Exodus 3
3
Hompa ta zigida Mosesa
1Mosesa nga lisa nonzwi datamweyi zendi Jeturo, mupristeli gwaMidiyana. Age kwa twere nonzwi kesinya kwina lyomburundu, makura ta wiza pondundu zaKarunga, edina lyazo Sinayi. 2Muengeli makura ta mu monekere momundiro gokutwera pokatji kosihwa. Ano ga tara ko hena, sihwa kuna kupya momundiro, nye aso nokuveva si! 3Ano Mosesa makura ta tanta asi: “Tanko ni hede ko ni ka tare eli emoneko lyenene, asi yinke sina kudilira kupya sihwa.”
4Ano Hompa ana kumumona asi ta heda ko, makura Karunga ta mu zigire age mosihwa, ta tanta asi: “Mosesa, Mosesa!”
Gwina ta limburura asi: “Nyame ogu.”
5Age ta tanta asi: “Wa ha heda ko. Hutura ko nonkaku konompadi doge, yeeyi evega eli ono sikama kwa pongoka.” 6Age ta mu tantere hena asi: “Ame nyame Karunga goguhwo, Karunga gwaAbirahamu naKarunga gwaIsaka naKarunga gwaJakopo.” Mosesa makura ta kudumike sipara sendi, yeeyi age kwa tjilire kutara Karunga.
7 Hompa ta tanta asi: “Udigu wombunga zange ezi za kara moEgipite na u mono nawa‐nawa; nkugo zawo kombinga zovaruganesi vawo, na zi zuvhu; nhi, ruhepo rwawo na ru diva. 8Yipo nye na hegumukire asi ni ya va zoworore mo mokuwoko koVaegipite, ngani va guse mo mosirongo oso, ni va tware kosirongo sosiwa somaporeza, kosirongo esi sa zura masini nousi, oku va hingira Vakanani noVaheti noVaamoli noVaperesi noVahevhi noVayebusi. 9Tara, ntaantani nkugo zoVaisraeli zina ya siki kwange. Ame hena nina mono eninkiliromo eli vana kuvaninkilira mo Vaegipite. 10Wiza, nkumwe ni ku tume kwaFarawo, o ka guse mo mbunga zange zaIsraeli moEgipite.”
11Nye Mosesa ta limburura Karunga asi: “Nyame yilye ni ka ze kwaFarawo asi ni ka guse mo Vaisraeli moEgipite?”
12Karunga ta limburura asi: “Ame ngani kara noge, ano eyi yiyo ngayi kara sidiviso sokuninka asi nyame nina ku tumu. Nsene ngo gusa mo mbunga moEgipite, ngomu ya ruganena Karunga pondundu ezi.”
13Mosesa makura ta limburura Karunga asi: “Nsene nani za koVaisraeli ni ka tante asi: ‘Karunga goguhyeni yige ana tumu nge kweni,’ awo va ka pure nge asi: ‘Edina lyendi yige yilye?’ Ame omu nani ka va limburura ngapi?”
14Ano Karunga ta tantere Mosesa asi: “AME NYAME.” Age ta tanta hena asi: “Yimo nye no ka limburura Vaisraeli ngesi asi: AME NYAME yige ana tumu nge kweni.” 15Karunga ta tantere hena Mosesa asi: “Eyi yiyo no ka tantera Vaisraeli asi Hompa Karunga gozinyakurweni Karunga gwaAbirahamu naKarunga gwaIsaka naKarunga gwaJakopo, yige ana tumu nge kweni. Eli yilyo edina lyange lyanarunye, alyo yilyo sidiworokeso sange somaruvharo geni nagenye. 16Zende o ka pongaike masimbi goVaisraeli o ka va tantere asi: ‘Hompa Karunga gozinyakurweni yige ana monekere nge, Karunga gwaAbirahamu naIsaka naJakopo, yiyo ana tanta asi: Ame kwa mu dingura, yiyo na mona eyi ava mu rugana moEgipite. 17Ame yiyo nina tokora asi: Tani mu gusa mo moudigu waEgipite ni mu ninke mu ze kosirongo soVakanani noVaheti noVaamoli noVaperesi noVahevhi noVayebusi, kosirongo sa zura masini nousi.’
18“Awo nava ka ku zuvha. Ove makura to ka za nomasimbi goVaisraeli kwahompa gwaEgipite, tomu ka mu tantera asi: ‘Tuna kanderere tu siga ngatu gende ure womazuva gatatu tu ze momburundu, ngatu ka zambere Hompa Karunga gwetu!’ 19Nye ame nina yi diva asi, hompa gwaEgipite kapi nga mu siga asi mu ze nomokuwoko si kononkondo kooku. 20Ame ngani gonona kuwoko kwange, ngani toonese Egipite koyitetu yange eyi ngani ruganena mo. Konyima zeyi ntani nga mu siga nye mu ze.
21“Ame ngani ninka Vaegipite, va tare mbunga ezi nomeho gomawa. Ano nsene ngomu za, nokuza si mawoko‐woko, 22nye nkenye mukadi nga hehere komumaparambo gwendi noku kogu ga kara nendi, yininke yosisiliveli neyi yongorodo noyikoverero. Makura tomu yi twike vana veni wovagara novana veni wovakadi, yimo ngomu hakana Vaegipite ngoso.”
Iliyochaguliwa sasa
Exodus 3: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003
