Exodus 8
8
Mafuma
1 Hompa kwa uyungire hena naMosesa asi: “Zende kwaFarawo, o ka mu tantere asi: ‘Hompa ta tanta asi: Siga mbunga zange zi ze, nkumwe ngava ka kerere nge. 2Ano nsene to nyoka kuvasiga va ze, sirongo soge nasinye ngano ngani si hepekesa komafuma. 3Mukuro gwaNili ngano ngagu likoha mafuma. Ago ngaga kanduka ga hwilire mombara zoge nomonzugo zokurara nopouro woge, nomomambo govakereli woge nomombunga zoge nomomasuga goge gonomboroto nopomarupasa goge gokuduvira. 4Ano mafuma ngaga ku vatukira nombunga zoge novakareli woge navenye.’ ”
5 Hompa makura ta twikire ko hena kuuyunga naMosesa asi: “Tantera Arona asi: ‘Gonona kuwoko koge nompango zoge kontunda zotumukuro nokomaruwombora gomema nokoyidiva, o rete mafuma moEgipite mudima.’ ” 6Ano Arona makura ta gonwene kuwoko kwendi kontunda zomema gaEgipite. Mafuma makura taga wiza, taga zura sirongo saEgipite nasinye. 7Nye nompure nado tadi yi rugana pasiumpure wado, nado tadi reta mafuma mosirongo saEgipite.
8Makura Farawo ta zigida Mosesa naArona, ta tanta asi: “Kanderereni kwaHompa asi a tu guse name nombunga zange mafuma. Ntani ngani siga mbunga zi ze asi zi ka zambere Hompa.”
9Nye Mosesa ta tantere Farawo asi: “Nyove wa fumana komeho zange! Tantera nge asi siruwoke nani ku kandererera nyamoge novakareli woge nombunga zoge, asi mafuma ga ku tunde nomononzugo doge ga pwe mo, ga hupe momukuro gwaNili mwelike?”
10Age makura ta limburura asi: “Mungura.”
Gwina ta tanta asi: “Yimo ngayi kara moomu ono uyunga, nkumwe ngo dive asi kutupu ogu ga sika pwaHompa Karunga gwetu. 11Mafuma ngaga mu siga, nyamoge nembo lyoge novakareli woge nombunga zoge, gomomukuro gwaNili gelike yigo ngaga hupa mo.” 12Ano oMosesa naArona makura tava tundu ko kwaFarawo. Mosesa makura ta kugu kwaHompa morwamafuma aga ga kandwilire Farawo. 13Makura Hompa nage ta rugana moomu ga yi mu hundilire Mosesa. Mafuma makura taga fu mo nomonomukunda nomowiza. 14Awo makura tava ga pongaike nondambo nondambo, sirongo kuna kunuka uworedi. 15Farawo apa ga mwene, asi mahepeko kuna litura ko hasa, makura mutjima gwendi tagu kukutike hena a dire kupurakena nonkango daMosesa naArona, moomu tupu ga yi tente Hompa.
Nomwe
16 Hompa ta twikire ko hena kuuyunga naMosesa asi: “Tantera Arona asi: ‘Gonona mpango zoge, makura o toone mbundu zevhu, zi lisitunuke nomwe mosirongo saEgipite nasinye.’ ” 17Nawo yimo va yi rugana ngorooro. Arona makura ta gonona kuwoko kwendi nompango, makura ta toona mbundu zevhu, nomwe makura tadi ngundama kovantu nokoyimuna. Mbundu zevhu nazinye kwa lisitunukire nomwe mosirongo saEgipite nasinye. 18Nompure nado da ruganene ngorooro pasiumpure wado asi di rete nomwe, nye kapi da yi vhulire. Nomwe yimo nye da ngundamene ngoso kovantu nokoyimuna. 19Nompure makura tadi tantere Farawo asi: “Sininke esi nyara zaKarunga.” Nye mutjima gwaFarawo tagu kukuta, kapi ga va purakenene, moomu tupu ga yi tente Hompa.
Nondi dokuhuma
20 Hompa ta twikire tupu hena kuuyunga naMosesa asi: “Ngo meneke ngurangura, makura to ka ndindira Farawo, yeeyi age nga pwaga a ze komema, ano ka mu tantere asi: ‘Hompa ta tanta asi: Siga mbunga zange zi ze, nkumwe ngava ka kerere nge. 21Ano nsene kapi ono kuvagava va ze, tara, ngano ngani mu tumina nove novakareli woge nombunga zoge nomambo goge madugi gonondi dokuhuma, mambo nagenye goVaegipite ngaga zura nondi dokuhuma, nevhu eli va tunga nalyo ngosikwawo. 22Nye mezuva olyo sirongo saGoseni, esi za tunga mbunga zange, ngani si ninka si kare namopeke, kuninka asi kapi ngamu kara amo nondi dokuhuma, o dive asi nyame Hompa mwenyasirongo. 23Ano ame ngani tura po malisigo geyoworoko pokatji kombunga zange nezi zoge. Mungura yipo ngasi kara po esi sitetu.’ ” 24Hompa makura ta si rugana. Madugi gonondi dokuhuma taga wiza membo lyaFarawo nomomambo govakareli vendi nomosirongo saEgipite nasinye. Sirongo kwa mwene runyando konondi dokuhuma.
25Farawo makura ta zigida oMosesa naArona, ta va tantere asi: “Zendeni, mu ka zambere Karunga gweni moomu mosirongo.”
26Nye Mosesa ta limburura asi: “Nokuwapa si kurugana ngoso, yeeyi eyi atu zambere Hompa Karunga gwetu, koVaegipite awo sidira. Ano nsene nye tu zamba oyo yosidira koVaegipite, awo kuna kutara, nye kapi va tu dipage nomamanya ndi? 27Tu siga tupu, tu gende mazuva gatatu tu ze momburundu, nkumwe ngatu ka zambere Hompa Karunga gwetu moomu nga tu pangera.”
28Makura Farawo ta tanta asi: “Ngani mu siga mu ze mu ka zambere Hompa Karunga gweni momburundu, nye nokuza si ure unene. Kandererereni nge.”
29Mosesa ta tanta asi: “Tara, ame tani tundu po poge ni ka kanderere Hompa. Nondi dokuhuma, mungura Farawo novakareli vendi nombunga zendi tadi va sigi. Nye Farawo ga ha tu kumbagera hena, a dire kusiga mbunga zi ze, zi ka zambere Hompa.”
30Mosesa makura ta tundu po pwaFarawo, a ka kanderere Hompa. 31Ano Hompa nage ta rugana moomu ga uyungire Mosesa. Age makura ta gusa madugi gonondi dokuhuma koFarawo novakareli vendi nombunga zendi. Kapi pwa hupire nampili ndi zimwe. 32Nye Farawo narooru si ta kukutike mutjima gwendi, a dire kusiga mbunga zi ze.
Iliyochaguliwa sasa
Exodus 8: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003
