Psom 31
31
Konfians dan Lesegner
Pou sef koral. Enn Psom David.
1Mo vinn ver twa, SEGNER, pou dimann proteksion;
pa les mwa tom dan laont;
dan to fidelite, delivre mwa.
2Ekout mo lapriyer;
vinn sekourir mwa vit.
Tomem sitadel ki protez mwa;
tomem fortres ki sov mwa.
3Twa ki mo sitadel ek mo fortres
gid mwa e montre mwa bon sime.
4Anpes mwa tom dan piez ki finn plase pou mwa,
parski tomem mo proteksion kont danze.
5Mo finn met mo lavi dan to lame;
to delivre mwa, SEGNER, Bondie fidel.
6To ayir bann ki ador fos bondie;
mwa, mo met tou mo konfians dan LESEGNER.
7Mo selebre lazwa ek boner dan to lamour infini
parski to konn mo soufrans
ek traka ki pe kraz mwa.
8To finn anpes mo ennmi may mwa;
to finn kas mo lasenn, to finn donn mwa laliberte.
9SEGNER, ena pitie pou mwa
parski mo dan tourman;
mo lizie bien fay parski mo larm finn bril li;
mo lekor antie feb ek mo fatige;
10Gro sagrin finn rwinn mo lasante
e larm pe ris mwa ver lamor.
Mo bann tor finn afebli mwa
e mo lezo pe deperi.
11Mo ennmi, sirtou mo prop vwazin mepriz mwa;
bann ki konn mwa zot per mwa;
kan zot trouv mwa, zot sove al kasiet.
12Dimoun finn fini bliye mwa,
koumadir mo finn fini mor;
mo initil kouma lasiet ki finn brize.
13Mo tann mo ennmi pe mirmire;
dife lor mwa partou kote.
Zot pe tir plan kont mwa;
zot pe konplote pou touy mwa.
14Me mo met tou mo konfians an twa, O SEGNER;
mo dir, “Twa ki mo Bondie. “
15Mo bann zour dan to lame;
protez mwa kont mo ennmi;
ed mwa kont seki pe persekit mwa.
16Ki lalimier to prezans briy lor mwa, to serviter;
sov mwa dan to lamour infini.
17Pa les mwa tom dan laont, SEGNER,
parski mo finn kriye ver twa;
me ki move dimoun konn laont,
les zot koule an silans dan trou lamor.
18Ferm zot labous dan silans lamor!
Zot ki bann gran manter insolan ek arogan
ki zet labou lor dimoun ki viv drwat.
19Li vreman gran sa bonte ki to rezerve
pou dimoun ki ena respe pou twa!
Devan lizie tou dimoun
to montre to bonte pou bann ki fer twa konfians.
20To prezans garanti zot sekirite
e anpes zot tom dan piez bann konploter;
dan labri kot to finn kasiet zot, insilt zot ennmi
pa pe reysi fer zot dimal.
21Tou louanz pou LESEGNER!
Li merveye, manier li ti donn mwa so lamour infini
ler ennmi ti pe anserkle mwa pou atake!
22Mo ti dezanpare ek trouble,
mo ti krwar Bondie ti finn abandonn mwa.
Me li ti tann mwa ler mo kriye osekour.
23Ador LESEGNER zot so bann fidel!
LESEGNER protez bann krwayan;
Li pini bann vantar, ki pou pey doub.
24Pa bes lebra; pa perdi kouraz
zot tou ki finn met zot lesperans dan LESEGNER.
Iliyochaguliwa sasa
Psom 31: KMOTPOR
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kreol Morisien OT Portions © Bible Society of Mauritius, 2020.