Markuji 14

Andimuwa a anamakuta na anamafundjiha malamulo kosakasaka ndila yoira kampena Yesu

Matewuji 26:1-5; Lukaji 22:1-2; Juwawu 11:45-57

1Vahanle malambo menli ira atu kadje Pwando ya Mavirelo na Pwando ya Pawu Dohosakanyiwana Leverina.#14:1 Pwando ya Mavirelo na Pwando ya Pawu Dohosakanyiwana Leverina: Zela Pwando dedi, nione rodape unafwanyeya Matewuji 26:17. Evale andimuwa a anamakuta na anamafundjiha malamulo kosakasaka ndila tchivi yafuna atu kamuhindena Yesu mozembiheya ira kampe. 2Mbwenye kohowonga keraga: <<So kanimpeni muwari mwa Pwando, tawiha ira nnaze nitatamule madugudugu muwari mwa anamwindji.>>

Muhiyana mmohi ohomuhela Yesu perefume

Matewuji 26:6-13; Juwawu 12:1-8

3Yesu agali tatamo ya Betaniya, ohodowa vande va mulombwana Simawu wenno aitaniwa maliba maranya. Agali vameza, ohozaga muhiyana mmohi anna mwana garafwa nasakanyiwe na nibwe, mwemo mwafwanyeya perefume onukela pama wa nardu.#14:3 perefume onukela pama wa nardu: Nardu ali mwana mutengo eni onukela pama. Atu keretcha tukula, aliwa sakanyagana perefume. Perefume wa nardu akala perefume onukela pama. Ali eto wa peresu yokwima. Muhiyanole ohotwa garafwa nne, liye kutulela perefume ule mmuruni mwa Yesu. 4Evale atu amohiwa kagaonne enne, kohoroma wonga motakaleliwa mmohi na nfwaye keraga: <<Mwasiwa gwa nni muhiyanola nongaga perefume wapama ula? 5Perefume wenna ogoguliha peresu yokwima nnga kobiri 300 da parata,#14:5 kobiri 300 da parata: Kobiri yaromola atu ili nnga mutu unatambilra liye alaba mmindani mwa nfwaye malambo 300. amala kobiriwa ogotukula aavahe aliba simela.>> Mwa enne kohokalelagave muwonga muhiyanole. 6Mbwenye Yesu ohawakula eraga: <<Nyo munamukukumulela nni muhiyanola? Kamuhiyeni eno! Liye uhudiirela miyo yengo yapama. 7Tchoira atu osimela kinamala, anakalave na nyo. Malringana vanafunege nyo airela upama munerege airela. Mbwenye vasogolro miyo kannakalegeve na nyo kala no kala. 8Liye uirilena yenno yafuna liye irana, tchoira siku naga nokwa nahanafiye liye uhudizoliha perefume maningwaga ira alabe zela siku naga nokoyiwa. 9Na ibaribari nnouwandelani ira mwilamboni mwatene mwene mwemo munalaleyiwa Muselu Wapama, yenno iirile mwana muhiyana ula inerege vweya. Evale liye unoza aumbuweliwege.>>

Judasi Iskariyoti ohopangana na anamakuta ira amugulihe Yesu

Matewuji 26:14-16; Lukaji 22:3-6

10Muwari mwa anamamuhara kumi na ambinli a Yesu mmohi aitaniwa Judasi Iskariyoti, ohovenya, liye dowa afwanya andimuwa a anamakuta ira angulihe Yesu. 11Andimuwale kagavwile yowonga ya Judasi Iskariyoti, kohoziveliwa, aliwa pangana ira kanvahe kobiri. Kagairile eno, Judasi ohoroma venda tempuwa yafuna liye nvelela Yesu mmandani mwiwa.

