Matiye 4

Seyɗan jarbake Yeesu

(Marku 1:12-13, Luka 4:1-13)

1Ɓaawo majjum, Ruuhu Ceniiɗo yaari Yeesu der ladde yorne gam Ibiliisa jarboo mo. 2O suumii nyaloomaaje lasoy ɗiɗi (40) e jemmaaje lasoy ɗiɗi (40). Den, rafo waɗi mo. 3Ɗon Jarbotooɗo on ɓattii mo, wi'i: «To a laati nun Ɓiɗɗo Alla, batu kaaƴe ɗee ɗo waylitoo peen.»

4Yeesu toontii mo, wi'i: «E winnaa der dewtere: "Neɗɗo wuurirtaa e peen tan, amma e haala burtiika diga hunnuko Alla fu#4:4 Ekkitinooje 8:3."»

5Ibiliisa yaari mo wanŋarde seniine, ɓili mo dow suudu Alla to ɓuri towugo. 6Den o wi'i mo:

«To a laati nun Ɓiɗɗo Alla, fittu diga ɗo koɗaa ley,

gam e winnaa der dewtere,

Alla batan malaykaaɓe mum ɓe taɓɓe e juuɗe maɓɓe

gam to koyɗe maa ferga kaaƴe#4:6 Jabuura 91:11-12.»

7Yeesu toontii mo, wi'i: «Dewtere wi'i kade: "Taa jarba Alla Joomiraawo maa".»

8Ibiliisa yaari mo kade dow waanne towune puy. O holli mo laamaareeji duuniyaaru fu e tedduŋal majji. 9Den o wi'i mo: «Mi hokkete ɗum ɗo fu, to a jiccake cujidanɗaa am.»

10Yeesu toontii mo, wi'i: «Dillu diga ɗon, an Ibiliisa, gam e winnaa der dewtere:

"Sujidan Alla Joomiraawo maaɗa, teddinaa mo kanko tan!"» 11Den Ibiliisa acci mo, go malaykaaɓe wari e jagganoo mo.

Yeesu waajake der leydi Galili

(Marku 1:14-15, Luka 4:14-15)

12No Yeesu nani Yuhaana gaɗoowo *batisi nanŋaama, wattaa der kasu, o witti leydi Galili. 13O wittoy leydi Galili, o eggi Nasaratu, o jooɗoy Kafarnahum, takkol maayo Galili, hakkune jeyde leydi Jabulon e Nefutali. 14Hande non haala ka annabi Esaaya batunoo hebbiri. Nani ɗo ka o batunoo, o wi'i:

15"Leydi Jabulon e leydi Nefutali,

onon jooɗiiɓe takkol gooruwol Urudun,

Galili, an laatiini jooɗorde himɓe ɓe lenyi janani,

16himɓe tawaaɓe der niwre,

yi'ii jayŋol manŋol.

Jooɗiiɓe e leydi maayde, niɓɓuni,

jayŋol yaynanii ɓe#4:15-16 Esaaya 8:23-9:1."

17Diga wakkati majjum, Yeesu fuɗɗi waajaago e wi'a: «Tuubee, gam Laamaare Alla ɓattake.»

Aahiiɓe Yeesu arandeeɓe

(Marku 1:16-20, Luka 5:1-11)

18No Yeesu woosotoo takkol maayo Galili, o yi'i suuɓotooɓe liƴƴi ɗiɗo e faɗɗa taaruuji mum der maayo. Kamɓe woni, Simon, noddeteeɗo Piyer, e miiraawo mum Andere. 19Yeesu wi'i ɓe: «Tokkee am, mi waɗan on suuɓotooɓe himɓe.»

20Ɗon maa ɗon ɓe acci taaruuji maɓɓe, ɓe tokki mo. 21O yahi yeeso, o yi'i rimdaaɓe ɗiɗo der laana diyam, Yaakuuba e miiraawo mum Yuhaana, ɓiɓɓe Jebede. Kamɓe e baaba maɓɓe, ɓee moƴƴina taaruuji maɓɓe. O noddi ɓe. 22Ɗon maa ɗon, ɓe acci laana ŋan e baaba maɓɓe, ɓe tokki mo.

Yeesu e waajoo, e nyawta himɓe

(Luka 6:17-19)

23Yeesu woositii leydi Galili fu. Oo janŋina der cuuɗi baajorɗi, oo waajoo *linjiila dow Laamaare Alla, oo nyawta himɓe ɓe nyawuuji feere feere toorata. 24Habaru makko sankitii der leydi Siriya fu. Ɓee gaddana mo nyawɓe nyawuuji feere feere, hande joon ɓe ginnaaji toorata, e yanooɓe paɗɗe, e moofiɗinɓe, o nyawti ɓe ɓe fu. 25Jama'aare ɗuunne e tokki mo. Ɓe ƴiway maa diga leydi Galili, e ɓaadeere Genniije Sappo, e *Urusaliima, e Yahudiya, e fonŋo gooruwol Urudun.

Iliyochaguliwa sasa

Matiye 4: BFB

Kuonyesha

Shirikisha

Nakili