2 Korinto 12
12
Pawulo ohowanda hagalala zela jovuta jaye
1Masiki muwari movititimiha mwahakaleve mpindu, inafwanela diwongegeve mazu ovititimiha. Miyo nnafuna diwongege zela jengo jionne miyo mmuruni na jengo jionihiwe miyo na Nabwiya. 2Miyo dihimuiziwa mutu mmohi muwari mwa Kiristu,#12:2 Miyo dihimuiziwa mutu mmohi muwari mwa Kiristu: Nafiya vs 7, nnofwanya ira va Pawulo unaviwonga liye eka. atukuliwe adowiwana fiyeda zulu waneraru#12:2 zulu waneraru: Ku wonga zulu wewo unafwanyeya Mulugu. Tchoira zulu woroma ku wewo unavava mbalrame. Zulu wanembinli ku wewo unakala nzuwa, mwedi na nyenyedi. Zulu waneraru ku wewo wahanaona hiyo na meso, wewo uli Yesu. yaka 14 da mundulrimu. Akala mutule atukuliwe muwari mwa maningo owu hehi, kadiiziwile. Uiziwile ejo gu Mulugu. 3Miyo mbwenye iiziwile miyo tchoira ohotukuliwa fiyeda ilambo ya ibaribari ya zulu. Akala ali muwari mwa maningo owu hehi, kadiiziwile. Uiziwile ejo gu Mulugu. 4Agadowile wewule, ohovwa jengo jaharumelihiwe wongiwa eto johowanda wongeya.#12:4 jaharumelihiwe wongiwa eto johowanda wongeya: Mulugu kamurumelihile ira mulombwana Pawulo aawandele atu javwile liye wewule. Masiki ahaire afuna awandela atu, Pawulo kawanda mwasiwa jengo jiwa jali jengo jowopiha johowanda wongeya. 5Miyo mbwenye nnowanda titimiha zela jengo jejo jamuireyele mutule. Mbwenye kannawanda vititimiha zela miyo meka.#12:5 Mbwenye kannawanda vititimiha zela miyo meka: Ku wonga Pawulo avititimiha zela jengo jamuireyele hiya jengo jaira liye mwa kopolo daye. Tchoira akala Pawulo afuna awonge mazu ovititimiha, ali ira Mulugu atitimihiwe. So dafuna vititimiha, nnavititimiha zela jovuta jaga. 6Dahafune vititimiha, kadakala zimora mwasiwa dawongege ibaribari. Mbwenye miyo kannafuna vitukulela, tawiha ira unakalevo mutu unasimbwe diona na makalelo okwaranya nnga mukalele miyo owu eto nnga mwemo munadivuruwanela liye.
7Ira dahasimbwe vitukulela na mwasa wa jengo johiyana hiyana japama Nabwiya jidionihile liye, dihivahiwa urenda#12:7 dihivahiwa urenda: Hiyo kaniiziwile urenda wanna Pawulo unawonga liye veva. So nihiiziwa ira agali ilambo ya Galasiya, liye afwanyeya na urenda wa meso. (Galasiya 4:13-15) ohokala wa masika kalaga nnga mwinga mmaningoni mwaga. Mwinga wenno ali namarumiwa okumela wa Satana azile divaha makofi ira dahasimbwege vitukulela.#12:7 Pawulo ohowonga zela mwinga wenno unafwanyeya agali urenda anna liye. Liye kwi: Mwinga wenno ali namarumiwa okumela wa Satana azile divaha makofi ira dahasimbwege vitukulela. Afunne ira Pawulo ahasimbwege vitukulela ali Mulugu. Ku wonga Mulugu orumela Satana aze amukukumule Pawulo mwasiwa Mulugu ohokana yengo yapama yafuna za muwari mwa Pawulo kukumuliwa. Satana afuna ambwanyule. Mulugu omuhiya Satana ira alabe vang'ono mwasiwa Mulugu ohoiziwa ira: <<Mwinga wa Satana kanalaba ira Pawulo abwanyuliwe. So unalaba ira Pawulo ahasimbwe vitukulela.>> Ku wonga Satana alabaga jotega jaye, liye eto unadowiha sogolro jofuna ja Mulugu. 8Miyo dohonvepa Nabwiya fendo taru ira akumihemo goyi dile. 9Liye mbwenye karumenle yovepa yaga. So wakula waye, kwi: <<Sayi daga dihikwakwana para weyo. Tchoira kopolo daga nnakwakwanela muwari movuta mwawo.>>#12:9 Yesu ohomuwandela Pawulo ira kopolo daga nnakwakwanela muwari movuta mwawo: Ku wonga tempu inakana mutu makatamiho, tchi tempu inatamangela liye wa Yesu ira avahiwe kopolo dovilela muwari mwa makatamiho ale. Kalaga nnga mulombwana Pawulo. Liye ohorumela ira tempu inavuta liye, muwari momuroromela Yesu muwari movuta mwaye, Yesu unomulimbiha. Nona miyo nnovititimiha mohagalala zela johokana kopolo jaga ira kopolo da Kiristu dikale na miyo. 10Eto nona muwari molaba ja Kiristu miyo kadinna makani ozela johokana kopolo, ruwaniwa, segedeya, harahariwa na jodiireyela jabure. Tchoira ora inavuta miyo, tchi ora inalimba miyo.#12:10 ora inavuta miyo, tchi ora inalimba miyo: Va eto Pawulo unawonga ira: <<Muwari moira kopolo doirana japama kahi daga, masiki miyo meka dikale ovutene, ukala unadilimbiha ira dikayena kopolo dohokumela wa miyo.>> Muwari moirana eno, afuna teteliwa muwari mwa joira jaye kaali Pawulo mbwenye ali Yesu wenno anvahile kopolo dile.