Yesu oharuma anamamuharaye ira kasakanyede Pwando ya Mavirelo

Matewuji 26:17-30; Lukaji 22:7-23; Juwawu 13:18-30

12Siku noroma na Pwando ya Pawu Dohosakanyiwana Leverina, neno nnafwanyeya nagali siku nopa mabila a Pwando ya Mavirelo, anamamuharaye kohonfukaga Yesu, aliwa ira: <<Nyo munafuna nasakanyede jodja uvi ira hiyo na nyo nidje Pwando ya Mavirelo?>>

13Muwari mwa anamamuharaye ale, Yesu ohasakulramo ambinli, aarumaga eraga: <<Muvenye, mudowe sidadi. Mwavolowa musidadi mule, munonfwanya mulombwana mmohi agatukunle muno wa mahindje. Mmuhare unadowa liye. 14Mwafiya vande vanaya liye, muwonge na mwinnya wa vande vale muire: <Namafundjiha gunirumile ira nufukeni ira: <<Sala yaga inafuna miyo na anamadiharaga nidje Pwando ya Mavirelo tchivi?>>> 15Liye unoutonyihedani sala ilukulu ya muzulu yomala sakanyediwa pama. Mwafiya nimburo neno musakanye jinafuna hiyo dja.>> 16Anamamuharaye ambinlale kohovenyavo, dowa sidadi. Kagadowile, kohofwanya jatene nnga mwemo mwawongele liye. Nomala eno, kohosakanyeda jatene ira kadje Pwando ya Mavirelo.

Yesu ohowonga zela wenno afuna muguliha

17Evale yagafiyile igudugudu, Yesu na anamamuharaye kumi na ambinli kohovira, aliwa fiya nimburo nenne. 18Kagali vameza, kadjaga pwando, Yesu ohawandela anamamuharaye ale eraga: <<Na ibaribari nnouwandelani ira veva vili hiyo va, ukalavo mutu mmohi mwa nyo unadja na miyo, unafuna diguliha.>> 19Evale anamamuharaye ale kohoroma kukumuwa, aliwa roma nfuka Yesu mmohi mmohi keraga: <<Aze akale miyo?>> 20Yesu mbwenye ohowakulaga, liye ira: <<Mutuwa uli muwari mwa nyo anamadiharaga kumi na ambinli. Unafuna diguliha gwenno unavoda na miyo pawu mparatoni mmohive. 21Tchoira na ibaribari Mwana wa Mutu unagulihiwa nnga mulrembele atu mMazuni. So mbwenye, udilu wa wenno unafuna muguliha! Ali yapama mutu wenno ahabaliwa!>>

Yesu ohodja seya na anamamuharaye

Matewuji 26:26-30; Lukaji 22:14-20; 1 Korinto 11:23-25

22Agairile enne, kadjagave, Yesu ohotukulaga pawu liye reliha. Agarelihile, ohomeyaga, liye avaheda anamamuharaye eraga: <<Tukulani pawu ila, mudje, tchoira ala ba maningwaga.>> 23Nomala enne, ohotukulaga kopo imohi, liye mutamalela Nabwiya. Eto ohavahaga anamamuharaye, aliwa ng'wamo. 24Vevale ohawandela anamamuharaye eraga: <<Ni ti sangiri naga, sangiri na Yopangana Ixa,#14:24 sangiri na Yopangana Ixa: Yesu awongaga zela Yopangana Ixa, unawonga zela Yopangana isakanyile liye muwari mwa ukwa waye. Tchoira malambo a mundulrimu, yohokalawo Yopangana ya Wanle. Wanle Yesu ahanaze, atu kapa mabila nari mbuzi nari ng'ombe ira jotega jiwa jikuneliwe. (Levitiku 1:1-5) Mbwenye muwari mwa sangiri naye, Yesu ohokunga Yopangana Ixa ira mwa sangiri naye neno, mutu awande leveleliwa. Nione Lukaji 22:20. neno nnatatiya para atu adjindji kakale pama. 25Na ibaribari nnouwandelani ira kadiza ding'wa akoka vinyu wa uva ula, fiyeda tempu inafuna miyo ng'wa vinyu muxa, muUmweneni mwa Mulugu.>>

26Vevale kohoimbaga nyumbo. Noira eno, kohodowaga Mwango wa Mitengo da Azeti.

