ଜହନ 1

ପରନ୍ ହିନ୍ନି ବାକ୍ୟ

1କାହେଟେଃଏ ବାକ୍ୟ ମାଚ୍ଚେ, ବାକ୍ୟ ମୁଲାପେନୁ ଡ଼ାହି ମାଚ୍ଚେ, ଏ ବାକ୍ୟ ମୁଲାପେନୁ ମାଚ୍ଚେ । 2ଏ ବାକ୍ୟ କାହେଟେଃଏ ମୁଲାପେନୁ ଡ଼ାହି ମାଚ୍ଚେ । 3ମୁଲାପେନୁ ତା ତାୱାଟି ହାବେତ୍ କୁଲା ପିଲ୍‌ତେଞ୍ଜି; ଆଟେ ପ୍ଲିଆନ୍ନି ହାବେତ୍ କୁଲାତାୱାଟି ରଣ୍ଡି ୱାଡ଼େ ତାଙ୍ଗେ ପିହାନ୍ ପ୍ଲିଆହେଃଲ୍ଲ । 4ତା ପାଟ୍ଟି ପରନ୍ ମାଚ୍ଚେ ଅଟେ ଏ ପରନ୍ ଆଇନେ କୁଇଙ୍ଗ୍‌ତି ଅଲା 5ଏ ଅଲା ଆନ୍ଦେରିଃଆ ମ୍ଲିସ୍‌ପିନ୍ନେ, ମତ୍ର ଆନ୍ଦେର୍ ଏ ଅଲାତିଦି ଡୁପନ୍ ମୁଃଏ ।

6 # ମାତି ୩:୧; ମାର୍କ ୧:୪; ଲୁକ ୩:୧,୨ ମୁଲାପେନୁ ରଃଅଞ୍ଜି କୁଏଞ୍ଜିକି ପାଣ୍ଡାଦାତେଞ୍ଜି, ଏୱାଞ୍ଜ୍‌ତି ପାରୁ ଜହନ । 7ଏୱାଞ୍ଜି ଇନିସ୍ ଅଲା କୁଲାଟି ୱେସ୍‌ପିନ୍ନେଞ୍ଜି ଅଟେ ତା ତାୱାଟି ହାବେତାରି ମାଞ୍ଜାଡ଼ି କିନେରି, ଏଦାକି ଏୱାଞ୍ଜି ସାକି ହିଅନ୍ ବାଗା ୱାତେଞ୍ଜି । 8ଏୱାଞ୍ଜି ତାନୁନେଃଏ ଏ ଅଲା ହେଃଲ୍ଲାତେଞ୍ଜି, ମତ୍ର ଏ ଅଲା କୁଲାଟି ୱେସ୍‌ପନ୍ ବାଗା ୱାତେଞ୍ଜି । 9ଏମ୍ୱେନାଞ୍ଜିକି ନିଜ୍ଜା ଅଲା ଆଟେ ହାବେତ୍ କୁଇଙ୍ଗିକି ଅଲା ହିନ୍ନେଞ୍ଜି, ଏୱାଞ୍ଜି ପୁର୍ତିଇନ୍ଦା ୱାଇଚ୍ଚେଞ୍ଜି । 10ଏୱାଞ୍ଜି ପୁର୍ତିତାୱା ମାଚ୍ଚେଞ୍ଜି ଅଟେ ପୁର୍ତି ତା ତାୱାଟି ପ୍ଲିଆନ୍ନେ, ଆତେସ୍‌ୱାଡ଼େ ପୁର୍ତି ତାଙ୍ଗେ ପୁଃନ୍ନାତେ । 11ଏୱାଞ୍ଜି ତା ରାଜିଇନ୍ଦା ୱାତେଞ୍ଜି, ଆତେସ୍‌ୱାଡ଼େ ତାଙ୍ଗେ ତା ରାଜି ଦାଲ୍ଲା ଗ୍ରହନ କିଃଆତେରି । 12ମତ୍ର ଏମ୍ୱେନାରି ତାଙ୍ଗେ ଗ୍ରହନ କିତେରି ଅଟେ ତା ପାରୁଟି ମାଞ୍ଜାଡ଼ି କିତେରି, ଏ ହାବେତାରିନିକି ଏୱାଞ୍ଜି ମୁଲାପେନୁତି ମ୍ରିକା ଆଅନ୍ ବାଗା ହକତ୍ ହିତେଞ୍ଜି । 13ଏୱାରି ରାକ୍କାତାୱାଟି ଗାଣ୍ଡିତି ଇଚ୍ଚାଟି କି କୁଏଞ୍ଜି କୁଆଲୁତି ଇଚ୍ଚାଟି ପ୍ଲିଃଆତେରି, ମତ୍ର ମୁଲାପେନୁତାୱାଟି ପ୍ଲିତେରି ।

