2 Korinto 3
3
Akuda Korinto kafwanyeya kagali karta na aPawulo
1Kodi hiyo nawongaga eni, nnavitetela akoka vamentoni venyu? Kodi ira nyo munirumele, inafuneya ira hiyo nikayena makarta onihidedela umboni nnga vinera atu amohiwa ira kawande roromeliwa? Owu hehi ira atu amohiwa kanirumele, kodi inafuneya hiyo nikayena makarta onihidedela umboni okumela wa nyo? Nari.#3:1 makarta onihidedela umboni: Malambo a mundulrimu atu omuroromela Yesu kawendaga, kotukula karta nokumela nikuru newa mwakala atu, aliwa dowana wa nikuru nimohi niwa ira atu kafwanyeya wewule kaiziwe ira: <<Afwihu kademunle peno ala kohokana unakuma atu. Kahi atu a vaheno vene mbwenye ba afwihu omuroromela Yesu.>> Nione Roma 16:1. 2Tchoira karta ninna hiyo nonihidedela umboni, gu nyenne. Nyo muli karta nilrembiwe mmirimani mwehu, neno nnaiziweya eto nnaileriwa muwari mwa atu atene.#3:2 karta ninna hiyo nonihidedela umboni: APawulo kohowonga na aKorinto ira: <<Hiyo nawendaga muwari mwa nyo, podi hawendana karta mwasiwa karta ninna hiyo gu nyenne.>> Tchoira atu amohiwa kaiziwa ira aKorinto kamuroromenle Yesu muwari mwa Pawulo, aliwa kohowanda iziwa ira: <<Na Pawulo wenne ira alaleye eno, liye gu mutu omuroromela Yesu.>> Eto aPawulo kawongaga ira: Nyo muli karta nilrembiwe mmirimani mwehu, ku wonga aPawulo kohaiziwa eto koazivela. 3Nyo munaoneya nnga karta nokumela wa Kiristu, neno nivahediwe hiyo.#3:3 Nyo munaoneya nnga karta nokumela wa Kiristu, neno nivahediwe hiyo: Maliba karta gu Kiristu. Karta niwa ba aKorinto. Aliba panganyediwa ba aPawulo. Aliba watchela ba atu a mwilamboni ya vati. Ku wonga atu a mwilamboni ya vati kafuna kakayena ibaribari zela Kiristu muwari moaona aKorinto anne kalaleyiwe na aPawulo. Eto kamuli karta nolrembiwa na tinta, mbwenye muli nnga karta nolrembiwa na Munemba wa Mulugu Okalawo, neno nahalrembiwe vamabweni osemiwa nnga matabwa, mbwenye nolrembiwa mmirimani.#3:3 neno nahalrembiwe vamabweni osemiwa nnga matabwa, mbwenye nolrembiwa mmirimani: Malambo a mundulrimu ira atu kakayena ibaribari zela ja Mulugu, Mulugu anvahedile Mozeji mazu kalrembiwe vamabweni osemiwa. Mbwenye tempu ili hiyo ila Pawulo unawonga ira inafwanela atu kakayena ibaribari zela ja Mulugu, moira Mulugu ulremba ibaribari mmirimani mwehu muwari mwa kopolo da Munemba Otchena. Ku wonga inafwanela atu kaona mmirimani mwehu, kavwa jowonga jehu, kaona joira jehu, kawande kana ibaribari zela Mulugu. Nione Jeremiya 31:33-34; Eberewu 8:10-12.
Pawulo ohiyaniha Yopangana Ixa na Yopangana ya Wanle
4Hiyo muroromela Mulugu wehu unazela muwari mwa Kiristu. 5Kahi ira hiyo nihikana iwandelo yolaba mabasa anno muwari mwa hiyo oka, owu mwa kopolo dehu, nari. So mbwenye unaniwandiha gu Mulugu. 6Liye gunivahile iwandelo ira nikale anamalaba a Yopangana Ixa yenno inalaba muwari mwa Munemba hiya yolremba.#3:6 anamalaba a Yopangana Ixa yenno inalaba muwari mwa Munemba hiya yolremba: Yopangana Ixa tcheniyo ikungile Yesu muwari mwa sangiri naye ira awande timiha jotega ja wenno unamuroromela (Lukaji 22:20), hiyaniha na Yopangana ya Wanle yenno yali Malamulo Kumi Mulugu amuwandenle liye Mozeji agali mwango Sinayi. (Ezodu 34:28-29; Detoronomiyo 4:13) Kala namalaba wa Yopangana Ixa ku kala mutu olaleya makalelo ovulusiwa muwari mwa ukwa wa Yesu Kiristu, hiyaniha no kala mutu olaleya Malamulo Kumi anafwanyeya muwari mwa Yopangana ya Wanle. Tchoira yolremba inopa mbwenye Munemba unavaha ingumi.