Genesis 24
24
MukadaIsaka
1Abirahamu opo ngoso ana kurupilire nye, ano Hompa kwa mu tungikire mwanayinye eyi nga rugana. 2Age kwa tanterere mukareli gwendi gomukurona, ogu ga kere mepangero lyemona lyendi nalinye asi: “Tura kuwoko koge pokatji komaguru gange o gane. 3Ame kuna hara o tumbwidire nge nomugano kwaHompa, Karunga geguru nevhu, asi kapi ngo hehera munwange mukadi omu moKanani, omu na kara. 4To tengura kwetu, yiko no ka retera munwange Isaka mukadi kekoro lyange.”
5Mukareli ta mu pura asi: “Ogo mukadi nsene nga ka nyoka kuwiza name kosirongo esi, ngapi nye? Ngani ya tuma nye munoge, nga tengure kosirongo esi wa tunda ndi?”
6Abirahamu ta limburura asi: “Yi diva asi, munwange nokumutengwida ko si hena oko! 7Hompa, Karunga geguru, yige ga gusa nge membo lyotate nomosirongo sezimo lyange, yiyo ga tumbwidira nge nomugano asi, esi sirongo nga si gava koruvharo rwange. Yige nga hova kutuma muengeli gwendi komeho zoge, nkumwe ngo ka gwanene munwange mukadi. 8Ano ogo mukadi nsene ana nyoka kuwiza noge, makura ono manguruka ko ketumbwidiro lyokukwange. Nye mokutwara oko munwange, hawe, nokumutwara ko si.” 9Makura ogo mukareli ta tura kuwoko pokatji komaguru gaAbirahamu, hekurwendi, makura ta gana kweyi ana mu harere asi yiyo nga rugana.
10Ogo mukareli makura ta gusa nongameru murongo dahekurwendi, nomauhwi gomanzi gomulyo, ta rongere, ta zi kositata saNahoro, moMesopotamiya. 11Eyi ga ka sika, makura ta ninki nongameru di rare petope lyoponze zositata. Alyo lina gomboka, paapa ava ya vhetere vakadi mema. 12Makura ta kanderere asi: “Hompa, Karunga gwahekurwange Abirahamu, pe nge erago naina, o sikise mo etumbwidiro lyoge lyakwahekurwange. 13Ame nyame ogu petope, apa ava wiza vakadona womositata va ya vhete mema. 14Ano mukadona ogu nani tantera asi, ‘Ko hegumwisa si kavaza koge ni nwe mo,’ nye a tante asi, ‘Nwa mo, nonongameru doge nado nani di vhetagwira,’ ngano yige nye ogu ono horowere mukereli goge Isaka. Nsene yi kara po eyi, ntani ni diva asi ono sikisa mo etumbwidiro lyahekurwange.”
15Haga za mokuuyunga, Repeka age kuna kuwiza. Age kwa kere munwaBetuwere, Betuwere munwaMilika, mukadaNahoro, mukurwaAbirahamu gomugara, age kuna simbi kavaza kepepe lyendi. 16Mukadona kwa kere muwa unene momutaro, age kapi ga mu kundama rumwe mugara. Age ta gurumuka korunone, ta zwida kavaza kendi, makura ta kanduka hena.
17Makura mukareli ta duka a mu simbagwire ta tanta asi: “Ko kwafa nge ni nwe mo nakauke mema mokavaza koge.” 18Age ta limburura asi: “Nwa mo, Tate.” Age makura ta hegumwine usimbu kavaza kwendi, makura ta mu pe a nwe mo. 19Eyi ga mana kumupa mema a nwe, ta tanta asi: “Nongameru doge nado tani di vhetagwire dogoro tadi kumwa.” 20Age makura ta genderere kutjira mema gomokavaza kendi metemba, ta dukire hena kondjombo a ka vhete, age kwa vhetagwilire nongameru dendi nadinye. 21Mugara ta mwena pore, oku ta mu tara a dive nsene asi Hompa na ragopeka nzira zendi ndi na zi hudipika.