Kukumuwa wa Pawulo zela aKorinto
11Miyo ira diwongege nnga zimora, nyo gudikanyihedile ira diwonge eno. Tchoira yali yofwanela ira nyo mudihidedele umboni miyo vano, mbwenye kamuirilena. Mwasiwa masiki miyo dahalive yengo, dahaakwaranya atu anno anaoneya nnga ba anamarumiwa okwaranyetchetcha.#12:11 anamarumiwa okwaranyetchetcha: Pawulo awongaga eno, kahi ira kohokalawo anamarumiwa omukwaranya liye. So awonga mosimbulela. 12Jihikalawo jengo jiireyile vamentoni venyu jorumelela ira miyo dili namarumiwa wa ibaribari. Miyo dohokana vilela wohokala wa masika. Dohoirana eto jionihedo na jotikiniha vamohi na joira ja kopolo vamentoni venyu. Jatene jejo ti jengo jaoniheda ira miyo dili namarumiwa wa ibaribari. 13Kodi yengo tchivi yairile miyo dagali muwari mwa makuru matene a atu omuroromela Yesu eto dahawandile miyo irana dagali na nyo? So mbwenye yohiyana inaonavo miyo tchoira kadukukumunleni zela watchela kobiri yenyu nnga virile miyo na atu amohiwa. Mwaona ira dihiviringaniha evo muwari mohowatchela kobiri, nnauvepani ira mudikurumuwele.
14Miyo eni dihimala kozeya, nnafuna dize wa nyo fendo yaneraru. Dazaga kannavenda jengo jinna nyo, mbwenye nnaufunani nyo bahi. Nona, miyo daza kannaukukumulani zela watchela kobiri yenyu. Tchoira kahi ahima anaakoyela jengo ababiwa. So mbwenye ababi banakoya jengo ira kaavahe ahimiwa. 15Miyo dinnana nonga jaga eto dinnana nongiwa mohagalala na mwasa wa minemba dinyu. Kodi miyo dasimbwaga uzivelani, inafwanela nyo muvungule dizivela wenyu? 16Na ibaribari nyo muhumala iziwa ira miyo kadukukumunleni. Mbwenye nyo munawonga iraga duhunyengani eto duhudjelrani na malrango.#12:16 nyo munawonga iraga duhunyengani eto duhudjelrani na malrango: Afwase ira aliwa kawonge eno, kawongela na mwasa oira Pawulo ohawongana aKorinto ira kaavahe kobiri atu osimela. Afwase kohokalawo atu kamunukeda ira: <<Pawulo unafuna adje kobiri inanisoka liye.>> 17Kodi miyo duhudjelrani muwari mwa mutu uli watene damurumile miyo? 18Miyo dohomukokomeza Titu ira aze wa nyo eto azaga dohomuruma mbalihu ira adowe vamohi na liye. Kodi Titu agazile ohoudjelrani? Kodi hiyo kanilabile na makalelo amohive? Kodi hiyo kananna mawendelo amohive?
19Nyo afwase podi umbuwelaga ira hiyo nnafuna nivikalihe apama vamentoni venyu. So ilukuluwa hiyo nnawongetcha vamentoni va Mulugu eto nnawonga muwari mwa Kiristu ira nyo atu anaaziveliwa hiyo mulimbihiwe.#12:19 nnawonga muwari mwa Kiristu ira nyo atu anaaziveliwa hiyo mulimbihiwe: Va Pawulo ira awonge mazu madjindjene ovihidedela umboni kahi ira liye afuna avikalihe wapama vamentoni va akuda Korinto movitukulela, nari. So mbwenye liye afuna awande aiziwiha ira liye afwanyeya agali mutu orumiwa na Mulugu. Mwasiwa mutu wenne unawanda mulramwisa mutu orumiwa na Mulugu, unamulramwisa Muluguwene mwinnya. Nona Pawulo awandaga wonga mazu madjindji owonga zela rumiwa waye atawa ira akuda Korinto anaze kafwanyeye na mulandu omulramwisa Mulugu. 20Tchoira miyo nnaova ira daza, nnaufwanyeni na makalelo dahanafuna miyo eto nyo munadionena makalelo mwahanafuna nyo. Nnaova ira daza nnafwanye kangana, kalelana nrima, uwali, idana, nukedana, wambana, petana na madugudugu. 21Miyo nnaova ira daza wa nyo, Mulugu waga unaze adiyevihe akoka vamentoni venyu. Diyeviha uwa, nyo munodiona dinlaga vamentoni venyu na mwasa wa atu oindjiva kategile malambo a mundulri anafwanyeya kahanatwaruwe zela jotakala jewa no rarutchana, na ja unyambi jinera atu.
Iliyochaguliwa sasa
2 Korinto 12: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral