Exodus 2
2
Ehampuruko nouteku waMosesa
1Mugara gumwe gemezimo lyaRevhi, kwa kwere mukadi gemekoro lyendi. 2Ogo mukadi makura ta kara nezimo, ta hampuruka mugara. Ano eyi ga mu mona asi muwa, ta mu horeke makwedi gatatu. 3Age kapi ga vhulire kumuhoreka siruwo sosire. Makura ta mu tungire simbamba, ta si gorongesa kerova nomanganganga. Makura ta rangeke mo munwendi; ta ka si tura pokatji konombu konontere daNili. 4Mukurwendi gomukadi ta ka sikama ure nakauke, a tare eyi nayi mu gwana.
5MunwaFarawo gomukadi kwa zire koNili a ka likuhwe kumwe novakadona vamwe ava va mu sindikilire. Age kwa gendere konontere daNili, makura ta mono simbamba monombu, ta tumu mukareli gomukadona a ka si rete. 6Eyi ana kukudumuna ko, ta gwana mo mukeke gomugara ana kulira. Ta mu retere nkenda oku ta gazara asi: “Mukeke ogu Muhebeli ogu.”
7Makura mukurwendi ta tantere munwaFarawo asi: “Ni ka ku retere mukadi goMuhebeli ogu ka hampurukire ntaantani, nga ku zamwekere ogu munona?”
8MunwaFarawo ta limburura asi: “Zende tupu!” Gwina makura ta zi a ka zigide zina zogo munona. 9MunwaFarawo ta tantere ozina asi: “Gusa ogu munona o ka mu zamwekere nge, ngani ku futa.” Ogo mukadi ta gusa munona a ka mu zamweke. 10Munona eyi ana ya kuru, gwina ta mu damuna a mu tware kwamunwaFarawo. Gwina ta mu tambura ngwendi muna gokureta mwene. Makura ta mu ruku Mosesa, yeeyi age kwa tente asi: “Amesi momema na mu zawire.”
Mosesa ta tjwayukire koMidiyana
11Mosesa apa ga kulire, makura ta zi ezuva limwe kovakwawo, ta ka mona vakwawo omu vana kurugana yirugana youngamba. Ta mono Muegipite ana kutoona Muhebeli mukwawo. 12Eyi ga tara oku noku nomuntu si, makura ta dipaga Muegipite, ta mu vhumbike. 13Ezuva limwe ta rugwire ko hena, ta ka lituntika Vahebeli vavali vana kulitoona. Makura ta pura ogu ga kere po nousima asi: “Yinke nye eyi ono kutoonena mukweni?”
14Gwina ta mu pura asi: “Ogu ana ku ninki o kare muhona ndi mupanguli gwetu yilye? Ndi kuna hara name o dipage nge moomu ko dipagere Muegipite?” Mosesa makura tagu mu pwaga, ta gazara asi: “Ani nda, nani yina divikwa.” 15Ano Farawo eyi ga yi zuvha nayinye eyi, ta hara kudipaga Mosesa, nye Mosesa ta mu tjwayuka a ka tunge moMidiyana.
Ta zi, ta hingire pondjombo 16ezi ngava ya vheta vana vatano‐navavali wovakadi womupristeli gwaMidiyana oku tava nwisa nonzwi daguhyawo. 17Ano vasita vamwe apa va wizire asi va va tjida‐tjide po, makura Mosesa ta katuka a genderere kuvakwafa mokunwisa nonzwi dawo. 18Ano apa va ka sikire kwaguhyawo, gwina ta va pura asi: “Ee, naina kapi tupu nye muna livinduka no?”
19Vena tava limburura asi: “Ani Muegipite gumwe yige ana tu popere kovasita peke. Namwene yige ana tu vhetere, yiyo hena ana nwisa yimuna yetu.”
20Guhyawo ta pura vana vendi asi: “Kupi oku ana kara? Eyi muna mu sigire ko yinke nye? Zendeni mu ka mu ninke a wize tu ya lye nendi.”
21Mosesa kwa yi haferere yokutunga nogo mugara, ga ninka ta kwara munwendi Sipora. 22Ogo mukadi eyi ga reta munona gomugara, Mosesa ta mu ruku Geresomu, yeeyi age kwa tente asi: “Ame ni mugenda mosirongo sovantu.”
23Eyi pwa pita siruwo, hompa gwaEgipite ta fu, nye Vaisraeli tava kara ngorooro mesivano nomutaku goyirugana youngamba. Moungamba wawo omo makura tava kugu ekwafo kwaKarunga. 24Karunga eyi ga zuvha nkugo zawo, ta diworoka malikwatakano gawo naAbirahamu naIsaka naJakopo. 25Karunga ta tara Vaisraeli eho, ta ninki egwanekero lyendi li rugane.
Iliyochaguliwa sasa
Exodus 2: KWN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Egwanekerobibeli Lyanamibia 1987, 2003
© Bible Society of Namibia 1987, 2003
