2 Korinto 6
6
1Nona hiyo muwari molaba vamohi na Mulugu, nnoukokomezani ira mwahawatchele sayi da Mulugu vasayi vene.#6:1 nnoukokomezani ira mwahawatchele sayi da Mulugu vasayi vene: Ku wonga Pawulo afuna aKorinto kawendege na sayi da Mulugu ira sayi da Mulugu dilabe muwari mwa aliwa ira kakale atu olaba mabasa a Mulugu, kakale atu oirana jengo japama, kakale atu otawa jotega. Fwanyeya ira Pawulo na Barnabe kohakokomeza atu omuroromela Yesu axa ira kawendegeve na sayi da Mulugu. (Joira ja Anamarumiwa 13:43) Pawulo ohowonga ira sayi da Mulugu nnanifundjiha ira nihiyege jotega, nihindege jengo jofwanela. (Titu 2:11-14) Pawulo eto ohowonga zela liye mwinnya ira: Sayi diwa udivahile Mulugu kadivahiwe vasayi vene mbwenye dihilabana mabasa akwaranya anamarumiwa afwaga atene. (1 Korinto 15:10) Yokokomeza ya Pawulo va, liye unafuna aKorinto katchindjiwe muwari mwa sayi da Mulugu hiyaniha no garati kagavwile sayi da Mulugu. 2Tchoira Mulugu unawonga ira: <<Muwari mwa tempu yapama, miyo dohovwa jawonga nyo. Eto siku nofuna vulusiwa nagazile, miyo dohoukamihedani.>> Fwanyeya ira nnga Mulugu mwawongele liye, tempu yenna tchi tempu yapama eto peno ti siku novulusiwa.#6:2 tempu yenna tchi tempu yapama eto peno ti siku novulusiwa: Pawulo aonne ira nnga Mulugu awongile liye na aIzarayeli wanle, zela ale kavwa mazwaye, siku nofwanela mutu twaruwa no vulusiwa ti siku neno nnavwa we mazu a Mulugu. Kavikale dibeliwa. Nione Eberewu 3:7-8,15. Zela ibaribari ira Mulugu unaarumeliha atu amohiwa ira katwaruwe eto unoakameliha atu amohiwa twaruwa, nione eto 2 Timoteyo 2:25; Ezodu 4:21, 11:9-10; 1 Samuweli 2:25; Roma 9:16-18.
3Hiyo nnowanda laba na makalelo matene ira nahawande mugwagwadutcha mutu mwasiwa hiyo kannafuna ira ioneye yoviringaniha muwari mwa mabasihu. 4Voira hiyo nili anamalaba a Mulugu, mwa jatene jinalaba hiyo ninnana venda ira nilabe na makalelo ofwanela. Nnowanda vilela mwa jabure jidjindji, nnorumela onihiwa makatamiho, nnozuzuma, nnosegedeya, 5nnobubudiwa, nnoheliwa kadeya, nnolaba muwari mwa madugudugu atu funaga jonipa, nnokana mabasa malukulu, nnomala mahiyu ompumbula hakagana tempu yogona, nnokana ndala, 6nnoirana jotchenave, nnolaba mwa zelru, nnovilela, nnoairela atu upama, nnolaba muwari mwa Munemba Otchena, nnokana zivelana wa ibaribari, 7nnowonga ja ibaribari, nnolaba muwari mwa kopolo da Mulugu, nihitukula jowanana japama na manda amenlene.#6:7 nihitukula jowanana japama na manda amenlene: Muwari mwa mazu a Efezo 6:11-17, Pawulo ohowonga na makalelo amohive. Pawulo ohowonga zela tukula defeza ku wonga wenda na nroromelo. Pawulo eto ohowonga zela tukula supada na Munemba Otchena ku wonga wenda na mazu a Mulugu. Pawulo eto ohowonga zela tukula jowanana japama jimohi jiwa. 8Nnolaba muwari moteteliwa nari mohoteteliwa, muwari monukediwa nari tamaleliwa. Atu ananiwesa nnga nili onyenga nagali eto a ibaribari. 9Ananiwesa nnga atu ohoiziweya nagali oiziweya pama. Ananiwesa nnga nnakwa eto kaing'anani, nihikalawove. Ananiwesa nnga atu otongiwa eto hiyo kannapiwa. 10Ananiwesa nnga atu okumbanya eto ora ili yatene nihikana hagalala. Ananiwesa nnga osimela eto nnoarayeliha atu adjindji.#6:10 Atu a unde kaawesa aPawulo nnga atu osimela mwasiwa kohoona goyi danna atu. Eto Pawulo mwinnya ohowonga ira: nnoarayeliha atu adjindji. Tchoira muwari molaleya mwewa, aPawulo koharayeliha ale kamuroromenle Yesu. Ananiwesa nnga atu ohokana yengo eto nihikana jatene.#6:10 Fwanyeya ira aPawulo kawendaga, kaviona ira nihikana jatene. Ku wonga muwari mokala atu omuroromela Yesu, muwari molaba mabasa a Yesu Kiristu, aliwa tchavionne nnga atu osimela. So aPawulo kaviona nnga atu okana jatene muwari mowandana na Mulugu. Nione Efezo 1:3; Filipo 3:8-9. Hiyo nnorumela ireliwa jatene ejo mwasiwa nili anamalaba a Mulugu.
