Jekariya 14
14
Konu cakitintooŋu e garki Joomiraawo
1Nyalaane Joomiraawo e wara.
Nyanne mum, onon himɓe *Urusaliima,
lenyi janani seenniran jawdi mon yeeso mon.
2Joomiraawo wi'i:
Mi hawritan lenyi fu wara yanta *Urusaliima.
Ɗi jaaloto ni,
ɗi teeta jawdi tawaani der cuuɗi mon.
Ɗi pukkodoo e rewɓe mon e semme.
Ɗi nanŋa feccere himɓe mon ɗi jawtina maccuŋaaku.
Amma ɗi accan horiiɓe mon kan e jooɗi e mayri.
3Ɓaawo mum Joomiraawo ummoto haɓa lenyi ɗin.
O haɓan ɗi hande no o woowiri haɓirgo der konu.
4Nyanne mum,
o daroto dow waanne jaytuuje
wonune lettugal *Urusaliima e daarontiri e mayri.
Waanne jaytuuje nen feccoto caka caka,
lowol wantoo caka mayre
diga lettugal faa gorgal.
Fecco wooto yaha far to soɓɓiire.
Fecco ɗiɗaɓo bo yaha far to hoore fuɗo.
5On tokkan e lowol ɓantiiŋol hakkune baalle ŋol oon dogga faa jahon Asali
gam ŋol yahan nun faa ton.
On doggan hande no kookiraaɓe mon doggirnoo
no leydi dimmii
wakkati Osiyaasi laamanii leydi Yahuuda.
Den Alla Joomiraawo am suppitinto
kanko e malaykaaɓe makko gollantooɓe mo.
6Nyanne mum, jayŋol waɗataa.
Peewol waɗataa, malamalluuje bo toɓataa.
7Nyalaane nen feereere, Joomiraawo tan nun anni ne.
Nyanne mum neɗɗo waawataa ko seenni jemma e nyalooma.
Baa to naaŋe yanii, jayŋol wonan nun.
8Nyanne mum,
siiɓiire diyam geetam wantoto der *Urusaliima.
Goɗɗam majjam ilira far to maayo lamɗam,
goɗɗam majjam bo ilira far to maayo Mediterane.
Ɗam ilan dunŋu e ceeɗu fu.
9Nyanne mum Joomiraawo laamanto duuniyaaru fu.
Kanko tan laatotoo Joomiraawo.
Inne makko tan nun himɓe noddata.
10Leydi nin fu wartan jayri,
diga Geba far to soɓɓiire
faa wanŋarde Rimmon wonune hoore fuɗo *Urusaliima.
*Urusaliima waɗan inne.
Ni wonan diga dammugal
bi'eteeŋal dammugal Benyamin
faa yottoo dammugal bi'eteeŋal dammugal soɓɓunu
to dammugal kiinŋal ŋal tawanoo.
Ni wonoo bo diga suudu deenirgol genni bi'eteeŋol Hananeyel
faa yottoo ɓiɗɗirɗe innabooje laamiiɗo.
11Wanŋarde *Urusaliima nen halkataake kade,
himɓe jooɗoto der mayre e deƴƴere.
12Nani ɗo boneeji
ɗi Joomiraawo accata tawa himɓe lenyi
ummanoytooɗi *Urusaliima fu konu:
Ɓalli maɓɓe nyolan diga ɓe maayay,
gite maɓɓe nyolan der to ɗe tiggii ton,
ɗelle maɓɓe nyolan der kunnuɗe maɓɓe.
13Nyanne mum,
Joomiraawo accan jiɓayeere mawne tawa ɓe.
Den ɓe ummontira,
moy fu yanta e fiya banniraawo mum.
14Himɓe Yahuuda walliran himɓe *Urusaliima hawre.
Ɓe ɓottan jawdi leyɗe takkiiɗe ɗon fu.
Ɓe ɓotta kanŋeeri, e cardi, e kolte ɗuuɗɗe.
15Boneeji iri ɗii ɗon tawan mareefuuji wayɓe *Urusaliima ɓen fu,
diga pucci maɓɓe, e alfadariije maɓɓe,
e jeeloobi maɓɓe, e babbi maɓɓe, faa e mareefuuji maɓɓe koriiɗi der hoɗorde maɓɓe fu.
16Diga nyanne mum,
sey waruɓe haɓi *Urusaliima horiiɓe mum fuɗɗa e yaha *Urusaliima duuɓol fu,
gam sujidanoygo laamiiɗo,
laatiiɗo Joomiraawo Joom huune fu,
e gam nyaamoygo juulɗe bukaaji.
17Der lenyi duuniyaaru,
caliiŋol yahugo *Urusaliima sujidanaa laamiiɗo laatiiɗo Joomiraawo Joom huune fu,
yoone toɓataa e leydi mum.
18To himɓe Misira salake yahugo *Urusaliima nyaamaa juulɗe bukaaji, yoone toɓataa der leydi maɓɓe.
Bone nee ɗon nun tawata lenyi caliiɗi yahugo nyaamaa juulɗe bukaaji ɗen.
19Loocol ŋol ɗon nun fiyata Misira e lenyi caliiɗi yahugo *Urusaliima gam nyaamoygo juulɗe bukaaji ɗen fu.
20Nyanne mum, ɗum winnan baa e lenŋuruuji pucci ɗum wi'a:
Ko suttaa feere gam Joomiraawo.
Paanɗe suudu Joomiraawo laatoto ceniiɗe hande keeɗe miccirɗe ƴiiƴam
desaaɗe takkol hiisirde.
21Paanɗe tawaaɗe *Urusaliima,
e der Yahuuda fu suttete feere gam Joomiraawo Joom huune fu.
Waruɓe waɗugo kiiseteeɗi fu ettan ɗe e defira tew.
Nyanne mum, tenkuujo gom tawataake kade der suudu Joomiraawo Joom huune fu.
Iliyochaguliwa sasa
Jekariya 14: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.