2 Korinto 1
1
Malondjelo a Pawulo
1Unalremba gu miyo Pawulo, namarumiwa wa Yesu Kiristu mofuna mwa Mulugu. Dili na mbalihu Timoteyo. Nnoulrembelani nyo nikuru na Mulugu munafwanyeya sidadi ya Korinto vamohi na nyo atu otchenihiwa mwatene munafwanyeya muwari mwa porovinsiya yatene ya Akaya.#1:1 sidadi ya Korinto… porovinsiya yatene ya Akaya: Sidadi ya Korinto yafwanyeya yagali sidadi indimuwa muwari mwa porovinsiya ya Akaya. Pawulo muwari molremba, afuna ira akuda Korinto kawatchele karta ni vamohi na atu atene otchenihiwa kafwanyeya muwari mwa Akaya watene. 2Malondjelo anaurumihedani hiyo ba ala. Nifunne ira sayi na murendele okumela wa Mulugu Babihu na Nabwiya Yesu Kiristu, jatene ejo jikale na nyo.
Mulugu oalimbiha aPawulo ira kawandege alimbiha afwiwa
3Otamaleliwa akale Mulugu, Baba wa Nabwiya wehu Yesu Kiristu, Baba wa tangaranga eto Mulugu wenno unanilimbiha murima. 4Liye gunanilimbiha mirima mmakatamihoni mwatene munafwanyeya hiyo ira niwande alimbiha mirima atu amohiwa anafwanyeya na makatamiho ali matene na makalelo nnga Mulugu unanilimbiha liye hiyo.#1:4 Liye gunanilimbiha mirima mmakatamihoni… ira niwande alimbiha mirima atu amohiwa: Mazwala ananiwandela ira mutu akuma mmakatamihoni, aona makalelo amulimbihile Mulugu, inafwanela amuona nfwaye uli mmakatamihoni, amukwivele ira amulimbihe. 5Tchoira muwari mowenda na goyi dilukulu nnga dedo danna Kiristu, nihikana eto limbihiwa ulukulu mmirimani mwehu muwari mwa Kiristu.#1:5 limbihiwa ulukulu mmirimani mwehu: Limbihiwa okumela muwari mwa Kiristu unazela muwari mwa jengo jipanganne Yesu ira aavahe atwaye omuroromela. Tchoira Yesu ohopangana ira aavahe atu omunyindela yotambilra yewa yozela mabasa analaba atu tempu ili hiyo ila. (Matewuji 5:11-12, 6:4, 10:42) Nihikana eto yopangana ira atwaye anoza kakale na liye kala no kala nimburo napama wahali goyi. (Jowandeliwa 21:3-7) Jopangana jeji jinoalimbiha atu omuroromela Yesu muwari mwa makatamiho anafwanyeyana atu.
6Akala hiyo nnafwanyeya muwari mwa makatamiho, makatamiho ehu analaba ira nyo mulimbihiwe eto muvulusiwe.#1:6 makatamiho ehu… analaba ira nyo mulimbihiwe eto muvulusiwe: Pawulo muwari mwa mabasa alaba liye, ali ira aKorinto omuroromela Yesu kalimbihiwe eto kavulusiwe. Tchoira vulusiwa ukana makalelo madjindjene. Mutu avulusiwa unoleveleliwa jotega jaye. (Efezo 2:4-8) Eto vulusiwa ukana ndila yoira mutu unoza akale na Mulugu kala no kala. (Roma 5:9, 13:11; 1 Peduru 1:5) Ira mutu afiyede vulusiwa zela leveleliwa jotega jaye, unaroma laleyiwa na mutu nfwaye. Eto ira mutu afiyede vulusiwa zela dowa kala na Mulugu kala no kala, unaroma limbihiwa na nfwaye ira nroromelo naye nahawelele mundulri. Tchoira mutu awelela mundulri zela nroromelo naye, mutu wenno kavulusiwe eto kanavolowa muUmweneni mwa Mulugu. (Matewuji 10:22; Eberewu 3:6,14, 10:39) Eto Tiyagu 5:19-20 unowonga zela mulimbiha nfwawo ira avulusiwe vulusiwa wogomiheda. Eto akala hiyo nnafwanyeya muwari molimbihiwa, ili ira na nyenne mulimbihiwe. Limbihiwa wenyu munakana mwagavilenle muwari mwa goyi nnga dedo nnaona hiyo. 7Yodediha inna hiyo zela makalelo anafuna nyo goma ilive yolimbene#1:7 Yodediha inna hiyo zela makalelo anafuna nyo goma ilive yolimbene: Pawulo ohokana yodediheda ira aKorinto anagomela vulusiwa. tchoira hiyo nihiiziwa ira nyo mwaona goyi nnga nnaona hiyo, munoona eto limbihiwa na makalelo nnga nnalimbihiwa hiyo.