Yesu ohomuwandelaga Peduru ira: <<We unodiruna.>>

Matewuji 26:31-35; Lukaji 22:31-34; Juwawu 13:36-38

27Yesu ohawandela anamamuharaye eraga: <<Nyo mwatene eva munoditawa. Mwasiwa nkani wenno umala lrembiwa mMazuni ira: <Miyo nnombubuda namakumbuza. Evale mabila anobalaleya.> >>#Zakariya 13:7 28Yesu ohowongagave eraga: <<Miyo mbwenye davenyihiwa mokwani, nnosogolra didowe Galileya. Nyo munodowa mwadifwanye wewo.>>

29Mulombwana Peduru ohomuwongana Yesu eraga: <<Masiki afwaga atene kautawegeni, miyo kannautawani.>> 30Evale Yesu ohomuwongana ira: <<Na ibaribari miyo nnouwandela ira mahiyu anna, mutumbi ahananle fendo mbinli, weyo unodiruna fendo taru.>> 31Peduru mbwenye okalela ntindi eraga: <<Masiki dipiwege vamohi na nyo, miyo kadiza durunani.>> Eto afwaye atene na aliwene kohowongaga mazu mamohive anne.

Yesu alobelaga Jesemani

Matewuji 26:36-46; Lukaji 22:39-46

32Noira enne, aliwa kohodowaga nimburo nimohi neriwa Jesemani.#14:32 Jesemani ali nimburo eni nafwanyeya muwari mwa Mwango wa Mitengo da Azeti. Nzina na Jesemani tapulela nimburo nofinya azeti. Kagali wewule Yesu ohowonga na anamamuharaye eraga: <<Nyo garatini veva. Miyo nnadowa dalobele.>> 33Liye mutukulavo Peduru na Tiyagu na Juwawu adowagana waya liye. Adowaga, Yesu ohoroma umbuwela jengo jidjindji, liye kukumuwaga mmirimani mwaye. 34Evale ohowonga, liye ira: <<Mmirimani mwaga muhukala kumbanya undimuwa.#14:34 Owu hehi Muzimwaga unokumbanya valukulu. Kumbanya unna miyo ku kumbanya undimuwa wowanda dipa.#14:34 Kumbanya unna miyo ku kumbanya undimuwa wowanda dipa. Kumbanya wanna Yesu wazenle muwari moiziwa goyi datene dafuna liye onihiwa. Nyo mbwenye halani veva, muing'anelege.>>

35-36Noira enne, Yesu ohosusagavo, ahiya evale anamamuharaye araru ale, dowa sogolro vang'onove, liye oramiha muru waye ante fiyiha vati, roma lobela eraga: <<Aba! Babani, yakala yowandeya, mudirambihede jengo jinafuna dizela. Nyo munowanda jatene. Dera mudikumihelemo kopo da goyi dinna miyo. Mbwenye kiireye nnga inafuna miyo, iireye nnga munafuna nyo.>>

37Noira enne, awelelaga wali anamamuharaye, aafwannye kagonaga. Evale ohowonga na Peduru eraga: <<Simawu, weyo unagona? Kodi kuwandile ing'anela nne ora imohi bahi? 38Muing'anelege eto mulobelege ira mwahaxixiwe na yotega. Nyo mmirimani mwenyu munofuna. Mbwenye maningo komala foka.>> 39Evale ohowelela wali liye dowa lobela. Yesu alobelaga, alobela mazu amohive. 40Awelagawo aafwannye aliwa kagonaga mwasiwa kohozaleliwa kove. Mwa enne tchannaga yomuwakula. 41Evale ohozaga fendo yaneraru, liye afwanya kagonagave. Evale ohawandelaga eraga: <<Kodi munagonave eto munaave vuma? Ihikwakwana, tchoira oriwa ihifiya. Mwana wa Mutu unafuna avahediwe mmandani mwa atu otega. 42Kavenyani ndoweni. Kaing'anani, ule unadiguliha unaza.>>

Hindiwa wa Yesu

Matewuji 26:47-56; Lukaji 22:47-53; Juwawu 18:3-12

43Yesu awongagave enne, tchi tempu yafiya Judasi wenno ali muwari mwa anamamuharaye kumi na ambinli vamohi na anamwindji kaganna masupada na golromondo diwa. Atwale karumiwe na andimuwa a anamakuta, anamafundjiha malamulo na andimuwa a aJudewu. 44Maliba nguliha Yesu ule ahanafiye wa Yesu, ohokana ionihedo yaavahile liye afwaye ale ira: <<Nafiya, munamuone nyo dinvahaga beju,#14:44 beju: Wanle atu a muibalini mmohive nari mutu na nfwaye kalondjeletchana muwari movahana beju. Nione Roma 16:16; 1 Korinto 16:20; 2 Korinto 13:12; 1 Tesalonika 5:26; 1 Peduru 5:14. mutuwa gwenno. Mmuhinde, mmutukule momuing'anela pama.>> 45Judasi agafiyile evale, mobaranya ohomuwandamelaga Yesu, liye ira: <<Namafundjiha!>> Nomala enne, liye mbejari. 46Agambejarile, tempu imohive yenne kohomuhinda, aliwa mmanga.

47Muwari mwa anamamuhara Yesu, ohokalamo mmohi apulunlege supada naye, liye funaga ira ankakatena namalaba mmohi wa mundimuwa wa anamakuta. Mbwenye supada nne nagwadilege nibaru na ikukuru ya muwononi odjana.

48Mwa enne Yesu ohowonga na ale kamuhinda ale, liye ira: <<Nyo mwazaga na masupada na golromondo dinyu ira mudihinde miyo, kodi munadiona nnga dili mbava? 49Miyo dakala na nyo malambo oindjiva Nyumba ya Yehova, dufundjihagani. Mbwenye nyo kamwadihindile. Mbwenye jatene eji jinaireya ira yenno ilrembiwe mMazuni ikwakwanele.>> 50Agairile eno, anamamuharaye kohomuhiya, aliwa tawa.

51Kagamuhindile Yesu, wohokala muzombwe mmohi amuharaga. Muzombole wara uwa avipitikelrelrege lensori bahi. Mwa enne, anyakondo ale kohomuhinda muzombole. 52Nomuhinda, liye ohoruxuwaga, hiya yowara yaye ile, liye tawa agali mandave.

Tongiwa wa Yesu

Matewuji 26:57-68; Lukaji 22:54-55,63-71; Juwawu 18:12-14,19-24

53Jagaireyile eno, kohomudowana Yesu vande va mundimuwa wa anamakuta. Vevale andimuwa a anamakuta na andimuwa a aJudewu na anamafundjiha malamulo kohogumana nimburo nenne. 54Kamudowaganave Yesu, mulombwana Peduru omuzembelaga Yesu vang'ono vang'ono mundulri, muharagave olapela wene. Ohasusela fiyeda vatando valigi atu, vande va mundimuwa wa anamakuta. Vevale liye ohogarati na agwarda ale kafwanyeya kaotaga munlo.

55-56Vevale andimuwa a anamakuta na andimuwa a anamatonga atene kohoroma sakasaka umboni ira kamugwihena mulandu Yesu ira kampe. Mwa enne kohooneya amohi kamunamelaga Yesu mazu. Mbwenye kavakumile yengo ya ibaribari mwasiwa mwa aliba namale, jowonga jiwa kajaharana.

