Roome 3
3
1Anɛ sinɔ geeɗɛ iɗit Ayuuduk tɔkɔny nɛɛk jikon? Ma yawɛ lak tɔkɔny kɛ jikon? 2Obi tɔkɔny nɛɛkɛkiŋ gopakɛ sigɔɔgɛ ɓɔɔkaaŋɔŋk, jeemɛ olaatɛ baŋɛ gaɓɛɛɓa pɛɛni Waakoyotoŋk a adarat sɛɛga.
3Ɔkɔn joop Ayuuduk a omoŋ omoŋ moko sɛɛg eekerkaanakiŋ, nɛ dakɛr eekeer kɛygun aasi ege joop baŋɛ nyonkaanakiŋ, ma sɛŋk ege Waakoyot eekerkan. 4Ki gayɛ a daktan. Ege joop baŋɛ nyonkaanak, mayakana in ege Waakoyot eekerkan, oko sinɛɓa taapɛɛɗɛ Wargatɛɛ Waakoyotoŋk kɛ,
"Eekerkan any sinɛ tonunk,
lɔsiɗiikinkɔɔ saadi palamɗiɗɛɛŋɔŋkuŋ."
5Mayakana ɔkɔn yaaŋɛr tikiyɛ gaŋk mentanka Waakoyotoŋkuŋ, anɛ tonii ɛk? Moko Waakoyot pɛrɛdɛ a liki saa tin goopɗu agut tikiyɛ gaŋkik? Tonɗiika seedi oko koɓi etoŋk. 6Ki gayɛ adaktan. Ɔkɔnɓa ɓɛɛlɛ oko sinikiŋ, nɛ gunkoy pɛrɛdɛ Waakoyot joope ɗookoŋk ɛk? 7Mayakana ɔkɔn yaaŋɛr nyon gaanɛ eekeer Waakoyotoŋkuŋ, a obiika eemɛyɔn nɛɛkiŋ, nɛti goop a ito eet tikitan agut jikon? 8Daariɗita joop a omoŋ omoŋ a ito rɔɔririyika kɛ koy ijaagii any sinɔ ŋɛɛwɛnŋɔŋk nɔkɔɔ laŋii any sinɔ mentanŋɔŋk. Agut sini liki goopan sinɛ goopɗɛ sɛɛgik.
Ege Joop Baŋɛ Tikitaanak
9Anɛ dɔɔskii eteŋk sigɛ joop Ayuuduk joope sigaagɛ moko Ayuuduk? Moko adaktan. Kɔnyɗiikaakan jeemɛ sinɔɔnɛ kɛ joop Ayuuduk kɛygun joop sigɔ moko Ayuuduk atu tikiyɛɛkɛ goyse ɗeek. 10Agut sinɔ taapɛɛɓa Wargatɛɛ Waakoyotoŋk kɛ,
"Kɛɛ iɗit sinɔ omoŋɔŋk mentan taamɛkɛ Waakoyotoŋkuk,
kɛɛ aasi sinɔ omoŋɔŋk.
11Kɛɛ iɗit sinɔ lak koɓik ara,
kɛɛ iɗit sinɔ ɗɛyɛ Waakoyok ara.
12Ŋaararkikan gopɛ Waakoyotoŋk baŋɛ,
dakɛrkan a kɛɛ any sinɔ kɔnyɛrkik sɛɛg baŋɛ,
kɛɛ iɗit sinɔ omoŋɔŋk ijaag any sinɔ mentanŋɔŋk,
kɛɛ aasi sinɔ omoŋɔŋk.
13Atutun gɛŋk ito pii sinɔkan tayɗiŋɔŋk,
tonur nyon kaɗateerɛ gɛŋk,
toni atutun gɛŋkik, ito marji kookowoŋk.
14Enya atutun gɛŋk koony a ŋɛɛwɛnka.
15Gorgoorar derak gɛŋk kɛnɔ ɓuurerki yɛrom.
16Lakɛ gopɛ nɛŋk sɔɔkiyɛ a rakatɛ.