#3:6 yolremba inopa mbwenye Munemba unavaha ingumi: Fwanyeya ira mazu a Yopangana ya Wanle kalrembiwe wanle anno anafwanyeya kagali malamulo anopa. Kahi ira malamulo tchi yengo yabure. So mbwenye hiyo atu nnoimwanana kwakwaneliheda malamulo, nona malamulo kinanivulusa, so ananipa, ananimanga mulandu. (Nione Roma 3:20, 4:15, 7:9-10; Galasiya 3:10-11) Mbwenye ira nikayena ingumi ixa, Munemba Otchena gunanvaha mutu ingumi muwari monvaha kopolo domuroromela Yesu, amala, liye vulusiwa. (Nione Juwawu 3:5,8; Titu 3:5)
7-8Mabasa ozana ukwa kazaga kalrembiwe vamabweni osemiwa,#3:7-8 Mabasa ozana ukwa kazaga kalrembiwe vamabweni osemiwa: Yalrembiwe vamabweni osemiwa, yenno yazana ukwa ali Malamulo Kumi. Zela ibaribari ira Malamulo Kumi anazana ukwa, nione Roma 3:19-20, 4:15; Galasiya 3:10-11. Kahi ira malamulo anafwanyeya kagali yengo yabure, nari. Malamulo bapama, so mbwenye hiyo nnoimwanana kwakwaneliheda malamulo, nona malamulo ananizelana mulandu vamentoni va Mulugu bahi. Mozeji liye watchela. Mabasa anno ozana ukwa kohoza na undimuwa fiyeda Ana Izarayeli aliwa imwanana ing'ana wintoni wa Mozeji na mwasa wa undimuwa wafwanyeya wintoni waye na mwasa oka makalelo ojerimela.#3:7-8 fiyeda Ana Izarayeli aliwa imwanana ing'ana wintoni wa Mozeji: Mozeji atitaga mwango Sinayi agawatchenle malamulo, muwari mokwivela undimuwa wa Mulugu, wintoni waye wohokana makalelo ojerimela. Atu atene kagaonne makalelo anno, aliwa kohokana ova undimuwa. Evale Mozeji ohotukulaga nguwo, liye kunelana wintoni yaye fiyeda jerimela waoneya wintoni waye aliwa totowa. Nione Ezodu 34:29-35. Eto fwanyeya ira jerimela wa wintoni waye wohototowa. Akala mabasa a ukwa kohokana undimuwa, kodi mabasa a Munemba kinakana undimuwa wokwaranya? Anokana. 9Tchoira akala wohokalawo undimuwa muwari mwa mabasa ozana mulandu, mabasa omukaliha mutu wapama vamentoni va Mulugu#3:9 mabasa ozana mulandu, mabasa omukaliha mutu wapama vamentoni va Mulugu: Mazwala anohiyanihavo mabasa a malamulo na mabasa a Yesu Kiristu. Malamulo kanna mabasa onvaha mutu mulandu. Tchoira para mutu aiziwe zela jotega jaye, unakala mutu oiziwa malamulo. (Roma 3:19-20) Ku wonga mutu aviroromela liye eka zela makalelo anawenda liye na malamulo, mutule unagomela gwana mulandu. (Galasiya 3:11-12) undimuwiwa unafuna ukale undimuwa wokwaranya. 10Tchoira na ibaribari yenno yanna undimuwa malambo a mundulrimu peno kinna undimuwa mwasiwa ukala undimuwa uzile wokwaranya.#3:10 yenno yanna undimuwa… peno kinna undimuwa mwasiwa ukala undimuwa uzile wokwaranya: Undimuwa wanna Malamulo Kumi unalingana na panti. Na mahiyu, panti inomukamiheda mutu iziwa unaya liye. Mbwenye undimuwa unafwanyeya muwari mwa Munemba Otchena unakala nnga nzuwa ora ya 12 ora. Kalivo unawendave na panti unde wagatchile. Fwanyeya ira unde umala tcha nona tempu ila kahi tempu yowenda na malamulo mbwenye tchi tempu yowenda na Munemba Otchena. Zela hiyana owenda na malamulo no wenda na Munemba Otchena, nione eto Roma 6:14-15, 7:1-6. 11Tchoira akala yenno yafuna mala yohoza na undimuwa, na ibaribari yenno yahanamala inokana undimuwa kwaranya.
12Muwari moira nihikana yodediha yozela undimuwa wokwaranya, nona nnawenda molimbiha murima. 13Kanili nnga Mozeji wenno ahenle yokunelana kove yaye ira Ana Izarayeli kahaone undimuwa wokumela yengo yoing'anela mala. 14Mbwenye aIzarayeli kafwanyeya kagali ovanda onelramo. Nona fiyeda peno, kailerigi mazu a Yopangana ya Wanle, onelramo wewa unakala okuneleya wene#3:14 Fiyeda peno, kailerigi mazu a Yopangana ya Wanle, onelramo wewa unakala okuneleya wene: Mazwala ananiwandela ira inafwanela nahaasazihe aIzarayeli. Tchoira muwari mwa aliwa, oindjiva kahanle mundulri na malamulo, kinawanda kana ibaribari zela Yesu Kiristu. Nakala aIzarayeli opwetelamo, ku wonga nnagomela kala atu ohokana mabasa vamentoni va Mulugu. Nione Roma 9:30-33, 10:1-14. na nguwo yavikunenlena Mozeji ile. Kinawanda onelramo, mwasiwa yokunelana ile inawanda kumihiwawo muwari mwa Kiristu bahi. 15Fiyeda ante peno eni aliwa kailerigi mazu kalrembiwe na Mozeji,#3:15 mazu kalrembiwe na Mozeji: Mozeji alrembile livuru na Jenesesi, Ezodu, Levitiku, Numero na Detoronomiyo. Malivuru anna anaitaniwa Malamulo a Mulugu. ikalawo yokunelana inakunela mmirimani mwewa. 16Mbwenye mutu arungunuwa, adowa wa Nabwiya, yokunelana ile inokumihiwawo.#3:15-16 kailerigi mazu kalrembiwe na Mozeji, ikalawo yokunelana inakunela mmirimani mwewa: Mazwala ananiwandela ira mutu wenno unalimbela malamulo ira avulusiwe ulive okuneleyene onelramo waye. Mbwenye mutu arungunuwa, adowa wa Nabwiya, ahiya jororomela jaye zela harihamo waye, amuroromela Yesu Kiristu wenno ulabile mabasa vamuradini, mutu wenno yokunelana ile inokumihiwawo, unokana onelramo ibaribari eto unoleveleliwa jotega jaye.
17Fwanyeya ira Nabwiya gu Munemba#3:17 Nabwiya gu Munemba: Mulugu agali mmohive, ukalamo Mulugu Baba, Mulugu Mwana na Mulugu Munemba Otchena. Navwa ira Nabwiya gu Munemba, ku wonga Nabwiya Yesu na Munemba Otchena analaba jimohive. Tchoira umurumile Munemba Otchena gu Nabwiya Yesu. (Joira ja Anamarumiwa 2:32-33; Juwawu 15:26, 16:13-14) eto uli Munemba wa Nabwiya, ku wewo unafwanyeya kutchiwa.#3:17 uli Munemba wa Nabwiya, ku wewo unafwanyeya kutchiwa: Muwari mwa muselu azana Pawulo, nnowanda iziwa ira malamulo kinazana kutchiwa, anasimbwa mugwihana mutu mulandu. Mbwenye Munemba Otchena unozana kutchiwa ozela mutu leveleliwa jotega jaye eto unokumihiwa muumweneni mwa Satana, liye heliwa muUmweneni mwa Mulugu, liye vahiwa ingumi ixa ira awande irana japama jinafuna Mulugu para ahimaye. 18Hiyo atene eto muwari moing'ana undimuwa wa Nabwiya kove dihu dagali dohokuneliwa dene nnasandutchiwa ira nikayena makalelo amohive, hiyo sanduwaga vang'ono vang'ono kwivelagave undimuwa unna liye.#3:18 moing'ana undimuwa wa Nabwiya kove dihu dagali dohokuneliwa dene nnasandutchiwa: Hiyo nnowanda ing'ana undimuwa wa Nabwiya Yesu muwari movuruwana jowonga jaye na joira jaye jilrembiwe mBibiliyani eto muwari moumbuwela makalelo anna liye. Hiya umbuwelaga so ja ilambo ya vati, inafwanela kada siku nikayena ora inaumbuwela hiyo zela Yesu, hiyo ing'anaga undimuwa unna liye ira nisandutchiwe ira nikayena makalelo amohive. Mazwala anatapulela ira mutu agavulusiwe, amuing'anaga Yesu, aumbuwelaga zela undimuwa wa Nabwiya Yesu, mawendelo aye na makalelo aye na jowonga jaye na joira jaye jinosanduwa vang'ono vang'ono ira jikale jofwanela vamentoni va Yesu. Ku wonga vari va ora inaroma mutu kana ingumi ixa fiyeda ukwa waye, Mulugu unolaba muwari mwa mutule ira makalelo aye kasanduwe. Ja wanle jazana liye, unerege hiya, atukulaga jofuna ja Yesu. Nione Roma 8:29. Zela mazu oira hiyo sanduwaga vang'ono vang'ono, ku wonga mutu kanahiya jotega jaye ora imohive vanamuroromela liye Yesu, liye hategaga akoka fiyeda ukwa waye. So unotwaruwa zela jatene jaye ora imohive, mbwenye unerege tchenihiwa zela mawendelo aye vang'ono vang'ono. Jatene eji jinakumela wa Nabwiya wenno uli Munemba.#3:18 eji jinakumela wa Nabwiya wenno uli Munemba: Mazwala anatonyiheda ira Munemba Otchena na liyene gu Mulugu mmohive. Eto anatapulela ira mutu agamanle muroromela Yesu ira ahiye ja wanle jaira liye ira atukule jixa jinafuna Mulugu, kanasanduwa muwari mwa kopolo daye mbwenye ti kopolo da Munemba Otchena.
Iliyochaguliwa sasa
2 Korinto 3: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral