Markuji 13

Yesu ohowonga zela bwanyuliwa wa Nyumba ya Yehova

Matewuji 24:1-2; Lukaji 21:5-6

1Yesu avenyaga vatando va Nyumba ya Yehova, ohokala namamuharaye mmohi amuwongilena eraga: <<Namafundjiha, kaing'anani riya uriyile nyumba di eto vamohi no riya uriyile mabwe kamangilena atu ala.>> 2Evale Yesu ohomuwandelaga ira: <<Akala weyo unaona nyumba dapama di peno va, vasogolro veva kavali nibwe nnafuna za kala vazulu va nibwe nfwaye. Jatene eji jinomala bwanyuliwavo.>>

Yesu ohowonga zela harahariwa na goyi malambo omariha

Matewuji 24:3-14; Lukaji 21:7-19

3Yesu ohogaratigi Mwango wa Mitengo da Azeti, mwango wenno unafwanyeya kombela ha ule, sogolro wa Nyumba ya Yehova. Agagaratile evale, Peduru, Tiyagu, Juwawu, na Andire kohozaga aliwa nfuka vewa vene keraga: 4<<Kaniwandeleni siku nnafuna za ireya jatene ejo. Kodi ionihedo tchivi inafuna za ireya jatene ejo jafunaga kwakwanela.>>? 5Evale Yesu ohawakulaga, liye roma afundjiha eraga: <<Polre polre tawiha ira munaze mmuhare mutu ouholotchani. 6Mwasiwa atu adjindji anerege za kavikalihege nnga miyo, kawongege kerege: <Miyo dili Kiristu>, kahali. Eto anofiyeda anyenga atu adjindji. 7Eto mwavwa ja kondo, na ja fe fe fe ja kondo, kamukukumuwe, mwasiwa ili yofuneya ira ejo jiireye. Mbwenye mwaona ejo jiireyaga kahi ira ku magomelo nari. 8Mwasiwa nlogo nimohi nnoza nivenye ira niwanege na nlogo nimohi niwa, umwene unoza uwanege na umwene umohiwa. Pandi didjindji dene da ilambo munoza mukale vindarandara eto munoza mufwanyeyege ndala. Mbwenye jatene ejo jaza jiroma ireya, wewo unakala maromelo wa goyi nnafuna atu ona nnga muhiyana aromaga wene ona upa obala.#13:8 nnga muhiyana aromaga wene ona upa obala: MaBibiliya amohiwa mazu anna kinazana.

9<<Ifwanele ira muviing'anele pama, mwasiwa munoza muvahediwe mmandani mwa anamatonga. Aliwa anoububudani muwari mwa nyumba dofundjamo Mazu eto anoza kaudowenani mmandani mwa agovernadore nari mmandani mwa amwene. Jatene ejo jinauireyelegeni na mwasa wa nzina naga ira nyo mudihidedele umboni. 10Tchoira ilambwela ya vati yahanafiye magomelo, inofuneya ira Muselu Wapama alaleyiwe mwa malogo matene. 11Mbwenye aliwa kauhindani, kausumelani, kamukale okukumuwene zela mazu anafuna nyo wonga. Mbwenye yafiya tempuwa ira nyo muwonge, inafwanela muwonge yenno Mulugu inauwandeleni liye. Mwasiwa mazu munafunege nyo wonga kinakala enyu, anakala mazu okumela wa Munemba Otchena.