14ଏ ବାକ୍ୟ କୁଇ ଗାଣ୍ଡି ଆହାନାହି ଅନୁଗ୍ରହ ଅଟେ ନିଜ୍ଜାଟି ନେଞ୍ଜାନାହି ମା ତାୱା ବାସାଆତେ, ଆଟେ ଆବାତାୱାଟି ୱାନ୍ନି ରଃଅଞ୍ଜେଃଏ ମ୍ରିଃଏଞ୍ଜ୍‌ତି ମହିମା ଲାକ୍କାଟି ମାମୁ ତା ମହିମା ହୁଡ଼ିତାମୁ । 15ଜହନ ଏୱାଞ୍ଜ୍ କୁଲାଟି ସାକ୍ୟ ହିଆନ୍ ଗଜେଲ୍ ଆନ୍ ୱେସ୍ତେଞ୍ଜି, ଏମ୍ୱେନାଞ୍ଜି ନା ବେତଟ୍ ୱାଇନ୍ନେଞ୍ଜି, ଏୱାଞ୍ଜି ନା ତାୱାଟି ଗାମିନାଞ୍ଜି, ଇନାକି ନା କାହେଟେଃଏ ତାନୁ ମାଚ୍ଚେଞ୍ଜି, ଇନ୍ଦାର୍ କୁଲାଟି ନାନୁ ଇ ହାବେ ୱେସ୍‌ପିଞ୍ଜାତେଃଏ, ତାନୁ ଇୱାଞ୍ଜି । 16ଇନାକି ତା ଗାପ୍‌ଚି ଅନୁଗ୍ରହ ଅଟେ ନିଜ୍ଜା ତାୱାଟି ମାରୁ ହାବେ ପାଁଣ୍ଡାନ୍ନା, ହାଁ ଅନୁଗ୍ରହ କୁଃଏଟି ଅନୁଗ୍ରହ ପାଁଣ୍ଡାନ୍ନା । 17ଇନାକି ହାଜୁ ମସା ତାୱାଟି ୱାତେ, ମତ୍ର ଅନୁଗ୍ରହ ଅଟେ ନିଜ୍ଜା ଜିସୁ କ୍ରିସ୍ଟ ତାୱାଟି ୱାତେ । 18ଏମ୍ୱେ ଏଚ୍ଚେକ୍ ମୁଲାପେନୁନିକି ହୁଡ଼ାହେଃଲ୍ଲେରି, ମତ୍ର ଆବା ଡ଼ାହି ମାଞ୍ଜିନ୍ନି ରଃଅଞ୍ଜେଃଏ ମ୍ରିଃଏଞ୍ଜି ମୁଲାପେନୁନିକି ପକ୍‌ତେଞ୍ଜି ।

ଡୁବନ୍ ହିନ୍ନି ଜହନତି ସାକ୍ୟ

(ମାତିଉ ୩:୧–୧୨; ମାର୍କ ୧:୧–୮; ଲୁକ ୩:୧–୧୮)

