Omoŋ Korontoosuk 6
6
Daririi Dooytaanakɛ Kɔɔr
1Ɔkɔn ɗaaki iɗit omaay a manya sinɔ dooytank iinakɛ kɔɔruŋ, nɛ in mermenargeeɗ rakatɛ nɛɛk joop Waakoyotoŋk, ɔɔtɛ sɔgun kɛɛɗ daariya son lak joop sigɔ gaɓɛr woorank. 2Kiir ɗegerɔɔn kɛ pɛrɛdɛrkoy joop Waakoyotoŋk ɗook sineene raŋkiŋ? Anɛ saa pɛrɛdɛrɗɔ ɗook sineene raŋkik, nɛ kɔnu ooɗɛ pɛrɛdɛ ant sineene balaaŋɔŋk ɛk? 3Kiir ɗegerɔɔn kɛ pɛrɛdiikoy aasi wosɛytaanakɛ Waakoyotoŋk raŋkiŋ? Anɛ kii oolɛ a pɛrɛdii olaatɛ ɗoo sini raŋan nɛɛkik a kaalɛŋ ɛk? 4Saa ɗaakiɗɔɔ ɛkanɛɛkɛ goŋkuk, anɛ daamari joop sigɔ kɛɛ sɛɛg eemɛyɔɔn godeey Sambatɛyoŋkuk kɛnɔ pɛrɛdɛr kɔneŋ? 5Tona sini kɛnɔ latukari keeny, a kɛɛ kɔne kɔɔr iɗit sinɔ ɗeger ɛɛkik gayɛ a pɛrɛdɛŋɔŋk? 6Anɛ dooytan omaay daariyɗi dooytaana omalta nɛ diilɛɛ godeya wooranoŋk joop sigɔ moko dooytaanakiŋ?
7Daraayɛ aasi kɔna daririi ɛkanɛɛkɛ goŋk. Dɔɔs aasi a kɔnu tikɛɛ ɛ kɔnu raamɛɛ. 8Yakana aasi sɔɔk ijaagiir any sinɔ moko likik a raamiyɛ masookoyakɛ sigaagɛ dooytaanakik raŋk. 9Kiir ɗegerɔɔn kɛ kirkoy tikitaana moonɛɛt Burɛ Waakoyotoŋku? Kat boŋiir any sinɔ kɔna tonu iɗit omaayk, joop sigɔ ibiɗiiŋɔŋk, maŋk sigɔ ugumer raŋaawotakaak, maŋk ruunykaanak, maŋk moojak sigɔ arir ruunyikeen a moojakik, maŋk peetak sigɔ arir ruunyikeen a peetakik, 10maŋk agaltiir, maŋk goltekaanak, maŋk tɔpɔytaanak, maŋk joop sigɔ laaganyaŋɔŋk, maŋk joop sigɔ weeweliŋɔŋk. Joop sigɔ ito sigik kirkoy moonɛɛt Burɛ Waakoyotoŋk 11Ɓɛɛlɛɛrɓa ɓɔrɔ oko sinik iinak a omoŋ omoŋ. Mayakana sisɔ aadiirɛɛkɔ kɔne tikiyɛ tiriyaakɛ Suumi naŋk Yeese Kereseek a Wɛɛŋakɛ sigɔɔgɛ Geetitaanakik Waakoyo naŋkiŋ, iinak joop sigɔkɔ pakatɛɛ Waakoyota a geetitaanakik, ɛkɔ mentaanirari taamɛkɛ Waakoyotoŋk.
In Eemɛyɛɛ Waakoyo
12"Pɛgɛdɛɛɓata ola baŋɛ," mayakana kir kɔnyɗiit olaat baŋɛ. Pɛgɛdɛɛɓata ola baŋɛ, mayakana kiira toŋoɗ ɛɛk olaata baŋɛ nɔtu ɓalir." 13Toniir kɛ, "Ɗama amɗa, maɓɔrɛ amɗ ɗamata." Liki, yakana aalɛkoy Waakoyot ola sigi pɛɛykiŋ. Nɛ tina ki ɗɛyɛ a ŋɔɗurii ɛɛk naŋk ruunyikeenaŋ. Agut sinɔ ɛɛk naŋk Suumiya Yeeseyaak, maɓɔrɛ Suumi Yeese ɛɛka naŋkik. 14Boŋkuɓa Waakoyot Suumi Yeesee ret walasaaŋ, nɛkoy ɓɔrɛ tin boŋku ret walasa ɓaŋkawukaat nɛɛkɛkiŋ.
15Kiir ɗegerɔɔn kɛ ege ɛɛk noŋk kaakastaana nyonitaak ɛɛk Kereseek? Anɛ ɗɛyɛ a boŋa kaakastaana nyonitaak ɛɛk Kereseek, nɛ ara a kaakastaana nyonitaak ɛɛk peet sinɔ ruunykankiŋ? Ki gayɛ a daktan! 16Kiir ɗegerɔɔn kɛ iɗit sinɔ ɗeegarar a peet sinɔ ruunykank kɛ sɛɛg omoŋ? Agut sinɔ taapɛɛɓa Wargatɛɛ Waakoyotoŋk kɛ, "Sigɛ pɛɛyk sɛɛg koy ɛɛk omoŋ."
17Mayakana iɗit sinɔ ijaagɗi a Suumi Yeese agut omoŋɔŋk sɛɛg ɛɛk omoŋ wɛɛŋakɛ.
18Agut sini in yowɛɛɗirɛɛ ruunyikent, tikiyɛ ɔgɔ baŋɛ ijaag sɛɛg iɗit eek nɛɛkɛ walas, mayakana iɗit sinɔ ijaag ruunyikeenk ijaag tikiyɛ eek nɛɛkɛk raŋk. 19In ɗegerɛɛ ɛɛk noŋk kɛ Gode sinɔ Geetitank Wɛɛŋa sigɔ Geetitaanakik sigɛ atu iinakɛ takik, sigɛɓa kɔna gaɓɛ Waakoyotuk. Iinak Waakoyotoŋk, ma moko iinak ɛkan goŋkuk. 20Ɓaliɓa sɛŋk kɔnu gatii, nɛ agut sini in eemɛyɛɛ Waakoyo taare noŋk.
Iliyochaguliwa sasa
Omoŋ Korontoosuk 6: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia