IPEKULU 26
26
AMPEU Kungo Phiki
1“Tinguno alau, no ye Ampeu kungo phiki mlalo, tipau lo atsüla, hughai eno huchuyi keu phi eno phepheike phi kipili no nhaqhiphi 10 mlalo; tipaqo lo kütshakügha shi cherubim shisülo. 2Nhaqhiphi lakhikhi no akushulau auxakuchho 12 eno akijelau auxakuchho 2 shilo; nhaqhiphi kümtsü aqhemi shini. 3Nhaqhiphi pungu ye lakhino lakhi shelo shi tsüghu kimelo, eno pungu ghi lakhino lakhi shelo shi tsüghu kimelo. 4Amqo lakhi lo ala ashekhau kichi lo atsüla phi pesü xikepu puchope qhilo. Titoi amqo akiniu lo ghi ala ashekhau kichi lo xikepu puchope qhilo. 5Nhaqhiphi lakhi lo xikepu pucho 50 mlalo eno amqo akiniu lo ghi ala ashekhau kichi lo xikepu 50 mlalo; xikepu puchope püakeqo ye lakhino lakhi ghüngü lo qhilo. 6Ameshoyi no mlakeu akufupu 50 mlalo, eno tipaqo pesü nhaqhiphi lakhino lakhi lo fukimepe qhilo, tishianguno Ampeu kungo phiki pesü akupuju lakhi shi qhini.
7“Ampeu kungo phiki shou nhaqhi kepu ghenguno ane mhi pesü nhaqhiphi mlalo; nhaqhiphi 11 mlalo. 8Lakhikhi no akushulau auxakuchho 13 eno akijelau auxakuchho 2 shilo. Nhaqhiphi 11 ye aqhemi shilo. 9Amqo lakhi lo ala pungu tsüghu kimelo, lakhiu mqo lono tsügho tsüghu kimelo, eno nhaqhiphi akütsüghou ye aphiki gizüu küqhüchhe kini shivelo. 10Nhaqhiphi amqo lakhi shekichi lo apucho 50 eno amqo lakhiu shekichi lo apucho 50 ishi sülo.
11“Alazayi pesü akufupu 50 mlalo eno apuchoqo lo fukimepe qhilo eno aphiki lo fukimepe akupuju lakhi shi qhilo. 12Aphiki lo nhaqhiphi ala ipeghi keu tüxa pesü Ampeu kungo phiki thiu nhape qhilo. 13Akushulau hula-hila aulotikipshe 18 achili akeu ye Ampeu kungo phiki hula-hila küzüpe qhi kepushi nhape qhilo. 14Akütsüqa lo nhakepu kütau kini mlalo, lakhi no ambe yiko huchuyi keu eno lakhiu no ane yiko pesü shilo.
15“Ampeu kungo phiki ghenguno akuchughi lo aghoghi acacia sü pesü mlalo. 16Aghoghi lakhikhi no akushulau auxakuchho 4 eno akijelau aulotikipshe 27 shilo. 17Aghoghi lakhikhi lo akichi aphiphi shi axu kini mlano aghoghi lo kime küqhalu kepu shilo. Ampeu kungo phiki lo aghoghi kümtsü titoi mlalo. 18Ampeu kungo phiki ghenguno aghoghi hitoi mlani: apeu küdau ghenguno muku; 19Aghoghi muku qholo ghükayi no shikeu boqha 40 mlalo, aghoghi lakhi qholo aboqha kini, tipau shelo aboqha gholono akichi chokime kepu shipe qhilo, 20Ampeu kungo phiki ahuu küdau ghenguno aghoghi 20 shilo, 21eno ghükayi no shikeu boqha 40, aghoghi lakhikhi qholo aboqha kini. 22Kulolau Ampeu kungo phiki thiu aghoghi tsügho mlalo, 23eno acheku ghenguno aghoghi kini shilo. 24Tipaqo ye aqhou kütüta shini, ikemu akütsüqa loye abocho atüghüu lono chokime küqhani. Ikehu tipaqo ye kinini shi qhini eno acheku kini shipe qhini. 25Tile aghoghi tache shini eno ghükayi no shikeu boqha no 16, aghoghi lakhikhi qholo axu kinini anani.
26“Ampeu kungo phiki ako tüxau aghoghi ghenguno acacia sü pesü heküptasü pungu mlalo, 27eno ako tüxau aghoghi ghengu ghi pungu mlalo, Ampeu kungo phiki kulola azübou aghoghi ghenguno pungu mlalo. 28Amta lo heküptasü aghoghi mta lo qhikeu ye Ampeu kungo phiki shekichi lakhi lono lakhiu kutolo chokimelo. 29Ameshoyi pesü aghoghiqo küzülo eno heküptasü ghenguno ameshoyi pesü abocho mlalo, ameshoyi pesü heküptasü ghi küzülo. 30Tishino I no naghuto lono o piye keu ghola kiqi lono Ampeu kungo phiki shiqhelo.
31“Atsüla, hughai, eno akuhu yeho ngo phepheike phi kipili pesü nhaqhiphi mlalo. Tile kütshakügha shi cherubim shisülo. 32Tipau pesü ameshoyi no küzü keu acacia sü tsükucho bidi lo ameshoyi kufuyi pesü pufuni eno ghükayi no shikeu boqha bidi shou nhaqhi woni. 33Nhaqhiphi pesü aphiki kunguu akufupu ajoshi akeu lo pufu wolo eno puloshoqhi bohu shepe pesü tile nhaqhiphi dolo peiloghi lo. Eno nhaqhiphi no Akimthe-a ngo Shishe Akimthe-a küma dolo kotha kütüta shi qhini. 34Shishe Akimthe-a lo puloshoqhi bohu shepe ye akünha pesü nhavelo. 35Nhaqhiphi nguno khalau aphiki jibo ahuu no akibepu qhilo eno apeu no akulu kibepu qhilo.
36“Aphiki kulaghi lo nhaqhiphi ghenguno atsüla, hughai, eno akuhu yeho ngo phepheike phi kipili pesü ayipu no aye shisü no qhilo. 37Nhaqhiphi ghenguno acacia sü pesü atsükucho pungu shilo, ameshoyi no ti küzüvelo. Tipaqo kufupu ye ameshoyi no shilo, tipaqo tsükucho ghenguno alazayi pesü aboqha pungu mlalo.
Iliyochaguliwa sasa
IPEKULU 26: SUMRVBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible Society of India
© 2023, Used by permission. All rights reserved. More