19“ନିନୁ ଏମ୍ୱେନାତି ?” ଇଦା ଜହନନିକି ୱେନ୍‌ବନ୍ ବାଗା ଜିହୁଦିଙ୍ଗ୍ ଏଚ୍ଚିକିଃଆ ଜିରୁସାଲମତାୱାଟି ଜାଜକଙ୍ଗ୍ ଅଟେ ଲେବିଙ୍ଗ୍‌ନିକି ତା ଟାକ୍କେ ପାଣ୍ଡିତେରି, ଏଚିତୁକାତାୱା ଏୱାଞ୍ଜି ଇ ସାକ୍ୟ ହିତେଞ୍ଜି, 20ଏୱାଞ୍ଜି ଅସ୍ପିକାର କିଃଆତେଞ୍ଜି; ଏୱାଞ୍ଜି ସ୍ୱିକାର କିଆନ୍ ୱେସ୍ତେଞ୍ଜି, “ନାନୁ କ୍ରିସ୍ଟ ଆଃଏ ।”

21ଏମ୍ୱାଟି ଏୱାରି ତାଙ୍ଗେ ୱେଚ୍ଚେରି, ଏହେଙ୍ଗ୍ ଆତେସି “ନିନୁ ଏମ୍ୱେନାତି ? ନିନୁ ଇନ୍ନା ଏଲିୟ ?”

ଏୱାଞ୍ଜି ୱେସ୍ତେଞ୍ଜି, “ବାଃଏ ।”

“ନିନୁ ଇନ୍ନା ଏ ବାବବାଦି” ମାମୁ ଇନ୍ଦାରିକି ଆସା କିଚ୍ଚାମୁ ?

ଏୱାଞ୍ଜି ୱ୍ଡେପ୍‌ଚ୍ଚି ୱେସ୍ତେଞ୍ଜି, “ବାଃଏ ।”

22ଏମ୍ୱାଟି ଏୱାରି ତାଙ୍ଗେ ୱେସ୍ତେରି, “ମାଙ୍ଗେ ପାଣ୍ଡାଞ୍ଜାନ୍ ଦାଲ୍ଲାନିକି ଇନ୍ନା ୱେସ୍‌ନାମୁ, ଏଦାବାଗା ନିନୁ ଏମ୍ୱେନାତି ? ଆଟେ ନିନୁ ନି କୁଲାଟି ଇନ୍ନା ୱେସ୍‌ପିଞ୍ଜି ?”

23ଏୱାଞ୍ଜି ୱ୍ଡେପ୍‌ଚ୍ଚି ୱେସ୍ତେଞ୍ଜି,

“ଜିସାୟ ବାବବାଦି ନା କୁଲାଟି ଇନ୍ନା ୱେସାଞ୍ଜାନେଞ୍ଜି, ଏଚିଡେହେଙ୍ଗ୍

ଦାର୍ମୁତି ପାହେର୍ ହାମ୍ୱେର୍ କିଦୁ ଇଞ୍ଜାନ୍

ନାନୁ ଚିହ୍‌ପି ଗର୍ରିତାୱା ଏଗେଲ୍ ଗଲି ଆନ୍ ୱେସ୍‌ପିନ୍ନି ରଃଅଞ୍ଜ୍‌ତି ଉକୁଡ଼୍ ।”

24ଏମ୍ବାଟି ପାରୁସିଙ୍ଗ୍ ଏଚ୍ଚୁରିକି କବର ତାପ୍‌କନ୍ ବାଗା ପାଣ୍ଡାଚ୍ଚେରି, 25ଏୱାରି ତାଙ୍ଗେ ୱେଚ୍ଚେରି, “ନିନୁ ଜଦି କ୍ରିସ୍ଟ ଆଃଏ, ଏଲିୟ ଆଃଏ ଆତେସ୍ ଏ ବାବବାଦି ଆଃଏ, ଏହେଙ୍ଗ୍ ଆତେସି ଇନ୍ନା ବାଗା ଡୁବନ୍ ହିଞ୍ଜି ?” 26ଜହନ ତାଙ୍ଗେ ୱେସ୍ତେଞ୍ଜି, ନାନୁ ମିଙ୍ଗେ ଏଜୁତାୱା ଡୁବନ୍ ହିଞ୍ଜା, ଇନ୍ଦାରିକି ମିରୁ ପୁଞ୍ଜାହେଃଲ୍ଲେରି, ଏୱାଞ୍ଜି ମି ତାୱା ମାନ୍ନେଞ୍ଜି; 27ଏୱାଞ୍ଜି ନା ବେତଟ୍ ୱାଇନ୍ନେଞ୍ଜି, ତା ପାଣ୍ଡେଙ୍ଗ୍‌ତି ନଡ଼୍‌କା ୱ୍ରିପ୍‌କନ୍ ବାଗା ନାନୁ ଜୁଗ୍ୟ ଆଃଏ । 28ଜର୍ଦ୍ଦନତି ଆନେଟ୍ ୱାଡୁ ମାନ୍ନି ବେତନିଆତାୱା ଜହନ ଡୁବନ୍ ହିଚ୍ଚେଞ୍ଜି, ଏ ଗର୍ରିତାୱା ଇ ହାବେ ଡୁଣ୍ଡେଲ୍ ଆଚ୍ଚେ ।

ମୁଲାପେନୁତି ମେଁଣ୍ଡାଡଟି

29ଏ ୱେଃଇତ୍ ଏୱାଞ୍ଜି ଜିସୁନିକି ତା ଟାକ୍କେ ୱାଅନ୍‌ତା ହୁଡ଼ାନ୍ ୱେସ୍ତେଞ୍ଜି, ଏୱାଞ୍ଜିକି ହୁଡ଼ାଟୁ, ମୁଲାପେନୁତି ମେଁଣ୍ଡାଡଟି, ଏମ୍ୱେନାଞ୍ଜି ପୁର୍ତିତି ପାପ ଡେକାନ୍ ଅନ୍‌ତାଞ୍ଜି । 30ଏମ୍ୱେନାଞ୍ଜି ନା ବେତଟ୍ ୱାଇନ୍ନେଞ୍ଜି, ଏୱାଞ୍ଜି ନା ତାୱାଟି ଗାମିନାଞ୍ଜି, ଇନାକି ନା କାହେଟେଃଏ ତାନୁ ମାଚ୍ଚେଞ୍ଜି, ଇନ୍ଦାର୍ କୁଲାଟି ନାନୁ ଇ ହାବେ ୱେସ୍‌ପିଞ୍ଜାତେଃଏ, ତାନୁ ଇୱାଞ୍ଜି । 31ନାନୁ ୱାଡ଼େ ତାଙ୍ଗେ ପୁଞ୍ଜାହେଃଲ୍ଲାତାନୁ, ମତ୍ର ଏୱାଞ୍ଜି ଇନିସ୍‌କି ଇସ୍ରାଏଲ ଦାଲ୍ଲା ନକେସ୍ ପଙ୍ଗିନେଞ୍ଜି, ଏଦାବାଗା ନାନୁ ଏଜୁତାୱା ଡୁବନ୍ ହିଅନ୍ ବାଗା ୱାମାଃଇ ।

32ଆଟେ ଜହନ ସାକ୍ୟ ହିଆନ୍ ୱେସ୍ତେଞ୍ଜି, ନାନୁ ପିର୍‌ନି ଡିଙ୍ଗା ଗୁଗୁର୍ ଲାକ୍କା ଜାଗ୍ଗୁଟି ଜାଚାନ୍ ତା କୁଃଏଟି କପ୍‌କନ୍‌ତାଆ ହୁଡ଼ାମାଃଇ । 33ନାନୁ ୱାଡ଼େ ତାଙ୍ଗେ ପୁଞ୍ଜାହେଃଲ୍ଲାତାନୁ, ମତ୍ର ଏମ୍ୱେନାଞ୍ଜି ନାଙ୍ଗେ ଏଜୁତାୱା ଡୁବନ୍ ହିଅନ୍ ବାଗା ପାଣ୍ଡାଞ୍ଜାନେଞ୍ଜି, ଏୱାଞ୍ଜି ନାଙ୍ଗେ ୱେସ୍ତାତେଞ୍ଜି, ଇନ୍ଦାର୍ କୁଃଏଟି ଡିଙ୍ଗା ଜାପନ୍ ଅଟେ କକ୍‌ନାଦାଃଆ ହୁଡ଼ିଦି, ଏମ୍ବେନାଞ୍ଜି ପିର୍‌ନି ଡିଙ୍ଗାଟି ଡୁବନ୍ ହିନେଞ୍ଜି, ଏୱାଞ୍ଜି ଆଇନ୍ନେଞ୍ଜି ଏ କୁଏଞ୍ଜି; 34ନାନୁ ଏଦା ହୁଡ଼ାମାଃଇ ଅଟେ ଏୱାଞ୍ଜି ମୁଲାପେନୁତି ମ୍ରିଃଏଞ୍ଜି ଇଞ୍ଜାନ୍ ସାକ୍ୟ ହିଆମାଃଇ ।

ଜିସୁତି କାହେତ୍ ଗ୍ରାମ୍ବାଗାଟାରି

35ଏ ୱେଃଇତ୍ ଜହନ ଅଟେ ତା ରିଃଆରି ଗ୍ରାମ୍ୱାଗାଟାର୍ ଡ଼ାହି ଡିଡ୍ଡାଚ୍ଚି ତୁକାତାୱା, 36ଜହନ ଜିସୁନିକି ଏ ଗିଜ୍ଜୁତାୱା ହାଜ୍ଜିଚ୍ଚାଦାଃଆ ହୁଡ଼ାନ୍ ତାଙ୍ଗେ ୱେସ୍ତେଞ୍ଜି, “ଇୱାଞ୍ଜିକି ହୁଡ଼ାଟୁ, ମୁଲାପେନୁତି ମେଁଣ୍ଡାଡଟି ।”

37ଏ ରିଃଆରି ଗ୍ରାମ୍ୱାଗାଟାରି ତା କାତା ୱେଞ୍ଜାନ୍ ଜିସୁତି ବେତ ବେତଟ୍ ହାଚ୍ଚେରି । 38ଜିସୁ ମ୍ଲିଆନାହି ଏୱାରି ତା ବେତଟ୍ ୱାଅନ୍‌ତାଆ ହୁଡ଼ାନ୍ ତାଙ୍ଗେ ୱେଚ୍ଚେଞ୍ଜି, ମିରୁ ଇନ୍ନା ଦାହ୍‌ପିଞ୍ଜେରି ? ଏୱାରି ତାଙ୍ଗେ ୱେଚ୍ଚେରି, ରାବ୍ବି (ଇଚ୍ଚେସି ଗ୍ରାପାଗାଟାତି) ନିନୁ ଇମ୍ୱିନାୱା ବାସାଆଇଞ୍ଜି ?

39ଏୱାଞ୍ଜି ଏୱାରିକି ୱେସ୍ତେଞ୍ଜି, “ୱାଦୁ, ହୁଡ଼ିଦେରି” ଏମ୍ବାଟି ଏୱାରି ତା ଡ଼ାହି ମାଞ୍ଜାନ୍ ତା ମାନ୍‌ବା ଗର୍ରି ହୁଡ଼ିତେରି, ଆଟେ ଏଚିୱେଲା ତା ଡ଼ାହି ବାସାଆତେରି । ଏଚିତୁକାତାୱା ମିଡ୍ଡଡ଼୍ ବାଇକ୍ ନାଲ୍ ଗଣ୍ଟା#୧:୩୯ ମିଡ୍ଡଡ଼୍ ବାଇକ୍ ନାଲ୍ ଗଣ୍ଟାଇଚ୍ଚେସି ବିହି ବାଇବଲତାୱା ଡାଃଏସ୍ ବାଇକ୍ ଦାସା ଗଣ୍ଟା ଇଞ୍ଜାନ୍ ୱ୍ରିଗାଆନ୍ନେ । ଆଚ୍ଚେ ।

