Roome 10
10
1Iinak manyaakak eeta sigɛ dooytaanakik, ɗɛyan ɓayɛ naakik agut joop Israeelik kalɛya Waakoyo kɛnɔ bɔdɛr. 2Waasa saak ɔɗɔwa naaka kɛ latu sɛɛk nyeken wɛɛŋakoŋk agut Waakoyo, ma moko ɗegerɔɔn sinɔɔnɛ likik. 3Agut sinɔ kirɓa ɗegerɔɔn mentanka taamɛkɛ Waakoyotoŋk sinɛ kus sooy lak Waakoyok, ɛɓa tukerki ɛɛka nɛŋk mentanka taamɛkɛ Waakoyotoŋk, kirɓa ɓalɗiit mentankaata taamɛkɛ Waakoyotoŋk. 4Ege Kerese pedi higiyoŋk kɛnɔ dakɛ a mentanka taamɛkɛ Waakoyotoŋk joopa sigaaga ŋaadiɗiik baŋɛ.
5Tonuɓa Muuse agut mentanka taamɛkɛ Waakoyotoŋk sinɛ ar higiik kɛ, "Iɗit sinɛ koorɛ sinik nɛkoy beeɗ wɛɛŋakɛ." 6Tonu mentanka taamɛkɛ Waakoyotoŋk sinɛ tukiɗik ŋaadiyɛɛkɛɛk kɛ, "Kat tonun ɓayaay nookɛ kɛ, 'Makoy kɛɛ dariya wooɗ?"' orkun sineene Keresee. 7Maŋk kat tonun kɛ, "Makoy kɛɛ ɗooka takana wooɗ?" boŋkun sineene Keresee reteerɛ. 8Ɛ ɓɔrɛ tonu Wargatɛ Waakoyotoŋk kɛ "Arne pɛɛni nɛɛkɛ jɔk, ar aasi ad nookɛ a ɓayaay nookɛk." Pɛɛni sini waasii seekik pɛɛni ŋaadiyɛɛkoŋk, 9agut sinɔ ɔkɔn waasin ad nookɛ kɛ ege Yeese Suumiŋ, ɛ ŋaadin ɓayaay nookɛ kɛ boŋkuɓa sɛɛn Waakoyot ret walasaŋ, nɛkoy bɔdun. 10Mentan iɗit taamɛkɛ Waakoyotoŋk saa ŋaadiɗiiɗik, nɛkoy bɔdɛ saa waasɛɛɗi ad nɛɛkɛkik. 11Oko sinɛ toniiɗ Wargatɛ Waakoyotoŋk kɛ, "Kɛɛ keeny ete sinaanɛ ŋaadiɗi sɛɛnek." 12Agut sinɔ kɛɛ pakakat joope Ayuuduk a joope sigɔɔgɛ moko Ayuuduk kɔɔr. Ege Suumi sinɛ omoŋɔŋk Suumi joop baŋɛk, ɛ geeti joop sigɛ riyar Sɛɛnik, 13agut sinɔ bɔdɛrkoy joop sigɛ riyar tiriya Suumiyoŋk baŋɛ.
14Anɛ oolɛr joop a riyar sɛɛn ɛk a kir ŋaadiɗiit sɛɛne? Oolɛr a ŋaadiɗiiɗiŋ ɛk, agut sɛɛn a kan kir weenta? Oolɛr a tiyɛrŋ ɛk a kɛɛ iɗit sinɔ sɛɛg rɔɔriyk? 15Oolɛr a rɔɔriyaaŋ ɛk ɔkɔnkɔ sɛɛg kɛɛ wosɛyɛtiŋ? Oko sinɛɓa taapɛɛɗɛ Wargatɛɛ Waakoyotoŋk kɛ, "Mentaana ɛk derak joop sigɛ waasɛr Pɛɛni sinɔ Ɓɛlkɛɛstank!"
16Yakanakan moko boŋur joop baŋɛ sigɛɓa tiyɛr Pɛɛni sinɛ Ɓɛlkɛɛstank. Tonuɓa Isaayas kɛ, "Suumi naakɛk, wooɗ sinɛɓa ŋaadi waasiyɛ gaŋkik?" 17Kurak ŋaadiyɛɛk tiyaan wosɛ nɛɛkik, maɓɔrɛ kus wosɛ nɛɛkɛ goy rɔɔriyɔɔnoŋk. 18Yakana kɔɔniyaaka kɛ kirɓa weenta? Tiyɛrɓa eekeerɛ oko sinɛ toniiɗ Wargatɛ Waakoyotoŋk kɛ, "Tiyɛɛɓa koŋgoy nɛŋk ɗoo baŋɛ, mɛlɛɓa any sinɛ tonurk kɛntɛya ɗookoŋk." 19Kɔɔniyaaka kɛkar, kirɓa joop Israeelik ɗegerɔɔn? Tonuɓa Muuse jeemɛ kɛ, "Araakɔɔ kɔnu a nyekenkaanak joope sigɔɔgɛ daraayɛɛŋɔŋk, araakɔɔ kɔnu a ŋadiiriŋ joope sigɔɔgɛ kɛɛ sɛɛge ɗegerɔnk." 20Tonuɓa Isaayas a ki ɓuriit kɛ, "Laŋɛɛ kɔtu joope sigaagakɔtu kir ɗɛyɛkiŋ, yaaŋakɔ ɛɛk naak joopa sigaaga kɔtu kir kɔɔniyɔɔnukuŋ." 21Yakana tonu agut Israeel kɛ, "Kera arin gaaŋk waawuy nɛɛk baŋɛ son lak joop sigɔ kir tiiɗit ɛ kir ariɗ kɛ dɔɔsuk."
Iliyochaguliwa sasa
Roome 10: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
