Roome 4
4
Mentanɓa Abraham Taamɛkɛ Waakoyotoŋk Ŋaadiyɛɛkɛ
1Tonii sisɔ ɛk agut Abraham sinɛɓa ɔrɛɛ naŋk taarek? 2Ɔkɔnɓa Abraham mentan taamɛkɛ Waakoyotoŋk ijaagiŋ, nɛ gunɓa lak any sinɔ meriiɗ ɛɛkŋɔŋkuŋ. Yakanaɓa ki oolɛ a meri ɛɛk taamɛkɛ Waakoyotoŋkuŋ. 3Tonu Wargatɛ Waakoyotoŋk kɛ, "Ŋaadiɓa Abraham Waakoyo, nɛɓa ikomguɗɛɛ ŋaadiyɛ gɛɛŋk a mentanka taamɛkɛ Waakoyotoŋk." 4Saa ijaagɗiɗ iɗik nɛ wori sinɛ koyguɗɛɛk kiigiɗɛ ikomiit a wookan, mayakana gati tɔkiyan nɛɛkik. 5Kɛygun aasi iɗit kiikɛ ijaagɛ any sinɔ mentanŋɔŋkuŋ, ma ɔkɔn ŋaadi Waakoyo sinɛ ari tikitaanak a mentaana taamɛkɛ Gɛɛnɛkik, nɛ ikomguɗɛɛ a mentanka taamɛkɛ Waakoyotoŋk. 6Yaaŋɛ Daawit goy nɛɛkɛ kɛ geetitan a ɛtɛ ɛk iɗit sinɛ ari Waakoyot a mentan taamɛkɛ Gɛɛnɛ, ma kiiɗɛ ijaag sinɔ mentanŋɔŋkuk, nɛɓa tonu kɛ,
7"Geetitaanak joop sigɛkan ranyjɛɛrɛ sɛɛge tikiyɛ gɛŋkik,
ɛ sɛɛge ŋɔɗurɛɛ ŋɛɛwɛnka nɛŋkik.
8Geetitan iɗit sinɛ Suumii kiigeeɗ ikomiit tikiyɛ gɛɛŋkik."
9Anɛ geet siniɓa tonu Daawitik joopa sigaagakan yayawɛɛk dakɛɗa, maŋk ɓɔrɛ joopa sigaagakan kɛɛ yawɛɛɗik? Tonii kɛ ikomɛɛɓa Abrahama ŋaadiyɛ gɛɛŋk a mentanka taamɛkɛ Waakoyotoŋk. 10Anɛɓa ikomguɗɛɛ ɛk? Yawɛɛɗ nɛɛkɛ baŋiya, maŋk yawɛɛɗ nɛɛkɛ ɔɗɔɔkɛ? Ikomguɗɛɛɓa yawɛɛɗ nɛɛkɛ ɔɗɔɔkɛ, ma mokoɓa yawɛɛɗ nɛɛkɛ baŋiya. 11Yawɛɛɓa Abraham kɛnɔ yaaŋɛ sinɔ kɛ ikomguɗɛɛɓa ŋaadiyɛ gɛɛŋk a mentanka taamɛkɛ Waakoyotoŋkuk a inɓa kɛɛ yawɛɛɗik. Agut sini ege Abraham ɛpɛn joopa sigaaga ŋaadiɗi maɓa kɛɛ sɛɛg yawɛɛɗik a sigaaga sɛɛga ikomɛ ŋaadiyɛ gɛŋk a mentanka taamɛkɛ Waakoyotoŋkuk. 12Sɛɛn ɓɔrɛ ɔrɛɛ joop sigɛɓa yayawɛɛkiŋ. Nɔ sɛɛga dakɛɗ a ɔrɛɛk moko agut sinɔɓa yayawuɗɛɛ sɛɛgŋɔŋk, mayakana agut sinɔ beeɗirɗi oko beeɗit ŋaadiyɛɛkoŋkuk sinɛɓa beeɗiɗ Abraham sinɛɓa ɔrɛɛ naŋkik a inɓa kɛɛ yawɛɛɗik.
13Kuumɗiɓa Waakoyot Abrahama a komoya nɛɛka kɛnɔkoy ege ɗook nɛɛk. Ijaagɛɛɓa kuumiyɛ sigiŋ moko agut sinɔɓa Abraham tiiɗiɗ higiyaak, mayakana agut sinɔɓa ŋaadiɗiiɗ ɛɓa ikomguɗɛɛ mentanka taamɛkɛ Waakoyotoŋk. 14Ɔkɔn joop sigɛ koorɛr higiik moonɛr nyon, nɛ gunɓa kir kɔnyɗiit ŋaadiyɛɛk ma kuumiyɛ gɛɛnɛ ɓɛɛlɛr kanysɛya. 15Agut sinɔ ɗɔku higii goopan, mayakana kɛɛ tikiyɛ nyon sinaanɛ kiiɗɛ higik.
16Tukɛɛɓa ŋaadiyɛ sigɛ kookorɛɛk ŋaadiyɛɛkɛ raŋk kɛnɔ dakɛr kuumiyɛ sigi a kabdi mɛyin a maariyeet Waakoyotoŋk komoya Abrahamuk baŋɛ, moko joopa sigaaga tiiɗi higiyaak dakɛɗa mayakana ɓɔrɛ joopa sigaaga ŋaadiɗi oko sinɛɓa ijaagiɗ Abrahamk, agut sinɔ egeɓa Abraham ɔrɛɛ naŋk baŋɛ, 17oko sinɛɓa taapɛɛɗɛ Wargatɛɛ Waakoyotoŋk kɛ, "Ara kɔnu a ɛpɛn joopa sigɔɔga ɓɔɔkaaŋɔŋk." Yaaŋiyɛɛkɛ sigeege Waakoyo sinɛ ŋaadik sinɛ gaɓɛ wɛɛŋa reteerak ɛ ɗɔku ola sigɔɓa kɛɛ sɛɛgik a ɓɛɛlɛrŋɔŋk.
18Ŋaadiɗiiɓa Abraham ɛɓa lak ŋaadiyɛ sigɛ kookorɛɛk, soodi ki gayɛ a gun lakiɗɛ ŋaadiyɛ sigɛ kookorɛɛkiŋ, kɛnɔ dakɛ a sɛɛn ɔrɛɛ joop sigɔ ɓɔɔkaaŋɔŋk ɗokanɛkoŋk, oko sinɛɓa taapɛɛɗɛ Wargatɛɛ Waakoyotoŋk kɛ, "Obiikoy komoy nookɛ a ɛtɛ oko sinik." 19Kiɓa sɛŋk bɔɔlaat ŋaadiyɛɛkɛ saaɓa dɛnɛɛɗ buusɛ nɛɛkik sinɛ itoɓa rɛr eekeerɛk agut sinɔɓa atukuɗ emeyi gɛɛnɛ sigɔɔgɛ ɗibɛk, maŋk saaɓa dɛnɛɛɗ amɗ Saaraak sinɛ tersikank. 20Kiiɗɛɓa koɓiɗak a pɛɛy nɔ ki ŋaadit ŋaadiyɛ sigɛ kookork Waakoyotoŋk, maɓa ɓaŋkaawur ŋaadiyɛɛkɛ gɛɛnɛ a gaɓɛ eemɛyɔn Waakoyota. 21Sɛɛnɓa eekerkan ɓayɛ baŋɛ sinɔɔnɛ kɛ dusanɛkoy Waakoyot ŋaadiyɛ sigɛ kookork sigɛɓa gageeɗikiŋ. 22Agut sini ikomguɗɛɓa ŋaadiyɛ gɛɛŋk a mentanka taamɛkɛ Waakoyotoŋk. 23Mokoɓa taapɛɛ agut sɛɛn dakɛɗa pɛɛni sinɛ tonu kɛ, "Ikomguɗɛɓa a mentanka taamɛkɛ Waakoyotoŋk." 24Yakana ɓɔrɛ ikomu koy a mentanka taamɛkɛ Waakoyotoŋk eteŋka sigaaga ŋaadii Sɛɛn sinɛɓa boŋku Suumi naŋk Yeese Kerese ret walasak. 25Gaɓɛɛɓa Sɛɛn kɛnɔ rɛr agut tikiyɛ gaŋk, ŋaarkiɓa ret walasak kɛnɔ mentankii taamɛkɛ Waakoyotoŋk.
Iliyochaguliwa sasa
Roome 4: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
