Markuji 15

Yesu asumeliwaga vamentoni va governadore Pilatu

Matewuji 27:1-2,11-14; Lukaji 23:1-5; Juwawu 18:28-38

1Vevale unde wagatchile, andimuwa a anamakuta na andimuwa a aJudewu, anamafundjiha malamulo na anamatonga atene kohogaratela ira kavahena zelru. Evale aliwa kohommangaga Yesu, aliwa mudowana, nvaheda governadore Pilatu.#15:1 governadore Pilatu ali mutu oza atonga na nzina na akuda Roma. Tchoira ora yenno aJudewu kafwanyeya mmandani mwa aRoma na mwasa oira kagondjihiwe na aliwene. Mwa enne aRoma koarumetcha atu ira kakale agovernadore oatonga aJudewu. Mwa tempu yenne eto aJudewu tchavahana na Pilatu. Mbwenye nnga aJudewu tchanna utongi ompa mutu, kohomudowana wa mwidaniwa ira kaone akala Pilatu ogorumela mpa Yesu. 2Kaganfiyilena wewule, Pilatu ohonfukaga Yesu eraga: <<Kodi weyo uli Mwene wa aJudewu?>> Evale Yesu ohowakula, liye ira: <<Nyo gunawonga eni.>>

3Vevale andimuwa a anamakuta kohoromaga munukeda jengo johokala ja masika jonama. Mbwenye Yesu kawakunleve yengo. 4Mwa enne Pilatu ohonfuka ira: <<Kavwa jinaunukeda atu ji, kodi weyo kunakanave yowakula?>> 5Yesu mbwenye, kawakunleve yengo. Evale Pilatu ohoroma tikiniheya zela miyala waye.

Pilatu ohorumela ira Yesu apiwe

Matewuji 27:15-26; Lukaji 23:13-25; Juwawu 18:38b-19:16

6Tempu yenno, va kada Pwando ya Mavirelo, Pilatu omukutcha munyakadeya mmohi wenno asakulriwa na aJudewu ira akutchiwe. 7Ora yenno mukadeya mule, mohokala mulombwana mmohi aitaniwa Baraba. Baraba afwanyeya mukadeya mule vamohi na afwaye kafwanyeyana muselu oapa atu tempu yawanawana atu muwari mokonda tongiwa na aRoma. 8Evale mwindji wa atwale kohoromaga kuwa aliwa nvepaga Pilatu keraga: <<Nnafuna mmukutche mutu mmohi nnga vineretcha nyo.>> 9Evale Pilatu ohafuka eraga: <<Munafuna dukutcheleni Mwene wa aJudewu?>> 10Pilatu aza awongaga enne tchoira ohoonelramo ira andimuwa a anamakuta kamusumela Yesu na mwasa wa nrima bahi. 11Mbwenye andimuwa a anamakuta kagavwile Pilatu awongaga zela mutapula Yesu, kohakanyiheda mwindji wa atu kazile ale ira kawonge ira: <<Hiyo nnafuna mmutapule Baraba, muhiya Yesu.>>

12Evale Pilatu ohafuka akoka eraga: <<Nnga damukutcha mulombwana Baraba, mulombwanola munamuira nyo mwene wa aJudewu ula, dimuirena avi?>> 13Aliwa kohokalelagave kuwa keraga: <<Mmukomele vamuradini!>> 14Vevale Pilatu ohafuka eraga: <<Mulombwanola kodi unafwanyeyana mulandu nni?>> Mbwenye aliwa kokuwagave na mazu olimbiha keragave: <<Kamukomeleni vamuradini!>> 15Evale Pilatu muwari moira aaziveliwihe anamwindji ale, oharuma atwaye ira: <<Mmutapule Baraba. Yesu mmudowena mwamuwaxule.>> Noira enne, kagamanle muwaxula, oharuma eraga: <<Tiyeni, mwankomele vamuradini!>>

Anyakondo kohompeta Yesu

Matewuji 27:27-31; Juwawu 19:1-3

16Vevale anyakondo karumiwe na Pilatu, kohomudowana Yesu vatando va palasiyo ya governadore. Kagafiyile evale, kohagumanihaga anyakondo afwiwa atene. 17Noira eno, kohomuwungula jowara jaye, aliwa tukula kapa ya usalru wa kore ya musuzu wa bwanda, jagali jowara ja peresu yokwima, aliwa muwariha. Eto aliwa luwa kara ya minga aliwa muhela vamuru vaye.#15:17 usalru wa kore ya musuzu wa bwanda, jagali jowara ja peresu yokwima… kara ya minga: Kamuwarihaga eno, kamwira Yesu mwene muwari mompeta. 18Vevale aliwa kohoroma mulondjela muwari mompeta keraga: <<Mwene wa aJudewu oye! Oye!>> 19Aliwa tukula murere, roma nkomagana vamuru vaye, kamutapelaga mare, kamukokorelaga muwari mompeta. 20Nomala mpeta enne, kohomuwungula kapa ya usalru wa kore ya musuzu wa bwanda, yenno yafwanyeya yagali ya peresu yokwima ile, aliwa muwariha jowara jaye, aliwa nkumiheda unde ira kadowe kankomele vamuradini.

Yesu ohokomeliwa vamuradini

Matewuji 27:32-44; Lukaji 23:26-43; Juwawu 19:17-27

21Kagamaruwile, kadowaga, kohongumanana maliba vira mmohi aitaniwa Simawu, wa sidadi ya Sirene. Simawu ule ali Alexandiri na Rufu babiwa. Liye akumaga unde avolowaga musidadi ya Jeruzalemu. Anyakondwale kohomutukuliha muradi wa Yesu ule. 22Vevale kohomudowagana Yesu sogolro fiyeda nimburo nnaitaniwa Gologota. Gologota ku wonga Nimburo na Nigaragazu na mutu. 23Evale anyakondwale kohotukula vinyu otatanyiwa na makura onukela kaitaniwa mira,#15:23 vinyu otatanyiwa: Kanvahile ira goyi danna liye divunguleye. Mbwenye Yesu kang'wilege. aliwa nvaha Yesu. Yesu mbwenye kang'wile. 24-25Evale kohomukomela vamuradini na mabebehi, pandi ya 9 ora. Kagamukomenle, anyakondo ale kohoganaga jowara ja Yesu muwari mosakanya jogu ya ngari#15:24-25 jogu ya ngari: Nione rodape unafwanyeya Matewuji 27:35. ira kada mutu atukule nnga mwemo mwaganyalrele liye.

26Kohotukula isi tabwa eni, aliwa lrembavo muselu kamutongilena atu. Aliwa lrembavo ira: <<MWENE WA AJUDEWU>>, aliwa komela vazulu va muradi vale, muruni waye.

27Ora imohive, kohakomela eto ambava ambinli, mmohi ikukuru ya muwononi odjana, mmohiwa ikukuru ya muwononi oromana, Yesu afwanyeya vari. 28Ejo johokwakwaneliheda ilrembiwe mMazuni wanle ira: <<Liye abalriwe nnga mutu wabure.>>#Izaiya 53:12

29Mwa enne atu kaviraga mundila kohoromaga mpeta Yesu, kawuzuzaga miru diwa, kamuruwanaga keraga: <<Kahi wenne wawongetcha ira unowanda bwanyula Nyumba ya Yehova eto umange muwari mwa malambo mararu bahi? 30Kavivune eto! Katita eto vamuradini vili we vo!>> 31Eto kohokalawo andimuwa a anamakuta na anamafundjiha malamulo kazile, aliwa roma mpetaga Yesu na makalelo mamohive, kawongaga oka oka keraga: <<Uluwole, gwenne aavulumutchetcha atu oindjiva. Peno avivune ekave nimuone. 32Akala liye gu Namatikeliwa, Mwene wa aIzarayeli, atite vamuradini vili liye vale tchineneva ira nimuone eto ira niroromele.>> Eto ale kakomeliwe na liye, na aliwene kohoromaga wonga mazu abure zela Yesu.

Makwelo a Yesu

Matewuji 27:45-56; Lukaji 23:44-49; Juwawu 19:28-30

33Yagafiyile pandi ya 12 ora, yohozavo isi ilukulu ilambo yatene fiyeda pandi ya 15 ora. 34Pandi ya 15 ora, Yesu ohokuwaga na mazu olimbiha eraga: <<Eloyi, Eloyi, lama sabatani?>> Tapulela ira: <<Mulugu waga, Mulugu waga, mudihiyele nni?>> 35Agairile enne, atu kaligi evale, kaganvwile eraga: <<Eloyi, Eloyi>>, mohoiziwa yengo tchivi, kohowongaga ira: <<Kanvweni, liye unamuitana Eliya.>> 36Mwa enne mutu mmohi ohotamangaga, liye dowa nyetiha ntondje#15:36 ntondje nnawongiwa va, na izugu anawonga esponja. na vinyu ohokala pama nnga vinagere, liye hela murereni, dowa nvaha Yesu ira ang'we. Eto ohowonga, liye ira: <<Kamuhiyeni, nimuone akala Eliya unamuitana liye unowanda za nvuna vamuradini va.>> 37Agairile eno, Yesu ohokuwa molimbiha. Mwa enne ohomariheya. 38Ora yenno yakwa Yesu kurtina ilukulu yafwanyeya mmba mwa Nyumba ya Yehova#15:38 kurtina ilukulu yafwanyeya mmba mwa Nyumba ya Yehova: Mulugu gwakawunle kurtina ile. Tchoira malambo a mundulri afiya hela wa kurtina ile akala mundimuwa wa anamakuta eto afiyawo va yaka fendo imohi agamanle kuta mukuto. Mulugu akawulaga kurtina ile, tapulela muwari mwa ukwa wa Yesu, mutu unowanda fiya wa Mulugu ekave. Eto yatapulela ira mukuto wa anavinyama ohomala. yohokauwaga vari na vari roma zulu fiyeda vati.

39Yesu akwaga, mundimuwa oasogolrelra anyakondo 100 afwanyeyaga vasogolro va Yesu, amuing'anaga. Mwa enne agaonne makalelo Yesu akwile liye, ohowonga ira: <<Mutula, mwa ibaribari ali Mwana Mulugu.>>

40Vakwa Yesu vale, vohokalaga ahiyana kafwanyeyaga olapela wene kaing'anaga. Muwari mwa ahiyanale, ohokalavo Mariya nkuda Madala, Salome na Mariya wenno ali Joze na Tiyagu wa muzombwe mmiwa,#15:40 Mariya wenno ali Joze na Tiyagu wa muzombwe mmiwa: Afwase Mariya unawongiwa gu Yesu mmaye. Nione Markuji 6:3. Nihiiziwa eto ira Mariya mmaye Yesu ali vevo vakwa Yesu. (Juwawu 19:27) Tiyagu wa muzombwe: Ku wonga Tiyagu mmohiwa hiya Tiyagu mwana Zebedewu. 41anno kawendetcha na Yesu agali ilambo ya Galileya, kamukamihedaga. Kohokalagavo eto ahiyana amohiwa oindjiva kamuharile Yesu vadowa liye Jeruzalemu.#15:41 ahiyana amohiwa oindjiva kamuharile Yesu vadowa liye Jeruzalemu: Mazu a Lukaji 8:2-3, anoniwandela mazina a ahiyana amohiwa anno kamuharile Yesu.

Koyiwa wa Yesu

Matewuji 27:57-61; Lukaji 23:50-56; Juwawu 19:38-42

42-43Siku nakwa Yesu, naligi siku nosakanyeda jatene ja sabado. Ora ya tchiguwo, Yesu agakwile, ohokalawo mundimuwa mmohi eriwa Joze, waniwa ali Arimateya eto ali namatonga oteteliwa muwari mwa andimuwa a aJudewu. Liye eto ali mutu aing'anela mazelo a Umwene wa Mulugu. Yesu agakwile, Joze ule oholimbiha murima, dowa fiya wa Pilatu, nvepa maningo a Yesu. Tchoira Joze afuna Yesu akumihiwevo vamuradini vale, akoyiwe, sabado ahanafiye.#15:42-43 akumihiwevo vamuradini vale, akoyiwe, sabado ahanafiye: Muwari mwa mangano a aJudewu zela siku na sabado, aliwa tchafunne nnga mutu okwa akale okomeliwene vamuradini siku na sabado. Siku na sabado naroma mavirelo wa nzuwa, nona Joze abaranyaga dowa wa Pilatu ira Yesu awande kumihiwavo vamuradini vale nzuwa nahanavire ira siku na sabado nahatakale. 44Pilatu agavwile ira: <<Yesu uhukwa.>> ohotikinaga mwasiwa esaga ali ahanakwe. Agamuitanihile mundimuwa aing'anela mapiwelo a Yesu, ohonfukedaga akala na ibaribari Yesu ohokwa. 45Mwa enne aganna ibaribari pama muwari mwa musogolrelri wa anyakondo ule ira Yesu uhukwa, evale ohomurumelihaga Joze maningo a Yesu ira adowe ankoye. 46Joze ohovenyaga dowa gula nguwo yosakanyiwa na usalru wapama, liye mutitiha Yesu vamuradini vale, mbulruwalri na nguwo ile, dowa muhela mmasiye, nifukwe neno natimba atu nibweni. Nomala liye pingiritcha nibwe nlukulu, fungana ovolowela wa nifukwe nne.

47Yesu akoyiwaga, Mariya nkuda Madala na Mariya mmaye Joze kohoonaga nimburo neno vakoyiwe liye.

Iliyochaguliwa sasa

Markuji 15: iLolo

Kuonyesha

Shirikisha

Nakili