Ijaag Wosɛytaanakoŋk 19
19
Paawuloos Epesoone
1Saaɓa Apiloos arkiɗ Korontooseek, nɛɓa Paawuloos ɗoyu sinɔɔnɛ ɗoo sinɛ ar edeenik nɛ mɛlɛ Epesoona. Nɛɓa saadi laŋi nomtaanak a tekerŋ.
2Nɛɓa kɔɔniy sɛɛg kɛ, "Saakan dooyɛrɗɔk, nɛkan boŋiir Wɛɛŋa sigɔ Geetitaanakiŋ?"
Nɛɓa sɛɛk jumurargeeɗ kɛ, "Kiikan. In aasi kii weenta kɛ lakɛnɔ Wɛɛŋa sigɔ Geetitaanakikiŋ."
3Nɛɓa Paawuloos tonu sɛɛga kɛ, "Anɛkan kɔnu aadiiɗɛ aadi kɛ jikon?"
Nɛɓa sɛɛk tonurgeeɗ kɛ, "Aadi Yowanisik."
4Nɛɓa Paawuloos tonu sɛɛga kɛ, "Aadi Yowanisik joopa sigɔɔgaɓa weerik tikiyɛɛkɛ Waakoyotak, maɓa sɛŋk tonu joopa kɛ, 'In ŋaadɛɛ iɗit sinɛkɔɔ mɛlki eete baŋik. Sɛɛn Yeesee.' " 5Saaɓa tiyɛrɗi sinik, nɛɓa aadɛɛ sɛɛk tiriyaakɛ Suumi Yeeseek. 6Nɛ saaɓa Paawuloos riiɓeeɗ sɛɛge ari raŋk, nɛɓa worworiik sɛɛga Wɛɛŋa sigɔ Geetitaanakik raŋana, nɛ tonɗi atutunɛ sigɔɔgɛ tɔɔmɔkuk nɛ tuker toni pɛrkaakoŋk. 7Atuɓa ɓɔɔkaaka joop gɛɛŋkik sigɔɔgɛ aarin a pɛɛyk.
8Kɛɛɓa Paawuloos godeya tolɛɛɗoŋk Ayuuduk nɛɓa waasiɗi a palamɗi a ɛyɛkeer jiit a ki ɓuriit, aɓa yaayaŋ joopa agut burɛ Waakoyotoŋk kɛnɔ ŋaadiɗi. 9Yakana egeɓa sɛɛge a omoŋ omoŋ diirkaanak ɛ kir ŋaadiɗiit, nɛɓa nyɔɔnar gopan Suumiyoŋk joope taamɛkɛ. Nɛɓa Paawuloos wide sɛɛge ɛɛk nɛ diile nomtaanak mowan godeya rɔɔriyɔɔnoŋk Tiranosuk, nɛ waawasi sɛɛga wawuykɛ. 10Ijaagɓa Paawuloos any sini emeyikɛ sigɔɔgɛ pɛɛyk. Agut sini oolɛrɓa a geleewɛr Pɛɛniya Suumiyoŋk joop Ayuuduk a joop sigɔ moko Ayuuduk sigɛ beeɗir Isiyaakeek baŋɛ.
Tɔɔmɔk Askewaak
11Ijaagɓa Waakoyot sɔɔriyɛ sigɔ reemɗi ɓayɛ jɛtik ariit Paawuloosuk. 12Didilarɓa abii sinɔkɔ ɓeesɛ ɛɛk Paawuloosuk, a abii sinɛɓa pooposɗu tɔkiyank nɛ ɓeesɛrɗi gortaanak, nɛɓa bɔdɛrki goriɗakɛ gɛŋkiŋ ɛɓa ŋaaŋararki sɛɛge wɛɛŋa sigɔ somkaanakik.
