APOSTOLO 16
16
1Iye wahetele ku Ndervwe nawa ni Lisetra: umwe kambaji wapwileko, jina lienyi, Timoteu, mwana wa umwe pwo Ka-Yunda, mukwa kufuliela, alioze tato Ka-Ngresia. 2Amushindakenyene kuli mandumbu mu Lisetra ni Ikoniu. 3Yono, Paulu wamuzangile kuya hamwe nenyi; mba yamwanda, yamupwisa ngalami, mumu hali A-Yunda waze apwile kuze: mumu o eswe anyingikine ngwo, Tato Ka-Ngresia. 4Shimbu apalikile mu membo, aakunjikile ndongo jize te hapatula apostolo ni makulwana ku Yerusaleme, akajifunge. 5Chocho yikungulwila yatakamine mu Ufulielo, yokele tangwa ha tangwa.
6O apalikile ndusu mu chifuchi cha Fwijia ni Ngalashia, se Spiritu Musandu waakanjishile kanda ambujola lie liji mu Eshia; 7mba muze akundakenyene ni Mishia, esekele kuya ku Mbitinia; alioze Spiritu ya Yesu kaatayijileko; 8o nikuhiana Mishia, apalumukine ku Troa. 9Usolwelo wasolokele kuli Paulu ha ufuku: kwapwile lunga wa ku Masendoniya, kanamana, nikuliumba kuli iye ngwenyi, Zauka, wize muno mu Masendoniya, ukatukwase. 10Muze te hamona usolwelo, haze hene twafupile kukatuka mukuya ku Masendoniya, nikunyonga ngwetu, Zambi hatutambika kwambujola sango lipema kuli ayo.
11Kashika, nikukatuka ku Troa, twendele mu ulungu pundu ku Samotrashia, ni muze hikwacha twendele ku Neapole; 12katu ku kuze twayile ku Fwilipu, lienalio lie limbo linene lia chihanda chize cha chifuchi cha Masendoniya, ni njize A-Roma atungileko nawa: twanyongonwene mu limbo lize matangwa amwe. 13Ha tangwa lia Sambata, twatuhukile haze lia chajilo cha limbo, nikuya ku sesa lia lwiji, kuze apwile nikuyaya mukulemba, twatwamine, twahanjikile kuli mapwo waze akungamineko. 14Mba umwe pwo, jina lienyi Lindia, mukwa kutalikila mahina a ufungo, wa ku limbo lia Taiatira, mukwa kuwayila Zambi watuvwile: Mwene wazulwile mbunge yenyi kupanjika ku yuma yize ahanjikile Paulu. 15Muze te hamupapachisa, ni akwa zuwo lienyi, waliumbile kuli yetu ngwenyi, Kachi unangumono wamwenemwene kuli Mwene, njilenu mu zuwo liami, nukatwamemo; mba watukokesele.
16Shimbu mutuchiya kuma kwa kulembela, umwe mwanapwo ni Spiritu ya munanyi, watakanyine ni yetu, yoze wamwesene miata jenyi upite wunji ha kuhanjika munanyi. 17Iye nikukaula kunyima ya Paulu ni yetu, wakololokele ngwenyi, Wano atu e ndungo ja Zambi mwe Chitunda, waze akunwambulwila jila ya ulamwino. 18Chino wachilingile matangwa anji. Mba Paulu nikwivwa chikulikuli chikolo, yatewulukila, yamba kuli Spiritu ngwenyi, Ngunakwambe mu jina lia Yesu Kristu ngwami, Tuhuka muli iye. Iye watuhukile ola yize yene.
19Alioze muze miata jenyi amwene kutalatala cha upite wo hichahwa, akwachile Paulu ni Saila, o aambulumwine ku chitanda kumeso ja akwa kuyula. 20Muze te haaneha kuli tupitau, ambile ngwo, Wano A-Yunda kakupikala chikolo limbo lietu. 21Kakwambujola ndako jize kuchalitele ni shimbi yetu tujitambule, chipwe kujilinga, se tuli A-Roma. 22Ni mbunga aakatukilile hamuwika; ni tupitau aatokwele mahina jo, yaamba aalambe ni mbwechi. 23Muze te haalamba chikolo, aambilile mu zuwo lia ususu, nikuhana shimbi kuli kalayi, akaafunge kanawa. 24Iye se hatambula shimbi yino, waambilile mu zuwo lia muchima nikuyika molu jo mu kuli.
25Alioze ha muchima ufuku Paulu ni Saila apwile nikulemba, nikwimba miaso kuli Zambi, ni funge aapanjikile; 26susumuku kwapwile minyiko yinene, ni fundamentu ja zuwo lia ususu janyikine, ni mapito eswe haze hene azulukile; ni makana ja eswe aechele. 27Kalayi, ha kukasumuka mu tulo twenyi, yamona mapito ja zuwo lia ususu a kwazulula, watomwene katana kenyi, wambile kulishiha, se kanashinginyeka ngwenyi, Funge hanomboka. 28Alioze Paulu wakololokele ngwenyi, Kanda ulilinga chipi, mumu yetu eswe muno mutuli. 29Iye wechile lutemo, wanjilile fuji, nikuchikima, wafulamanyine kumeso ja Paulu ni Saila, 30waanehene haze, wambile ngwenyi, Malunga, kuchi changutamba kulinga hanga angulamwine? 31O ambile ngwo, Fuliela Mwene Yesu Kristu, mba kumakakulamwina, yena ni akwa zuwo lie. 32O ahanjikile kuli iye liji lia Mwene, ni kuli waze eswe apwile mu zuwo lienyi. 33Iye waatwalile ola yize yene ya ufuku, wasanyishine mijiji yo; mba amupapachishile, iye ni akwa jiko lienyi eswe haze hene. 34Iye waakandwishile ku zuwo lienyi, waahele kulia, walikwijile hamwe ni akwa zuwo lienyi eswe, se hafuliela Zambi.
35Muze hikwacha, tupitau atumine sarjentu, ngwo, Tusula wano atu. 36Kalayi wambulwile maliji ano kuli Paulu, ngwenyi, Tupitau hatuma hanga tunutusule: kashika haliapwila tuhukenu kama, nukatuke ni sambukila. 37Alioze Paulu wambile kuli ayo ngwenyi, Kanatulambe kumeso ja atu eswe, kutushi chitela, yetu tuli A-Roma, hanaumbila mu zuwo lia ususu; ni haliapwila kanatumbila haze ku tenga, nyi? Ka wate; alioze eze ayo ene akatutwale haze. 38Sarjentu ambulwile maliji ano kuli tupitau: o evwile woma muze evwile ngwo, A-Roma; 39o ejile nikuliumba kuli ayo; ni muze te haaneha haze, alembele akatuke ku limbo. 40O atuhukile mu zuwo lia ususu, anjilile mu zuwo lia Lindia: mba muze te hamona mandumbu, aalembejekele, yakatuka.
Iliyochaguliwa sasa
APOSTOLO 16: Csa
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chokwe Bible © Bible Society in Angola, 1975.