40ଇମ୍ୱିନ୍ ରିଃଆରି କୁଇଙ୍ଗ୍ ଜହନତି କାତା ୱେଞ୍ଜାନ୍ ଜିସୁ ବେତଟ୍ ହାଜ୍ଜାଚ୍ଚେରି, ଏୱାର୍‌ତାୱାଟି ରଃଅଞ୍ଜି ସିମନ ପିତରତି ଆମ୍ୱେସ୍ ଆନ୍ଦ୍ରିୟ ମାଚ୍ଚେଞ୍ଜି । 41ଏୱାଞ୍ଜି କାହେ ତା ଆମ୍ୱେସ୍ ସିମନନିକି ୱେସ୍ତେଞ୍ଜି, ମାମୁ ମସିହନିକି (ଇଚ୍ଚେସି କ୍ରିସ୍ଟ) ହୁଡ଼ନ୍ ପାଁଣ୍ଡାନ୍ନାମୁ । 42ଏୱାଞ୍ଜି ତାଙ୍ଗେ ଜିସୁ ଟାକ୍କେ ତାଚ୍ଚିୱାତେଞ୍ଜି । ଜିସୁ ତାଙ୍ଗେ ୱେସ୍ତେଞ୍ଜି, ନିନୁ ଜହନତି ମ୍ରିଃଏଞ୍ଜି ସିମନ । ନିନୁ କେପା (କେପାତି ଅର୍ତ ପିତର) ପାରୁଟି ପଙ୍ଗିଦି ।

ପିଲିପ ଅଟେ ନିତିନିଏଲ୍‌ନିକି ଜିସୁ ଆର୍‌ପନି

43ଏ ୱେଃଇତ୍ ଜିସୁ ଗାଲିଲିଇନ୍ଦା ହାଲ୍‌ବନ୍ ବାଗା ମନ କିତେଞ୍ଜି, ଆଟେ ପିଲିପନିକି ହୁଡ଼ନ୍ ପାଁଣ୍ଡାନ୍ ତାଙ୍ଗେ ୱେସ୍ତେଞ୍ଜି, “ନା ବେତଟ୍ ୱାମୁ ।” 44ପିଲିପ ବେତ୍‌ସାଇଦାତି କୁଏଞ୍ଜି ମାଚ୍ଚେଞ୍ଜି, ଏଦି ଆନ୍ଦ୍ରିୟ ଅଟେ ପିତରତି ଗାଡ଼ାନାଜୁ ମାଚ୍ଚେ । 45ପିଲିପ ନିତିନିଏଲ୍‌ନିକି ପୁଁଣ୍ଡାନ୍ ତାଙ୍ଗେ ୱେସ୍ତେଞ୍ଜି, “ଇନ୍ଦାର୍ କୁଲାଟି ମସା ହାଜୁତାୱା ୱ୍ରିଗାନ୍ନେଞ୍ଜି ଅଟେ ବାବବାଦିଙ୍ଗ୍ ୱାଡ଼େ ୱ୍ରିଗାନ୍ନେରି, ମାମୁ ତାଙ୍ଗେ ହୁଡ଼ନ୍ ପାଁଣ୍ଡାନ୍ନାମୁ; ଏୱାଞ୍ଜି ନାଜରିତ ଜିସୁ ଜସେପତି ମ୍ରିଃଏଞ୍ଜି ।”

46ନିତିନିଏଲ୍ ତାଙ୍ଗେ ୱେଚ୍ଚେଞ୍ଜି, ନାଜରିତତାୱାଟି ଇନ୍ନା ନେହି କୁଲା ପ୍ଲିଅନ୍ ମୁନେ ?

