Lukaji 1

Mazu oroma

1Atu adjindji kohovilevela ira kalrembe istoriya ya jengo jiireyile muwari mwa hiyo. 2Atu anne kaonile jatene jiireyile roma maromelo wene eto atu anno kalaleyetcha mazu baniwandenle. Evale nagawandeliwe, nihilremba jejile jawandeliwe hiyo. 3Mwa eno, so mundimuwa Teyofilo, miyo dihifundja mwapama zela jatene jiireyile roma maromelo, nomala miyo ona ira: <<Inafwanela dimulrembele mundimuwa Teyofilo jatene jene mokwakwanela ira na liyene aiziwe jiireyile.>> 4Eniva nnalremba ira mukaleve oimelene zela jatene jene jifundjihiwe nyo.#1:4 nnalremba ira mukaleve oimelene: Fwanyeya ira mulombwana Lukaji amulrembelaga mulombwana Teyofilo, kaali ira Teyofilo ali ahanaiziwe yengo tchivi. So Lukaji abalra ira: <<Mulombwana Teyofilo ukana jivwile liye. Mbwenye liye kanavwe mokwakwanela. Nnafuna dimulrembele karta ira awande onelramo pama mohowanganyeda yengo ili yatene zela Yesu.>>

Zakariya ohowandeliwa zela Baliwa wa Juwawu

5Tempu yatonga mwene Erodi ilambo ya Judeya, ohokalawo namakuta mmohi eriwa Zakariya. Liye ali namakuta wa nikuru nimohi naitaniwa nikuru na Abiya.#1:5 nikuru na Abiya: Ora yenno anamakuta kohogaweya makuru makuru muwari movahana exkala. Kada nikuru nohokana tempuwa yalaba atu. Mundimuwa Zakariya ali muwari mwa nikuru na anamakuta kakumile ziza na mundimuwa mmohi eriwa Abiya. Nione 1 Koronika 24:1-10. Liye ohomukana muhiyanaye eriwa Ezabeli, wenno ali wa ziza na Arawu. 6Aliwa ambinlene muhiyana na mulombwana kafwanyeya kagali apamene vamentoni va Mulugu, tchanna makani. Aliwa kawenda mwapama na malamulo vamohi na mangano matene a Nabwiya. 7Eto fwanyeya ira muhiyanaye kaanna ahima mwasiwa ali ngomwa eto mwa ora yenne ambinlene kohoulula.

8Yagafiyile tempu yoira nikuru na Zakariya nne nilabe, Zakariya ohodowa ira alabe mabasaye a unamakuta vamentoni va Mulugu. 9Nnga veretcha atu tempu yenno, namakuta para avolowe Nyumba ya Yehova#1:9 Nyumba ya Yehova: Nione foto inafwanyeya Matewuji 4:5. atumeye jonukela,#1:9 atumeye jonukela: Malambo a mundulrimu Mulugu oharuma aIzarayeli mabasa kafuna laba anamakuta. Muwari mwa mabasiwa, aliwa kohokana mabasa otumeya jengo jonukela pama vazulu va ibuwa imohi yafwanyeya muwari mwa Musasa wa Yehova. (Nione Ezodu 30:1,7,34-36) asakulriwa mwa ngari.#1:9 asakulriwa mwa ngari: Nione rodape unafwanyeya Matewuji 27:35. Mwa enne Siku nenne asakulriwe ali mulombwana Zakariya. 10Tempu yavolowa namakuta mmba mule ira alabe mabasaye otumeya jonukela, atu atene kakala unde kalobelaga. 11Evale liye agavolowile mmba mule, mungelro wa Nabwiya ohozaga liye imela muwononi odjana vaibuwani vatumeyetcha atu jonukela. 12Evale Zakariya agamuonne mungelrole, ohorendjeyaga, liye roma muovaga. 13Mbwenye mungelrole ohomuwandelaga, liye ira: <<We Zakariya kuove. Tchoira malobelo awo kohomala vweya na Mulugu. Eni muhiyanawo Ezabeli unombala mwana wa mwanapongwe. Mwanole abaliwa, weyo unvahe nzina na Juwawu. 14Liye abaliwa, weyo unohagalala eto atu adjindji anoziveliwa valukulu. 15Tchoira zela wa Nabwiya, mwanole unakala mundimuwa ofwanela vamentoni va Nabwiya eto kaza ang'wa vinyu nari yong'wa imohiwa yolrezelriha. So mbwenye unozaleliwa Munemba Otchena ahanabaliweve. 16Liye unoza aarungunutche Ana Izarayeli adjindji ira kamuhare Nabwiya Mulugu wewa. 17Eto unodowa vasogolro va Nabwiya. Makalelo aye na kopolo nnafuna liye kana unalinganege na namafiyiheda Eliya. Mwa eno, liye unorungunutcha mmirimani mwa ababi ira kawendege pama na ahimiwa. Unorungunutcha mmirimani mwa atu ohovwelela ira aliwa kawende na zelru da atu apama. Unoarungunutcha atu oindjiva ira Nabwiya afiyaga, aafwanye kagali ovisakanyedene.>>

