Lukaji 3

Juwawu Mbatizi ohotara ndila yafuna vira Yesu

Matewuji 3:1-12; Markuji 1:1-8; Juwawu 1:19-28

1Vagamanle yaka kumi na tanu romela tempu Tiberiyo Sezare aromile liye kala mwene wa aRoma atene, Ponsiyu Pilatu agali governadore wa Judeya, Erodi agali mwene wa Galileya, mbalaye Filipi agali mwene wa ilambo ya Itureya na ilambo ya Tarakonite eto Lizaniya agali mwene wa ilambo ya Abileme, 2mulombwana Anasi na Kayafasi kagali andimuwa a anamakuta,#3:2 Anasi na Kayafasi kagali andimuwa a anamakuta: Kahi ira ambinlene kali andimuwa a anamakuta tempu imohive, nari. Mwasiwa alaba mmohi mmohi. So anaoniha ira muwari mwa tempu yenne alabile yaka dedile ali atu ambinli anna. pa evale Mazu a Mulugu vazile atu wa Juwawu mwana Zakariya muisalesaleni.#3:2 pa evale Mazu a Mulugu vazile atu wa Juwawu mwana Zakariya muisalesaleni: Mulugu mazu awongile liye na Juwawu ali ira adowe abatizege eto muwari mobatiza mule pafuna za oneya Nvulusi. (Juwawu 1:31-34) 3Liye ohoroma wendawenda wandamelana muhindje Jordawu aalaleyaga atu ira katwaruwe eto kabatiziwe ira kaleveleliwe jotega jiwa. 4Ejo jakwakwaneliheda mazu kalrembiwe na namafiyiheda Izaiya wanle oira:

<<Ukala nizu nnakuwa muisalesaleni niiraga: <Sakanyedani rampa wa Nabwiya. Ongolani ndila inafuna liye vira. 5Mwemo munafwanyeya mapedi odiha munoza muvuheleliwe. Mwango na mikuma datene nnoza ditonde. Jogomba jatene jinoza jiwongoliwe. Ndila datene dotimbeya nnoza disakanyiwe pama. 6Eto atu atene anoza kaone vulusa wa Mulugu.> >>

7Evale Juwawu alaleyaga enne, kozaga atu wewule waligi liye ule ira kabatiziwe. Evale Juwawu agaaonne aliwa kazaga, ohoroma asumulula eraga: <<Nyo mulogo wa jivili nyo! Kodi uuwandenleni bani ira mutawe uwali wa Mulugu unafuna za utolotchani? 8Akala muhutwaruwa, muvahege misapo dapama dotonyiheda twaruwa wenyu. Nyo mwagarati kamuroromelege ira: <Mulugu unonirumela mwasiwa hiyo nili ziza na Abarahamu.> Tchoira miyo nnouwandelani ira Mulugu afuna, unowanda tukula mabwe ali eva ala, liye sandutcha ira kakale ana Abarahamu. 9Eto mbazo imala sayihiwa ira igwadege mitengo na mitchitchi diwa dene. Mutengo watene ahanavaha misapo dapama, unogwadiwa, avokediwe munloni.>>

10Nomala enne, atu adjindji kaligi evale kagavwile jowonga ja Juwawu, kohonfuka, aliwa ira: <<Nnga hiyo niirege avi?>> 11Evale Juwawu ohawandela, liye ira: <<Miyo nnouwandelani ira ule unna kamiza mbinli, atukule imohi anvahe nfwaye ahanna. Ule unna jodja, inafwanela atukule anvahemo nfwaye ahanna jodja.>> 12Evale eto vohokalaga aliba sokiha misoko. Aliwa kohozaga wa Juwawu ira kabatiziwe. Evale kohonfukaga Juwawu keraga: <<Namafundjiha, nnga hiyo vano niirege avi?>> 13Evale Juwawu ohawandela, liye ira: <<Nyo mwasokihaga misoko, kamuromolege konta yokwaranya yenno iwandeliwe nyo.>> 14Evale eto vohokala anyakondo. Aliwa kohonfuka keraga: <<Nnga hiyo vano niire avi?>> Evale Juwawu ohawandelaga eraga: <<Nyo kamwaawakege atu kobiri diwa mowatutcha. Eto kamwaanukedege atu jengo jahairilena atu. So nyo mbwenye, muziveliwege yotambilra yenno munatambilra nyo bahi.>>

15Muwari mwa enne atu dediheda wewa wohosimbwaga wendjededeya, aliwa umbuwelaga zela Juwawu ira: <<Kodi Namatikeliwa kaza akala wenna?>> 16Juwawu mbwenye ohawandelaga atu kafwanyeyaga evale eraga: <<Miyo nnaubatizani na mahindje, mbwenye ukala unaza odikwaranya miyo, nne miyo eto kadili ofwanela tapula mingohi da sapato daye.#3:16 kadili ofwanela tapula mingohi da sapato daye: Wanle mundimuwa afiya vande vaye, omukana namalaba mmohi adowa kokora mutapula sapato daye liye wungula. Wenne ali nnga mutu ohokana mabasa vamentoni va anamalaba atene. Liye aza, unaubatizegeni na Munemba Otchena na munlo. 17Liye ukana yovetana yaye mmandani mwaye ira avetena tirigu wenno uli nimburo nobubudavo jalo. Amala veta, unafuna atukule tirigu ahele musandjani mwaye, makata atatilele munloni ohotima.>>

18Mulombwana Juwawu ohalaleya atu atene, aawandelaga, aakokomezaga Muselu Wapama na makalelo madjindjene. 19Juwawu eto ohomusumulula mwene Erodi mwasiwa liye ohomutela Erodiya wenno amukumihile liye mmba. Tchoira muhiyanole ali mwadi mbalaye Filipi. Juwawu eto omusumulula zela jabure jatene jairetchana Erodi. 20Evale Erodi ohowendjeda jabure jatene jaira liye. Wendjeda uwa, amuhindile Juwawu, liye muheliha mukadeya.

Batiziwa wa Yesu

Matewuji 3:13-17; Markuji 1:9-11

21Juwawu ahanaheliwe mukadeya, oabatiza atu oindjivene. Yesu eto na liyene ohobatiziwa tempu imohive yabatiza Juwawu. Agabatiziwe, ohoromaga lobela. Mbwenye Yesu alobelaga, zulu wohuleya. 22Evale Munemba Otchena ohotita na makalelo a kangayiwa, liye za vali Yesu vale eto zulu wohokumelaga mazu kawongaga ira: <<Weyo uli Mwanaga wenno nnamuziveliwa miyo eto unadihagalaliha.>>

Makolo a Yesu kuma mutu oroma Adawu fiyeda baliwa waye

Matewuji 1:1-17

23Yesu ohoroma laba mabasaye aganna yaka 30. Liye aoneya nnga mwana Joze,#3:23 Liye aoneya nnga mwana Joze: Mazwala kinawonga ira Yesu ali mwana Joze. Tchoira Yesu aoneya nnga mwana Joze mbwenye kaali. Liye ali Mwana Mulugu mwasiwa vambani vanna Mariya yaireyile mwa kopolo da Mulugu hiya kopolo da Joze. Joze mwana Eli, 24Eli mwana Matati, Matati mwana Levi, Levi mwana Meliki, Meliki mwana Janayi, Janayi mwana Joze, 25Joze mwana Matatiya, Matatiya mwana Amoji, Amoji mwana Nahumi, Nahumi mwana Esili, Esili mwana Nagayi, 26Nagayi mwana Maati, Maati mwana Matatiya, Matatiya mwana Semeyi, Semeyi mwana Jozeki, Jozeki mwana Joda, 27Joda mwana Jowanani, Jowanani mwana Reza, Reza mwana Zorobabeli, Zorobabeli mwana Selatiyeli, Selatiyeli mwana Neri, 28Neri mwana Meliki, Meliki mwana Adi, Adi mwana Koza, Koza mwana Elimada, Elimada mwana Eri, 29Eri mwana Jozuwe, Jozuwe mwana Eliyezeri, Eliyezeri mwana Jorimu, Jorimu mwana Matati, Matati mwana Levi, 30Levi mwana Simeyawu, Simeyawu mwana Juda, Juda mwana Joze, Joze mwana Jonani, Jonani mwana Eliyakimu, 31Eliyakimu mwana Meleya, Meleya mwana Mena, Mena mwana Matata, Matata mwana Nata, Nata mwana Davi, Davi mwana Jese, 32Jese mwana Obedi, Obedi mwana Bowazi, Bowazi mwana Sala, Sala mwana Nasoni, 33Nasoni mwana Aminadabe, Aminadabe mwana Adimi, Adimi mwana Arini, Arini mwana Ejiromi, Ejiromi mwana Pereji, Pereji mwana Juda, 34Juda mwana Jako, Jako mwana Izaki, Izaki mwana Abarahamu, Abarahamu mwana Tera, Tera mwana Nahori, 35Nahori mwana Serugi, Serugi mwana Rewu, Rewu mwana Pelegi, Pelegi mwana Eberi, Eberi mwana Sala, 36Sala mwana Kayinani, Kayinani mwana Aripaxadi, Aripaxadi mwana Semi, Semi mwana Nowe, Nowe mwana Lameki, 37Lameki mwana Metusela, Metusela mwana Inoki, Inoki mwana Jaredi, Jaredi mwana Mahalaleli, Mahalaleli mwana Kayinani, 38Kayinani mwana Enosi, Enosi mwana Seti, Seti mwana Adawu, Adawu mwana Mulugu.#3:38 mwana… mwana: Mazina matene anna analaba ira kaiziwihe ira Yesu akumenle mwa atu anna.

Iliyochaguliwa sasa

Lukaji 3: iLolo

Kuonyesha

Shirikisha

Nakili