APOSTOLO 17
17
1Achi, muze te hapalika ndusu mu Amafwipoli ni Apoloneya, ahetele ku Tesalonika, kuze kwapwile sunangonga ya A-Yunda: 2Paulu nikulita ni ndako yenyi, wanjilile mukachi ko, ni ha masambata atatu wahanjikile kuli ayo ku yisoneko. 3Nikulumbununa pundu nikulweza ngwe chatamba Kristu kwivwa lamba, nikuhinduka hakachi ka afu; ngwenyi, Yono Yesu ngunanwambulwilayo, iye mwe Kristu. 4Mba amwe akunukine, alifutwile hamuwika ni Paulu ni Saila, a kuli A-Ngresia akwa kuwayila chizavu chinene, ni anji a kuli mapwo akwa lutwe. 5Alioze A-Yunda, nikwivwa ukwa, akungulwile amwe yingulungulu a ku yitanda, nikukunga mbunga, anehene vunda mu limbo; nikupupa zuwo lia Yasone, afupile kwaneha haze kuli atu; 6muze kaawanyineko, ambulumwine Yasone ni amwe mandumbu kumeso ja akwa kuyula limbo, nikukololoka ngwo, Wano hanalumuna yifuchi yeswe ya hashi, haneza kuno nawa; 7Yasone hanaatambula, ni wano eswe kakulimika ni shimbi ja Sesare, ngwo, Kwali mwanangana mukwo, iye Yesu. 8Ni mbunga ni akwa kuyula limbo muze evwile yino yuma, alipikalile. 9Muze te hatambula chifungo kuli Yasone, ni kuli akwo, aatuswile.
10Mandumbu haze hene atumine Paulu ni Saila ha ufuku ku Mberia: o muze ahetele, anjilile mu sunangonga ya A-Yunda. 11Wano apemene kuhiana hi waze ko a mu Tesalonika, se atambwile liji ni mbunge yeswe, nikuhengula mu yisoneko tangwa ha tangwa akamone kachi yino yuma yapwile chocho. 12Kashika anji a kuli ayo afulielele; ni a kuli mapwo A-Ngresia alemu, ni anji a kuli malunga. 13Alioze muze A-Yunda a ku Tesalonika anyingikine ngwo, Liji lia Zambi aliambujolele kuli Paulu ku Mberia, ayileko nawa, nikuvundula nikupinjisa mbunga. 14Hohene mandumbu atumine Paulu mu jila ya kuya ku kalunga-lwiji: ni Saila ni Timoteu asalileko. 15Alioze waze atwalile Paulu, amuhetesele ndo ku Atene, o se hatambula shimbi hali Saila ni Timoteu eze kuli iye nikawashi, akatukile.
16Alioze shimbu Paulu aatachile mu Atene, Spiritu yenyi yakasumukine muli iye, ha kumona limbo lia tò ni mahamba. 17Kashika wahanjikile mu sunangonga kuli A-Yunda ni akwa kuwayila, ni mu yitanda tangwa ha tangwa kuli waze apwileko. 18Alioze amwe a kuli akwa mana jo, A-Epikuria ni A-Stoiku atakanyine nenyi, ambile ngwo, Yono mukwa kumbambula kuchi mamba? Akwo ambile ngwo, Kanasoloka ngwe mukwa kwambujola mazambi ja yilambala; mumu wapwile nikwambujola sango lipema lia Yesu ni Uhindukilo. 19O yamukwata, yamutwala ku mulundu wa Mare, ngwo, Mutuhasa kunyingika longeso lino liaha unahanjika yena, nyi? 20Mumu unaneha yimwe yuma yakututungumwisa: tunazange kashika kunyingika chize yino yuma muyilumbunuka. 21(Achi, A-Atene eswe ni ngeji kalingile chuma cheka shina kwambujola ni kwivwavwa chuma chimwe chaha.)
22Mba Paulu yamana ha mulundu wa Mare, yamba ngwenyi, Yenu A-Atene, ha yuma yeswe ngunamono yenu nwahiana uwayilo. 23Mumu shimbu napalikile, natalile ha makombelelo jenu, nawanyine chilumbilo ni chisoneko chino ngwo, Kuli Zambi Yoze Kutwamunyingikine. Yoze kashika nwakuwayila ha kwalajala, iye ngunamwambujola kuli yenu. 24Zambi yoze watangile hashi ni yuma yeswe yiliho, iye se kapwa Mwenya lilu ni hashi, keshi kutwama mu matembele a kutangiwa ni moko; 25chipwe keshi kumulingila ni moko ja atu ngwe anahono chuma chimwe, se iye mwene kakuhana kuli eswe mwono, ni mwiku, ni yuma yeswe; 26iye watangile ku manyinga amuwika mavungu eswe a atu mukutwama ha kuzazuluka cheswe cha hashi, se afunjikile miaka yo yize waselele kushi, ni manjiza ja yihela yo: 27hanga akafupe Zambi, kachi akapapate kama hali iye, akamuwane, hindu katwamine kusuku ni mweswe wa kuli yetu; 28mumu
Muli iye, tuli ni mwono, muli iye twakwenda, muli iye tuli ni kupwa chetu;
nikulita ngwe chipwe amwe a kuli akwenu akwa kutomba miaso hanambe ngwo,
Mumu yetu tuli ana jenyi nawa.
29Se kashika tuli ana a Zambi, kuchatutambile kushinginyeka ngwe Uzambi unalifu ni oru, hanji prata, hanji liwe, kaponya wa kwola ni ulangaji ni chishinginyeka cha atu. 30Miaka ya kwalajala kashika Zambi walihumikijine nayo; alioze haliapwila kakwamba atu eswe kweswe alikonyeke. 31Mumu te hanasela tangwa muze makapatwila akwa yifuchi yeswe ya hashi mu ululi kuli yoze lunga hanamuselacho; ha chino hanahana chinyingi kuli atu eswe, se hanamuhindwisa hakachi ka afu.
32O muze evwile ha Uhindukilo wa afu, amwe achimbungwine; ni akwo ambile ngwo, Mutukakwivwa ha chino tangwa likwo. 33Chocho Paulu watuhukile mukachi ko. 34Alioze amwe malunga alifutwile nenyi, afulielele: hakachi ko nawa, apwile Ndioniseu wa ku mulundu wa Mare, ni pwo, jina lienyi Ndamari, ni akwo hamwe no.
Iliyochaguliwa sasa
APOSTOLO 17: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.