12<<Mutu unerege muguliha mbalaye obaliwana ingulu imohive ira apiwe eto babi unerege muguliha mwanaye. Eto ahima anerege apiha ababiwa. 13Atu atene anerege uidani na mwasa wa nzina naga. Mbwenye mutu wenno unavilele ante magomelo, unovulumuwa.>>

Yesu ohawendjeliha anamamuharaye zela jengo jinafuna ireya

Matewuji 24:15-28, 21:20-24

14Yesu ohowelela wonga akoka eraga: <<Nyo mwaza muona yabure yohokala ya masika, yengo yotakaliha Nyumba ya Yehova#13:14 yabure yohokala ya masika, yengo yotakaliha Nyumba ya Yehova owu hehi yengo yotakaletchetcha yobwanyula. yagaimetchiwe nimburo nohofwanela imetchiwavo#13:14 yagaimetchiwe nimburo nohofwanela imetchiwavo: Nafwanya Lukaji 21:20-22, nnowanda iziwa ira yengo yotakala inawongiwa yafuna ize vamohi na nikuru na anyakondo. Na ibaribari Yesu agadowile zulu, nohokalawo nikuru na anyakondo a aRoma kazile, aliwa mala apa aJudewu pwi eto aliwa kohovolowa Nyumba ya Yehova, aliwa ibwanyula. Aliwa eto kohatamalela amilugu ewa zela agondjiha aJudewu. Yesu ohawendjeliha anamamuharaye ira kaatawe anyakondo kahanavolowe sidadi ya Jeruzalemu mwasiwa kagavolowile, tchakalawo tempu yotawa. Eto yengo yotakala imohive yenno inoza iireye sogolro (2 Tesalonika 2:1-12) (ule unaileri mazwala, aumbuwele pama tapulela uwa), atu anne anakale Judeya, inafwanela katawelege mmwangoni. 15Mutu wenno unafwanyeye vazulu va nyumba yaye,#13:15 vazulu va nyumba yaye: Malambo a mundulrimu atu komangetcha nyumba dokana nimburo eni notandeleya. Ora ya tchiguwo atu keretcha gwela vazulu, aliwa vumaga jiwa. So akala nnga tempu ili hiyo ila, Yesu unawonga ira: <<Tempu yotawa yafiya, wenno unafwanyeye agagaratile vasikansoni vaye avenyaga kavolowe mmba mwaye ira atukule jofuneya, amala atawe, nari. So akumaga evale arome tawa.>> aza avwa ira: <Yengo yotakala ile ihimetchiwa>, inafwanela atawe mobaranya, atita nne kavolowe mmba mwaye ira atukule yengo. 16Nari mutu wenno unafwanyeye agali minda, na liyene kawelele vande ira adowe atukule kapa yaye.

17<<Udilu zela ahiyana okana vambani na ahiyana okana ahima ang'onong'ono owamwa matempu anno! 18Inafwanela mulobele ira ejo jahaireye tempu yodidila. 19Mwasiwa malambo anne inoza ikalewo goyi ilukulu, yenno ili yahanababihege kalawo roma mapandutchiwelo wa jatene, jejo jipandutchile Mulugu fiyeda peno. Eto goyi yenno yavira, kiza ikalawo goyi imohiwa yokala ha yenno. 20Eto Nabwiya uhuvungula malambo a goyi dile na mwasa wa atu osakulriwa anno waasakunlre liye. Mbwenye Nabwiya ahavungula malambo a goyi dile, kalivo afuna vulumuwa.#13:20 Nabwiya uhuvungula malambo a goyi dile: Malambo a mundulrimu Mulugu ohoumbuwela ira: <<Miyo nnafuna divungule malambo a goyi kafuna atu ona ira ale daasakunlre miyo kawande vulumuwa.>>

21<<Eto munvwa mutu auwandelagani ira: <Namatikeliwa ula!>, owu hehi airaga: <Namatikeliwa ule!>, kamuroromele. 22Mwasiwa anoza kakumelele akiristu onama na anamafiyiheda onama. Aliwa anerege irana jionihedo na jotikiniha johokala ja masika ira kaanyengege atu. Eto jakala jowandeya anerege anyenga atu osakulriwa na Mulugu. 23Mbwenye nyo mukale tchendjewa! Miyo nnouwandelani jatene ejo, jengo jiwa jahanaireye.>>