8Tchoira hiyo abalihu kannaukuwani ira nyo mwahaiziwe makatamiho madjindji naonne hiyo nagali porovinsiya ya Aziya. Nagali Aziya nohokana makatamiho ohokala a masika fiyeda hiyo gomeliwa, hiyo waheya, hakana kopolo, fiyeda funaga nnga nahakalewo wene. 9Hiyo so kumbanya wanna hiyo naumbuwela ira fendo ila mbwenye Mulugu ubanlre ira nikwe bahi. Eto fwanyeya ira jatene ejo jalaba ira nahavinyindele mbwenye nimunyindele Mulugu wenno unaavenyiha atu mokwani.#1:9 jatene ejo jalaba ira nahavinyindele mbwenye nimunyindele Mulugu: Muwari mwa karta ni, Pawulo unawonga fendo didjindji dene ira ora inavuta liye, unokala olimbene mwasiwa ukalawo unamukamiheda muwari movuta mwaye. Nione 2 Korinto 3:5, 4:8-10, 12:8-10. 10Liye ohonivunela muwari mwa ukwa wowopiha eto uneregeve nivunela. Hiyo nihikana yodediha muwari mwa liye ira uneregeve nivunela. 11Nnafuna na nyenne munikamihede muwari monilobelela vamohi na atu oindjiva ira atene ananilobelela kamutamalelege Mulugu na mwasa wa upama unafuna nifwanya na mwasa wa jolobela jewa.
Pawulo unawonga zela hagalala waye
12Hagalala wehu ku wu. Mmirimani mwehu muli mwapama mwene zela makalelo niwendile hiyo mwilamboni ya vati mohojingari, mwa ibaribari nnga Mulugu unafunela liye. Hiya wenda na zelru da ilambo ya vati, hiyo mbwenye niwendile muwari mwa sayi da Mulugu. Simbwasimbwa nagali vamohi na nyo, hiyo nawendave na makalelo mamohive apama anno. 13-14Tchoira hiyo kannalremba yengo hiya ejo jinawanda nyo ileri no onelramo. Sawasawa na makalelo amohive nnga muwandile nyo rumela vang'ono malambo a mundulrimu ibaribari zela hiyo, peno miyo nnafuna nnga muwande rumela mokwakwanela nnga vili hiyo ira siku na Yesu Nabwiya wehu naza nifiya, nyo muwande hagalala zela hiyo na makalelo nnga nnafuna hiyo hagalala zela nyo.#1:13-14 nnafuna nnga muwande rumela mokwakwanela nnga vili hiyo: Pawulo afuna aKorinto kakayena ibaribari zela liye na anamarumiwa afwaye ira ba atu orumiwa na Mulugu, hiya aona nnga atu a vaheno vene. Tchoira Pawulo ohoiziwa ira: <<Afwaga kahadione nnga yengo, aliwa eto kinakana makalelo owatchela mazu a Mulugu.>> Zela mazu oira muwande hagalala zela hiyo na makalelo nnga nnafuna hiyo hagalala zela nyo, hagalala wa Pawulo wafuna uze siku nnafuna za Nabwiya mwasiwa aKorinto ale kofiyeda mwezo ovulusiwa. Pawulo erege hagalala aaonaga aliwa eto awatchelaga yotambilra yaye na mwasa oalaleya aliwa. Eto akuda Korinto ale anerege kana hagalala zela vulusiwa wewa eto simbwasimbwa kamuonaga Pawulo wenno aalaleyile. Kalaga nnga jini namafundjiha ahagalalaga zela namafundja waye mamalelo wa yaka eto namafundja ahagalalaga zela namafundjihaye. Nione Filipo 2:16.
Pawulo ohowonga zela tchindja palano daye
15Miyo muwari mokana ibaribari zela eji, tcheniyo yadivahile miyo voroma vale funafuna za wa nyo ira muwande watchela upama muwari mopandiwa na miyo fendo mbinli. 16Miyo dohofuna ira dupandeni vadowa miyo Masedoniya. Eto diwelagawo, dohofuna nnga dupandeni fendo yowelela ira davenyagavo, dadowaga Judeya, na nyenne mudikamihede ulrendo wenno. Mbwenye ejo kajiireyile.#1:16 dohofuna nnga dupandeni fendo yowelela: Pawulo agamanle vwa na Timoteyo zela makalelo abure anna aKorinto, liye ohela zelru dotamanga dowa Korinto ira aone na meswaye jaireya wewo eto aasumulule atu oviringaniha. Amala afuna adowe Masedoniya. Amala adowe Korinto akoka. Va Pawulo unawonga ira: <<Dofuna>>, mwasiwa ali yofuna yaye. Mbwenye agadowile Korinto, agaonne makalelo kanna atu, ohokwiha zelru dowelelawo fendo yanembinli mwasiwa panda woroma waapandile liye kwawendile pama. (2 Korinto 2:1-2)
17Miyo difunaga irana jatene ejo kadairana muwari mowanganyeda. Tchoira miyo dasakanyedaga palano daga kannasakanyeda na makalelo nnga jinaira atu kawendaga na kopolo da maningo, aliwa wongaga: <<He, he.>> eto ora imohive aliwa umbuwelaga: <<Hehi, hehi.>> 18Sawasawa nnga Mulugu gororomeleya, mazu anawonga hiyo na nyo kahi mazu a <<He.>> na <<Hehi.>> ora imohive.#1:18 mazu anawonga hiyo na nyo kahi mazu a <<He.>> na <<Hehi.>> ora imohive: Pawulo unawonga na makalelo anna muwari moawandela aKorinto mwasiwa ahakwakwanelihedile liye nnga mwapanganne liye. Afuna dowa fendo mbinli mbwenye adowilewo fendo imohi bahi. Ira Pawulo ahawelelewo, kahi ira liye ere kala ngongomwa. So liye ohoona ira: <<Dawelelawo akoka tchineneva, kilivo yapama inafuna kumavo. Yapamiwa, dirome vuma, diyewo siku nimohi niwa.>> (2 Korinto 2:1-2)
19Tchoira miyo na Sila#1:19 Sila: Owu hehi Silivano. na Timoteyo nulaleyagani zela Yesu Kiristu Mwana Mulugu, laleya wehu kwaali laleya wa <<He.>> na <<Hehi.>>#1:19 kwaali laleya wa <<He.>> na <<Hehi.>>: Ku wonga laleya wa aPawulo kwaali laleya ira: <<Yesu unovulusa>>, amala liye wongaga ira: <<Hehi, malamulo bananivulusa>>, amala: <<Mariya gunavulusa>>, amala: <<Xamada djinavulusa>>, amala: <<Laba mabasa a igereja banavulusa.>> So aPawulo laleya wewa wali ira Yesu gunanivulusa bahi. Mbwenye muwari mwa Yesu, laleya wehu unafwanyeya wagali <<He.>> bahi. 20Tchoira mapangano matene a Mulugu muwari mwa Yesu ba mapangano a <<He.>>#1:20 mapangano matene a Mulugu muwari mwa Yesu ba mapangano a <<He>>: Tapulela mapangano matene a Mulugu anafwanya kagali okwakwanela muwari mwa Yesu. Kilivo yengo yapama Mulugu apanganne liye nivaha inaza muwari mwa mutu mmohiwa nnga Mariya owu Peduru owu Xaviyeri. Teto kilivo yapama inanifwanya muwari mwa tangaranga dehu owu upama wehu. So mbwenye upama watene unakumela muwari mwa Yesu Kiristu bahi. Nona niwongaga: <<Ame!>> muwari mwa Yesu ira Mulugu atitimihiwe.
21Eto uniimelihile hiyo vamohi na nyo muwari mwa Kiristu gu Mulugu. Liye gunihambihile na makura 22eto gunidindile na karimbu yaye eto gunivahile Munemba waye uli mmirimani mwehu ira akale ipanda ira nikayena ibaribari zela ja sogolro.#1:21-22 Wanle anamakuta nari amwene kasakulriwaga na Mulugu ira kalabe mabasa, kohambihiwa na makura. (Ezodu 29:21; 1 Samuweli 10:1, 16:13) Pawulo awongaga Mulugu… gunihambihile na makura ku wonga Mulugu ukana mabasa ira atwaye kahindege. Masiki Mulugu ampandutchaga Adawu na Eva voroma vene, kaapandutchile ira kagarati wene. Eto Mulugu anvahaga mutu ingumi ixa, kananvaha ira aire garati wene, mbwenye unonvaha ingumi ira alabege mabasa aye. Eto zela mazu oira Mulugu… gunidindile na karimbu yaye, mutu adindaga yengo ku wonga sinale ira yengwele tchaye. Ku wonga unalremba nzina naye ira atu atene kaiziwe ira: <<Yengwela tcha Udje.>> Pawulo unawonga ira Mulugu unomala nidinda hiyo ira angelro apama nari angelro abure nari Satana kaiziwe ira: <<Mutula kahi mutu wa vaheno vene. Gu mutu wa Mulugu.>> Eto zela mazu oira Mulugu… gunivahile Munemba waye uli mmirimani mwehu ira akale ipanda, ku wonga mutu awanda roromela ira: <<Munemba Otchena uli mmirimani mwaga eto unodikamiheda ira diiregena jinafuna Mulugu eto diidege jotega>>, zela mutu wenno, Munemba Otchena uli nnga ipanda yonvaha ibaribari ira: <<Vasogolro nnoza dikale na Mulugu.>>
Pawulo ohowonga mwasa ahadowele liye Korinto fendo yowelela
23Ira miyo dahawande za akoka sidadi ya Korinto wo, ali ira dahauzuzumiheni. Umboni unna miyo ira nnawonga ibaribari gu Mulugu. 24Mabasa analaba hiyo, kahi ira nitongege nroromelo nenyu, so mbwenye hiyo nnalaba vamohi na nyo ira muhagalale.#1:24 mabasa analaba hiyo, kahi ira nitongege nroromelo nenyu: Ahakale nnga aPawulo kawendaga nnga atu otonga nroromelo na aKorinto, kogodowa fendo yanembinli ira kaazuzumihe aKorinto muwari moatonga na kopolo. Pawulo mbwenye ohowonga ira: Miyo kannavenda joutongani eto kannavenda jouzuzumihani. So mbwenye hiyo nnalaba vamohi na nyo ira muhagalale. Tchoira nyo muli olimbene na mwasa wa nroromelo munna nyo.
Iliyochaguliwa sasa
2 Korinto 1: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral