Matiye 27

Yeesu yaaraama to Pilaatu

(Marku 15:1, Luka 23:1-2, Yuhaana 18:28-32)

1Subaka kecco, hooreeɓe *liimaamiiɓe, e *dottiiɓe fu, hawritii e dawra dow no ɓe barirta Yeesu. 2Ɓe kaɓɓi mo, ɓe jaari to Pilaatu, hooreejo jeyde leydi Yahudiya.

Maayde Yahuuda Isikariyotu

(Golle Lilaaɓe 1:18-19)

3No Yahuuda jammiiɗo Yeesu yi'i o hiitaama o waree, o miijitii, o wittini ceede cardi laso e sappo ɗe o jaɓunoo to hooreeɓe *liimaamiiɓe, e *dottiiɓe, 4o wi'i ɓe: «Mi waɗii hakke, mi jammake mo walaa gacce!» Ɓe toontii mo, ɓe bi'i: «Ko faalii men? Haala maa nun ɗon!» 5Yahuuda woppi ceede ɗen der suudu Alla, yahi haɓɓitoyi ɓoggol, maayi. 6Hooreeɓe *liimaamiiɓe etti ceede ɗen, wi'i: «Sariya meeɗen hokkay laawol ceede hande ɗee ɗo hawritee e ceede cakkanaaɗe Alla der suudu Alla, gam ceede ƴiiƴam nun.»

7Ɓaawo dawriine maɓɓe, ɓe nannantiri, ɓe etti ceede ɗen, ɓe coodiri gesa mahoowo paanɗe gom, gam hoɓɓe e uwee ton. 8Kanjum acci faa hanne, gesa ŋan e noddee ‹Gesa Ƴiiƴam›. 9Hande non annabaaku Yeremiya hebbiri, ŋu o waɗunoo, o wi'i: «Ɓe ettii ceede cardi laso e sappo, kanje nun himɓe Isira'iila tawi o foti yoɓaneego. 10Ɓe coodirii ɗe gesa mahoowo paanɗe, hande no Joomiraawo batirnoo am#27:9-10 Jekariya 11:12-13, Yeremiya 19:1-13, 32:6-15.»

Yeesu yeeso Pilaatu

(Marku 15:2-20, Luka 23:1-4,13-25, Yuhaana 18:28–19:16)

11Ɓe jaari Yeesu yeeso Pilaatu hooreejo leydi, o ƴami mo, o wi'i: «An woni laamiiɗo *Yahuduuɓe na?» Yeesu toontii mo wi'i: «A batii ka.» 12Den hooreeɓe *liimaamiiɓe, e *dottiiɓe gaccii mo, amma o toontaaki gokka. 13Go Pilaatu wi'i mo: «A nanataa gacce ɗe ɓe gaccete na?» 14Amma Yeesu toontaaki gokka mum. Ɗum haaynii hooreejo leydi on sanne.

Yeesu hiitaama waree

(Marku 15:6-15, Luka 23:13-25, Yuhaana 18:39–19:16)

15Der Juulɗe *Paska fu, hooreejo leydi e woowi yoofugo maɓɓaaɗo gooto, mo himɓe yiɗi. 16Wakkati mum, e woodunoo maɓɓaaɗo annanaaɗo, bi'eteeɗo Yeesu Barabbasi. 17No jama'aare hawti, Pilaatu ƴami ɓe, wi'i: «Moy jiɗuɗon mi yoofana on: Yeesu Barabbasi na, naa Yeesu bi'eteeɗo *Almasiihu?» 18Pilaatu e anni sabbu nawniraagu nun waɗi ɓe nanŋi Yeesu ɓe gaddi to mum. 19Wakkati Pilaatu jooɗii e hiitoo, debbo mum lili goɗɗo, wi'a mo: «Taa naannu hoore maa der haala gorko mo walaa gacce oo, gam hanki mi toorake der koyɗool dow haala makko.»

20Hooreeɓe *liimaamiiɓe, e *dottiiɓe yeeƴi jama'aare, ɓe ƴama Pilaatu yoofana ɓe Barabbasi, acca Yeesu waree. 21Hooreejo leydi on ƴamitii ɓe, wi'i: «Mi yoofanan on maɓɓaaɗo gooto. Moy nun der ɗiɗo ɓen jiɗuɗon mi yoofana on?» Ɓe toontii, ɓe bi'i: «Barabbasi!» 22Pilaatu ƴami ɓe, wi'i: «Den, noy gaɗanmi Yeesu bi'eteeɗo *Almasiihu?» Ɓe fu ɓe toontii, ɓe bi'i: «Tiggu mo dow leggal palaaŋal!» 23O ƴami ɓe, o wi'i: «Kalluɗum ɗume o waɗi?» Ɓe ɓeydi woolo e semme, ɓee bi'a: «Tiggu mo dow leggal palaaŋal!» 24Pilaatu tawi waawataa ko deƴƴitini ɓe, woolo bo e ɓeydoo. Den o etti diyam, o looti juuɗe makko yeeso jama'aare, o wi'i ɓe: «Mi walaa gacce dow reƴƴitingo ƴiiƴam gorko on. Haala mooɗon nun ɗon.» 25Ɓe fu ɓe toontii, ɓe bi'i: «Men jaɓii gacce ƴiiƴam makko yowoo dow ko'e amen, e dow ɓiɓɓe amen!» 26Den, Pilaatu yoofitani ɓe Barabbasi, o hokki laawol Yeesu fiyee looci, ɓaawo mum, o tiggee dow leggal palaaŋal.

Soogeeji jaancii Yeesu

(Marku 15:16-20, Luka 23:11, Yuhaana 19:2-3)

27Soogeeji hooreejo leydi yaari Yeesu der fageere laamorde mum, ukkere soogeeji ɗin fu hawti e tummi mo. 28Ɓe ɓorti gineeji makko, ɓe ɓornini mo gulunfaare woɗeere#27:28 Wakkati Yeesu, laamiiɓe nun ɓornoto gulunfaare woɗeere.. 29Ɓaawo majjum, ɓe canyi huuneere gi'e, ɓe kuunini mo. Ɓe kokki mo helliiru e juunŋo makko nyaamo, ɓee jiccoo yeeso makko, ɓee jaanca mo, ɓee bi'a: «Foofo maa, laamiiɗo *Yahuduuɓe!»

30Ɓe tuuti mo joode, ɓe teeti helliiru ŋol, ɓe piyiri mo dow hoore. 31No ɓe keennyi jaancugo mo, ɓe ɓorti gulunfaare nen, ɓe ɓornini mo gineeji makko. Den, ɓe jaari mo ɓe tiggaa dow leggal palaaŋal.

Yeesu tiggaama dow leggal palaaŋal

(Marku 15:21-32, Luka 23:26-43, Yuhaana 19:17-27)

32No ɓe burtoto siire, ɓe potti e gorko bi'eteeɗo Simon mo Sirene. Soogeeji dooli mo o roonoo leggal Yeesu palaaŋal. 33Ɓe jottii nokkuure wi'eteene Golgota. Maana Golgota woni (nokkuure le'al hoore). 34Ɓe kokki Yeesu innabojam jillontiraaɗam e kaaɗuɗum, o yara. No o metti ɗam, o salii yarugo.

35No ɓe keennyi tiggugo mo, ɓe piɗani gineeji makko tete, ɓe ceenniri ɗi. 36Ɓaawo majjum, ɓe jooɗii ɗon, ɓee deeni mo. 37Ɓe binni dow alluwal daliila ko acci o tiggaa, ɓe takki dow hoore makko. Go ɓe binni woni: ‹Oo ɗo woni Yeesu, laamiiɗo *Yahuduuɓe.› 38Pasotooɓe ɗiɗo gom bo e tiggaa takkol makko, gooto far to nyaamo makko, gooto bo far to nano makko.

39Himɓe falotooɓe ɗon e yenna mo, e dimma ko'e mum, 40e wi'a: «An pusoowo suudu Alla, mahitoo ŋol der balɗe tati, faaba hoore maa. To a laati nun Ɓiɗɗo Alla, jippa diga e leggal palaaŋal ŋal!»

41Hande non nun, hooreeɓe *liimaamiiɓe, e moodiɓɓe tawreeta, e *dottiiɓe fu jaanciri mo, e wi'a: 42«O faabake woɓɓe, amma o waaway ko faabii hoore makko, kanko laamiiɗo Isira'iila. Jooni, o jippoo diga leggal palaaŋal ŋal, gam goonɗinen mo. 43O hoolake Alla. To non Alla faaboo mo jooni, to oo yiɗi mo. Gam o wi'i, o laati nun Ɓiɗɗo Alla.»

44Pasotooɓe, tiggaaɓe takkol makko bo e yenna mo hande non.

Yeesu maayii

(Marku 15:33-41, Luka 23:44-49, Yuhaana 19:28-30)

45Diga caka nyalooma, niwre waɗi e leydi nin fu, faa yottii yanne tati kiikiiɗe. 46Jaka yanne tati kiikiiɗe, Yeesu halɓi e semme, wi'i: «Eli, Eli, lama sabaktani?» Kan woni ‹Alla am, Alla am! Gam ume accuɗaa am?› 47Der dariiɓe ɗon, woɓɓe mum no nani ka, wi'i: «Oo nodda Eliya!» 48Ɗon maa ɗon, gooto maɓɓe doggi waddoy soosuuji, suuwi ɗi der jaram lammuɗam, haɓɓi e sawru, ɓattini to hunnuko Yeesu gam o musina. 49Den horiiɓe wi'i: «Munyen, daaren naa Eliya waran faaboo mo.» 50Ɓaawo majjum, Yeesu halɓi e semme, o maayi.

51Wakkati mum, wudere wirniraane der suudu Alla serkitii caka caka, diga dow faa ley. Leydi dimmii, tepaaje feccii, 52janaale maɓɓitii, seniiɓe ɗuuɓɓe maayunooɓe finti. 53Ɓe burtii e janaale. Ɓaawo mum, Yeesu finti, ɓe naatidi der *Urusaliima wanŋarde seniine, himɓe ɗuuɓɓe yi'i ɓe.

54Hooreejo soogeeji deenuɗo Yeesu, e soogeeji mum, yi'i dimmaaɗe leydi e ko waɗi fu. Ɓe kuli sanne, ɓe bi'i: «E gooŋa, o laati nun Ɓiɗɗo Alla!» 55Rewɓe ɗuuɓɓe e tawaa ɗon e daara diga woɗɗi, kamɓe nun tokkoynoo mo diga Galili, ɓee jagganoo mo. 56Mariyama mo Magadala, e Mariyama inna Yaakuuba e Yusufu, e inna ɓiɓɓe Jebede na'on caka maɓɓe.

Yeesu uwaama

(Marku 15:42-47, Luka 23:50-56, Yuhaana 19:38-42)

57No kiikiiɗe waɗi, gorko joom jawdiijo gom, mo siire Arimatiya, wari. Oo wi'ee Yusufu, kanko bo o laati nun aahiijo Yeesu. 58O yahi to Pilaatu, o eeli mo ɓannu Yeesu. Den, Pilaatu wi'i o hokkee ŋol. 59Yusufu etti ɓannu ŋol, suddi ŋol wudere heyre, 60o watti ɓannu ŋol der yanaane heyre ne o wasani hoore makko der hayre. Ɓaawo mum, o talli hayre mawne, o maɓɓiri dammugal yanaane nen, o yawti. 61Mariyama Magadalaajo, e Mariyama oo too, e tawaa ɗon, e jooɗi e daari far to yanaane nen.

Soogeeji e reeni yanaane Yeesu

62Fini mum laatii nyalaane tokkune nyalaane ne siri nyalaane siwteteene waɗetee. Den hooreeɓe *Liimaamiiɓe e *Farisaaɓe hawritii yahi to Pilaatu. 63Ɓe bi'i mo: «Joomiraawo, men ciwtorii pewoowo on batiino diga e wuuri, wi'i, fintan nyalaane tatawre. 64Gam majjum, batu soogeeji reena yanaane nen faa balɗe tati ɗen yawta. Gam to aahiiɓe makko wujju ɓannu makko, wi'a, o fintii diga maayde. Den fewre sakitiineere nen ɓuran arandeere hallugo.» 65Pilaatu wi'i ɓe: «Soogeeji nani, jahee, deenee yanaane nen no baawirɗon!»

66Ɓe jahi, ɓe deenoy yanaane nen. Ɓe talli hayre, ɓe maɓɓi faa wooɗi, ɓe darini soogeeji gam reena ne.

Iliyochaguliwa sasa

Matiye 27: BFB

Kuonyesha

Shirikisha

Nakili