ୍ଜେନ୍ନେ” ଇଦି ଦର୍ମପୁତିତାୱା ୱ୍ରିଗାଆନ୍ନେ ଇଞ୍ଜାନ୍ ତା ଗ୍ରାମ୍ୱାଗାଟାରିକି ଏଲୁ ଦିତେ ।
18ଏମ୍ୱାଟି ଜିହୁଦି ଦାଲ୍ଲା ତାଙ୍ଗେ ୱେଚ୍ଚେରି, “ନିନୁ ଜେ ଇ ହାବେ କିଅନ୍ତିକି ହକତ୍ ପାଁଣ୍ଡାମାଃଇ ଇଞ୍ଜାନ୍ ମାଙ୍ଗେ ଏମ୍ୱାତି ଇନ୍ନି ତୁର୍ରି ତସ୍ପିଞ୍ଜାଦି ?” 19#ମାତି ୨୬:୬୧; ୨୭:୪୦; ମାର୍କ ୧୪:୫୮; ୧୫:୨୯ଜିସୁ ଏୱାରିକି ୱ୍ଡେପ୍ଚ୍ଚି ୱେସ୍ତେଞ୍ଜି, “ମିରୁ ଇ ମନ୍ଦିରତିଦି ଲେକ୍ଦୁ, ଆଟେ ମୁନେସିଆଟି ନାନୁ ଏଦା କ୍ଲେହିଃଇ ।” 20ଏମ୍ୱାଟି ଜିହୁଦି ଦାଲ୍ଲା ୱେସ୍ତେରି, “ଇ ମନ୍ଦିର କ୍ଲେହନ୍ ବାଗାଟି ରି କୁଡ଼ି ହାରା ଅଁଣ୍ଡୁ ଆହାଞ୍ଜାନେ; ଆଟେ ନିନୁ ଇନ୍ନା ଇଦା ମୁନେସିଆଟି କ୍ଲେହିଦି ?” 21ମତ୍ର ଇମ୍ୱିନ୍ ମନ୍ଦିର କୁଲାଟି ଏୱାଞ୍ଜି ୱେସ୍ପିଚ୍ଚେଞ୍ଜି, ଏଦି ଆଇନେ ତା ଗାଣ୍ଡି । 22ଏଦାବାଗା ଏୱାଞ୍ଜି ହାନ୍ନାର୍ଟିଆଟି ନିଙ୍ଗିତାୱାଟି ତା ଗ୍ରାମ୍ୱାଗାଟାରି ଏୱାଞ୍ଜି ଇଦା ୱେସାଞ୍ଜାତେଞ୍ଜି ଇଞ୍ଜାନ୍ ଏଲୁ କିତେରି; ଆଟେ ଏୱାରି ଦର୍ମପୁତି ଅଟେ ଜିସୁ ୱେସାଚ୍ଚି ବାକ୍ୟ ମାଞ୍ଜାଡ଼ି କିତେରି ।
ଜିସୁ କୁଏଞ୍ଜ୍ତି ମନ କୁଲାଟି ପୁନ୍ବନ୍
23ହାଦାଡ଼୍ ନିସ୍ତାର ରେହାଙ୍ଗ୍ ତୁକାତାୱା ଏୱାଞ୍ଜି ଜିରୁସାଲମତାୱା ମାଚ୍ଚି ତୁକାତାୱା ଗାପ୍ଚି ଦାଲ୍ଲା ଏୱାଞ୍ଜି କିଚ୍ଚି ଆକ୍କାବାଡ଼ାଙ୍ଗ୍ତି କାମା ହୁଡ଼ାନାହି ତା ପାରୁଟି ମାଞ୍ଜାଡ଼ି କିତେରି । 24ମତ୍ର ଜିସୁ ଏୱାରିକି ମାଞ୍ଜାଡ଼ି କିଃଏଟେଃଏ ଏୱାର୍ତାୱାଟି ଆଙ୍ଗେ ବାସାଆତେଞ୍ଜି, ଇନାକି ଏୱାଞ୍ଜି ହାବେତାରିତି ମନ ପୁଞ୍ଜିଚ୍ଚେଞ୍ଜି । 25ଆଟେ ଏମ୍ୱେନାଞ୍ଜି କୁଏଞ୍ଜି କୁଲାଟି ସାକ୍ୟ ହିନେଞ୍ଜି ଇଦା ତାଙ୍ଗେ ଆବସକ ହେଃଲ୍ଲାତେ, ଇନାକି କୁଏଞ୍ଜ୍ତି ହଡାଙ୍ଗ୍ତାୱା ଇନ୍ନା ମାନ୍ନେ, ଏଦା ଏୱାଞ୍ଜି ପୁଞ୍ଜିଚ୍ଚେଞ୍ଜି ।
Iliyochaguliwa sasa
ଜହନ 2: DWK
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2023 NLCI CC BY-NC-ND 4.0
