2 Korinto 5
5
Atu omuroromela Yesu anoza kavahiwe maningo maxa ira kakale nyumba yewa
1Maningo ehu ala nnakalamo hiyo mwilamboni muno anafwanyeya nnga musasa. Muwari mobalra jengo johooneya, hiyo nihiiziwa ira musasa wehu ula atolowa, nihikana nyumba imohiwa yokumela wa Mulugu,#5:1 musasa wehu ula atolowa, nihikana nyumba imohiwa yokumela wa Mulugu: Ku wonga mazu a Mulugu anahiyanihavo munemba wa mutu na maningo a mutu. Munemba mmohive unokana maningo menli. Tchoira tempu ili hiyo ila, munemba wehu unawenda muwari mwa maningo odediha vunda. Mbwenye vasogolro munemba wehu unoza akale muwari mwa maningo ohowanda vunda. Nione 1 Korinto 15:53. yohomangiwa na manda, ya mukalakala inafwanyeya ilambo ya zulu. 2Tchoira muwari mwa musasa ula, nihikana dumbela, nifunaga nnga niware nyumba ya zulu. 3Nawara nyumba ya zulu, kannakalave eno mandave nahanna nyumba, nari. 4Tchoira na ibaribari hiyo nagalive muwari mwa musasola, ninnana dumbela vamohi no ona nyemela.#5:4 muwari mwa musasola, ninnana dumbela vamohi no ona nyemela: Mazwala anatapulela ira anamamuhara Yesu mwilamboni ya vati muno so mabasiwa ku ona goyi. Nnadumbela mwasiwa tempu ila kahi tempu yodjavo mbwenye tchi tempu yozuzuma no ona nyemela zela jengo jinaniireyela. Kannadumbela ira niwunguliwe nikaleve eno mandave nahanna nyumba nari, mbwenye nnadumbela ira nivolowe nyumba yapama kwaranya yenno inna hiyo ira maningo anna hiyo owanda kwa katchindjiwe na maningo a ingumi ohowanda kwa. 5Unisakanyedile ira nikayena tchindjiwa wewo gu Mulugu wenno univahile Munemba ira akale ipanda ira nikayena ibaribari zela ja sogolro.#5:5 Mulugu wenno univahile Munemba ira akale ipanda: Ku wonga akala nihikana Munemba Otchena muwari mwa hiyo, nihikana ibaribari ira vasogolro nnoza nivahiwe maningo maxa owanda kala na Mulugu kala no kala.
6Nona hiyo ora ili yatene nilive olimbene kopolo, masiki niiziwagave ira tempu inna hiyo maningo anna, nili olapela wene na Nabwiya.#5:6-7 nnawenda muwari mwa nroromelo bahi hiya muwari moona: Wenda muwari moona ku wonga wenda muwari mofuna jengo jinaona we na meso. Wenda muwari mwa nroromelo hiya moona ku wonga wenda mokana mutu unamuroromela we unafwanyeya agali Yesu Kiristu. Hiyo kannamuona Yesu Kiristu eto kannaona nimburo nnafuna liye avaha atwaye sogolro eto kannaona yotambilra inafuna liye avaha zela laba mabasaye. Mbwenye muwari momuroromela liyene, muwari modediha upama unafuna atu vahiwa sogolro, atu omuroromela Yesu anowanda lramwisa ja mwilamboni ya vati jinaona atu na meso. Pawulo ohowonga ira: tempu inna hiyo maningo anna, nili olapela na Nabwiya mwasiwa liye ohoiziwa ira peno nili mwilamboni ya vati eto Yesu uli ilambo ya zulu. (Efezo 1:20) Yodediha ya atu atene omuroromela Yesu ili ira vasogolro nihiye maningo ala, nikayena maningo maxa, nikale vamohi na Yesu kala no kala. (2 Korinto 4:14; 1 Tesalonika 4:16-17) Nona Pawulo agali muwari mwa makatamiho ohowanda wonga ira: ora ili yatene nilive olimbene kopolo. 7Tchoira ora ila hiyo nnawenda muwari mwa nroromelo bahi hiya muwari moona jengo jiwa. 8Na ibaribari hiyo nili olimbene kopolo eto yofuna yehu ili ira nihiye maningwihu ala ira nikale vande vamohi na Nabwiya.#5:8 yofuna yehu ili ira nihiye maningwihu ala ira nikale vande vamohi na Nabwiya: Muwari moiziwa vali atu na vadowa atu, aPawulo kohowanda rumela ira: <<Nnafuna nikwe, nidowe nakale na Mulugu.>> Ku wonga zela mutu wenno uli muwari momuroromela Yesu Kiristu, ukwa kahi yengo yabure. Ukwa inafwanyeya yagali nnga karo yomudowana mutu wa Mulugu. Nione Filipo 1:21-23. 9Eto fwanyeya ira masiki nikale vande vamohi na Nabwiya, masiki nikale olapela wene, yofuna yehu tchoira nimuzivelihe Nabwiya.#5:9 yofuna yehu tchoira nimuzivelihe Nabwiya: Pawulo ohoiziwa ira inowandeya mutu omuroromela Yesu irana jengo jomuziveliha Nabwiya nari jengo johomuziveliha Nabwiya. Yofuna yaye ali ira airegena jomuziveliha Yesu. Ku wonga Pawulo ohowanda rambela jotega mwasiwa liye aonne ira: <<Datega, Mulugu kanaziveliwa.>> Nione Efezo 5:10; Filipo 4:18; Koloso 3:20; Eberewu 13:21. 10Tchoira hiyo atene nnoza nifiye mpando otonga wa Kiristu ira kada mutu awatchele yotambilra yaye zela joira jaye jaira liye ora yawenda liye mmaningoni mwaye, akala jali japama nari akala jali jabure.#5:10 kada mutu awatchele yotambilra yaye zela joira jaye jaira liye: Matongelo ogomiheda, mutu unatongiwa zela mabasa alabile liye hiya so jowonga jaye. Akala kulabile yengo, ora yenno unafwanyeya wagali mutu ohokana nroromelo eto kunavulusiwa. Mbwenye akala weyo na ibaribari ulabile jofuna ja Mulugu, unokana yotambilra yawo. Kahi ira mabasawo anouvulusa. Mutu unavulusiwa muwari mokana nroromelo, ku wonga muwari momuroromela Yesu Kiristu wenno ulabile ira jotega jaye jikurumuweliwe. Mutu akana nroromelo, nroromelo tinamulabiha mabasa anafuna Mulugu. (Eberewu 11:4-38) Inafwanela niiziwe ira siku notongiwa nafiya, nnoza nikayena kumbanya zela yotega ili yatene yairile hiyo mwilamboni ya vati. Siku nenne kalivo unafuna za wanda wonga ira: <<Dohosakanya pama diiragana yotega yenno.>> Nona inafwanela niumbuwele makalelo anafuna hiyo wenda mwilamboni ya vati ira nahazeliwe kumbanya vasogolro.
Mabasa oawandaniha atu na Mulugu
11Nona muwari mokala atu omuova Nabwiya, nnalaba ira naagondjihe atu amohiwa ira kakayena ibaribari.#5:11 nnalaba ira naagondjihe atu amohiwa ira kakayena ibaribari: Agondjiha ku wonga alaleya atu ante aliwa fiyeda rumela Muselu Wapama zela Yesu Kiristu. Mbwenye makalelo ehu kohomala iziweya na Mulugu. Miyo eto dafuna nnga na nyenne, mwaniona hiyo, mmirimani mwenyu mukayena ibaribari zela hiyo.#5:11 dafuna nnga… mmirimani mwenyu mukayena ibaribari zela hiyo: Mazu pwi muwari mwa livuru ni kalrembiwe ira aKorinto kakayena ibaribari zela Pawulo na mabasa alaba liye. (2 Korinto 1:12, 4:12, 10:10-11, 11:5-33) Tchoira kohokalawo atu kamululuviha Pawulo. Liye eto ohoiziwa ira: <<Atu anno anadikayikela anopuzeya ibaribari zela mazu analaleya miyo.>> Nona Pawulo kagana kondo ira afwaye kaiziwe ira liye ali mutu orumiwa na Mulugu. 12Hiyo kannawonga eji malro ovitetela vamentoni venyu. So nnerela ira muwande nitetela mwagumana na ale anatetela jengo jooneya na meso bahi hiya ja mmirimani.#5:12 nnerela ira muwande nitetela mwagumana na ale anatetela jengo jooneya na meso: Mazwala tapulela ira Korinto kohokalawo atu kaalramwisa aPawulo. Atu anno kotetela jengo jooneya na meso. Ku wonga kavitetela uyesa wanna atu nari zela jengo nnga jowara jiwa, nlogo niwa, rayela wewa, ineliwa wewa, uyesa wanna atu muwari molaleya nari imba. Pawulo mbwenye afuna aKorinto kaiziwe ira liye ali mutu wa ibaribari orumiwa na Mulugu hiyaniha na atu anno kanna uyesa bahi. 13Tchoira akala munaniona ira nihikana mihala, nikayelena muwari molaba mabasa a Mulugu. Akala munaniona ira nili apamene, upama wehu unaulabani nyo.
14Tchoira nnalaba muwari mosogolrelriwa no zivela wa Kiristu. Makalelo anawanda hiyo iziwa zivela waye ba ala. Liye gu mutu mmohi uzile akwela atu atene. Nona atu atene kohokwa.#5:14 Liye gu mutu mmohi uzile akwela atu atene. Nona atu atene kohokwa. Navwa ira Yesu upiya murombwe muwari mwa ukwa waye ira atu atene kavulumuwe, ku wonga atu atene karomile kala arenda. Ira Yesu aze anikwele, hiyo naromile kala okwene. 15Wenno aakwenle atene akwele ira ale kaliwo kahakalewo ira kairegenave jofuna jewa mbwenye kakalewo para kairegena jofuna ja wenno aakwenle nomala avenyihiwa mokwani.#5:15 akwele ira ale kaliwo kahakalewo ira kairegenave jofuna jewa mbwenye… kairegena jofuna ja wenno aakwenle: Vaire Yesu aakwela atu okwene, ale anamuroromela Yesu anovahiwa ingumi ixa. (Juwawu 3:14-18) Mazwala anatapulela ira Yesu akwele ira aavahe atu ingumi ixa ira kagavahiwe, kahawendege na jofuna jewa, mbwenye kawendege na jofuna ja wenno aavahile ingumi ixa. Nadowave sogolro nitegaga komove, nagaiziwile ira Yesu anikwenle ira niiregena jofuna jaye hiya jofuna jehu, inokala nnga nnatapela mare wintoni waye. Zela maliba tega komove, kavihanle mukuto mmohiwa orumelela jotega ejo. So mutule unadediha tumeyiwa. Nione Eberewu 10:26-27.
16Nona kuma peno dowa sogolro hiyo namuona mutu, kannamuona muwari mwa zelru da ilambo ya vati. Agali wanle hiyo namuonetcha Kiristu muwari mwa zelru da ilambo ya vati, peno mbwenye kannamuonave akoka na makalelo anno.#5:16 namuona mutu, kannamuona muwari mwa zelru da ilambo ya vati: Muwari mwa zelru da ilambo ya vati, mutu unamuona nfwaye zela rayela waye nari izo inna liye nari makalelo a vande vaye nari jowara jaye nari makalelo anawanda liye wonga nari mabasa analaba liye. APawulo tchaaona atu eno. So aPawulo kohoiziwa ira kohokala atu kaliwo muwari momuroromela Yesu Kiristu eto kohokalawo anawenda okwene. Mazu oira wanle hiyo namuonetcha Kiristu muwari mwa zelru da ilambo ya vati ku wonga wanle Pawulo amuona Yesu nnga mutu ohokana mabasa eto ohokana zelru. Amuona nnga mutu akomeliwa vamuradini vasayi vene. Zela mazu oira kannamuonave akoka na makalelo anno, aPawulo kohiya makalelo omuona Yesu nnga mutu ohokana mabasa. Peno aliwa kohoiziwa ira kalivo unna mabasa mwilamboni ya vati omukwaranya Yesu. 17Nona akala ukala mutu uli muwari mwa Kiristu, liye gu yopandutchiwa ixa.#5:17 akala ukala mutu uli muwari mwa Kiristu, liye gu yopandutchiwa ixa: Ku wonga inafwanela namuona nfwihu omuroromela Yesu, nahamuone zela makalelo anna liye malambo a mundulri. Inafwanela nimuone nnga mutu muxa. Tchoira vamentoni va Mulugu gu mutu muxa. Ja wanle jihivira. Jatene jihisanduwa, jinafwanyeya jagali jixa.
18Jatene eji jikumile mwa Mulugu wenno aniwandanihile, avigumanihaga liye na hiyo muwari mwa Kiristu eto univaha mabasa oawandela atu makalelo owandanihiwa na Mulugu. 19Ku wonga Mulugu muwari mwa Kiristu uhawandaniha atu a ilambo ya vati vamohi na liye, ahaagwihilena mulandu zela joviringaniha jiwa eto anivahedaga mabasa oawandela atu makalelo owandana na Mulugu. 20Nona hiyo nili atu orumiwa na Kiristu. Mulugu unaaitana atu muwari mwa hiyo. Hiyo nnouguzelani mendo na nzina na Kiristu ira inafwanela muwandane na Mulugu.#5:20 muwandane na Mulugu: Nafwanya 2 Korinto 1:1, nnowanda iziwa ira Pawulo kalrembile mazu a karta ni ira atu kaiziwe makalelo ovulusiwa momuroromela Yesu. Liye alrembile nnga unaalrembela atu kamuroromenle Yesu roma wanle. Eto fwanyeya ira muwari mwa nikuru na atu omuroromela Yesu, kohokalawo atu ofwanela twaruwa zela jotega jiwa. (2 Korinto 12:20-21) Eto Pawulo ohaiziwa aliba xolra anno anavolowa muwari mwa afwiwa omuroromela Yesu. (2 Korinto 13:5) Nona awongaga na aKorinto ira nnouguzelani mendo na nzina na Kiristu ira inafwanela muwandane na Mulugu. 21Ira nikale pama, Mulugu amukalihile wenno ahaiziwile yotega ira akale mutu otega ira muwari mwa liye, hiyo niwande kana upama wa Mulugu.#5:21 Mulugu amukalihile wenno ahaiziwile yotega ira akale mutu otega: Mazwala ananiwandela makalelo Mulugu alabile liye ira awande muona mutu otega nnga mutu ohokana yotega. Makaleluwa, Yesu ali mutu ohokana yotega. Akwaga vamuradini, Mulugu anvahedile tongiwa wewo ofwanela ira hiyo nitongiwe ira muwari mwa liye, hiyo niwande kana upama wa Mulugu. Nione 1 Peduru 2:24; Roma 3:23-24; Izaiya 53:4,6,11,12. Wenno unamuroromela Yesu, vamentoni va Mulugu uhukana upama wa Mulugu. Ku wonga Mulugu anvahedile Yesu jotega jehu eto Mulugu utukunle upama wa Yesu, liye nivaha hiyo. Ku wonga Mulugu unamuona mutu wenno unamuroromela Yesu nnga mutu ohokana yotega eto unamuona nnga mutu okana upama olingana na upama wa Yesu Kiristu. (Roma 3:22, 5:18; 1 Korinto 1:30; 2 Korinto 5:17,19; Filipo 3:9)
Iliyochaguliwa sasa
2 Korinto 5: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral