Ijaag Wosɛytaanakoŋk 20
20
Ŋawit Paawuloosuk Ɗokanɛɛka Mɛkedooniyaak A Giriikik
1Saaɓa dakɛɛɗ ɗakan nɛɛkɛ kɛ manyki nɛɓa Paawuloos riy ŋaadtaanak agut omoŋ, nɛ gaananɛ sɛɛg pɛɛnii rɔɔriyɔɔnoŋk, nɛɓa pakakati nɛ ŋaar ɗooka Mɛkedooniyaak. 2Nyonitaakɛ sigaagɛɓa ɗoyiɗik ariɓa ŋaadtaanak a ɓaŋkaawurarŋ rɔɔriyɔɔn sinɔɔnɛ obiiŋɔŋk nɛ ŋaar ɗooka Giriikik, 3nɛɓa beeɗ saadi a ɛyɛkeer jiit. Saadi baŋiya koɓuɓa ɛnyɛ Sooriyaakak emɗ, yakana agut sinɔɓa ɗegerɗi kɛ giimar sɛɛn joop Ayuudukŋɔŋk, nɛɓa ɗɛyɛ a ɗoyu sinɔɔnɛ Mɛkedooniyaak. 4Joop sigɛɓa kaar a sɛɛn agut omoŋɔŋk, tɔɔn Pirhusuk Sopatros Beeriyaak, a Aristirokoos a Sikondus Tɛsɛlonkeek, a Gaayiyoos Dɛrbeek, a Timotiyoos, a Tikikoos a Tiropimos Isiyaak. 5Kaarkunkan sɛɛk eteŋkɛ ɔɗɔɔkɛ nɛ tin koorɛrkun Tiroadaake. 6Nɛkan seek teeŋii emɗa Pilipisiyoose Ba'aale Nasiyoŋk baŋiya, nɛ kɛɛɗii saana atukuɗ sɛɛkik nɛ mɛlii ɗoŋikɛ sigɔɔgɛ tuulk Tiroadaa, nɛkan saadi kaalii ɗoŋ a tula pɛɛy.
Pedi Lɛɛwɛɛt Paawuloosuk Tiroadaak
7Tolɗiikiiɓa agut omoŋ kidamii ajigeya#20:7Ikomiit joop Ayuuduk ege Kidamii Waawuy sinɛ tuktan Sambatɛɛk., kɛnɔ nyɔɔkii kiiwu sinɔ geetitank. Nɛɓa Paawuloos waasiɗi joopa gɛɛna agut sinɔɓa ɗɛyɛɛɗ a ŋaar alɛ nɛɛkɛŋɔŋk, ariɓa waasiyɛ gɛɛŋk a jeeɗoŋ mɛlɛɛɗa nɔ kaay kɔɔr nɛɛk. 8Lakɛɓa ɗaawan jɛt pooke sinaanɛɓa tolɗiɗiik. 9Beeberkan ateeny omaay sinɔ riyɛ kɛ Ewutikosuk maskoote. Nɛ agut sinɔɓa Paawuloos waasiɗiiɗ kɛ manyk, nɛɓa ateeny sinɛ lak ɗoŋ jɛt nɛɓa lɔsɛr sɛɛniŋ nɛ ɗirki pooke jiiteene nɛɛkɛ ɗooka. Nɛ saaɓa ɓɔŋgɔɔrɛrɗi joopk, nɛɓa dɛnɛr a kɔ rɛrŋ. 10Nɛɓa Paawuloos kus ɗooka, nɛ kɔru nɛ gaamku nɛ tonu kɛ, "Kat ŋaatɛɛ. In ɓɛɛlɛrɗi wɛɛŋa gɛɛnɛŋ!" 11Nɛɓa Paawuloos teeŋɛ kɛkar rakaaya nɛ kɛɛ ŋapati kiiwu nɛɛk nɛ ɗami a ŋaadtaanak agut omoŋ. Nɛɓa waawasi a joop gɛɛŋk mɛlɛɛɗa aayirɔɔna nɛ saadi baŋiya ŋaarŋ. 12Nɛɓa joop gɛɛnɛ diiler ateeny sinɛkɔ bɔdukuk nyaka nɛɛkaak nɛɓa gaananɛr ɛɛk a yaa sɛɛgaŋ.
Ŋaar Paawuloos Tiroadaake Militiyaaka
13Yakanakan seek ɗoykuunii ɔɗɔɔkɛ son lak emɗ nɛɛkik kɛnɔ kɛɛɗii boŋii Paawoloos, nɛɓa saadi ŋaarii emɗ Asoona, nɔɓa ijaagiiɗi oko sinikik agut sinɔɓa Paawuloos ɗɛyɛɛɗ a kɛɛ derɛ ɗookuk. 14Nɛɓa lalaŋikii a sɛɛn Asoone, nɛ gaɓɛɛrii emɗa nɛ kɛɛɗii Mitiliniya agut omoŋ. 15Nɛɓa alɛ nɛɛkɛ ŋaarii saadi nɛ kaalii asuulɛ Kiyosuk. Nɛɓa alɛ nɛɛkɛ ekaŋii nɛ mɛlii asuulɛya Saamoosuk nɛ romiɗ nɛɛkɛ mɛlii Mitiliniya. 16Ɗɛyɛɓa Paawuloos a ɗoyu Epesoone a gopan kɛnɔ kat moɗɛɛ ɔɔtɛ Isiyaake, agut sinɔ saa ɗoyiɗ Ba'aale Pentekosteek sinaanɛkɔɔ eemɛyɛɛk ɗɛyɛɓa a ɔkɔn gaygeeɗiŋ gun laŋɛɛ sɛɛn Yorsaleeme.
Pakakati Paawuloos A Gutarɛyɛ Epesoonuk
17Wosɛyɛɓa Paawuloos iɗit Militine Epesoona kɛnɔ riykɛɛ gutarɛyɛ gode Sambatɛyoŋkuk. 18Saaɓa kurakiɗ son lak sɛɛnik, nɛɓa tonu sɛɛga kɛ, "A tukiɗi ɓenysinaanɛkan mɛlkiɗa Isiyaakaak ɗegerari kɛ beeɗiikan a iinak agut omoŋ. 19Kɛygun laŋakaaya rakatɛ giiman joop Ayuudukuŋ nɛ ijaagɗikaa Suumiya rikiteet ɛɛkoŋk a pileetakɛ. 20Saakan kɔnu rɔɔriyɗa soogiyakɛ totoliiɗ joopk maŋk sinɔɔnɛ nyaki goŋkuk, nɛkan kɔna tona any sinɔ kɔnu kɔnyɛŋɔŋk baŋɛ, ma kɛɛ any sinɔkan ŋɔɗaak ara. 21Joop Ayuuduk a sigɛ moko Ayuuduk waasaakan sɛɛga a ɓaŋkawuŋ kɛnɔ guugunyar anta sinɔɔna mentanŋɔŋk nɔ weerik Waakoyota nɔ ŋaadir Suumi naŋk Yeesee.
22"Maɓɔrɛ sisɔ tonurkɔta Wɛɛŋa sigɔ Geetitaanakik, kɛnɔ kɛɛɗa Yorsaleema a kaa ɗegerɔɔn kɛ laŋkaakɔɔ jikon saakɔɔ mɛlɛɛɗa saanak, 23tonurkɔta Wɛɛŋa sigɔ Geetitaanakik kɛ laŋkaakɔɔ katamɛɛkɛ korkoɗɔn a rakatɛ. 24Yakana kaa aasi saak koɓiit wɛɛŋaka gaanak, nɔkoy ruumeeɗa ijaag naak wookan Waakoyotoŋk a rɔɔriyɔn Pɛɛni sinɔ Ɓɛlkɛɛstank ɛ nɔkoy ruumeeɗa ijaag sinɛɓata gaɓɛ Suumi Yeeseek.
