Roome 7
7
Rɔmɛ Waawanoŋk
1Iinak manyaakak eeta sigɛ dooytaanakik, tonɗiika joopa sigaaga ɗegerar higiik, a kiir ɗegerɔɔn kɛ lak higii ɓaŋkawuka ete raŋk ɔɔtɛya sinaana ɓɛɛlɛɛɗ wɛɛŋakɛk dakɛɗa? 2Rɔmɛɛɗ, ege jartii korkortan higii waawanoŋk ɔɔtɛya sinaana ɓɛɛlɛɛɗ baabuy nɛɛkɛ wɛɛŋakɛk, mayakana ɔkɔn rɛr baabuy nɛɛkɛkiŋ, nɛɓɔ sɛɛn woortan higii waawanoŋk. 3Ɔkɔn waawu baabuya omalta ma in ɓɛɛlɛ baabuy nɛɛkɛŋ, nɛ riyɛɛ kɛ ibiɗiikɔŋ. Mayakana ɔkɔn rɛr baabuy nɛɛkɛkiŋ, nɛ sɛɛn woortan higii sinaanɛ ɛ kɛɛ toniiɗ kɛ ibiɗiikɔŋ kɛygun aasi waawu baabuya omaltaaŋ.
4Oko sinik iinak manyaakak eeta, rɛrarikan higiya goy buusɛ Yeese Kereseek. Nɛ agut sini eteŋk Kereseek sinɛɓa ŋaarki ret walasak kɛnɔ gaɓii taamɛ ijaaga Waakoyotoŋk. 5A inɓa ki rerin buusɛ naŋk sini tikitank nɛɓa ijaajagɗi buusɛɛ naŋk tak ɗɛyan tikiyɛɛkoŋk sinɛ ɓeeɓeski higiik kaakastaanakɛ ɛɛk naŋkik, nɛɓa gaɓii taamɛ retoŋk. 6Yakana sisɔ rɛɛriikan higiya sinaanakan tin korkokork nɛkan ŋaarkii yaakata, kɛnɔ ijaagɗikii beeɗit sinɔɔnɛ tɔɔnuk ikekeɓ Wɛɛŋa sigɔ Geetitaanakik, a moko sinaanɛɓa taapɛɛ higii saaɓa bɔɔlɔŋk.
Higi A Tikiyɛ
7Anɛɓɔ tonii ɛk? Ege higii tikiyɛ? Moko adaktan. Kaagunɓa ɗegerɔɔn kɛ tikiyɛ jikonak, ɔkɔn moko goy higiyoŋkuŋ. Kaagunɓa ɗegerɔɔn ɗɛyan, ɔkɔnɓa ki toniiɗ higii kɛ, "Kat ɗɛyin." 8Yakana laŋir tikiyɛɛk milki sekiyɛɛkɛ, nɛte ijaagir tak ɗɛyaanak baŋɛ sigɔ pakakataaŋɔŋk. Ege tikiyɛɛk reteer a kiiɗɛ higi. 9Eetɓa bɔdtan saaɓa kiiɗɛ higiik, mayakana saaɓa mɛlɛrkiɗ sekiyɛɛkik, nɛɓa tikiyɛɛk bɔdtaanak ɛɓa rɛɛra. 10Sekiyɛ sigɛɓa kuumɗigiɗɛɛ kɛ laŋiiɗɛɛkoy bɔdɛɛk nɛɓɔta ɗɔkarki rer. 11Laŋirɓa tikiyɛɛk milki goy sekiyɛɛkoŋk nɛɓati raamɛr, nɛɓati ɓokotur sekiyɛɛkɛ. 12Agut sini ege higii geetitan, ɛɓɔrɛ sekiyɛɛk geetitaanak, ɛ liki, ɛ mentaana.
13Anɛta any sinɔ mentanŋɔŋk dakɛ a rer? Ki dakɛ adaktan. Ijaagir tikiyɛɛk rer eete tak goy higi sinɔ mentanŋɔŋk kɛnɔ yaaŋɛ kɛ tikiyɛ jikonak, nɛ agut sini ege tikiyɛɛk tikitaanak a kaalɛŋ goy sekiyɛɛkoŋk.
14Ɗegerii kɛ kuskan higii sooy lak Waakoyok, yakana eet iɗit taaroŋk sinɔkan ɓalɗiiɗɛɛ tikiyɛɛkaak a ito laaŋoyenk. 15Kaa ɗegerɔɔn any sinɛ araak. Agut sinɔ kaa ariɗ any sinɛ ɗɛya a araaŋɔŋk, mayakana ara sinɛ kaa ɗɛyɛɛk. 16Ɔkɔn ara sinɛ kaa ɗɛyɛkiŋ, nɛ dooma sinɔ kɛ mentan higiiŋɔŋk. 17Nɛ ɔkɔn ɓɛɛlɛ oko sinikiŋ, nɛ moko ara sini saak, ma arɗi tikiyɛ sigɛ beeɗir eete takik. 18Nɛ ɗegera kɛ kɛɛ eete tak any sinɔ mentanŋɔŋk taare naakɛ tak. Kɛygun aasi ɗɛykaaya ijaaga any sinɔ mentanŋɔŋk eek naakɛ takiŋ nɛ kaa oolɛ a ara sɛɛniŋ. 19Agut sinɔ kaa ariiɗ any sinɔ mentanŋɔŋk sinɛ ɗɛyaak, mayakana ara any sinɔ ŋɛɛwɛnŋɔŋk sinɛ kaa ɗɛyɛɛk. 20Ɔkɔn ijaaga any sinɛ kaa ɗɛyɛ a gun ijaagaŋɔŋkuŋ, nɛ moko ariɗika any sinɛ eet, ma arɗi tikiyɛ sigɛ beeɗir eete takik.
21Mɛlɛkɔta kɛ ijajagi higi siniŋ. Saa ɗɛykɛɗa ijaaga any sinɔ mentanŋɔŋk, ma eet a any sinɔ ŋɛɛwɛnŋɔŋk agut omoŋ. 22Yaati ɓayɛ jɛt higii Waakoyotoŋk. 23Yakana dɛna a lakɛ higi om sinɔ ijaagɗi nyonitaakɛ gaanɛ ɛɛkoŋk takik, a tima a higi kalbi naakik nɛti ari a eet korkortan higiya tikiyɛɛkoŋk sinɛ ijaagɗi nyonitaakɛ gaanɛ ɛɛkoŋk takik. 24Eet rakatkan sinɔ ɓɛɛlɛ ɛkik! Wooɗ sinɛ oolɛ ati ebɔduku taare sineene dilɗi retaak? 25In dakɛr pɔɔsiyɛɛk Waakoyota goy Suumi naŋk, Yeese Kerese sinɛ kan tin ebɔdukuk. Nɛ agut sini tiiɗika higiya Waakoyotoŋk kalbii naakɛk, yakana tiiɗika taare naakɛ higiya tikiyɛɛkoŋk.
Iliyochaguliwa sasa
Roome 7: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