18Evale Zakariya ohonfuka mungelrole ira: <<Nnga miyo nnawande roromela avi ira nyo munawonga ibaribari? Tchoira miyo dihimala ulula eto muhiyanaga uhumala ulula.>> 19Mbwenye mungelrole ohomuwakulaga ira: <<Miyo dili Gabiriyeli, maliba kala vamentoni va Mulugu. Liye gudirumile ira dize duwandele Muselu Wapama wenno unauwandela miyo. 20Uing'ane, kuma peno eni kunawongege fiyeda siku nnafuna za kwakwanela jatene jene jiwongile miyo ji, mwasiwa weyo kufunne roromela zela yenno yuwandenle miyo. Mbwenye jejo jinoza jiireye siku niwa naza nifiya.>>

21Jejile jiireyaga enne, atu kafwanyeya unde ule, kohoroma muing'anela eto kohotikiniheyaga na mwasa odibeliwamo muwari mwa Nyumba ya Yehova mule. 22Evale Zakariya akumaga mmba mule kawanda wonga, so mbwenye liye afunaga wonga, atonya na manda bahi. Atu kagaonile ira Zakariya kawanda wonga, aliwa kaonelramo ira: <<Liye agali muwari mwa Nyumba ya Yehova, ukala jionihiwe liye.>> 23Evale mulombwana Zakariya malambwaye a mabasa kagamanle, ohovenyihana liye welela vande. 24Vagavirile malambo mangasi mangasi, muhiyanaye Ezabeli ohokana vambani. Liye aganna vambani, ohovikoya ante medi mitanu doroma,#1:24-25 aganna vambani, ohovikoya ante medi mitanu: Hiyo veva kaniiziwile mwasiwa avikoyela liye. Afwase, ali ira akumaga, atu kamuona aganna vambani kahamuteyegeve akoka. aumbuwelaga ira: 25<<Nabwiya uhudiirela upama ira manyazo ohobala danna miyo malambo a mundulrimu vari va atu, kamale.>>

Mungelro ohomuwandela Mariya zela baliwa wa Yesu

26Ezabeli aganna vambani medi mitanu na mmohi, Mulugu ohomuruma mungelro Gabiriyeli ira adowe ilambo ya Galileya, sidadi ya Nazareti, 27awonge na namwali mmohi aitaniwa Mariya wenno ali ahanarome gona na mulombwana. Mariya tempu yenno abanyelriwe na mulombwana mmohi wa ziza na mwene Davi, eriwa Joze. 28Evale mungelrole agafiyile wewule, ohomulondjela Mariya, nomala liye ira: <<Weyo uli mutu orelihiwa eto Nabwiya uli na weyo.>>#1:28 Weyo uli mutu orelihiwa eto Nabwiya uli na weyo. MaBibiliya amohiwa anazana mazu amohiwa oira Muwari mwa ahiyana atene, usimbwile relihiwa gu weyo. 29Mbwenye Mariya agavwile londjela wa mungelrole, ohokukumuwaga, liye roma umbuwela ira: <<Kodi mungelrola londjela wewu unafuna utapulele avi?>> 30Evale mungelrole ohomuwandelaga, liye ira: <<Mariya weyo kuove, mwasiwa Mulugu uhuureliha. 31Kaing'ana, weyo unokana vambani umbale mwanapongwe. Liye abaliwa, unvahe nzina na Yesu. 32Mwana unafuna we mbala unakala mundimuwa wa kopolo, wenno unaitaniwege Mwana Mulugu, Mulugu Okwaranya Jatene. Nabwiya Mulugu unonvaha mpando wa umwene wa mbwiyaye Davi. 33Liye unerege tonga mulogo wa Jako. Umwene waye kuza umala. Unakala umwene wa mukalakala.>> 34Evale Mariya agavwile enne, ohonfuka mungelrole ira: <<Kodi ejo jinaireya avi agali miyo kannamugonena mulombwana?>>

