Chapa ya Youversion
Ikoni ya Utafutaji

Genesis 27

27
Isaka ta swere Jakopo pevega lyaEsau
1Apa ga kurupire Isaka, meho ago gana uvire, kapi ana kumona hena, ta zigida munwendi gomukurona po Esau a ya mu tantere asi: “Munwange!”
Age ta limburura asi: “Nyame ogu!”
2Isaka ta tanta asi: “Tara, ame na kurupa, ano ezuva eli ngani fa nokulidiva si. 3Gusa yikwata yoge, nkafa zoge nouta woge o ze mowiza, o ka dipagere nge ko sikorama, 4makura o ya terekere nge nondya donontovara edi na hara unene, nkumwe ni ku tungike paapa na dili kufa.”
5Repeka age kuna kuzuvha omu ana kuuyunga Isaka namunwendi Esau. Esau makura ta zi mowiza, a ka dipage sikorama a rete. 6Repeka makura ta tantere munwendi Jakopo asi: “Tara, ame kuna zuvhu oguho tava tantere mukuroge Esau asi: 7‘Ka retere nge sikorama o ya terekere nge nondya donontovara, ni ya lye makura ni ku tungike kosipara saHompa, paapa na dili kufa.’ 8Munwange, purakena nye eyi nina kukutantera! 9Zende nye kosiunda, o ka retere nge ko tukombogona tuvali totuwa, ni ya terekere oguhwo nondya donontovara edi vana hara. 10Makura nkumwe o di twarere oguwho va ka lye, va ku tungike paapa vana dili kufa.”
11Nye Jakopo ta tantere ozina Repeka asi: “Tareni, mukurwange Esau sivhivhi, ame kwa kwehuka. 12Ezuva nava ka papatera nge otate, ni ka kare kosipara sawo ngwendi nyame ogu nina kuvazora, makura ni ka lihadere nye efingo, kapisi etungiko hena.”
13Nye ozina tava mu limburura asi: “Efingiliro lyoge li wize kwange, munwange! Zuvha nge tupu o ze o ka yi harere nge.” 14Age ta zi a ka yi hare, makura ta yi retere ozina. Ozina makura tava rugana nondya donontovara moomu va di here oguhwe. 15Repeka makura ta gusa yikoverero yoyiwa po yamunwendi gomukurona Esau, eyi ya kere monzugo zendi, makura ta yi dwareke munwendi gomunona Jakopo. 16Oyo yipapa yoyikombogona ta yi dingi komawoko gendi nomonsingo zendi zokukwehuka. 17Makura ta pe munwendi Jakopo odo nondya donontovara nomboroto ezi ga kangere.
18Jakopo makura ta zi kwaguhwe, ta tanta asi: “Tate!”
Awo asi: “Nyame ogu. Nyovelye, munwange?”
19Jakopo ta tantere oguhwe asi: “Nyame Esau, mbeli zeni. Nina mana kurugana eyi komu tantere nge. Komu pinduka si, mu lye nyama zosikorama, nkumwe mu tungike nge.”
20Isaka ta pura munwendi asi: “Siruwoke ono si gwana apa ntani, munwange?”
Age ta limburura asi: “Hompa Karunga goge yige ana si pe nge.”
21Isaka ta tantere Jakopo asi: “Heda oku, ni ku papatere munwange, nsenesi nyove sili‐sili munwange Esau.” 22Jakopo makura ta heda ko kwaguhwe Isaka. Age ta mu papatere, ta tanta asi: “Kezwi, ezwi lyaJakopo, nye komawoko, mawoko gaEsau.” 23Age kapi ga mu dimbwilire, morwa mawoko gendi nohuki da kere ko ngwendi gamukurwendi Esau. Makura ta mu tungike. 24Mokupura ga mu pulire asi: “Nye sili nyove munwange Esau ndi?”
Age ta limburura asi: “Nhi, nyame.”
25Age makura ta tanta asi: “Yi hedesera nge oku, ni lye nyama zosikorama samunwange, nkumwe ni ku tungike.” Age makura ta yi va hedesere, makura tava li. Age ta va retere hena vhinyu, tava nu.
26Kutunda poyo oguhwe Isaka tava mu tantere asi: “Heda oku o ya ncumite nge, munwange!”
27Jakopo makura ta heda ko a va ncumite. Isaka ta fumbwire edumba lyoyikoverero yendi, makura ta mu tungike asi: “Ko tara si tupu, edumba lyamunwange ngwendi edumba lyowiza ou ga tungika Hompa.