Yesu ohowonga makalelo a mazelo aye

Matewuji 24:29-31; Lukaji 21:25-28

24Yesu ohowongagave eraga: <<Muwari mwa malambo anne, goyi dile damalaga, nzuwa nnoza nidibe eto mwedi kanamoneyege. 25Zulu ule nyenyedi nnoza dimorewo eto kopolo datene da zulu nnoza ditikinyeye. 26Jaireya eno, munoza mmuone Mwana wa Mutu azelaga mmiramboni na kopolo no wareya wohokala wa masika. 27Evale liye unoza aarume angelro aye ira kaze mwilamboni mwatene kaagumanihe atu atene osakulriwa pandi dannayi dene da ilambo, roma magomelo wa ilambo ya vati fiyeda magomelo wa ilambo ya zulu.

Yesu ohofwalrafwaniha mutengo wa mufigera na mazelo aye

Matewuji 24:32-35; Lukaji 21:29-33

28<<Inafwanela mufundje zela yofwalrafwaniha ya mutengo wa mufigera. Nyo mwaona matakuru aye karoma puwa, munovayela iziwa ira tempu ya muzongwe ihiwandamela.#13:28 mwaona matakuru aye karoma puwa, munovayela iziwa ira tempu ya muzongwe ihiwandamela: Tempu yenno yawonga Yesu mazwala, ilambo yafwanyeya atu, tempu ya ilimwe yali tempu yarumbwa muzongwe. Mwilamboni muno, ilimwe yamalaga, muzongwe awandamelaga tchi tempu inapweta nantambu. Ku wonga mutengo oroma okana matakuru maxa gu nantambu. Masiki muzongwe akala ahanarome rumbwa, mwedi wa Setemburu, mitengo didjindji dagali dovareya dene, unamuona nantambu uroma pweta matakuru maxa. Ku wonga wamuona nantambu apwetaga, umala iziwa ira tempu ya muzongwe ihiwandamela. 29Tchi imohive eto inafuna za ireya zela za wa Mwana wa Mutu. Mwaona jeji jiireyaga inafwanela muiziwe ira liye uhuwandamela, uli vakwikwive na va mulango. 30Nnafuna duwandeleni ibaribari ira jatene eji jinokwakwanela atu okalawo malambo anne kahanamale kwa.#13:30 jatene eji jinokwakwanela atu okalawo malambo anne kahanamale kwa: Ku wonga atu anne anafuna kaone nzuwa na mwedi jidibaga eto nyenyedi dimoragawo zulu na jionihedo jimohi jiwa kinamala kwa atene Yesu ahanaze akoka. 31Zulu na ilambo ya vati jinoza jivire, mbwenye mazwaga kiza kamala.>>

Yesu ohawendjeliha anamamuharaye ira kakale oing'anela

Matewuji 24:36-44

32Yesu ohowongagave eraga: <<Mbwenye zela siku niwa vamohi na oriwa inafuna za Mwana wa Mutu, kalivo uiziwile. Nne angelro anakala zulu, nne miyo Mwanaye. So uiziwile gu Baba mwinnya bahi. 33Mukale tchendjewa, muing'anelege eto mulobelege. Tchoira nyo kamuiziwile tempuwa inafuna za fiya jatene ejo. 34Mwasiwa inaza ikale nnga patarawu unakuma vande vaye, adowaga olapela wene. Liye ahanavenye vande vale unonvaha kada namalaba mabasa anafunege liye laba. Anamalaba atene agamanle agawela mabasa, unomukokomeza eto gwarda uli va mulango ira aing'anelege. 35Na nyenne ifwanele muing'anele, mwasiwa siku nnafuna za maliba vande kamuiziwile. Akala unatwanyuwa na tchiguwo, akala unaza vari va mahiyu, akala unaza mitumbi dinlaga, akala unaza na mabebehi kamuiziwile. 36Ifwanele muing'anele ira liye afiya morurumutcha, ahaufwanyeni mugonaga! 37Ilukuluwa inoukokomezani miyo mwatene tchoira mukale oing'anela.>>

Iliyochaguliwa sasa

Markuji 13: iLolo

Kuonyesha

Shirikisha

Nakili