17Kir ɗegerɔɔn gopan bɔdɛɛɗoŋk
18Kɛɛ taamɛkɛ gɛŋk ɔɗɔɔkɛ tuɓur Waakoyotoŋk."
19Sisɔ ɗegerii kɛ tonɗi higii joopa sigɔɔga atu higii goyse ɗeekik. Nɔ ɓɛɛlɛɛɗ sinik kɛnɔ miinye atutun joop baŋɛk ɛkoy ar ɗoo sini baŋɛ pirdii Waakoyotoŋk goyse ɗeek. 20Nɛ agut sini kɛɛ iɗit sinɔ mentan taamɛkɛ Waakoyotoŋk ma dusanɛɛ ijaag higiyoŋkuk, agut sinɔ ɗegerɛ kɛ ege joop baŋɛ tikitaanak higii.
Mentanka Taamɛkɛ Waakoyotoŋk Goy Ŋaadiyɛɛkoŋk
21Yakana sisɔ yaaŋɛkan ɛɛk mentanka Waakoyotoŋk higii walas, waasɛrgeeɗ aasi sɛɛna higii a joop pɛrkaakoŋkuŋ. 22Ege sini mentanka Waakoyotoŋk sinɛ laŋɛɛ ŋaadiyɛɛkɛ Yeese Kereseek joopa sigaaga ŋaadiɗiik baŋɛ, agut sinɔ kɛɛ pakakat ara. 23Agut sinɔ tikiɗikan joop baŋɛ, ɛkan bitakɗi sɛɛge eemɛyɔn Waakoyotoŋk, 24mentaanirar sɛɛk taamɛkɛ Waakoyotoŋk wookaan nɛɛkɛ goy Yeese Keresee sinɛkan gaɓɛ ɛɛk nɛɛk gumakaak. 25Wideerɓa Waakoyot Yeese Keresee a uduŋeet kɛnɔ laŋir joop sigɛ ŋaadiɗi sɛɛnek baŋɛk tɔŋɔɗ tikiyɛɛkoŋk yɛrom nɛɛkɛk. Ijaagɓa Waakoyot sini ɓaŋkaawurɔɔn oolaan nɛɛkik a ŋɔɗur tikiyɛ sigɛɓa ijaagir joop ɗeeŋk a yaaŋɛ pirdi nɛɛk sinɛ likik. 26Nɔɓa ijaagiɗ sinik kɛnɔ yaaŋɛ eme sineene kɛ Sɛɛn ɔɗɔwa nɛɛka iɗit sinɔ mentan ɛ kɛnɔ ari joop sigɛ ŋaadiɗi Yeeseek a mentaana taamɛkɛ Waakoyotoŋk.
27Oolii a merii ɛɛk jikoy? Kɛɛ ara. Manɔ kiiɗii meriiɗ ɛɛkik agut jikon? Agut sinɔ tiiɗiɗii higiyaak? Moko, yakana agut higi ŋaadiyɛɛkoŋk. 28Agut sini dusanii sinɔ kɛ mentan iɗit Waakoyote ma ŋaadiɗiiŋ dakɛɗa, ma moko ijaag sinɔɔnɛ sekɛ higiik. 29Ege Waakoyot Waakoyo Ayuuduk dakɛɗa? A moko Waakoyo joop sigɛ moko Ayuuduk? Eekeerɛ ege ɓɔrɛ Waakoyot Waakoyo joop sigɛ moko Ayuuduk. 30Ege Waakoyot omoŋ, ɛ ari joop Ayuuduk a mentaanaŋ agut ɛɛk nɛɛk ŋaadiyɛ gɛŋkik. Maɓɔrɛ ari a mentaana joop sigɔ moko Ayuuduk ŋaadiyɛɛkɛ gɛŋk. 31Aalii higi ŋaadiyɛɛkɛ sigegeeŋ? Moko, arii higi a ɛtɛ a ɓaŋkawuŋ.
Iliyochaguliwa sasa
Roome 3: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