13Ɛɓa ɓɔrɛ lakɛ joop Ayuuduk a omoŋ omoŋ sigɔ ŋawiiter nyonitaakak kɛnɔ ɔɔyɛrki wɛɛŋa sigɔ somkaanakik joope tiriyaakɛ Yeeseek. Nɛɓa paarir any sini a tonur sɛɛga kɛ, "Tonii kɔna kɛ in ŋaarkɛɛ tiriyaakɛ Yeesee sinɛkɔ rɔɔriyaaɗ Paawuloosuk." 14Ijaagirɓa tɔɔmɔk ɔɗɔweerɛ tapa ŋaadiyɛɛkoŋk Ayuuduk omk Askewaak sigɔ tula pɛɛy oko sinɛk. 15Yakanaɓa wɛɛŋa sigɛ somkaanakik tonur sɛɛga kɛ, "Ɗegerii Yeeseeŋ, ɛ ɗegerii Paawuloos, ma sɔɔk iinak wooɗak?" 16Nɛɓa iɗit sinɛɓa gaamur wɛɛŋa sigɔ somkaanakik pireer sɛɛga nɛ gaamu sɛɛk nɛ lɔsɛ sɛɛgiŋ. Nɛɓa ari sɛɛg a koɗoosaaŋ nɛ gonarki godeey nɛɛkɛ a ɓɛɛlɛr konaanakɛ. 17Nɛɓa tiyɛr any sini joop Ayuuduk, a sigɛ moko Ayuuduk sigɛ beeɗir Epesoonekik, nɛɓa ɓuri sɛɛg baŋɛ, nɛɓa eemɛyar tiriya Suumi Yeeseek jɛt. 18Nɛɓa kurak ŋaadtaanak a ɓɔɔkaaŋ nɛ totonar tikiyɛ gɛŋk joope taamɛkɛ. 19Joop sigɔ ŋeytunk a ɓɔɔkaaŋ tolɛrɓa wargatɛyɛ gɛŋk nɛ moɗɛr sɛɛg taamɛkɛ joop sigɛ ɓɔɔkaak. Nɛɓa lotɛɛ wori nɛɛk nɛ laŋkɛɛ a biriyatɔk kumɛɛ pɔlpɔlɛ joop pɛɛyk a aarin. 20Agut sini ɛnyɛnyɛɓa Pɛɛni Suumiyoŋk a bakaanyir ɛ lɔlɔsi.
Ŋaarki Ɗaakan Epesoone
21Saaɓa ɓɛɛlɛɛɗ oko sinik baŋiya, nɛɓa Paawuloos koɓu ɓayaay nɛɛkɛ kɛ gun ɗoyu sinɔɔnɛ Mɛkedooniyaak a Akayaak, nɛ ŋaar Yorsaleema nɛɓa tonu kɛ, "Ɔkɔnkɔɔ mɛla son, nɛkɔɔta ɗɛyɛ a ŋaara Rooma." 22Nɛɓa boŋu joope sigɔɔgɛ ijaagɗiiŋɔŋk a pɛɛy Timotiyoos a Erastos nɛɓa wosɛyɛ sɛɛg Mɛkedooniyaaka, maɓa sɛŋk beeɗ Isiyaake a ɗoŋ tekerŋ.
23Ŋaarkiɓa saaɓak ɗaakan sinɔ obiiŋɔŋk Epesoone agut Gopan Suumiyoŋk. 24Iɗit om sinɔ riyɛ kɛ Dimetiroosuk sinɔ ɓɛɛɓɛr awɛ sinɔ riyɛ kɛ birik. Ijajagɓa tagaytan goroy Artemisik awɛyt sinɔɔnɛ riyɛ kɛ birik, nɛɓa lalaŋ wori a obiiŋ joopa sigaaga ɓɛɛraak. 25Iɗit sini tolɛɓa joop sigi ɓɛɛraak, a joop ɔgɔ sigɔ latu ijaag sinɔ ito sinɛ nɛŋkik nɛ tonu sɛɛga kɛ, "Iinak joop sigi, ɗegerari kɛ laŋii wori ijaag sineene. 26Dɛnɛɛrkɔ ɛ tiyɛɛr kɛ Paawuloos sini tonukan Epesoone a Isiyaake nyonitaakɛ sigɔɔgɛ tekeriŋɔŋk sɔgɔɔsɔyk baŋɛ kɛ tagaytan sinɔkan ijaagɛɛ ariit etoŋkuk moko Waakoyotoŋk, aɓa ari joop a ɓɔɔkaaŋ a babadar nɛ ŋaadirŋ. 27Moko sini dakɛɗa daraayɛɓa ijaag sini naŋk goroyoŋk, raŋawo sinɛ obiikik Artemisik sinɛ ŋaadir joop Isiyaak a ɗoo nɛɛk baŋɛk, dakɛkɔɔ kanysɛya, aalɛɛkɔɔ obiika nɛɛkiŋ."
28Saaɓa joop gɛɛnɛ tiyɛrɗi sinik, nɛɓa ŋadir nɛ ooyɛr kɛ, "Obi Artemis Epesoonuk!" 29Nɛɓa sisa ɓeesiɗi katamɛ nɛɛkɛ baŋɛ. Nɛɓa reerir joop gɛɛnɛk nyona ibaaloŋk a puruuter piraakak Paawuloosuk a pɛɛy Gaayiyoos a Aristirokoos sigɛɓa ɓartɛɛ sɛɛg Mɛkedooniyaakeek. 30Ɗɛykɛɓa Paawuloos ɛnyɛ son lak joop gɛɛŋkik, yakanaɓa ŋaadtaanak gɛɛnɛ kaaɓur kɛnɔ kat kɛɛ. 31Maɓɔrɛ ɔɗɔweerɛ Isiyaak sigaagɛ porur sɛɛnik a omoŋ omoŋ wosɛyɛɛrkiɓa iɗit son lak Paawuloosuk nɛ tonguɗɛɛ kɛ, "Kɛɛɗin nyona sinaana ibaaloŋk nɛ kat yaaŋin ɛɛk." 32Nɛɓa joop gɛɛnɛ ooyɛr a iɗit omaay tonu any om, maɓɔrɛ iɗit omaay tonu any om. Nɛɓa durkuusɗi olaat baŋɛ, nɛɓa aasi joop a ɓɔɔkaaŋ kir ɗegerɔɔn kɛ tolɗigeeɗkɔ jikon. 33Joop Ayuuduk a omoŋ omoŋ direrɓa iɗit sinɔ riyɛ kɛ Iskindirk nɛ wideetar ɔɗɔɔka, nɛɓa joope sigaagɛ gɛɛnɛ a omoŋ omoŋ tonurgeeɗ kɛnɔ palamɗi sɛɛga jɛt. Nɛɓa Iskindir ijoopɗi nɛ koykoɗi nɛ ragad ɛɛk kɛnɔ palamɗi. 34Yakana saaɓa joop gɛɛnɛ ɗegerarɗi kɛ ege Iskindir iɗit Ayuuduk, nɛɓa ooyɛr sɛɛg baŋɛ agut omoŋ a sayitiyɛ pɛɛy kɛ, "Obi Artemis sinɛ raŋawo Epesoonuk!"
35Nɛɓa pediya nɛɛka iɗit sinɛ taatapi katamɛ nɛɛkik koykoyɛ joop sigɛ ɓɔɔkaak nɛ tonu sɛɛga kɛ, "Iinak joop Epesoonuk, ɗegerɛɛ joop baŋɛ kɛ joop katamɛ Epesoonuk koorɛr goroy sinɛ Artemisik sinɛ obiik a tagaytan sinɛɓa worworiiki darik. 36Kɛɛ iɗit sinɔ kaadɛ sinik, ɗɛyɛ kɔna a koorɛɛr ɛɛk kɛnɔ dakɛɛr kɛ many, a kat lakɛ iɗit sinɔ teejɛ anta sinɔɔna ŋɛɛwɛnŋɔŋkuk. 37Diilerkɔɔkɔ seena joop sigɔkɔ yakana kir boŋiiɗ olaaturu goroyoŋk, ɛkɔ kir nyɔɔnɛ raŋawo naŋkik. 38Dimetiroos a joop sigɛ sɛɛg a sɛɛnik, ɔkɔn lakɛ iɗit sinɔ daariyɗiigiɗɛŋɔŋkuŋ ɓɛɛlɛr wawuy sigɔ pɛrɛdɛɗɛɛŋɔŋkuŋ, ɛ ɓɛɛlɛr suumiyɛɛk, in kaar palamɗi saadi. 39Ma ɔkɔn lakɛ any om sinɔ ɗɛyɛɛr sineene walasiŋ, nɛ mermenɛɛ joope sigɔɔgɛ gaɓɛr wooran higiik. 40Ɓurii sinɔkɔɔ tina daariyɗiɗɛɛ kɛ, 'Ŋaarkikɔ ɗaakan ant sineenekɔ ijaagɛɛ ɓenysek.' Ɔkɔnkɔɔ tin kɔɔniyɛ kɛ, 'Ŋaarkikɔ teejɛt sini agut jikonkuŋ,' nɛkɔɔ kɛɛ any sinɔ jumuriik." 41Nɛɓa tonu sini, nɛ ari a kɛɛtiɗi joop sigɛkan tolɗiikiŋ.
Iliyochaguliwa sasa
Ijaag Wosɛytaanakoŋk 19: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
