SOQQAMAASINETE LOOSO 27
27
PHAAWULOOSI ROOMA HA'RI
1Ixaaliyu gobba ha'nammora ka'nummota, Phaawuloosinna wole usuranyoota Awugisxoosi bagadaano ledo noohu xibbu hajajaanchi Yuliyoosi yinannihu anga wortu. 2Issiyaho baaru malkuwa hadhannotera Adiramixiyooni yinanni markaawera ofolline ha'nummo. Teselonqe hee'rannohu Meqedooniyu manchi Arisxirokoosino ledonke no.
3Layinki soodo Sidoona iillinummo. Yuliyoosi Phaawuloosi mararino daafira, jaallasiwa mare Phaawuloosira hasiisannosire kaa'litannosi gede assi. 4Hakkiinni ka'ne albankeenni bubbe bubbissanni noo daafira, Qophiroosi giddicho laayyo amande ha'nummo. 5Kiliqiyunna Phinfiiliyu mule noo baara sa'ne Muura yinanniha Liqiyu gobba katama iillinummo. 6Hakkiicho xibbu olanto hajajaanchi Ixaaliya hadhannota Alekisaanderiyu yowolo afi're, isenni ha'neemmo gede assinke.
7Lowo barra suutunni ha'nanni shente, Qenidoosi yinanni katami mulira iillinummo. Bubbe alba hige ha'ra ho'liteennanke, Salimoona qacce widoonni sa'ne, Qerxeesi giddicho gaa'line ha'nummo. 8Lowo qarrinni qacce qacce amande ha'nanni Laasiyu Katami mule, «Dancha Malka» yinanni darga iillinummo.
9Doogote aana lowo yanna gooffinohuranna qatumete yanna sa'inohura, hatte yannara baaru aana ha'ra waajjishshannota ikkitinohura, Phaawuloosi manna, 10«Konne manna, kunni ka'a ha'neemmo ha'rinsho aana lowo qarri iillannoti leeltannoe. Markaawetenna hogowu aana calla ikkikkinni, mannu aanano lowo qarri iillanno» yee qorophisiisi. 11Xibbu olanto hajajaanchi kayinni Phaawuloosi yiinontenni roore markaawe laaqannohunna yowolote anni kultannore macciishsha roorsino. 12Hatti malka hawado hakko sayisate injiitinokkihura, rooru manni, «Alba hinge ha'ne dandiinanniha ikkiro, aliyye galchiminna wodiidi galchimi farora Finqe yinannita Qerxeesi malka iilline hawado hakko sayinso» yee mala shiqishi.
BAARU AANA DAMBALU KAI
13Manaado wodiidinni dagganno bubbe affe, heddino gede ikkinoha laweennansa markaawete cificho buqqisse hadhara ka'u. Malkatewiinni ka'e, Qerxeesi muleenni higge qacce amadde sa'u. 14Ikkollana shiima yanna gedensaanni, «Aliyye soojjaati hombobolatteeti» yinanniti wolqaataame bubbe giddichotenni ka'e aanansa daggu. 15Markaawe diilallo shaffanni qarrissino daafira, bubbe xiibbanna ha'nummo. 16Qeeda yinanni giddicho gaa'line ha'nanni hee'ne, markaawete yowolo lowo qarrinni gatinsoommo. 17Markaawete giddo loossannori yowolo goshooshshe markaawete aanira fushshite siiwotenni xaxxe usurtu. Markaaweno Surtiisi yinanniwa shaafaamo darga ubbanno yite waajjite, shara dirrisse bubbe xiibbanna hadhu. 18Hombobolatte batidhanni hadhinohura, layinki soodo markaawete aana hogomboonni uduunne baaru giddo tuttuga hanaffu. 19Sayikki barra markaawete giddo loonsanni uduunneno fushshite tuttuggu. 20Lowo barra arrishshonna beeddahe anfummokkinni bubbe lexxitanni hadhinohura, ganteemmo yineemmo hexxo ba'unke.
21Mannuno sagale itikkinni lowo barra iillino. Phaawuloosino kae uurre, «Manna, ani yoommota macciishshitine Qerxeesinni ka"a hoogginoommero, kuni qarrinna tini bao di"iillitanno. 22Xaano ikkiro markaawennita ikkinnina, ki'ne mittuno diba'inannina waajjitinoonte! 23Sai hashsha isiha ikkoommohu magansi'reemmo Magani soyino sokkaasinchi daye mule'ya uurre, 24‹Phaawuloosi, waajjitooti! Jawu moote albaanni uurra hasiissannohena. Ledokki hadhanni nooreno Maganu angakkira sayise uyino› yee kulinoena waajjitinoonte. 25Kunnira, manna waajjitinoonte! Maganu kulinoere baala wonshannota ammaneemmo. 26Ikkirono bubbe massite mitte giddicho aana tuggannonke» yii. 27Tonaa shoolki hashsha Adiriya Baari #27:27 Adiriya Baari, Mediteraaniyu Baari giddo mitto gafaati. aana bubbe daassitannanke ha'nanna hashshu taalootira markaawete giddo loossannorira baaru qacce iillitinoha lawinsa. 28Kunnira, bikkinanni siiwo baaru giddora tugge la'anno woyite giddo 80 cigile ikki. Xaano shiima geeshsha keeshshite bikkaasincho tugganno woyite giddo 60 cigile ikki. 29Markaawe baaru gama noo kinnara tu'mitannokki gede, badheenni qolte markaawe usurrannita shoole ciffa baaru giddora qolte tugge, hashshu rahe soodannonsa gede huuccidhu. 30Markaawete giddo loossannori mereerinni fulte xooqqara hedde, markaawete ciffa tuggannoha labbe, markaawete aaninni yowolo haadhe baaru giddo tuggu. 31Hakko mereero Phaawuloosi olantote hajajaanchonna olanto woshshe, «Kuni manni sammi yee ofolla hoogiro, ki'ne digattinanni» yiinsa. 32Kunnira olanto yowolo usurroonni siiwo murte wayi duhanno gede assitu. 33Sooda rahita, Phaawuloosi sagale ittanno gede kulanni, «Sagale ittinikkinni techo tonaa shoolki barraati. 34Kunnira xa ballo sagale itte! Ittiniro lubbo assidhinanni. Umi'ne dananchi nafa tae diuwannona» yii. 35Hatto yiihu gedensaanni tima haa're wo'munku albaanni Magano galati. Timano hiiqqaqqe ita hanafi. 36Hatte yannara baalunku jawaatte sagale ittu. 37Markaawete giddo hee'noommori mitteenni 276 mannaati. 38Baalunku itte ka'uhu gedensaanni, markaawete aana hogomboonni qamade fushshite baaru giddo tugge markaawe shottanno gede assitu.
MARKAAWE HIIQQANTU
39Soodita, hiikkiira iillite nooro diaffino. Ikkollana baaru qaccera noohu shaafaamu dargi leellinsa; dandiitoommero markaawe xiibbe qacce fushshitara heddu. 40Markaawete ciffa tirte baaru giddo agurtu. Hakkawoyintenni markaawete laaqaasinchu siibba tirte, shara hoolte bubbe bubbissanno widoonni qolte uurrisse, qacce higge hadhu. 41Ikkollana markaawe shaafu duunora tu'mite eela higge galchantu. Albiido shaafaho qasidhe millo gibbu. Badheenni kayinni bubbe lowo geeshsha xiibbanni noohura markaawe hiiqqaqqantu.
42Olanto, mittuno daahe fule ba"annokki gede hasidhe, usuranyoota shite guddara heddu. 43Xibbu roorrichi kayinni Phaawuloosi gatisara hasi'rino daafira, heddinore assitannokki gede hooli. Dandiitannori baaru giddora kubbite e'e, daakke baattote aanira iillitanno gede hajaji. 44Wolootu kayinni markaawete cufananna hiiqqantino haqqe cu'midhe fultanno gede kuli. Kunni garinni baalunku keerunni baattote aanira iillitu.
Iliyochaguliwa sasa
SOQQAMAASINETE LOOSO 27: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