28“Karunga ngano ta ku pe eme
lyekeguru nevhu lyewa
newogo lyonombuto novhinyu.
29Nomuhoko ngadi ku ruganene,
marudi ngaga ku tongamene.
Ngo kara mupangeli govanavanyoko,
vana wovagara wonyoko ngava
tongamena kosipara soge.
Gokukufinga ngava mu fingilira,
ano gokukuswera nage ngava mu swera.”
Esau ta likwambere etungiko lyaIsaka
30Tupu ana kumana Isaka kuswera Jakopo, age Jakopo yipo ana kukatuka po pwaguhwe Isaka a ka ze, mukurwendi Esau age nage ta tundu koukongo. 31Nage ta tereke nondya donontovara, ta di twarere guhwe, ta tanta asi: “Pindukeni si tate, mu lye nyama zosikorama samunweni, nkumwe mu tungike nge.”
32Oguhwe Isaka tava mu pura asi: “Nyovelye?”
Age ta limburura asi: “Nyame munweni Esau, mbeli zeni.”
33Isaka makura tagu mu pwaga unene, ta ninki asi: “Ogu ana ka dipaga sikorama yiyo ana retere nge no yilye? Ame yiyo na li nayinye, ove wa hana kuwiza, yiyo na mu tungike ana pu kumutungika makura.”
34Esau eyi ga yi zuvhire, ta zigire unene neguwo, ta tantere guhwe asi: “Tungikeni nge name, tate!”
35Nye age ta limburura asi: “Mumbyoge kuna ya kumbagere nge, yiyo ana ku hakana etungiko lyoge.”
36Esau ta tanta asi: “Mpili vana ku ruku Jakopo (edina Jakopo kuninka asi ‘Ta kotokere’), morwa ana kotokere nge nye ntaantani ruvali. Ukurona wange ga gusa, naina gogu hena ana hakana etungiko lyange.” Ta twikire ko hena kupura asi: “Kapi muna hupisa po etungiko limwe?”
37Isaka makura ta limburura Esau asi: “Tara, ame kuna mu tura asi a kare mupangeli goge. Vanavazina navenye kuna va mu pe va kare vakareli vendi; yiyo na mu pe hena nombuto novhinyu. Ntaantani ngapi nye omu nani ku rugana, munwange?”
38Esau makura ta pura oguhwe asi: “Tate, eswero limwe tupu mwa kara nalyo ndi? Tungikeni nge ko name, tate!” Esau makura ta ziguruka kulira.
39Guhwe Isaka ta mu limburura asi:
“Tara, ove ngo kara ure nevhu lyewa,
ove hena ngo kara ure neme lyekeguru.
40Ngo lisukisa kegonga.
Ngo ruganena mumbyoge.
Nye nsene ngo kara mupampi mokukondja,
ngo kuturuka mo mondjoko zendi.”
41Esau kwa nyengere Jakopo morweswero eli va mu swerere oguhwe. Esau makura ta lipura nomutjima asi: “Mazuva gokulira nomfa dotate pepi; ntani ngani dipaga mumbyange Jakopo.”
42Repeka apa va mu tanterere nonkango damunwendi gomukurona Esau, ta tumine munwendi gomunona Jakopo, va ka mu zigide. Makura ta mu tantere asi: “Tara, Esau kuna ku handukire, nyove ana hara kudipaga. 43Munwange, zuvha nge. Liwapaika o dukire koHarani, kwamukurwange Rabani, 44o ka kare ko tanko siruwo esi lina kutura ehandu lyamukuroge, 45dogoro noku ngali litura ehandu lyamukuroge, nga divare eyi ono mu rugana. Ntani ngani ku tumina va ka ku hare ko. Yinke nani litundilira po pwanamuvenye mu vavali mezuva limwe?”
Isaka ta tumu Jakopo kwaRabani
46Repeka ta tantere hena Isaka asi: “Mutjima gwange guna va roroka nye vana wovakadi vaHeti. Jakopo nsene a kwara po gumwe povana vaHeti, vaava tupu ava wosirongo esi — ame yinke, nampili kuna fu yi kare nye.”

Iliyochaguliwa sasa

Genesis 27: KWN

Kuonyesha

Shirikisha

Nakili

None

Je, ungependa vivutio vyako vihifadhiwe kwenye vifaa vyako vyote? Jisajili au ingia