Lukaji 2

Baliwa wa Yesu

Matewuji 1:18-25

1Tempu yali Sezare Agustu#2:1 Sezare Agustu: Ali mwene anna utongi zela atu atene. Liye kamuova mutu. Owanda sakanya yenno yafuna liye. Muwari mwa enne atu kamuona nnga Mulugu. mwene wa aRoma atene, liye ohokumiha nlamulo ira atu a mwilamboni mwaye mwatene kalrembelriwe ira aiziwe indjiva wa atu atene. 2Lrembelra wewo wali woroma kuma mulombwana Kwiriniyo varomile liye kala governadore wa ilambo ya Siriya. 3Evale kada mutu odowa tatamo ya waniwa ira alrembelriwe wewo. 4Voira kada mutu alrembelriwa wewo wafwanyeya nlogo naye, mulombwana Joze ohovenyaga Nazareti, porovinsiya ya Galileya, adowaga sidadi ya Davi#2:4 sidadi ya Davi: Ira itaniwege sidadi ya Davi, tchoira mwene Davi abaliwile wewule. yaitaniwa Beleme, yafwanyeya muwari mwa porovinsiya ya Judeya. Joze adowile lrembelriwa wewule mwasiwa liye abaliwe muwari mwa nlogo na mwene Davi. 5Joze adowaga wewule ira alrembelriwe, ohomutukula mwendaye Mariya wenno ambanyenlre liye. Eto fwanyeya ira Mariya tempu yenno afwanyeya aganna vambani. 6-7Aliwa kagafiyile Beleme ule, yohokwakwana tempu yoira Mariya ambale mwana. Evale kohovenda nyumba yofiyedamo eto tchafwannye. Mwa enne kohovolowa munikolrani mwakala anavinyama a vande. Noira eno, Mariya ohombala mwanaye oroma wa mwanapongwe. Aliwa mbulruwalri mwanole na nguwo, dowa mugonantiha muningulani mwemo mwadjela anavinyama.

Anamakumbuza kohowandeliwa zela baliwa wa Yesu

8Fwanyeya ira mutatamoni mmohive emule, mahiyu anne kohokalawo anamakumbuza kafwanyeya mukokolani kaing'anelaga mabila emule. 9Morurumutcha mungelro mmohi wa Nabwiya ohatwanyuwela eto moneya ulukulu wa Nabwiya woharungunuwaga anamakumbuza atene anne. Evale aliwa kohokana ova wohokala wa masika. 10Mbwenye mungelro wa Nabwiya ohawandela eraga: <<Nyo kamuove! Kaing'anani, tchoira miyo dazela uwandelani Muselu Wapama unafuna zana hagalala ulukulu. Muselu dizilena miyo uwandelani uli para atu atene a ilambo ya vati. 11Museluwa gu ula: Peno eva eni musidadi ya Davi muhubaliwa Nvulusi, liye gu Namatikeliwa, gu Nabwiya.#2:11 Namatikeliwa: Anamafiyiheda kalrembile mazu a Mulugu wanle kawongetcha zela mutu afuna kala musogolrelri eto Nvulusi wa aIzarayeli. Izarayeli wanle komuing'anela Namatikeliwa wenno afuna tikeliwa na Mulugu ira akale musogolrelri eto akale Nvulusi wewa. (Izaiya 9:6-7, 53:3-12; Jeremiya 23:5) Fwanyeya ira Yesu gu Namatikeliwa awongiwa wanle. (Joira ja Anamarumiwa 17:2-3) 12Ionihedo inafuna miyo uvahani tchi ila: Mwadowa mwanfwanya mwana agamanle bulruwalriwa na nguwo eto agagonantihiwe muningulani mwemo munadjela anavinyama, mwaniwa gwenno.>> 13Evale mungelrole agawongile enne, kohozaga angelro amohiwa oindjiva, aliwa za gumanela na mungelro nfwiwole, kamutamalelaga Mulugu keraga: 14<<Mulugu Okwaranya Jatene atitimihiwe eto murendele akale vati vano muwari mwa atu anno anaaziveliwa liye.>> 15Mwa enne angelro ale kagadowile, anamakumbuzale vahanle atu kohowongaga, aliwa ira: <<Ndoweni sidadi ya Beleme ira naone jejo Nabwiya aniiziwihile liye hiyo muwari mwa angelro ale.>> 16Evale aliwa kohovenyihanaga mobaranya kadowaga sidadi ya Beleme. Kagafiyile wewule, kohonfwanya Mariya na Joze wewule wali nyumba ya anavinyama. Eto kohomuona mwanole agagonantihiwe muningulani mwemo mwadjela anavinyama. 17Nomala eno, kohoromaga awandelamo atu kali evale zela jatene jawongile angelro ale zela mwanole. 18Atu atene kavwile jawongile anamakumbuza ale kohotikiniheyaga. 19Mariya mbwenye agahanle, kawandile diwala jengo jatene jaireyile. Vagarati liye oumbuweletcha mmirimani mwaye. 20Noira enne, anamakumbuzale kohowelelaga kokolani wakoka wene, kamutamalelaga Mulugu na mwasa wa jengo javwile atu na jaonne atu. Tchoira kohofwanya jatene nnga mwemo mwawongele mungelrole.

Ineliwa wa Yesu

21Kagakwakwanne malambo matanu na mararu oira mwanole aineliwe, kohomuinelaga, aliwa nvaha nzina na Yesu. Nzina na Yesu ali neno naromonle mungelro, Mariya ahanakayena ingulu ya mwanole. 22Eto kagakwakwanne malambo ovisasanyeda#2:22 kagakwakwanne malambo ovisasanyeda: Nafwanya Levitiku 12:3-8, nnovwa ira muhiyana ambala mwanapongwe, okana malambo 40 ahadowaga Nyumba ya Yehova eto ahahindaga fwaramento da Nyumba ya Yehova. Malambo aye kakwakwana, ovelela mukuto, amala eno pawanda liye dowa akoka pama Nyumba ya Yehova. nnga mwemo malamulo a Mozeji munawongela atu, aliwa kohomutukulaga mwanole kamudowagana Jeruzalemu ira kanvelele vamentoni va Nabwiya.#2:22 kohomutukulaga mwanole… ira kanvelele vamentoni va Nabwiya: Nafwanya Ezodu 13:13-16, nnovwa ira Mulugu osakanya makalelo ira aIzarayeli kahawande diwala makalelo verile liye tempu aIzarayeli kali atu azari muwari mwa aIjipitu wanle, tempu yapiwa arandji baliwa atene a Ijipitu eto arandji baliwa atene a aIzarayeli kavuneliwaga muwari mwa ukwa wa mwana nibila. Mwa enne aliwa kagakumilemo mwilamboni mwa Ijipitu, Mulugu ohowonga na aIzarayeli ira: <<Ahiminyu atene arandji baliwa kawomboliwege na ukwa wa mwanainyama.>> Nione Ezodu 22:29, 34:19; Numero 3:13. 23Aliwa kairana mokwakwanela na jejo jilrembiwe mmalamuloni mwa Nabwiya ira:

<<Mwana uli watene wenno uli murandji baliwa, akala mwanapongwe, inafwanela avahediwe wa Nabwiya.>> # Ezodu 13:2,12

24Eto kadowa velela mukuto mokwakwaneliheda nlamulo na Nabwiya ira: Kaveleliwe maziya menli owu hehi ana kangayiwa ambinli. #2:24 Va nnavwa zela mukuto wa maziya menli owu hehi ana kangayiwa ambinli: Tchoira malamulo kohowonga eto ira mutu osimela ahakayena nibila, podi velela maziya menli owu hehi ana kangayiwa ambinli. (Levitiku 12:8) Muwari mowonga ira Joze na Mariya kohovelela mbalrame, ku wonga aliwa tchali atu orayela.

25MuJeruzalemu mule mohokala mulombwana mmohi aitaniwa Simeyawu. Liye ali mutu wapama, omuriheda Mulugu eto odediheda ona womboliwa wa aIzarayeli.#2:25 odediheda ona womboliwa wa aIzarayeli: Mazwala anawonga ira Simawu adediha ira vasogolro aIzarayeli anoza kakayena tempu ya murendele ira kahatongiwegeve akoka na mwene wabure kanna atu eto anokumamo muuzarini, kakayena mwene muxa wenno afwanyeya agali Yesu. Eto liye ali mutu owenda na Munemba Otchena. 26Muwari mwa Munemba Otchena emule ohowandeliwa ira: <<Weyo kunafiyeda kwa wahanamuone Namatikeliwa wa Nabwiya.>> 27-28Mulombwana Simeyawu agawandeliwe enne muwari mosogolrelriwa na Munemba Otchena, ohovolowaga Nyumba ya Yehova. Tempu yavolowaga Mariya na Joze kamuzagana mwanole ira kakwakwanelihede nnga mwemo mwawongela malamulo, fwanyeya eto mulombwana Simeyawu ohodowaga liye mutukula mwanole Yesu mmandani mwaye, liye roma mutamalela Mulugu eraga: 29<<Nabwiya peno mbwenye muhukwakwaneliheda yenno yawongile nyo malambo a mundulrimu. Va mbwenye miyo podi kwa mwa murendele. 30Mwasiwa miyo peno dihimala ona na meswaga vulusa wenyu, 31wewo musakanyile nyo para atu atene 32ira akale wareya wa atu atene ohokala aJudewu ira kaiziwe ndila yenyu eto ira atwinyu aIzarayeli kateteliwe.>>

33Joze na Mariya kagavwile jengo jawongilege mulombwana Simeyawu zela mwanole, kohokalaga otikiniheyene. 34Nomala enne, Simeyawu oharelihaga, amuwandelaga Mariya mmaye Yesu eraga: <<Kaing'ana, mwanola gusakulriwe na Mulugu ira akale mutu oagudjula atu adjindji a aIzarayeli no avenyiha atu adjindji a aIzarayeli.#2:34 mwanola gusakulriwe na Mulugu ira akale mutu oagudjula atu adjindji a aIzarayeli no avenyiha atu adjindji a aIzarayeli: Ku wonga ira liye agaulukunle afuna akale Nvulusi wa atu amohiwa eto liyene gwafuna agudjula atu adjindji amohiwa. Ku wonga zela mutu wenno unamuroromela, Yesu unomuvulusa. Mbwenye zela wenno ahanamuroromela, Yesu unoza amugudjule. Nione Juwawu 3:18, 5:27-29; Joira ja Anamarumiwa 10:42; 1 Peduru 2:6-8; Roma 9:33. Liye gunafuna kala ionihedo ya Mulugu. Atu adjindji anerege wonga jabure zela liye. 35Eto jengo jatene jinaumbuwelege aIzarayeli mokoyeya jinoza jiiziweye.#2:35 jatene jinaumbuwelege aIzarayeli mokoyeya jinoza jiiziweye: Mazwala tapulela ira mabasa ulabile Yesu Kiristu kahi so kunga umwene mwilamboni ya vati. Utongi waye unotonga vamohi na joumbuwela jene ja atu. Tchoira Yesu Kiristu aza aatongaga atu atene, liye unoza atonge joumbuwela jokoyeya. Nione Roma 2:16. Mbwenye zela weyo Mariya, mwa mwanola ikala yengo inafuna za ireya, yukumbanyihe nnga supada noxongowa nnaulata mmirimani mwawo.>>#2:35 yukumbanyihe nnga supada noxongowa nnaulata mmirimani mwawo: Afwase Simeyawu awongaga mazwala na Mariya, liye awonga zela kumbanya wafuna Mariya kana mwasiwa erege muona mwana ambanle liye akomeliwaga vamuradini.

36Wewule eto wohokala namafiyiheda mmohi wa muhiyana aitaniwa Ana, liye ali makwele. Ana babaye ali Fanuweli wa ziza na Azeri. Liye eto ohomala ulula. Muhiyanole agateliwile, agaromile muiziwa mulombwana, vamanle yaka tanu na mbinli, noira eno mamunaye ohokwa. 37Tempu yakwile mamunaye liye okalave makwele fiyeda siku nenne. Ana tempu yenne afwanyeya aganna yaka 84. Liye akaletchave vatando va Nyumba ya Yehova ntana na mahiyu amutamalelaga Mulugu, ajejuwarigi, alobelaga. 38Evale tempu mulombwana Simeyawu yamutamalela liye Mulugu zela mwanole, na Ana wenne ohozaga amutamalelaga Mulugu, awongaga jengo jidjindji zela mwanole. Ana eto oawandeletcha zela mwanole atu oindjiva kadedihetcha womboliwa wa Jeruzalemu.

Ulukula wa Yesu

39Joze na Mariya kagamanle kwakwaneliheda nnga mwawongela malamulo a Nabwiya, kohowelelaga waniwa wakoka wene, ilambo ya Galileya sidadi ya Nazareti.

40Yesu oulukula, agali olimbene maningo, zelru daye dodowagave sogolro. Eto Mulugu omusogolrelra na sayi daye.

Yesu agali Nyumba ya Yehova

41Va kada yaka, Yesu ababaye kodowetcha Jeruzalemu ira kadje Pwando ya Mavirelo.#2:41 Pwando ya Mavirelo ali pwando yadja aJudewu moumbuwela mavirelo a Nabwiya Mulugu aapaga aIjipitu eto aavunelaga aIzarayeli muwari mwa mabila kapile atu, kazolihaga sangiri kaxilu ya musuwo. Kuma evo, va kada yaka aIzarayeli kapa mabila, aliwa djaga na makalelo kadja andimuwiwa malambo a mundulri. 42Yesu aganna yaka kumi na mbinli, aliwa kohodowa Jeruzalemu pwandoni nnga veretcha atu molemelela. 43Kagafiyile wewule, pwando yagamanle djiwa, kagabalaleyile, ababaye kohovenyihana, aliwa welagawo. Mbwenye Yesu kawenlewo, ohalaga Jeruzalemu wewule, ababaye kahaiziwaga. 44Aliwa kesaga: <<Nili vamohi, liye uli na afwaye a muulrendoni.>> Kagawendile siku nimohi, kohoroma musaka mwaniwa muwari mwa abali ewa na muwari mwa afwiwa. 45Mbwenye kalivo amuonne. Vevale aliwa kohowelaga, aliwa dowa wakoka wene wali atu Jeruzalemu, roma nvenda.

46Kagamanle malambo mararu, kohonfwanyaga mwanole agali Nyumba ya Yehova agagaratile vari va anamafundjiha malamulo aavuruwanaga eto aafukaga. 47Atene anne kanvuruwanaga kotikiniheya vadjindji mwasiwa Yesu awakulaga na makalelo apama no onelramo wapama.

48Ababaye ale kaganfwannye mwanole, na aliwene kokalaga otikiniheyene. Mmaye ule kwi: <<Mwanaga, wirele nni jeji? Kaing'ana, miyo vano na babawo nohosimela nusakaga.>> 49Evale liye ohawakula eraga: <<Nyo mwadivendela nni? Nyo kamuiziwile ira ili pama dikalege nyumba ya babaga?>> 50Ababaye ale kagavwile mazu anne, tchawandile onelramo. 51Vevale Yesu ohomaruwaga vamohi na ababaye kawelelaga Nazareti. Eto liye oavwelela ababaye. Mbwenye mmaye ohokoya jatene ejile mmirimani mwaye. 52Yesu ohoulukula. Zelru daye doulukulave. Liye oziveliwiwa na Mulugu eto oziveliwiwa na atu.

Iliyochaguliwa sasa

Lukaji 2: iLolo

Kuonyesha

Shirikisha

Nakili