Jekariya 4
4
Jiiki joyaɓi ki Joomiraawo holli Jekariya: yesirde fitillaaji e jaytuuje
1Ɓaawo mum, malaykaajo baddannooɗo am on wittoy to am, finnini hakkillo am, hande no ɗaaniiɗo finninirtee. 2Ɗon nun o ƴamimmi o wi'i: Ume nun ji'ataa ɗon? Go toontiimi bi'umi: Mi yi'an nun yesirde fitillaaji ne kanŋeeri, go to nebbam wattetee e yowaa dow yesirde fitillaaji nen. Dow to nebbam wattetee ɗon nun fitillaaji jeeɗiɗi yowaa, e ɓoggi mum jeeɗiɗi. 3Jaytuuje ɗiɗi e woni takkol to nebbam wattetee ɗon, gooti e woni far to nyaamo, gooti bo e woni far to nano. 4Go ƴamumi malaykaajo baddanɗo am on bi'umi: Joomiraawo, ume woni maana majjum? 5Go o ƴamimmi o wi'i: A annaa maana majjum? Go toontiimi bi'umi: Joomiraawo am, mi annaa. 6aƊon nun o tintinimmi maana majjum o wi'i:
10bFitillaaji jeeɗiɗi ɗin hollitan nun gite Joomiraawo daaruɗe ko waɗata der duuniyaaru fu. 11Go ƴamu moo mi kade bi'umi: Ume nun jaytuuje ɗiɗi gonuɗe wecco nyaamo e wecco nano yesirde fitillaaji ɗen hollitinta? 12Go ƴamu moo mi kade de ɗiɗawre bi'umi: Licce jaytuuje ɗiɗi, gonuɗe takkol ilinirɗum nebbam ɗum kanŋeeri, diga to nebbam ɓulata hande kanŋeeri, ume nun ɗum ɗon bo hollitinta? 13Go o ƴamimmi o wi'i: A annaa maana majjum? Go toontiimi bi'umi: Joomiraawo am, mi annaa. 14Ɗon nun o wi'immi: Ɗe kollitan nun himɓe ɗiɗo, suttaaɓe feere gam gollanaago Joomiraawo duuniyaaru fu.
Alkawal ŋal Alla waɗani Jorobabiila
6bMalaykaajo baddanɗo am on wi'immi mi yottina Jorobabiila haala kaa ɗo mi wi'a: Nani ɗo ka Joomiraawo Joom huune fu bati wi'i:
An Jorobabiila, e baawɗe maa bane,
e semme maa bo bane gaɗirtaa golle maa,
amma sey e baawɗe Ruuhu makko tan.
7Ume nun waanne mawne gonune yeeso Jorobabiila laatii?
Jorobabiila pusan ne ne fu butu.
Den o sutta der ɗon hayre yeere daɗɗirteene suudu Joomiraawo.
Den mum himɓe huuɓan kuuɓaali belɗum ɓerne ɓe bi'a:
Kay, hayre nen e wooɗi! E gooŋa, hayre nen e wooɗi!
8Joomiraawo baddimmi kade wi'i:
9Jorobabiila waɗii daɗɗa suudu Joomiraawo ŋol ɗoo,
o heennyitan bo maadi maggol.
To ɗum ɗon laatake, on annitan no Joomiraawo Joom huune fu nun lilimmi to mooɗon.
10aGam mum to on jawee golle puɗɗaaɗe baa to ɗee laatii panɗuɗe. On ceyoto to on ji'ii Jorobabiila e jogii mahirɗum gam mahugo suudu Joomiraawo ŋol.
Iliyochaguliwa sasa
Jekariya 4: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.