35Evale mungelrole ohomuwandela, liye ira: <<Munemba Otchena unoutitela eto kopolo da Mulugu Okwaranya Jatene nnakala na weyo. Nona mwana unafuna we mbala unaitaniwege Otchena eto unaitaniwege Mwana Mulugu. 36Eto kaing'ana, Ezabeli wenno uli muibalini mmohive na weyo, wenno atu atene kamuiretcha atu ngomwa, liye uhukana vambani medi mitanu na mmohi. Vambani vinna liye, unombala mwanapongwe. 37Tchoira na Mulugu kilivo yengo yahanawandeya.>> 38Evale Mariya agavwile mazu anne ohowongaga eraga: <<Miyo vano nnafwanyeya dagali muzari wa Nabwiya. Jatene ejo jidiireyele nnga muwongele nyo.>> Mungelrole agamanle wonga jejile ohokumagavo valigi Mariya vale, liye dowaga.

Mariya ohodowa mpanda Ezabeli

39-40Vagamanle malambo a vang'ono, Mariya ohovenyaga adowaga ilambo ya mmwangoni, vande va Zakariya, tatamo imohi yafwanyeya muwari mwa porovinsiya ya Judeya. Aganfwanyile Ezabeli, ohomulondjela. 41Evale Ezabeli agavwile londjela wa Mariya, mwana afwanyeya mbani mwaye oholupalupa. Evale Ezabeli ohozaleliwa Munemba Otchena. 42Mwa enne ohoromaga wonga mokuwa eraga: <<Muwari mwa ahiyana atene usimbwile relihiwa gu weyo. Eto orelihiwa gu mwana wenno unafuna we mbala! 43Kodi miyo dili ani fiyeda ira weyo mmaye Nabwiya waga uze udipande? 44Kaing'ana, tchoira miyo dagavwile udilondjelaga, mwana unafwanyeya mbani mwaga mu, uhulupalupa mohagalala.#1:44 mwana unafwanyeya mbani mwaga mu, uhulupalupa mohagalala: Mwanole oholupalupa muwari mozaleliwa Munemba Otchena ahanabaliweve, molingana na mazu awongile mungelro. Nione Lukaji 1:15. 45Orelihiwa gu mutu wenno unaroromela jejo jiwandeliwe liye na Nabwiya ira jinoireya.>>

Imba wa Mariya

46Mariya agavwile enne ohowonga eraga:

<<Miyo nnomuriheda Nabwiya no kalawo waga watene.

47Munemba waga unohagalala zela Mulugu Nvulusi waga.

48Tchoira Nabwiya uhudiumbuwela zela makalelo mang'onong'onove danna miyo, muzari waye. Makalelo danna miyo tchoira kadateteliwa na atu. Mbwenye kaing'anani, kuma peno dowa sogolro atu a tempu datene anadiitanege muhiyana orelihiwa.

49Wenno unna Kopolo uhudiirela miyo jengo jilukulu eto nzina naye totchena.

50Liye unooniha tangaranga daye muwari mwa atu anne anamuova, roma atu a wanle dowagave para atu a sogolro.

51Liye uhuvenyiha muwono waye wa kopolo, uhabalaletcha atu ovitukulela na jofuna jiwa jatene.

52Liye uhatitiha andimuwa anno kagaratile mipando da umwene eto uhagweliha atu oviyeviha.

53Liye unoarumbaliha na jengo japama atu okana ndala, amala eto unoatamangiha atu orayela, aliwa dowaga eno manda ve.

54-55Liye kadiwanle yopangana yenno yapanganne liye ira unoza anikamihede hiyo aIzarayeli anamalabaye. Mwasiwa liye ohopangana na ababihu, mulombwana Abarahamu vamohi na ahimaye ira: <Miyo nneregeve uwendelani tangaranga malambo matene a mukalakala.> >>

56Mariya ohomala medi miraru agali vande va Ezabeli awalredaga. Agamanle walreda, ohovenya, liye dowaga waniwa.

Baliwa wa Juwawu Mbatizi

57Ezabeli tempu yaye yobala yagafiyile, ohombala mwanapongwe. 58Evale amwandamanaye na abalaye kagavwile tangaranga dedo Nabwiya amuirele liye, kohagalalaga valukulu. 59Mwanole agakwakwanihile malambo matanu na mararu, kohomuinela.#1:59 Mwanole agakwakwanihile malambo matanu na mararu, kohomuinela. Ineliwa unawongiwa va kahi nnga ineliwa wa tempu ili hiyo ila. Wanle Mulugu ohomuwandela Abarahamu ira: mwana wa mwanapongwe uli watene unabaliwege vande vawo, akwakwanihaga malambo matanu na mararu, inafwanela aineliwe. (Jenesesi 17:10-14) Eto aineliwa ali ahima a alombwana ve, kakwakwaniha malambo matanu na mararu. Ku wonga mwana agali nnyenya na mmandani. Nione Levitiku 12:3. Ku wonga ja lunga jinera azombwe eto ja zoma na anamwali jinera atu tempu ili hiyo ila kajinna pandi na Mulugu. Kagamuinenle kohofuna ira kanvahe nzina na babaye Zakariya. 60Mbwenye mmaye ohoira: <<Hehi, nzina naye unakala Juwawu.>>#1:60 nzina naye unakala Juwawu: Kanvahile nzina nne muwari mowandeliwa na mungelro Gabiriyeli. (Lukaji 1:13) 61Evale atu kohonfuka, aliwa ira: <<Kodi nyo muzizani mwinyu, ukalamo unna nzina neno?>> 62Evale atu kohonfuka Zakariya zela nzina nafuna liye nvaha mwanayele. 63Evale Zakariya ohovepa imwana tabwa ira alrembevo. Kaganvahile tabwa nne, oholrembavo ira: <<Mwanola nzina naye gu Juwawu.>> Atu atene kafwanyeya evale kohotikinaga. 64Agalrembile vatabwani vale, tempu imohive yenne ohoromaga wonga akoka, agali liye kawongetcha. Noira eno, ohoromaga mutamalela Mulugu. 65Jagaireyile enne amwandamaniwa kohokana ova eto zela jejile jaireyile johomala vweya ilambo ya mmwangoni ya Judeya. 66Zela atu atene kavwile jejile, koumbuwela mmirimani mwiwa kafukanaga keraga: <<Kodi mwanola unafuna akale ani?>> Mwasiwa kopolo da Nabwiya dali na mwanole.

Zakariya ohowonga mazu mozaleliwa Munemba Otchena

67Zakariya muwari mozaleliwa Munemba Otchena, ohoroma wonga mazu a Mulugu, eraga:

68Atamaleliwe Nabwiya Mulugu wa aIzarayeli. Tchoira unazela awombola atwaye.

69Mwasiwa liye gumurumile Nvulusi waye wa kopolo ira aze wa hiyo. Liye azaga, unakumela muzizani mwa Davi namalaba waye.

70Liye unokwakwaneliheda mazu awongile liye wanle muwari mwa anamafiyihedaye otchena

71ira aniwombole mmandani mwa amwidanihu eto mmandani mwa atene anno ananiharahara.

72Liye oholumbela na ababihu ira: <<Miyo nnouwendelani tangaranga. Miyo kannadiwala yopangana yaga yotchena yenno ipanganne miyo na nyo.>>

73-74Tchoira liye oholumbela na nikolo nehu Abarahamu malambo a mundulri ira: <<Miyo nnoza daawombole ahimawo a musogolro mmandani mwa amwidani ewa atene eto aliwa anoza kaditamalelege mohoova.>>#1:73-74 mohoova: Owu hehi mohowanganyeda.

75Liye awongele eno ira hiyo niwende vamentoni vaye na makalelo otchena vamohi na makalelo apama, kalawo wehu watene.

76Zakariya ohowongagave zela mwanaye eraga: <<We mwanaga, unerege itaniwa namafiyiheda wa Mulugu Okwaranya Jatene. Weyo gunafuna kala vasogolro va Nabwiya ira utare ndila inafuna liye vira.

77Weyo unerege avwiha atwaye zela vulusiwa wewo unazela moleveleliwa jotega.

78Na mwasa wa tangaranga da Mulugu dohokala da masika, ukala unakumela zulu nnga nzuwa nakumaga

79ira aamoneye ale anagarati muisini vamohi na wewo unafwanyeya nfulri wa ukwa. Unonisogolrelra manyalo ehu ira niwende na ndila yozana murendele.>>

80Mwanole Juwawu oulukula eto okala olimbene mwa munemba.#1:80 okala olimbene mwa munemba: Ku wonga Juwawu aulukula aharaga jofuna ja munemba. Kaali mutu odengumela wu na wu haraga jonama ja atu, mbwenye liye ali mutu ohideda ibaribari ya Mulugu na manda menli. Evale ohodowa muisalesaleni, liye kala mwemule fiyeda siku naromile liye laba mabasaye vamentoni va aIzarayeli.

Iliyochaguliwa sasa

Lukaji 1: iLolo

Kuonyesha

Shirikisha

Nakili