SOQQAMAASINETE LOOSO 28
28
PHAAWULOOSIRA MAALTA YINANNI GIDDICHORA XAADINOSI COYE
1Keerunni baattote aanira iillinummo woyite, marre hee'noommo giddicho Maalta yinannita ikkitinota buunxummo. 2Hatte giddicho manni dhaggeeffantanni garinni wosinchimma haa'rinke. Xeena ganeenna qiidino daafira giira iibbishshe giwaa'neemmo gede assitunke. 3Phaawuloosi xigiro haa're giirate tuganna iibbillunni kainohunni buute fulte angasira qa'mitu. 4Maalta Giddicho manni buute Phaawuloosi anga aana qa'mite noota afe mimmitoho, «Kuni manchi halaalinta manna shiinoho. Baaru dambaliwiinni gate fulirono, halaaluwiinni gate fula didandiino» yii. 5Phaawuloosi kayinni buute giirate aanira wixe tuge, mittoreno ikkikkinni gati. 6Mannuno, «Mamootinni mamoote biso darshanno woy uwe reyanno» yee agari. Ikkollana lowo yanna agarte, mittoreno ikka hoogita affe, albi hedonsa soorrite, «Kuni maganoho!» yitu.
7Hakkiicho hee'noommohura mule giddichote gashshaanchira Pupiliyoosira baatto nosi. Kuni manchi minisira haa're masse sase barra seekke wosinsinke. 8Hatte yannara Pupiliyoosi anni iibbabbisheennasinna godowa gobbara qolannasi dhiwame goxe no. Phaawuloosi isiwa shiqqi yee huuccatto assisi. Angano aanaho wore hursisi. 9Hakkunni gedensaanni giddichote heedhannori wole dhiwamaanono dagge hurtu. 10Mannu lowo geeshsha ayirrise afanshano uyinke. Ha'nammora ka'nummota, hasiisannonkere baala markaawete hogobbunke.
PHAAWULOOSI ROOMA IILLI
11Sase agana Maalta keeshshinummohu gedensaanni, hawado ledonke keeshshitino Markaawe Alekisaanderiyunnitera ofolline ha'nummo. Tini markaawe Diyosiqoroosi yinanniri lakkuwu maganna sumudi aanaho noote. 12Serakuusi yinanni katama iilline hakko sase barra honsummo. 13Hakkiinni ka'ne baaru qacceenni hinge Regiyumi yinanni katama iillinummo. Hakko mitto barra honsummohu gedensaanni wodiidi bubbe ka'eenna layinki barra Putiyoluusi yinanni katama ha'nummo. 14Hakkiicho xaandoommo roduuwi lamala barra insawa keeshshineemmo gede huuccidhunke. Hakkunni gedensaanni fulle Rooma ha'nummo. 15Roomaho heedhanno roduuwi ninke duduwo macciishshite, Afiyoosi yinanniwanna Sase Wosinu Minna yinanniwa shiqqunke. Phaawuloosi insa afe Magano galati; wodanisino hagiidhi.
PHAAWULOOSI ROOMAHO MAGANU QAALE KULI
16Rooma iillinummota, Phaawuloosi mittu agarannosi gaaddichi ledo callisi hee'ranno gede assitu.
17Sasu barri gedensaanni Phaawuloosi Roomaho heedhannore Ayihudete jajjabba woshshiishi; gamba yituta, «Roduuwa'ya, Israeeletenna akaakkanke budi aana assoommo sao dino. Kayinni kune amadde usurte Roomaho sayisse uyitinoe. 18Roomootu qorte affanno woyite, reyote iillishanno coyi nookki daafira tirtaera heddino. 19Ayihude kayinni tirrannieta gibbeenna, ‹Coyi'ya jawu mootewa saoe› yoommo. Ikkirono gosa'ya aana ku'leemmo coyi dinoe.#Soq 25:11 lai. 20Xa woshshoommo'nehu la"ammo'neraatinna konne coye kulammo'neraati. Ani tenne cagaagenni usuramoommohu, Israeelete uyinoonni hexxo daafira yeeti» yii.
21Insa qolte, «Yihudunni atere kultanno borro di"iillitinonke. Kawa dayino manni giddonnino ate su'ma bushatenni kayisinohu dino. 22Ati amadootto amma'no mannu darga baalaho giwinota anfoommona, hanni hedokki maatiro macciishshineemmona kulinke» yitu.
23Xaaddanno barra amaxxite hadhe, kiirono lexxite isi noowa ka'e daggu. Isino soodinni hawarro geeshsha Maganu gashshootire farci'ranni hedosi xawise kulinsa. Insa ammanchiishate Muse Seerinna himanaanote borro giddo noo coye kulanni Yesuusire egensiisinsa. 24Mitu mitu kulino coye ammantu. Gamisu kayinni diammantino. 25Kunnira mimmitinsa ledo afoo xaaddukkinni billaallitara ka'u. Billaallitara albaanni Phaawuloosi, «Qullaawu Ayyaani himanaanchu Isayaasi widoonni qole akaakka'nera kulinori halaaleho. 26Coyi'rino qaalino,
«Hakkunni manniwa marte,
‹Aye geeshshano macciishshitine dihuwattinanni;
aye geeshshano la'ine dibuuxxinanni!› yaannoho.
27Kunni manni wodani dillaawino;
maccansa beebbino;
illensa tunsitino.
Hatto ikka hooggoommero,
illensanni la'e, maccansanni macciishshite,
wodaninsanni wodanchite, anewa higgeenna
hurseemmonsahu gatino. #Isa 6:9-10 lai.
28«Xa kayinni tenne Maganunnita gatisaanchimmasi sokka dagate sonkoonnita affe; insano, ‹Maahoyye› yite adhitanno» yii. 29Konne coye coyi'rihu gedensaanni Ayihudootu mimmitinsa ledo xa'mantanni hadhu.#28:29 Qoqqowu giddo noohu mite mite keeshshitinotera angatenni borreessinoonni borro giddo dino.
30Phaawuloosi kiru mine lame diro hee'ri. Hakkiicho hee're isiwa daanno manna baala haa'ri. 31Maganu gashshootire kulanni, Mootichu Yesuusi Kiristoosireno ittisannohu nookkiha ruxxi yiikkinni rosiisi.
Iliyochaguliwa sasa
SOQQAMAASINETE LOOSO 28: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