ପିଲିପ ତାଙ୍ଗେ ୱେସ୍ତେଞ୍ଜି “ୱାନ୍ ହୁଡ଼ାମୁ ।”

47ଜିସୁ ନିତିନିଏଲ୍‌ନିକି ତା ଟାକ୍କେ ୱାଅନ୍‌ତାଆ ହୁଡ଼ାନ୍ ତା କୁଲାଟି ୱେସ୍ତେଞ୍ଜି, “ହୁଡ଼ାଟୁ, ନିଜ୍ଜାନେଃଏ ଇୱାଞ୍ଜି ରଃଅଞ୍ଜି ଇସ୍ରାଏଲତି କୁଏଞ୍ଜି, ଇୱାଞ୍ଜ୍ ପାଟ୍ଟି କଲ ହେଃଲ୍ଲେଏ ।”

48ନିତିନିଏଲ୍ ତାଙ୍ଗେ ୱେଚ୍ଚେଞ୍ଜି, “ନାଙ୍ଗେ ନିନୁ ଇନିସ୍ ପୁଞ୍ଜାତି ?”

ଜିସୁ ତାଙ୍ଗେ ୱ୍ଡେପ୍‌ଚ୍ଚି ୱେସ୍ତେଞ୍ଜି, “ପିଲିପ ନିଙ୍ଗେ ଆଃରାନ୍ କାହେଟେଃଏ ନିନୁ ଏଚ୍ଚିକିଃଆ ତଗା ମ୍ରାନୁ ନେତେ ମାଚ୍ଚି, ଏଚିତୁକାତାୱା ନାନୁ ନିଙ୍ଗେ ହୁଡ଼ାଞ୍ଜାତେଃଏ ।”

49ନିତିନିଏଲ୍ ତାଙ୍ଗେ ୱ୍ଡେପ୍‌ଚ୍ଚି ୱେସ୍ତେଞ୍ଜି, ଏ “ଗ୍ରାପାଗାଟାତି” ନିନୁ ମୁଲାପେନୁତି ମ୍ରିଃଏଞ୍ଜି, ନିନୁ ଇସ୍ରାଏଲତି ରାଜେଞ୍ଜି ।

50ଜିସୁ ତାଙ୍ଗେ ୱ୍ଡେପ୍‌ଚ୍ଚି ୱେସ୍ତେଞ୍ଜି, ନାନୁ ନିଙ୍ଗେ ତଗା ମ୍ରାନୁ ନେତେ ହୁଡ଼ାଞ୍ଜାତେଃଏ ଇଞ୍ଜାନ୍ ୱେସ୍‌ପନେଃଏ ଇନ୍ନା ନିନୁ ମାଞ୍ଜାଡ଼ି କିଞ୍ଜି ? ନିନୁ ଇମ୍ବାତାୱାଟି ଆକ୍କାବାଡ଼ାଙ୍ଗ୍ କାମା କୁଲାଟି ହୁଡ଼ିଦି । 51ଆଟେ ଏୱାଞ୍ଜି ତାଙ୍ଗେ ୱେସ୍ତେଞ୍ଜି, “ନିଜ୍ଜାନେଃଏ ନାନୁ ମିଙ୍ଗେ ୱେସ୍‌ପିଞ୍ଜା, ମିରୁ ସର୍ଗ ଗେର୍‌ପା ଆନ୍ନାଦାଃଆ ଅଟେ ମୁଲାପେନୁତି ଦୁତଙ୍ଗ୍‌ନିକି କୁଏଞ୍ଜି ମ୍ରିଃଏଞ୍ଜି ଡ଼ାହି ଏଙ୍ଗନ୍‌ତାଦା ଅଟେ ଜାପନ୍‌ତାଦା ହୁଡ଼ିଦେରି ।”

Iliyochaguliwa sasa

ଜହନ 1: DWK

Kuonyesha

Shirikisha

Nakili