22Nongameru eyi da mana kunwa, makura ogo mugara ta gusa linga zongorodo zekezuru, mukumo gwazo nogarama ntano‐nazimwe. Ta gusa hena nomusere mbali dokomawoko gendi, mukumo gwado ngorodo zonogarama efere nonomurongo mbali. 23Age ta pura asi: “Ove o munwalye? Nina ku kanderere, tantera nge. Membo lyoguho nye natu ka gwana mo evega lyokukarara?”
24Age ta limburura asi: “Ame munwaBetuwere, Betuwere munwaMilika gwawo naNahoro.” 25Ga ninka ta mu tantere asi: “Ose kwa kara norwenge nowayi wounzi unene nonzugo zokurara.”
26Makura mugara ta nyongeke mutwe gwendi a kanderere Hompa, 27ta tanta asi: “Hompa Karunga gwahekurwange Abirahamu va mu fumadeke, ogu ga dira kugusa po uwa wendi noulimburukwi wendi pwahekurwange. Ame ko name Hompa ana pitisire nge monzira dogoro kembo lyezimo lyahekurwange.”
28Mukadona makura ta dukire komunkanzo gozina, makura ta ka va sansekera nayinye eyi ya horokere ko. 29Repeka ga kere nampanzendi, edina lyendi Rabani. Rabani makura ta pwaga, a dukire kogo mugara ga kere korunone. 30Tupu ga mona linga nonomusere komawoko gampanzendi, a zuvhe hena nonkango dampanzendi asi, ngesi ngesi yimo ana uyunga name ogo mugara, makura ta zi kogo mugara, age kuna sikama ponongameru porunone, 31ta mu tantere asi: “Hwilira mo, ove ogu ga tungika Hompa! Ee, yinke yokusikamena ponze, ame na wapeke nzugo nevega hena lyonongameru?”
32Ogo mugara makura ta hwilire membo — nongameru tava di kuturura tava di pe rwenge nowayi, age tava mu pe mema gokulikuhwa konompadi dendi nedi dovagara ava ga gendere nawo. 33Awo makura tava mu tulire nondya asi a lye; age ta tanta asi: “Ame kapi nani lya na hana kusanseka simpe mbudi zange.”
Rabani ta mu limburura asi: “Zi sanseka tupu.”
34Age ta tanta asi: “Ame ni mukareli gwaAbirahamu. 35Hompa kwa tungika unene hekurwange, ntaantani ngawo zonene ana kara. Age kwa mu pa nonzwi dononzi nonongombe dononzi nosisiliveli nongorodo novakareli wovagara nava wovakadi nonongameru noyindongili. 36Ano Sara, mukadahekurwange, ga hampurukira hekurwange munona gomugara moukurupe wendi; age yiyo ga mu pa nayinye eyi ga weka. 37Hekurwange kwa ganena nge asi: ‘Nokugusira si munwange mukadi movakadona woVakanani womosirongo esi na tunga; 38nye zende kembo lyotate kezimo lyange, yiko ngo ka harera munwange mukadi.’
39“Makura ame tani tantere nye hekurwange asi: ‘Mukadi mpamwe kapi nga ka hara kuwiza kumwe name.’
40“Makura age ta limburura nge asi: ‘Hompa, ogu ani ruganene, nga tuma muengeli gwendi kumwe noge. Age nga ragopeka nzira zoge, nkumwe ngo ka harere munwange mukadi gemezimo lyetu nemembo lyotate. 41Nsene ngo ka sika kezimo lyange, nye va nyoke kumukupa, makura ono manguruka mo nye momugano gwange.’
42“Ano naina nyame nye ogu, nina wiza apa porunone, yiyo na tanta asi: ‘Hompa, Karunga gwahekurwange Abirahamu, ngano to ragopekere nge nzira zange! 43Tara nye, nyame ogu nina sikama porunone, ngano yi horoke ngesi asi mukadona ogu na tunda mositata, a ya vhete mema, ni mu tantere asi: Ninka ni nwe mo tumema mokavaza koge. 44Makura age a limburure nge asi: Nweni mo, nonongameru deni tani di vhetagwire, makura ogo yige nye mukadi, ogu ga horowera Hompa munwahekurwange.’
45“Hana za mokuyilipura nomutjima gwange, Repeka kuna kutunda mositata nokavaza kendi kepepe, a gurumuke, a ya vhete mema korunone. Makura ame tani mu ninki asi: ‘Ko pe nge, ni nwe mo.’
46“Makura age ta genderere kukahegumuna ko kepepe lyendi, ta tanta asi: ‘Nweni mo tupu, nonongameru deni nado nani di vhetagwira, dogoro tadi kumwa.’ Makura ame tani nu, nongameru nado ta di vhetagwire.
47“Apa na mu pura asi: ‘Ove munwalye?’ Gwina ta limburura asi: ‘Ame munwaBetuwere zaNahoro, ogu ga mu retera Milika.’ Makura yipo nye na mu kogekere linga mezuru, tani mu pandaike nomusere komawoko gendi. 48Ame tani linyongamene, ni twe sipara sange pevhu kosipara saHompa Karunga gwahekurwange Abirahamu, ni pande Hompa, ogu ga gendesa nge nawa monzira, ni ya harere munwahekurwange muna gomukadi gwamukurwahekurwange. 49Ano nsene muna hara kuhorwera hekurwange uwa noulimburukwi, tantereni nge, ndi nsene muna nyoka, napo tantereni nge, ame ni vyuke korulyo ndi korumoho.”
50ORabani naBetuwere makura tava limburura asi: “Eyi yininke kwaHompa yina tundu; ose omu natu tanta asi yiwa ndi yidona ngapi. 51Repeka gogo ana sikama komeho zoge, mu gusa mu ze, nkumwe nga ka kare mukada munwahekuroge, moomu ga tanta Hompa.”
52Mukareli gwaAbirahamu kwa zuvha tupu nonkango dawo, makura ta nyongamene pevhu kosipara saHompa.
53Mukareli makura ta rongorora mo yininke yosisiliveli neyi yongorodo noyidwara, makura ta yi pe Repeka. Age ta pe hena mpanzaRepeka nozina yininke yondiro.
54Awo makura tava li oku tava nu, mwene novagara ava ga gendere nawo, masiku makura tava rara. Eyi vana kupinduka ngurangura, age ta tanta asi: “Rekereni nge ni ze kwahekurwange.”
55Nye mpanzendi nozina tava tanta asi: “Siga mukadona a kare pwetu mazuva gamwe, nampili murongo; ngaga pwa ntani nye nga za.”
56Nye age ta limburura asi: “Yinke hena eyi nomu silikira nge, age Hompa ana ragopeke nzira zange. Rekereni nge ni ze kwahekurwange.”
57Awo tava tanta asi: “Tanko tu zigide mukadona tu ya zuvhe mwamwene.” 58Awo makura tava zigida Repeka tava ya mu pura asi: “Ono hara kuza nogu mugara ndi?”
Age ta limburura asi: “Nhi, na hara.”
59Awo makura tava rekere mpanzawo Repeka nomureli gwendi va ze kumwe nomukareli gwaAbirahamu novantu vendi. 60Awo makura tava tungike Repeka tava tanta asi:
“Ove mpanzetu, ngo kare zinya zomayovhi nomayovhi, ruvharo roge ngaru kwate yitata yononkore daro.” 61Makura Repeka novakareli vendi tava katuka, tava rondo konongameru va kwame ogo mugara. Mukareli gwaAbirahamu makura ta gusa Repeka va ze.
62Ano Isaka kwa tundililire koyiha yetope lyaRahayi Royi; yeeyi age kwa tungire mosirongo sorwaMbindakano. 63Isaka kwa zire koyiha yongurova mosanzara a ka lipure nomutjima. Ga zumba meho gendi, ta mono nongameru dina kuwiza. 64Repeka nage ana kuzumba meho gendi, makura ta mono Isaka. Age makura ta hegumuka ko kongameru, 65ta pura mukareli asi: “Mugarake gwina ana kugenda mosanzara ana kutusimbagwira?”
Mukareli ta limburura asi: “Yige hekurwange.” Age makura ta gusa mwaye ta gu likudumike.
66Mukareli makura ta sansekere Isaka nayinye eyi ga rugene. 67Isaka makura ta mu hwilida motenta zozina Sara, Repeka makura ta kara mukadendi; age kwa mu here. Eyi yiyo ya hengagwidire Isaka mokulira nomfa dozina.
Iliyochaguliwa sasa
Genesis 24: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003
Genesis 24
24
MukadaIsaka
1Abirahamu opo ngoso ana kurupilire nye, ano Hompa kwa mu tungikire mwanayinye eyi nga rugana. 2Age kwa tanterere mukareli gwendi gomukurona, ogu ga kere mepangero lyemona lyendi nalinye asi: “Tura kuwoko koge pokatji komaguru gange o gane. 3Ame kuna hara o tumbwidire nge nomugano kwaHompa, Karunga geguru nevhu, asi kapi ngo hehera munwange mukadi omu moKanani, omu na kara. 4To tengura kwetu, yiko no ka retera munwange Isaka mukadi kekoro lyange.”
5Mukareli ta mu pura asi: “Ogo mukadi nsene nga ka nyoka kuwiza name kosirongo esi, ngapi nye? Ngani ya tuma nye munoge, nga tengure kosirongo esi wa tunda ndi?”
6Abirahamu ta limburura asi: “Yi diva asi, munwange nokumutengwida ko si hena oko! 7Hompa, Karunga geguru, yige ga gusa nge membo lyotate nomosirongo sezimo lyange, yiyo ga tumbwidira nge nomugano asi, esi sirongo nga si gava koruvharo rwange. Yige nga hova kutuma muengeli gwendi komeho zoge, nkumwe ngo ka gwanene munwange mukadi. 8Ano ogo mukadi nsene ana nyoka kuwiza noge, makura ono manguruka ko ketumbwidiro lyokukwange. Nye mokutwara oko munwange, hawe, nokumutwara ko si.” 9Makura ogo mukareli ta tura kuwoko pokatji komaguru gaAbirahamu, hekurwendi, makura ta gana kweyi ana mu harere asi yiyo nga rugana.
10Ogo mukareli makura ta gusa nongameru murongo dahekurwendi, nomauhwi gomanzi gomulyo, ta rongere, ta zi kositata saNahoro, moMesopotamiya. 11Eyi ga ka sika, makura ta ninki nongameru di rare petope lyoponze zositata. Alyo lina gomboka, paapa ava ya vhetere vakadi mema. 12Makura ta kanderere asi: “Hompa, Karunga gwahekurwange Abirahamu, pe nge erago naina, o sikise mo etumbwidiro lyoge lyakwahekurwange. 13Ame nyame ogu petope, apa ava wiza vakadona womositata va ya vhete mema. 14Ano mukadona ogu nani tantera asi, ‘Ko hegumwisa si kavaza koge ni nwe mo,’ nye a tante asi, ‘Nwa mo, nonongameru doge nado nani di vhetagwira,’ ngano yige nye ogu ono horowere mukereli goge Isaka. Nsene yi kara po eyi, ntani ni diva asi ono sikisa mo etumbwidiro lyahekurwange.”
15Haga za mokuuyunga, Repeka age kuna kuwiza. Age kwa kere munwaBetuwere, Betuwere munwaMilika, mukadaNahoro, mukurwaAbirahamu gomugara, age kuna simbi kavaza kepepe lyendi. 16Mukadona kwa kere muwa unene momutaro, age kapi ga mu kundama rumwe mugara. Age ta gurumuka korunone, ta zwida kavaza kendi, makura ta kanduka hena.
17Makura mukareli ta duka a mu simbagwire ta tanta asi: “Ko kwafa nge ni nwe mo nakauke mema mokavaza koge.” 18Age ta limburura asi: “Nwa mo, Tate.” Age makura ta hegumwine usimbu kavaza kwendi, makura ta mu pe a nwe mo. 19Eyi ga mana kumupa mema a nwe, ta tanta asi: “Nongameru doge nado tani di vhetagwire dogoro tadi kumwa.” 20Age makura ta genderere kutjira mema gomokavaza kendi metemba, ta dukire hena kondjombo a ka vhete, age kwa vhetagwilire nongameru dendi nadinye. 21Mugara ta mwena pore, oku ta mu tara a dive nsene asi Hompa na ragopeka nzira zendi ndi na zi hudipika.
22Nongameru eyi da mana kunwa, makura ogo mugara ta gusa linga zongorodo zekezuru, mukumo gwazo nogarama ntano‐nazimwe. Ta gusa hena nomusere mbali dokomawoko gendi, mukumo gwado ngorodo zonogarama efere nonomurongo mbali. 23Age ta pura asi: “Ove o munwalye? Nina ku kanderere, tantera nge. Membo lyoguho nye natu ka gwana mo evega lyokukarara?”
24Age ta limburura asi: “Ame munwaBetuwere, Betuwere munwaMilika gwawo naNahoro.” 25Ga ninka ta mu tantere asi: “Ose kwa kara norwenge nowayi wounzi unene nonzugo zokurara.”
26Makura mugara ta nyongeke mutwe gwendi a kanderere Hompa, 27ta tanta asi: “Hompa Karunga gwahekurwange Abirahamu va mu fumadeke, ogu ga dira kugusa po uwa wendi noulimburukwi wendi pwahekurwange. Ame ko name Hompa ana pitisire nge monzira dogoro kembo lyezimo lyahekurwange.”
28Mukadona makura ta dukire komunkanzo gozina, makura ta ka va sansekera nayinye eyi ya horokere ko. 29Repeka ga kere nampanzendi, edina lyendi Rabani. Rabani makura ta pwaga, a dukire kogo mugara ga kere korunone. 30Tupu ga mona linga nonomusere komawoko gampanzendi, a zuvhe hena nonkango dampanzendi asi, ngesi ngesi yimo ana uyunga name ogo mugara, makura ta zi kogo mugara, age kuna sikama ponongameru porunone, 31ta mu tantere asi: “Hwilira mo, ove ogu ga tungika Hompa! Ee, yinke yokusikamena ponze, ame na wapeke nzugo nevega hena lyonongameru?”
32Ogo mugara makura ta hwilire membo — nongameru tava di kuturura tava di pe rwenge nowayi, age tava mu pe mema gokulikuhwa konompadi dendi nedi dovagara ava ga gendere nawo. 33Awo makura tava mu tulire nondya asi a lye; age ta tanta asi: “Ame kapi nani lya na hana kusanseka simpe mbudi zange.”
Rabani ta mu limburura asi: “Zi sanseka tupu.”
34Age ta tanta asi: “Ame ni mukareli gwaAbirahamu. 35Hompa kwa tungika unene hekurwange, ntaantani ngawo zonene ana kara. Age kwa mu pa nonzwi dononzi nonongombe dononzi nosisiliveli nongorodo novakareli wovagara nava wovakadi nonongameru noyindongili. 36Ano Sara, mukadahekurwange, ga hampurukira hekurwange munona gomugara moukurupe wendi; age yiyo ga mu pa nayinye eyi ga weka. 37Hekurwange kwa ganena nge asi: ‘Nokugusira si munwange mukadi movakadona woVakanani womosirongo esi na tunga; 38nye zende kembo lyotate kezimo lyange, yiko ngo ka harera munwange mukadi.’
39“Makura ame tani tantere nye hekurwange asi: ‘Mukadi mpamwe kapi nga ka hara kuwiza kumwe name.’
40“Makura age ta limburura nge asi: ‘Hompa, ogu ani ruganene, nga tuma muengeli gwendi kumwe noge. Age nga ragopeka nzira zoge, nkumwe ngo ka harere munwange mukadi gemezimo lyetu nemembo lyotate. 41Nsene ngo ka sika kezimo lyange, nye va nyoke kumukupa, makura ono manguruka mo nye momugano gwange.’
42“Ano naina nyame nye ogu, nina wiza apa porunone, yiyo na tanta asi: ‘Hompa, Karunga gwahekurwange Abirahamu, ngano to ragopekere nge nzira zange! 43Tara nye, nyame ogu nina sikama porunone, ngano yi horoke ngesi asi mukadona ogu na tunda mositata, a ya vhete mema, ni mu tantere asi: Ninka ni nwe mo tumema mokavaza koge. 44Makura age a limburure nge asi: Nweni mo, nonongameru deni tani di vhetagwire, makura ogo yige nye mukadi, ogu ga horowera Hompa munwahekurwange.’
45“Hana za mokuyilipura nomutjima gwange, Repeka kuna kutunda mositata nokavaza kendi kepepe, a gurumuke, a ya vhete mema korunone. Makura ame tani mu ninki asi: ‘Ko pe nge, ni nwe mo.’
46“Makura age ta genderere kukahegumuna ko kepepe lyendi, ta tanta asi: ‘Nweni mo tupu, nonongameru deni nado nani di vhetagwira, dogoro tadi kumwa.’ Makura ame tani nu, nongameru nado ta di vhetagwire.
47“Apa na mu pura asi: ‘Ove munwalye?’ Gwina ta limburura asi: ‘Ame munwaBetuwere zaNahoro, ogu ga mu retera Milika.’ Makura yipo nye na mu kogekere linga mezuru, tani mu pandaike nomusere komawoko gendi. 48Ame tani linyongamene, ni twe sipara sange pevhu kosipara saHompa Karunga gwahekurwange Abirahamu, ni pande Hompa, ogu ga gendesa nge nawa monzira, ni ya harere munwahekurwange muna gomukadi gwamukurwahekurwange. 49Ano nsene muna hara kuhorwera hekurwange uwa noulimburukwi, tantereni nge, ndi nsene muna nyoka, napo tantereni nge, ame ni vyuke korulyo ndi korumoho.”
50ORabani naBetuwere makura tava limburura asi: “Eyi yininke kwaHompa yina tundu; ose omu natu tanta asi yiwa ndi yidona ngapi. 51Repeka gogo ana sikama komeho zoge, mu gusa mu ze, nkumwe nga ka kare mukada munwahekuroge, moomu ga tanta Hompa.”
52Mukareli gwaAbirahamu kwa zuvha tupu nonkango dawo, makura ta nyongamene pevhu kosipara saHompa.
53Mukareli makura ta rongorora mo yininke yosisiliveli neyi yongorodo noyidwara, makura ta yi pe Repeka. Age ta pe hena mpanzaRepeka nozina yininke yondiro.
54Awo makura tava li oku tava nu, mwene novagara ava ga gendere nawo, masiku makura tava rara. Eyi vana kupinduka ngurangura, age ta tanta asi: “Rekereni nge ni ze kwahekurwange.”
55Nye mpanzendi nozina tava tanta asi: “Siga mukadona a kare pwetu mazuva gamwe, nampili murongo; ngaga pwa ntani nye nga za.”
56Nye age ta limburura asi: “Yinke hena eyi nomu silikira nge, age Hompa ana ragopeke nzira zange. Rekereni nge ni ze kwahekurwange.”
57Awo tava tanta asi: “Tanko tu zigide mukadona tu ya zuvhe mwamwene.” 58Awo makura tava zigida Repeka tava ya mu pura asi: “Ono hara kuza nogu mugara ndi?”
Age ta limburura asi: “Nhi, na hara.”
59Awo makura tava rekere mpanzawo Repeka nomureli gwendi va ze kumwe nomukareli gwaAbirahamu novantu vendi. 60Awo makura tava tungike Repeka tava tanta asi:
“Ove mpanzetu, ngo kare zinya zomayovhi nomayovhi, ruvharo roge ngaru kwate yitata yononkore daro.” 61Makura Repeka novakareli vendi tava katuka, tava rondo konongameru va kwame ogo mugara. Mukareli gwaAbirahamu makura ta gusa Repeka va ze.
62Ano Isaka kwa tundililire koyiha yetope lyaRahayi Royi; yeeyi age kwa tungire mosirongo sorwaMbindakano. 63Isaka kwa zire koyiha yongurova mosanzara a ka lipure nomutjima. Ga zumba meho gendi, ta mono nongameru dina kuwiza. 64Repeka nage ana kuzumba meho gendi, makura ta mono Isaka. Age makura ta hegumuka ko kongameru, 65ta pura mukareli asi: “Mugarake gwina ana kugenda mosanzara ana kutusimbagwira?”
Mukareli ta limburura asi: “Yige hekurwange.” Age makura ta gusa mwaye ta gu likudumike.
66Mukareli makura ta sansekere Isaka nayinye eyi ga rugene. 67Isaka makura ta mu hwilida motenta zozina Sara, Repeka makura ta kara mukadendi; age kwa mu here. Eyi yiyo ya hengagwidire Isaka mokulira nomfa dozina.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003