Exodus 7
7
1 Hompa kwa tanterere Mosesa asi: “Ame tani ku tura o kare ngwendi Karunga kwaFarawo, ano mukuroge Arona yige nga kara muporofete goge. 2Nkenye eyi ngani ku tantera yiyo yokuuyunga, ano ogo mukuroge Arona yige nye gokukauyunga naFarawo, asi nga sige Vaisraeli va tunde mo mosirongo sendi. 3Ame ngani kukutika mutjima gwaFarawo, nkumwe ngani rugane yidiviso noyitetu yoyinzi moEgipite. 4Nye Farawo kapi nga mu zuvha. Vaegipite ngani va twika kuwoko kwange, makura tani dirura vakwayita vange, mbunga zange zaIsraeli, mosirongo saEgipite nomahepeko gomanene. 5Ntani ngava diva Vaegipite asi ame Hompa, ntene ngani gonwena kuwoko kwange kontunda zaEgipite, ngani guse mo Vaisraeli mokatji kawo.” 6OMosesa naArona makura tava rugana moomu ga va tanterere Hompa. 7Mosesa kwa kere nonomvhura nomurongo ntano‐nantatu, ano mukurwendi Arona age nomurongo ntano‐nantatu nantatu, apa va uyungire naFarao.
Mpango zaArona
8 Hompa yiyo ga tanterere oMosesa naArona nonkango edi asi: 9“Nsene a ka mu tantera Farawo asi: ‘Ruganeni po sitetu,’ to tantere Arona asi: ‘Gusa mpango zoge, o zi zugumine komeho zaFarawo, makura tazi lisitunuka ezoka.’ ” 10OMosesa naArona makura tava zi kwaFarawo, tava ka rugana moomu ga va tanterere Hompa. Arona ta zuguma mpango zendi komeho zaFarawo novantu vendi, makura tazi lisitunuka ezoka. 11Farawo makura ta zigida vanongo nonompure. Ado nompure daEgipite nado tadi rugana ngorooro moupure wado. 12Nkenye ogu ta zugumine mpango zendi pevhu, makura tazi lisitunuka ezoka. Nye mpango zaArona makura tazi mini nompango dawo. 13Nye mutjima gwaFarawo ago gwanywe, nokuvazuvha si moomu ga tente Hompa.
Mahepeko taga gwana Vaegipite: Honde
14 Hompa kwa tanterere Mosesa asi: “Farawo mutjima gwendi kuna gu kukutike, ana nyoka kusiga mbunga zi ze. 15Ngurangura to zi kwaFarawo; age nga pwaga a ze komema, ngo ka sikame konontere daNili ngomu ka gwanekere nendi. Ngo piture mokuwoko koge ezi mpango za lisitunukire ezoka, 16ngo mu tantere asi: ‘Hompa, Karunga goVahebeli, yige ana tumu nge koge neraka eli asi: Siga mbunga zange zi ze, va ka kerere nge momburundu. Tara, dogoro naina eli ove nokuzuvha si. 17Hompa ta tanta asi: Apa yipo no yi divira asi ame nyame Hompa. Tara, ame tani toona pomema gaNili nompango ezi zina kara mokuwoko kwange, makura ga lisitunuke honde. 18Nomfi domwaNili ngadi fa, mukuro ngagu nuka unene. Ano Vaegipite ngava tonda kunwa mema gamo.’ ”
19 Hompa ta twikire ko hena kuuyunga naMosesa asi: “Gusa mpango zoge o gonone kuwoko koge kontunda zomema gomoEgipite, kontunda zotumukuro nokontunda zomaruwombora gomema noyidiva nokontunda zanapenye apa pwa ponga mema, nkumwe ga kare honde, nomomatenga nomoyipako yomamanya.”
20OMosesa naArona makura tava rugana moomu ana va tantere Hompa. Arona kwa zerwire mpango, makura ta zi toona pomema aga ga kere moNili, age Farawo novantu vendi kuna kutara. Makura mema gomoNili nagenye taga lisitunuka honde. 21Ano nomfi edi da kere momukuro tadi fu. Mukuro gwaNili kuna kunuka, Vaegipite kapi va vhulire kunwa mema gomomukuro gwaNili. Sirongo nasinye saEgipite honde zelike za kere mo. 22Nye nompure daEgipite nado tadi yi rugana pasiumpure wado. Ano mutjima gwaFarawo tagu kukuta, age kapi ga va purakenene, moomu ga yi tente Hompa. 23Farawo makura ta siguruka a ze kombara zendi, nokomutjima kapi ga yi peke ko. 24Vaegipite navenye ngava pongo konontere domukuro va sime mema gokunwa, yeeyi mema gomoNili nokuwapa si kuganwa.
25Mazuva gatano‐nagavali ga pitire po kutunda apa ga toonene Hompa mukuro gwaNili.
Iliyochaguliwa sasa
Exodus 7: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003