25"Weeweriikaakan iinakɛ kɔɔr nɔ mɛlɛɛɗa sisɔwa a rɔɔriyaaɗa burɛ Waakoyotoŋk. Mayakana a tukiɗi sisɔ ɗegera kɛ kɛɛ iinakɛ iɗit sinɔkoy dɛnɛ taamɛ gaaŋkik kɛkark. 26Agut sini yaaŋa kɔna waawuy sineene ɓenysek kɛ ɔkɔnkɔne badɛ iɗit a omoŋ kɛɛte ɔɗɔwikeen nɛɛk. 27Agut sinɔ waasaakɔ kɔna koɓi Waakoyotoŋk baŋɛ, a kɛɛ any sinɔkɔ ŋɔɗaak. 28Daamarkan kɔnu Wɛɛŋa sigɔ Geetitaanakik a iinak koortaanak pony nɛɛkik, nɛɓɔ in koorɛɛ ɛɛk noŋk a pony nɛɛk. In lowɛɛ joop Waakoyotoŋk sigɛkan sɛɛga gaɓɛ yɛrom Tɔɔn nɛɛkik a any gaamitoŋk. 29Saakɔɔ ŋaarɗak baŋiya, ɗegera kɛ guugunyarkikɔɔ kɔna kɔɔra joop sigɔ kalkaalar a ito tuwookakik sigɔ sɛɛga ki sanɗit pony nɛɛkɛkik. 30Maɓɔrɛ ŋaararkikɔɔ iinakɛ kɔɔr joop a omoŋ omoŋ nɛ rɔɔriyaaɗ rɔɔriyɔn sinɔ ruruŋaaŋɔŋk nɛ puruuterki ŋaadtaanak a ɓɔɔkaaŋ son lak sɛɛgik. 31Agut sini in koorɛɛ ɛɛk a ɗegerari kɛ iinak a omoŋ omoŋ rɔɔriyaakan kɔnu a gupatika pileetak gaaŋk kaay a waawuy a emeyi jiit.
32"Sisɔ gaɓaakankɔnu a adarat Waakoyota a pɛɛniya wookan nɛɛkik sinɔ ari kɔnu a ɛtɛɛriŋɔŋk, ɛ oolɛ akɔna gaɓɛ any sinɛɓa ŋɔɗɛɛk geetitaanakɛ kɔɔruk. 33Kaaɓa saak ɗɛyɛɛ goorɛ nɛɛkɛ worke a wori, maŋk abiyak etoŋk. 34Ɗegerari kɛ ijaagɗikaakan saak arnɛ gaanɛ nɛ kɔnya ɛɛk naak, a joop sigɛ eet a sɛɛgik. 35Yaaŋakan kɔna gopakɛ sigɔɔgɛ ɓɔɔkaaŋɔŋk kɛ ɗɛyɛ tina a ijaagɗikii arnɛ gaŋk, nɛ kɔnyii joop sigɛ bɔɔlaatak a koɓukii pɛɛni Suumi Yeeseek sinɛɓa tonu kɛ, 'Geetitan iɗit sinɛ gijiɗiik a kaalɛ iɗit sinɛ gijɛɛk.' "
36Saadi baŋiya ɛtɛrɓa Paawuloos korontunɛ a sɛɛg baŋɛ agut omoŋ nɛ ɗanɗamaaŋ. 37Nɛɓa kuɗer sɛɛg baŋɛ nɛ gaamurku Paawuloos nɛ samɓoyarŋ. 38Ɓakɛyɗiɓa kɛ ɗɔm a kaalɛŋ agut sinɔɓa toniiɗ sɛɛga kɛ a tukiɗi sisɔ kiirkoy taanta taamɛ gaaŋkik. Nɛɓa tuunɛyɛr mɛlɛɛɗa emɗa nɛɛkaak.
Iliyochaguliwa sasa
Ijaag Wosɛytaanakoŋk 20: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
