IPEKULU 25
25
Akimthe-a ghenguno Tüqhatüzü
1 Ampeu no Moses vilo pi, 2“Israelmi pütsa no I ghenguno tüqhatüzü shilo. Khuu no amlo lono pa hakite keu ani keno pa launo lulo. 3Nongu no panoqo launo tüqhatüzü luni keu ye hike: ameshoyi, ghükayi, eno alazayi, 4atsüla, hughai, eno akuhu yeho, phepheike phi akiviu, ane mhi, 5ambetsü yiko hughai bevekeu, ane yiko, acacia sü, 6akuluqo ghenguno thazü, nukepu thazü ghenguno amkhu eno axokütsüngü, 7ephod phimini ngo amla küxaphi lo süpu kepu ghenguno onyx tu. 8Panongu no I ghenguno akimthe-a mlani, tishianguno I no panoqo gholo ngoni. 9I no aphiki kogheküghü eno tile tinhemgha kümtsü o piyeve keu tholono nongu ye tipau mlani.
Puloshoqhi Bohu
10“Acacia sü pesü puloshoqhi bohu lakhi mlalo. Akushulau no aulotikipshe 45, akijelau no aulotikipshe 27, eno akiqhelau ghi aulotikipshe 27 mlani. 11Ameshoyi kimthe pesü abohu alou eno ashou ghi medani, eno ameshoyi no ashe vehomxape qhini. 12No ye tipau ghenguno ameshoyi no mlakeu abocho bidi mlani eno apukhu bidi lo yedalo, abocho kini no ako tüxau süni eno kini no ako tüxau süni. 13Acacia sü pesü abohu xapu kepu sü mlani eno ti küma lo ameshoyi no medalo. 14Eno ti küma pesü puloshoqhi bohu akou abocho akeqo lo xisü no xapuni. 15Asü tiküma ye puloshoqhi bohu bocho lo xisüpe qhini; ti ye abohu lono ikhipheve moni. 16Eno I no o tsüniye akeu zakütsü pesü abohu lo ashepe lakhi shi qhini.
17“Ameshoyi kimthe pesü akünha#25:17 Momu Küpükini Lakhü mlani. Akushulau aulotikipshe 45, eno akijelau aulotikipshe 27 mlalo. 18Akünha shekichi kini lo cherubim kini ameshoyi hephave keu no mlalo. 19Ako tüxau cherub lakhi eno ako tüxau no cherub lakhi ishi mlalo. Cherubim kinikujo akünha lo meda küqhalo. 20Cherubim chishibo ye kunguu no sükhope akünha khonhape ngoni, tiküma lakhino lakhi kuju kilepe qhini; cherubim gi ye akünha küdau juni. 21Eno akünha ye puloshoqhi bohu kütsüqa lo qhini, eno puloshoqhi bohu lo I no o tsüniye akeu zakütsü pesü nono ashepe lakhi shi qhini. 22Akünha sholo ashepe bohu shou cherubim kini akeu mta lono I no o sasü kushoni, Israelmi ghenguno I no azakütsü o tsüniye akeu vehu I no tileno o vilo pini.
Asho Ghenguno Akibepu
23“Acacia sü pesü akibepu lakhi mlalo. Akushulau aulotikipshe 45, akijelau aulotikipshe 18, eno akiqhelau aulotikipshe 27 shilo. 24Ameshoyi kimthe pesü tipau medalo eno ameshoyi no ashe vehomxa lo. 25Akichi lo asü tachu akijelau aulotikipshe 3 pesü vehomxa lo eno ameshoyi pesü tipau mekhave lo. 26Tipau ghenguno ameshoyi no shikeu abocho bidi mlalo, eno abocho tipaqo pesü ako bidi lo apukhu bidi lo yedalo. 27Akibepu xapuni ke asü xisülu kepushi abochoqo ye akou akichi lo qhini. 28Acacia sü akibepu xapu kepu sü mlalo, eno ameshoyi pesü tipaqo medave no akibepu kuhopeni. 29Axokütsüngü ghenguno akhu ajukhu, eno atsaizü kümllagho lephe kepu chithakhu eno akhosali mlalo; tipaqo ye ameshoyi akimthe pesü mlalo. 30Akimthe sho ye alhokuthu I zülo akibepu shou qhilo.
Ameshoyi Kulu Kibepu
31“Ameshoyi kimthe pesü akulu kibepu mlalo. Akulu kibepu ye ameshoyi hephave keu pesü mlani: tipau pukhu, akemtsü, ajukhu, anipa eno axamunu shisü keu kümtsü shikime pukulo. 32Eno tipau lono aloka tsügho ikowo keu shilo, akulu kibepu loka küthü no ako tüxau eno küthü no ako tüxau qhilo; 33Aloka tsügho lo lakhikhi no almond kupu eno anipa toikeu jukoghe shilo. 34Akulu kibepu tipau lo almond puipeghi aketoi keu jukhu bidi mlalo, tipa gholo anipa ngo tipau xamunu mlasü lo, 35aloka tsügho akulu kibepu lono ipeghi akeu lakhikhi lo anipa mlasü lo. 36Tipa nipa ngo alokaqo ye lakhi lono shipukulo, akulu kibepu kupuju ye hephave keu ameshoyi lakhi no mlalo. 37Tipau ghenguno akulu tsüni mlani. Eno akulu ye ghope qhilo, tishianguno tipau zülo aküvü tsüpeni. 38Tipau tsümtsa ngo akhu ajukhu kibepu ye ameshoyi kimthe no shini. 39Tipau lo peitha kepu akhu ajukhu jeli kümtsü mlani ke ghenguno ameshoyi ahu shighi pungu peitha lo. 40No ye ti kümtsü kogheküghü khikhi I no naghuto lono o piye ani keno tipau kiqi lono mlalo.
Iliyochaguliwa sasa
IPEKULU 25: SUMRVBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible Society of India
© 2023, Used by permission. All rights reserved. More