57Kohooneya eto atu amohi kamunamelaga mazu keraga: 58<<Nihivwa liye awongaga ira: <Nyumba ya Yehova imangile atu na manda, miyo nnobwanyula, dimange muwari mwa malambo mararu nyumba imohiwa yohomangiwa na manda a atu.> >> 59Mbwenye masiki atene kamunamela ale, jonama jiwa kajaharana. 60Evale mundimuwa wa anamakuta ohovenyaga vamwindjini, liye nfuka Yesu vari va atu atene eraga: <<Kavwa jinaunukeda atu ji, kodi weyo kunakanave yowakula? Katiye, jatene jinawonga atu zela weyo tapulela ira nni?>> 61Mbwenye Yesu kawakunlegeve yengo. Eregeve miyala bahi.

Evale mundimuwa wa anamakuta ule ohowelelave nfuka akoka eraga: <<Kodi weyo uli Namatikeliwa, Mwana wa Mulugu Oteteliwa?>> 62Yesu ohowongaga ira: <<MIYO DILI. Eto munoza mmuone Mwana wa Mutu agagaratile ikukuru ya muwononi odjana wa Mulugu wa Kopolo Datene eto munoza mmuone azaga mmiramboni zulu.>> 63Mundimuwa wa anamakuta ule agavwile mazu anne, ohokawulaga kamizaye eraga: <<Kodi hiyo nneregeve funa umboni wa mutu mmohiwa eva? Umboni umala oneya. 64Tchoira nyo mwatene muhumala vwa na mabaru enyu yenno iwongile liye amululuvihaga Mulugu.>> Mwa enne ohafukaga anamwindji eraga: <<Nnafuna nimuirenani avi?>> Anamwindji atene kaligi vevale kohowongaga keraga: <<Inafwanela apiwe!>> 65Evale kohokalawo karomile mutapelaga mare, aliwa mmangaga wintoni, nkomaga na maxoko keraga: <<Kamurohe ukomile!>> Eto agwarda kali evale na aliwene kohomuhinda, aliwa roma nvaha makofi.

Peduru ohomuruna Yesu

Matewuji 26:69-75; Lukaji 22:56-62; Juwawu 18:15-18,25-27

66Vande va mundimuwa wa anamakuta vale nikonde niwa nohokala hogwela vang'onove. Peduru agali mpedi muwa, ohozaga namwali mmohi amulaba mundimuwa wa anamakuta. 67Namwali ule agamuonne Peduru aotaga munlo, ohomuing'anaga, liye ira: <<Weyo wawendetcha vamohi na Yesu wa Nazareti.>> 68Evale Peduru ohomuruna eraga: <<Miyo wenne kadimuiziwile, nne kadiiziwile inawonga we.>> Evale Peduru noira eno ohodowa va mulango va muru awerewera nyumbele. Agali va mulango vale, ora imohive yenne mutumbi ohonlaga. 69Namalabole agamuonne Peduru evale, ohoroma awandela atu aawandamenle liye evale ira: <<Mulombwana wenna na liyene gu namamuhara wa mutule.>> 70Evale mulombwana Peduru ohorunagave akoka. Mwa tempu ya vang'onove atu kaligi evale kohomuwongana Peduru akoka keraga: <<Na ibaribari weyo uli namamuhara wa mutule, tchoira na wenne uli wa Galileya.>> 71Evale Peduru ohoroma lumbela aawandelaga eraga: <<Miyo mulombwana wenno munamuwonga nyo uyo kadimuiziwile! Akala miyo nnawonga yonama, Mulugu aditonge.>> 72Agalumbenle enne, mwa ora imohive yenne mutumbi ohonlaga. Evale Peduru ohoumbuwelaga mazu amuwandenle Yesu oira: <<Mutumbi ahananle fendo yanembinli, weyo unodiruna fendo taru wiraga: <Kadimuiziwile.> >> Evale Peduru ohokumaga evale, liye roma nla.

Iliyochaguliwa sasa

Markuji 14: iLolo

Kuonyesha

Shirikisha

Nakili