11Hiyo nnawongetcha na nyo aKorinto mohowanganyeda. Mmirimani mwehu nili omasuwene wa nyo. 12Hiyo mmirimani mwehu kaninna makani zela nyo. Mbwenye nyo gufungile mirima denyu zela hiyo. 13Miyo nnafuna diwonge na nyo nnga baba awongaga na anaye ira makalelo amohive nnga vili hiyo, na nyenne mukale omasuwene mmirimani mwenyu zela hiyo.
Atu omuroromela Yesu kisimbwe wandana na atu a unde
14Kamurumele mangeleliwa vamohi na atu ohomuroromela Yesu, mwasiwa mangeleliwa wewo ku mangeleliwa wohokala pama.#6:14 Mangeleliwa unawongiwa va ku tukula imiri imohi, gumanihana ng'ombe na kavalo ira ditutumulege aterelado. Muwari moira ng'ombe na kavalo kopolo diwa nnohiyana eto zelru diwa nnohiyana, mabasa kinawenda pama. So mbwenye kavalo amangeleliwe na kavalo nfwaye, ng'ombe na ng'ombe nfwaye. Muwari mwa muselu unawongiwa va, kinafwanela ira atu omuroromela Yesu kavigumanihe na atu ohomuroromela Yesu. Ku wonga muwari motelana, inafwanela atu omuroromela Yesu katelane na omuroromela Yesu afwiwa hiya mutela mutu wa unde owu muhiyana rumela teliwa na mutu wa unde owu olobela eto ahali omuroromela Yesu. (Detoronomiyo 7:3; 1 Korinto 7:39, 9:5) Eto zela wendiha malronda, kinafwanela mutu omuroromela Yesu agumanihe malronda aye na nfwaye ohomuroromela Yesu. Tchoira kada mutu unokana inaroromela liye ira malrondaye kawendege pama. Eto wakana murenda vande vawo, kwaavepe abalawo a mutatamoni zelru mbwenye inafwanela utamangele wa afwawo omuroromela Yesu. Tchoira watamangela unde, unovwa zelru da unde. Kodi irana upama no irana ubure unowenda vamohi? Kodi moneya unowandana na isi? 15Eto kodi vwanana kuvi unafwanyeya muwari mwa Kiristu na Satana? Nnga yengo tchivi inafuna kana mutu omuroromela Yesu vamohi na nfwaye ohomuroromela Yesu? 16Kodi harana kuvi unafwanyeya muwari mwa Nyumba ya Yehova na vikwamutu josema? Tchoira hiyo nili Nyumba ya Mulugu Okalawo.#6:16 hiyo nili Nyumba ya Mulugu Okalawo: Wanle Mulugu muwari mokala mwatene mwene, liye okana nimburo nakala liye yafwanyeya yagali Nyumba ya Yehova yenno yali sidadi ya Jeruzalemu. Peno eto Mulugu uhutama, muNyumbani mule kalimo. Muwari mwa Munemba Otchena, Mulugu uli mmirimani mwa mutu wenno unamuroromela Yesu Kiristu.
Kalaga nnga mazu Mulugu awongile liye oira:
<<Miyo nnosakanya vande vaga muwari mwa aliwa eto nnowenda muwari mwa aliwa. Miyo nnokala Mulugu wewa. Aliwa anokala atwaga. 17Nona inafwanela mukume muwari mwa aliwa, mukale venyu vene hiya kala vamohi na aliwa.#6:17 Nona inafwanela mukume muwari mwa aliwa: Ku wonga niwande muramba nfwihu okanyiheda jabure, nari igereja yoirana jahanafuna Mulugu, nari abalihu onikokomeza ira niwendelege jimohi jiwa, nari nfwihu wa malronda okamihediwa na jaye jaye. Atene anno okonda irana jofuna ja Mulugu, inafwanela nahawende vamohi. Unawonga gu miyo Nabwiya. Kamuhinde yengo yatene ili yotakala. Mwera eno, miyo nnouwatchelani. 18Miyo nnokala Babinyu. Nyo munokala anaga a anapongwe na anavihiyana. Unawonga gu miyo Nabwiya wa Kopolo Datene.>>#6:18 Mazu a Mulugu Pawulo anawonga liye ala kakumile malivuru ohiyana-hiyana ala. Levitiku 26:12; Ezekiyeli 20:34-41, 37:27; Izaiya 52:11; Jeremiya 31:33.
Iliyochaguliwa sasa
2 Korinto 6: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral