2 Korinto 13
13
Mazu oalimbiha aKorinto ira katwaruwe
1Fendo ila tchi fendo yaneraru inafuna miyo za wa nyo. Ira mutu atongiwe, inafwanela ikalevo ibaribari mohokayikela muwari mwa amboni ambinli owu araru. 2Miyo dagali na nyo fendo yanembinli, dohatutcha ale kategile malambo a mundulrimu eto dohatutcha atu atene eto peno va dagali olapela wene na nyo, nnoatutcha aliba tega akoka. Daza wewo, daafwanya kagali na jotega jiwa jene, miyo kannaahiya eno. 3Nnagomela atonga ira muwande iziwa ira Kiristu gunawonga muwari mwa miyo. Eto Kiristu alabaga muwari mwa nyo kahi mutu ovuta, gwa kopolo. 4Mwa ibaribari liye ohokomeliwa movuta mbwenye peno liye ukalawo muwari mwa kopolo da Mulugu. Na hiyene nili ovuta nnga mwavutile liye, mbwenye nnerege wanda kalawo mwa liye, muwari mwa kopolo da Mulugu ira nulabegeni.#13:4 nili ovuta… mbwenye nnerege wanda kalawo mwa liye, muwari mwa kopolo da Mulugu: APawulo kafwanyeya ovutene zela makatamiho matene kawendana atu. Mbwenye muwari movuta mwewa, aliwa kalaba na kopolo da Mulugu. Pawulo awongela eno ira aKorinto kaiziwe ira ora yafuna liye fiya, afuna aatonge ale kahatwaruwile na kopolo da Mulugu.
5Inafwanela muvipime ira muone akala mulive olimbene mwa ibaribari inahara hiyo. Muviing'ane vili nyo. Mwavipima, mwaviona ira munafwanyeya muwari mwa ibaribari, muiziwe ira Yesu Kiristu uli muwari mwa nyo.#13:5 muvipime ira muone akala mulive olimbene mwa ibaribari inahara hiyo: Mazwala Pawulo awongile na atu aaonne liye nnga atu omuroromela Yesu. Eto fwanyeya ira muwari moaona nnga atu omuroromela Yesu, ohoona ira kohokalawo amohiwa kafwanyeya kagali aliba xolra. Ku wonga kobatiziwa muwari morumela na milomove ira nnamuroromela Yesu agali mmirimani mwiwa jalimo kajali ejo. Zela mazu a Pawulo oira Mwavipima, makalelo ovipima ku wonga wombeza akala weyo uli mutu omuroromela Yesu eto akala uli mutu oida jotega eto akala uli mutu oziveliwa japama. Akala nnazuzumela ira niiregena japama, zuzumela wehu tchi ionihedo ira nili atu osakulriwa. (2 Peduru 1:10) Mbwenye akala hiyo nnairetchana jotega komove, tchi ionihedo ira hiyo kaninna pandi na Mulugu. (Eberewu 10:26-27; 1 Juwawu 2:4, 3:6,9) 6Miyo nnafuna ira nyo mwaniona, muwande iziwa ira hiyo mbwenye nagavipimile, nnafwanyeya nagali atu a ibaribari.
7Mbwenye hiyo nnanvepa Mulugu ira nyo mwahairena yabure. Ilukuluwa inafuna hiyo kahi ira nioneye nnga atu a ibaribari. Hiyo podi oniwaga nnga atu oviringaniha, so inafuna hiyo ilukuluwa, nifunile ira nyo muiregena japama.#13:7 Hiyo podi oniwaga nnga atu oviringaniha, so… nifunile ira nyo muiregena japama. Fwanyeya ira aPawulo yofuna yewa ilukulu tchali oniwa nnga atu apama. So aliwa yofuna yewa ali ira aKorinto kawendege na makalelo ofwanela vamentoni va Mulugu. 8Tchoira kilivo yengo inawanda hiyo irana yononga ibaribari. So jatene jinera hiyo jinaoniha ibaribari. 9Nona hiyo navuta, nyo mwakala a kopolo, hiyo nnowanda hagalala. Hiyo nnaulobelelani ira nyo mukale okwakwanela. 10Na mwasa wenno miyo nnalremba jengo eji dagali olapela wene na nyo ira dagazile dahakale orutcha#13:10 nnalremba jengo eji dagali olapela wene na nyo ira dagazile dahakale orutcha: Va Pawulo unaavepa aKorinto kafwanyeya muwari mwa jotega ira katwaruwe liye ahanafiye wa aliwa ira liye adowa wa aliwa, ahakayena mabasa oatonga atu ohofuna twaruwa. Nione 1 Korinto 4:21; 2 Korinto 10:2, 12:20-21. muwari mwa utongi Nabwiya udivahile liye ira duulukuliheni hiya ira dubwanyuleni.
Mazu ogomiheda
11Abalaga yengo yogomiheda inafuna miyo, nnafuna ira muhagalale. Muone akala munowanda kala okwakwanela. Inafwanela mulimbihanege eto muvwananege, muwendege pama vamohi na murendele. Mwaira eno, Mulugu ozivela eto wa murendele unousogolrelrani.#13:11 Mwaira eno, Mulugu ozivela eto wa murendele unousogolrelrani: Ku wonga kohokalawo makalelo anafuna hiyo kana ira Mulugu awandege nisogolrelra. Pawulo ohakokomeza atu omuroromela Yesu ira kakayena makalelo ozivelana. Mbwenye kakonda zivelana, kuli sogolrelriwa na Mulugu.
12Mwalondjelanege na beju dotchenihiwa.#Roma 16:16; 1 Korinto 16:20 Atu atene otchenihiwa anoulondjelani. 13Sayi da Nabwiya Yesu Kiristu no zivela wa Mulugu no vwanana okumela wa Munemba Otchena, jatene ejo jikale na nyo. Ame!
Kukala mazu a karta nanembinli nalrembiwele atu omuroromela Yesu a Korinto.
Iliyochaguliwa sasa
2 Korinto 13: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral