Marku 13
13
MIDÄ ROIH JÄLGIMÄZINNY PÄIVINNY 13
Jumalankoin levitändy
(Matf. 24:1-2; Luk. 21:5-6)
1Konzu Iisus oli lähtemäs jumalankoispäi, yksi Hänen opastujis sanoi Hänele: «Opastai, kačos, mittumat kivet, mittumat huonukset!» 2Iisus vastai: «Nämiigo suurii kodiloi sinä kačot? Täh ei jiä kivie kiven piäle. Kai levitetäh muan tazale.»
Midä roih jälgimäzel aijal
(Matf. 24:3-14; Luk. 21:7-19)
3Konzu Iisus istui Voipuumäil jumalankoin vastal, Pedri, Juakoi, Iivan da Andrei kyzyttih Hänel rahvahattomal aijal: 4«Sano meile, konzu se kai rodieu da mi on tunnusmerkinny sit, ku kai tämä terväh stuanihes.»
5Iisus rubei pagizemah:
«Vardoikkuattokseh, ku niken ei yöksyttäs teidy. 6Äijät tullah minun nimel da sanotah: ‘Minä se olen’, i hyö yöksytetäh äijii. 7Konzu kuuletto torien iänii da viestilöi voinih näh, älgiä pöllästykkiä. Muga pidäy olla, no se vie ei ole loppu. 8Rahvas nouzou rahvastu vastah, mua muadu vastah, äijis kohtis roih muansärizendiä da n՚älgiä. Tämä on suandutuskien algu.
9Vardoikkuattokseh! Teidy vietäh suudoh, teidy lyvväh sinagougis. Teidy pannah valdumiehien da suariloin edeh minun täh, tovestamah heile minus. 10No sidä enne pidäy kuuloittua jevangelii kaikile rahvahile. 11Konzu teidy vietäh suudittavakse, älgiä ielpäi olgua huolissah, midä sanuo. Sanokkua sidä, midä teile sil aigua annetah. Etto työ iče pagize, a pagizou Pyhä Hengi.
12Velli andau tapettavakse vellen, tuatto – oman lapsen, a lapset nostah omii vahnembii vastah i tapetah heidy. 13Kaikin ruvetah vihuamah teidy minun nimen täh, no ken kestäy agjah suate, se piäzöy.»
Suuri ahtistus
(Matf. 24:15-28; Luk. 21:20-24)
14«Konzu työ näittö tylgien pöllätyksen seizomas sie, kus sil ei pie olla,» (ken tämän lugou, ellendäkkäh) «sit Juudien rahvas pajettahes mägilöih. 15Ken ku ollou levol, hänel ei pie heittyö alah, eigo mennä pertih nimidä ottamah, 16a ken ku ollou pellol, anna ei mene kodih sobua ottamah. 17Oi niilöi, kudamat niilöinny päivinny ollah kohtuzennu libo imetetäh! 18I moliettokseh, ku se ei rodies talvel, 19sendäh ku niilöil päivil rodieu moine ahtistus, mittumua ei olluh muailman allus suate, kaiken Jumalan luajitun allus nämih päivih suate, eigo nikonzu rodei. 20Ku Ižändy ei lyhendäs sidä aigua, ni yksi ristikanzu ei piäzis hengih. No vallittuloin täh, kudamat valličči Häi, Häi lyhendäy sen aijan.
21Ku ken sit sanonou teile: ‘Kačo, tiä on Messii’, libo: ‘Kačo, Häi on tua’, älgiä uskokkua. 22Kačo ku tullah Messiekse da iänenkandajakse menijät, i hyö luajitah suurii tunnusruadoloi da kummii, ku yöksyttiä, ku suannou, vallittuloigi. 23A työ vardoikkuattokseh! Minä jo ielpäi sanoin teile kai.»
Ristikanzan Poigu tulou pilvien keskes
(Matf. 24:29-36; Luk. 21:25-33)
24«No niilöinny päivinny, sen ahtistuksen jälgeh, päiväine pimenöy, kuudamaine ei anna valgiedu, 25tiähtet pakutah taivahaspäi, i taivahien väit liikutah. 26Sit rahvas nähtäh, ku Ristikanzan Poigu tulou pilvis taivahallizes väis da valgies. 27I sit Häi työndäy omat anhelit da keriäy vallitut muan n՚elläs čuras, taivahan agjas da agjah suate.
28Otakkua mieldy smokvupuus: konzu sen oksu turbuou da puhketah lehtet, sit työ tiijättö: kezä on lähäl. 29Muga i tämän kaiken nähtyy tiijäkkiä: se aigu on lähäl, ihan uksipieles. 30Toven sanon teile: tämä polvi ei hävie, kuni kai tämä ei stuan՚ei. 31Taivas dai mua hävitäh, no minun sanat ei hävitä. 32No sidä päiviä da aigua ei tiijä niken, eigo taivahan anhelit, eigo Poigu. Sen tiedäy vai Tuatto.»
Olgua jallas!
(Matf. 24:42-44)
33«Kačokkua, olgua jallas [da moliettokseh], ettohäi työ tiijä, konzu se aigu tulou. 34Kačo, konzu mies lähtöy koispäi matkah vierahale muale, häi andau käskyläzile oman vallan da jogahizele oman homman, a veriänvardoiččijale häi käsköy olla jallas. 35Ga sit olgua jallas, ku etto tiijä, konzu taloin ižändy tulou: illalgo vai keskiyöl, kukoinlaulun aigahgo vai konzu huondes valgenou. 36Häi tulou vuottamattah – olgua jallas, ku häi ei tabuas teidy maguamas. 37Midä sanon teile, sen sanon kaikile: olgua jallas!»
Iliyochaguliwa sasa
Marku 13: LIVVI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
(c) Biblienkiännändyinstituuttu, Helsinki 2003
